1 Adanshi a̱ A̱sulazuva a̱ ta̱wa̱ ta̱ ya̱'a̱ va̱, 2 <<Mawun ma vuma, Vu yuwan yitele a̱vu vu yuwan adanshi e iroci a̱ tyo o u'wa wa Isra'ila. 3 Damma le, <Apa ili i na A̱sulazuva Zagbain dammai, a̱ba̱jini a̱ a̱a̱kuru ne evelu o ucira, na ashi'in a̱bunda̱ o uga'an aza a na a̱ ri na̱ mini koko'o, a̱ ta̱wa̱ diga Lebanon a̱vu u kaɓa aci o uɗanga wa sida. 4 A̱vu wu kuɗa eten a na a̱ ri ɗe a̱ ncilecile, a̱vu u tara a̱ tyo e iɗa ya aza a atsulu na awina. A̱vu waru u shuwa̱ yi a̱ lyuci ya aza a atsulu na awina. 5 U tara ta̱ cu'un vi iɗa'a a̱vu u cu'wa̱n yi e iɗa yu umili. A̱vu u zuwa yi uba̱ta̱ u na u ri na̱ mini a̱bunda̱. 6 Cu'u'un vu uta̱ ta̱ a̱vu u bala e iɗa yo o'wo ataci, a̱vu eten a̱ yi a vadala a̱ ka̱mba̱ uba̱ta̱ wa̱ a̱a̱kuru'u, aralu a̱ yi lo uba̱ta̱ u na a̱ shuwa̱ niyi. Ɗaɗa wo o'woi ataci reve u bala eten, reve u yuwan a̱vu'un.> >> 7 << <Agba a yuwan ta̱ a̱a̱kuru a gbain o ro za na da̱na̱i ne evelu o ucira oɓolo na ashi'in a̱bunda̱. Reve gba ataci'i u lyungu aralu a̱ yi a̱ tyo uba̱ta̱ wa̱ a̱a̱kuru'u diga uba̱ta̱ u na a̱ shuwa̱ niyi reve wu ba̱ruwa̱ eten a̱ yi a̱ tyo uba̱ta̱ wa̱ yi adama u tsura̱ mini. 8 A̱ cu'wa̱n yi ta̱ a̱ ma̱bula̱ ma sa'ani uba̱ta̱ u na u ri na̱ mini ma̱ a̱bunda̱, adama u bala eten, u matsan muwun a̱vu wo o'wo ataci a̱ a̱ɓula̱.> >> 9 <<Damma le, <Apa ili i na A̱sulazuva Zagbain dammai, ataci a ina̱bi a nda a̱ ta̱ da̱na̱ wuma? Woo rono aralu a̱ yi a̱vu u koɗo muwun ma̱ yi shi, adama u kpanla, tsa̱ra̱ waru ototopi a kpanla? Waa ciga ukere wu ucira ko ama a̱bunda̱ a na oo rono yi diga aralu a̱ yi shi. 10 Ko na̱ a̱ shi a̱ shuwisa̱ yi, u ta la'a? Waa kpanla suru suru shi nu upepu wa asana u lapa yi, waa kpanla uba̱ta̱ u na u kungwai shi?> >> 11 Ɗaɗa adanshi a̱ A̱sulazuva a̱ ta̱wa̱i uba̱ta̱ u va̱, 12 <<Vu damma u'wa wa aciyogbamu, <A̱vu vu reve ili i na ili i nda waa dansa shi?> Vu damma le, <Mogono ma Babila ma̱ 'ya̱wa̱ ta̱ Urishelima, reve u tara mogono ma̱ yi oɓolo na azagbain a̱ yi a̱vu a̱ ta̱wa̱ ne ele Babila. 13 Reve u tara vuma ro a̱tsuma̱ o u'wa u tsugono reve u yuwan akucunu na̱ a̱yi. Reve u zuwa yi u tara akucunu. Reve waru u tara azagbain e iɗa'a, 14 tsa̱ra̱ a̱ ka̱mba̱to tsugono e iɗa. Waa gura 'yon waru shi, adama a na ni itoni i wila̱ u ɗa goon tsugono tso ndolo tsee isawan. 15 Agba a̱vu vuma'a u 'ya̱sa̱a̱n yi aci a na u lyunguyi ajiya a̱ tyo Masar, adama a ca yi ido na̱ a̱soja a̱ a̱bunda̱. U ta lyuwa aci? Vuma na yuwain ili i nda u ta la'a? Nu u kuɗa akucunu u ta la'a?> >> 16 Amayun, na̱ n ri wuma, ne ɗa A̱sulazuva Zagbain dammai. U ta̱ kuwa̱ a̱tsuma̱ a Babila, e iɗa i mogono za na zuwa niyi o ootogu o tsugono, za na u ronoi akucunu a̱ yi e iɗa, za na u kuɗai nzuwulai ma̱ yi. 17 Firi'awuna na̱ a̱soja o ucira a̱ yi a̱ da̱na̱ ni ikambi shi a mantsa ma na o ɓolotoi a̱jili a na aa kumba adama o uvon. Reve a yuwan atsura adama o una wuma wa ama na̱ a̱bunda̱. 18 Vuma'a u rono ta̱ nzuwulai e iɗa o una̱ u na u kuɗai akucunu. A̱yi ɗa nda ne ekere a̱ yi a ɗa u yuwain nzuwulai n na wa̱a̱ kuru akucunu, na̱ ne suru ne ɗa u yuwain ili suru. Adama o ndolo waa la'a shi. 19 << <Adama o ndolo apa ili i na A̱sulazuva Zagbain dammai, amayun na̱ n ri wuma, n te ge'eto yi adama a akucunu a̱ va̱ a na u ronoi e iɗa, na̱ nzuwulai n va̱ n na u kuɗai. 20 N ta vari igolo i va̱, a̱vu n reme yi a̱tsuma̱ a yakuru va̱. N ta̱ ta̱wa̱to yi a̱tsuma̱ a Babila a̱vu n ge'eto yi adama a na u yuwaan mu a̱ɓula̱ shi. 21 A̱soja a na a la'a gurai uvon suru a̱ to una le na̱ matsun me pe'eni, reve a baza aza a na a buwai ba̱ta̱ ba̱ta̱.> >> Tsundolo tsa ɗa yee reve a na a̱mu A̱sulazuva ɗa a dammai ne. 22 << <Apa ili i na A̱sulazuva Zagbain dammai, a̱mu aciya̱va̱ n to foɗo ototopi e eten a̱ ncilecile n na n ri zuva vu uɗanga wa sida na ri uga'an, a̱vu n shuwa̱ yi. N to foɗo za ta̱ a̱tsuma̱ o ototopi e eten a na a̱ ri a aci e le, a̱vu n shuwa̱ yi a̱ a̱ba̱jini a agaɗi a na a̱ ri uga'an. 23 Zuva masasan ma Isra'ila ma ɗa ma̱a̱ shuwa̱ yi. U ta yuwan eten reve waru u matsan muwun, a̱vu wo o'wo sida va̱ a̱ɓula̱. Nnunu icu'un icu'un n ta̱ da̱nu ɗe, a̱ ta̱ tsura̱ uba̱ta̱ wu nden o ululu wa eten a̱ yi. 24 Suru ɗanga va atsusa te reve a na a̱mu A̱sulazuva n to oco ɗanga vu uga'an a̱vu n zuwa okoɗi a ɗanga a kungwa uga'an. N tsu zuwa ta̱ ɗanga va̱ a̱vu'un e 'yewe, a̱vu waru n zuwa ɗanga na 'yewei topo a̱vu'un. A̱mu A̱sulazuva a̱mu ɗa n yuwain adanshi, waru n ta yuwan yi.> >>