1 Adanshi A̱sulazuva a̱ ta̱wa̱ ta̱ ya̱'a̱ va̱: 2 <<Mawun ma vuma yuwan adanshi e ikaka ya̱ A̱sula̱ vu damma, apa ili i na A̱sulazuva Zagbain dammai, <Shoyin reve yoo oruwo,> <A̱tsuma̱lima̱ a cina tsu ta̱ adama o urana u ndolo!> >> 3 Adama a na urana u rawa ta̱ zuzu, urana wa̱ A̱sulazuva u rawa ta̱ zuzu, urana we eleshe, mantsa mo ukototosu adama a nɗa. 4 Matsun me pe'eni ma̱ ta̱ riya̱a̱ Masar, waru a̱tsuma̱lima̱ a̱ ta̱ da̱na̱ a̱tsuma̱ a̱ Kush. Mantsa ma na aza a na o unai a̱ riya̱i a̱tsuma̱ a Masar, a̱ ta̱ pura̱ utsuru wa̱ yi, waru o to ɓuɓoso ikyun ya̱ yi. 5 <<Kush na̱ Fut na̱ Lud na̱ Araba suru, na̱ Libiya, na ama e iɗa ya akucunu o to kototo le na̱ matsun me pe'eni.>> 6 Apa nda ili i na A̱sulazuva a dammai, <<Aza a na o ɓoloi aci na̱ Masar a̱ ta̱ riya̱, waru ucira u na waa yuwusaan uvaɗu u to koto. Diga Megido a̱ tyo Siyene o to kototo le a̱tsuma̱ a̱ yi na̱ matsun me pe'eni,>> A̱sulazuva Zagbain ɗa dammai ne. 7 O to o'wo okongo a̱tsuma̱ a nɗa n na n ri okongo. Waru ilyuci i gbain i le i to o'wo a̱tsuma̱ e ilyuci i gbain i na i ri ofoli. 8 Ne ɗa ee reve a na a̱mu ɗa A̱sulazuva, mantsa ma na n gba'atowoyi Masar akina, waru suru a̱za̱ e ikambi ya̱ yi a minjira le ta̱.

9 <<O urana u ndolo ta̱ lyungu nlingata a̱tsuma̱ a wantsun babu urevu a̱vu wu da'wanto ama a̱ Kush a̱tsuma̱ a̱ nden n lafiya. Waru a̱tsuma̱lima̱ a̱ ta̱ ta̱wa̱ le o urana u na oo kototo Masar. Amayun a ɗa u ta̱ ta̱wa̱.

10 <<Apa ili i na A̱sulazuva Zagbain dammai, <N ta zuwa a̱bunda̱ a Masar o koto e ekere a Nebukanaza mogono ma Babila. 11 A̱yi na̱ a̱soja a̱ yi, aza a na a la'ai iwuya a̱tsuma̱ a nɗa, a̱ ta̱ ta̱wa̱ nu ukototosu a̱tsuma̱ e iɗa. A ta tala mutsun mu pe'eni n le a aci a Masar reve o shiton iɗa'a na̱ a̱kwa̱kwa̱. 12 N ta̱ 'yeweto Uɗolu wa̱ Nilu waru n ta wina iɗa'a a̱ tyo e ekere aza a mayan me iwuya. N ta̱ ta̱wa̱ nu ukototosu e iɗa'a ni ili i na i ri a̱tsuma̱ a̱ yi suru, e ekere o mocin.> A̱mu A̱sulazuva a ɗa a dammai.

13 <<Apa ili i na A̱sulazuva Zagbain dammai, n to kototo a̱ma̱li, n ta̱ gba a zuwa utyo wa̱ a̱ma̱li a̱tsuma̱ a Memfis. A̱a̱ da̱shi tsura̱ mogono a̱tsuma̱ e iɗa ya Masar shi, n ta zuwa wovon a̱tsuma̱ e iɗa ya Masar. 14 N ta zuwa Paturo wo o'wo okongo waru m gba'atowo lyuci va̱ Zowan akina waru n ta ca lyuci va Tebe oforo. 15 N ta̱ tsun upan wu usuɗuwu u va̱ a aci a Felusiyum, uɓaɓu wu ucira wa Masar, waru n to kototo ama a Tebe. 16 N ta gba'atowo Masar akina. Felusiyum ta̱ sowo a̱tsuma̱lima̱ lon. A̱ ta̱ rukutsa̱ Tebe, waru n'yuwatan n ta yuwan nla̱ngi na̱ Memfis urana ma̱ɓula̱. 17 Olobo a̱ lyuci gbain va Heliyofolis na aza a Bubastis a̱ ta̱ kuwa̱ na̱ matsun me pe'eni, waru a̱ma̱ci e le a ta uwa tsugbashi. 18 Urana u ta yuwan irumbu a̱ lyuci va Takifanke mantsa ma na n kuɗai ucira wa Masar ɗe uba̱ta̱'a̱. Ucira u na wa yuwusaan uvaɗu na̱ a̱yi u to koto. A ta pupala yi ne eleshe, waru esheli a̱ yi a ta uwa tsugbashi. 19 Ne ɗa maa ca Masar oforo, waru e te reve a na a̱mu ɗa A̱sulazuva.>>

20 O urana we cindere o woto wu ufaru a a'wan a kupa na̱ za ta̱, adanshi A̱sulazuva a̱ ta̱wa̱ ta̱ ya̱'a̱, 21 <<Mawun ma vuma n kuɗa ta̱ ukere wa Firi'awuna mogono ma Masar. Waru a̱yi ɗa nda a̱ nla̱ yi ukere adama u ka̱mba̱ gbaga shi ko a̱ nla̱ yi a na waa gbama hali u gura ɓana matsun me pe'eni shi. 22 Adama o ndolo apa ili i na A̱sulazuva Zagbain dammai, n ta yuwan nla̱ngi na̱ Firi'awuna mogono ma Masar. N ta kukuɗa ekere a̱ yi, suru ukere u gbaga na̱ za na a̱ shi a kuɗai, waru n ta zuwa matsun me pe'eni ma̱ riya̱ diga o ukere wa̱ yi. 23 N ta̱ bete'we ama a Masar a̱tsuma̱ a nɗa, a̱vu m bete'we le n nɗa mu uvaɗi. 24 N ta gbamoto ekere o mogono ma Babila waru n zuwa matsun me pe'eni ma̱ va̱ e ekere a̱ yi. Amma n ta kukuɗa ekere a Firi'awuna, waru u ta yuwan ma̱nga̱ a̱ ma̱ka̱ka̱n ma̱ yi, ma̱nga̱ mo ukwa̱ u vuma na a amotoin. 25 N ta gbamato ekere o mogono ma Babila, amma ekere a Firi'awuna a̱ ta̱ kuwa̱. Waru ne ɗa ee reve a na a̱mu ɗa A̱sulazuva, mantsa ma na n zuwai matsun me pe'eni ma̱ va̱ e ekere o mogono ma Babila waru u ta̱ buba̱ruwa̱ yi u yuwan nla̱ngi ni iɗa ya Masar. 26 Waru n te bete'we aza a Masar a̱tsuma̱ a nɗa, reve m bete'we le a nɗa mu uvaɗi ma̱ɓula̱. Ne ɗa ee reve a na a̱mu ɗa A̱sulazuva.>>