1 Reve u damma mu, <<Mawun ma vuma, tama ili i na ve enei suru. Tama aatagada o ukutsuluwu a nda, a̱vu vu 'ya̱wa̱ vu yuwan adanshi nu u'wa wa Isra'ila.>>✝ 2 Ɗaɗa m kpa̱tu'wa̱i una̱ u va̱, a̱vu u ca mu aatagada'a n tama. 3 Reve u damma mu, <<Mawun ma vuma, tama aatagada o ukutsuluwu a nda a na maa casu wu vu shiton a̱a̱tsuma̱ a̱ wu na̱ a̱yi.>> Ɗaɗa n tama niyi, a̱vu u yuwan peme tsi ishiki o una̱ u va. 4 Reve u damma mu, <<Mawun ma vuma, 'ya̱wa̱ o u'wa wa Isra'ila a̱vu vu yuwaan le adanshi a̱ va̱. 5 Adama a na a̱ lyungu wu uba̱ta̱ wa ama a na a̱ ri na adanshi ko'o ne elentsu a na a̱ ri usa̱n u na vaa gura reve shi, agba o u'wa wa Isra'ila, 6 ko uba̱ta̱ wa ama a̱ a̱bunda̱ a na a̱ ri na adanshi ko'o ne elentsu a na a̱ ri usa̱n, za na vaa gura reve idanshi e le shi. Amayun na̱ n shi lyungu wu ya̱'a̱ le, a̱ shi to o poloo wu atsuvu. 7 Amma u'wa wa Isra'ila woo poloo wu atsuvu shi, adama a na a̱ ri na aɗa a na oo poloo mu atsuvu shi. Adama a na u'wa wa Isra'ila suru a̱ ta̱ na aciyogbamu no okolo ugbamu. 8 Uwwa nda, n zuwa wu ta̱ na aciyogbamu tse ele, okolo a̱ wu waru ugbamu tse le. 9 N ta zuwa cin va̱ wu vo o'wo ugbamu tsa̱ a̱ta̱mba̱. She vu uwwa wovon u le ko vu da'wan wan, ko a na wo o'woi ele a̱za̱ o u'ya̱susa̱n wu ugbozu u ɗa.>> 10 Reve waru u damma mu, <<Mawun ma vuma, vu polo atsuvu ulobonu vu zuwa idanshi i na maa damma wu o okolo a̱ wu. 11 Reve vu 'ya̱wa̱ uba̱ta̱ wa ama a̱ wu aza a na a̱ pura̱i nu uvon, a̱vu vu damma le, <Apa nda ili i na A̱sulazuva Zagbain dammai,> ko a uwwa wu ko a 'yuwan a uwwa.>> 12 Ɗaɗa Ruhu 'ya̱sa̱n numu zuva, reve mu uwwa mesun a̱ ma̱gugwa̱ a̱ca̱pa̱ a̱ va̱: Lyawa tsugbain tsa̱ A̱sulazuva tso o'wo na aba'un uba̱ta̱ wu nda̱na̱ta̱ ma̱ yi! 13 Mesun me evelu me ili i wuma i ɗaɗa a̱ nju'wula̱i, na̱ mesun ma̱ a̱ga̱nda̱mu e eɓele e le a̱ ma̱gugwa̱. 14 Reve Ruhu'u u 'ya̱sa̱n mu a̱vu u tara mu a̱ ka̱ra̱. Reve n ka̱ra̱ na̱ a̱tsumola̱ngu nu upan a̱ ruhu va̱, nu ukere wu ucira wa̱ A̱sulazuva a aci a̱ va̱. 15 Reve n ta̱wa̱ uba̱ta̱ wa aza a na a̱ pura̱i a na a̱ ri nden Tel Abib zuzu nu Uɗolu wa Keba. Reve n da̱nu ne ele ɗe uba̱ta̱ u na a̱ shi nden. N da̱nu ta̱ ne ele rana cindere n reve ili i na maa yuwan shi. 16 O ukosu wu rana cindere'e, reve adanshi a̱ A̱sulazuva a̱ ta̱wa̱ ya̱'a̱ va̱, 17 <<Mawun ma vuma, n zuwa wu ta̱ vo o'wo za vi ipiri vu u'wa wa Isra'ila. Mantsa ma na suru vu uwwai adanshi diga o una̱ u va̱, reve vu ronoo mu ele atsuvu. 18 Nna̱ n damma za vi iwuya, <Na amayun vu ta̱ kuwa̱,> a̱vu gba vu rono yi atsuvu shi. Waru vu yuwan adanshi adama vu zuwa yi u bula̱ iwuya ya̱ yi shi, adama vu wawa wuma wa̱ yi, za vi iwuya ndolo ta̱ kuwa̱ adama o unusu wa̱ yi. Agba n te ece mpasa ma̱ yi e ekere a̱ wu. 19 Amma na̱ vu rono za vi iwuya'a atsuvu, agba u vadala o ure wi iwuya ya̱ yi shi, ko e re vi iwuya va̱ yi shi, u ta̱ kuwa̱ adama o unusu wa̱ yi. Amma a̱vu vu wawa ta̱ wuma wa̱ wu. 20 Waru na̱ vuma va̱ a̱ɓula̱ vadala u lyawa a̱ɓula̱ a̱ yi, a̱vu gba u yuwan ili i na i ri mejege shi, reve n zuwa ili yu uta̱ɗatsusa̱ elime a̱ yi, u ta̱ kuwa̱. Adama a na vu rono niyi atsuvu shi, u ta̱ kuwa̱ adama o unusu wa̱ yi. Agba aa cuwan ni ili ya̱ a̱ɓula̱ i na u yuwain shi. Agba n te ece mpasa ma̱ yi e ekere a̱ wu. 21 Agba na̱ vu rono za va̱ a̱ɓula̱ atsuvu she u yuwan unusu wan, a̱vu gba u kuɗa̱ a yuwan unusu, na amayun u ta̱ da̱na̱ wuma, adama a na wu uwwai morono ma atsuvu, a̱vu waru vu wawa ta̱ wuma wa̱ wu.>> 22 Reve ukere wa̱ A̱sulazuva u ta̱wa̱ ya̱'a̱ va̱ lo uba̱ta̱'a̱, a̱vu u damma mu, <<'Yon vu ka̱ra̱ a̱ tyo a agalaci, ɗe ɗa maa yuwan adanshi na̱ a̱vu.>> 23 Ɗaɗa n 'yoyin a̱vu n ka̱ra̱ a̱ tyo a agalaci'i. A̱vu gba a̱yi ɗa nda tsugbain tsa̱ A̱sulazuva mishin lo, tsa tsugbain tsa na me enei a̱ nge'en mu Uɗolu wa Keba. Reve n riya̱ ma̱kpa̱ɓa̱. 24 Reve Ruhu'u u uwa a̱tsuma̱ a̱ va̱, a̱vu u 'ya̱sa̱n mu mishin. A̱vu u yuwan adanshi na̱ a̱mu u damma, <<Wala, vu ɓa̱ru aciya̱wu a̱tsuma̱ o u'wa wa̱ wu. 25 Waru a̱vu mawun ma vuma, a̱ ta̱ nla̱ wu na amunga. A̱ ta̱ nla̱ wu adama vu uta̱ uba̱ta̱ wa ama wan. 26 A̱mu gba n ta zuwa eelentsu a̱ wu a sura zuva vu una̱ wo gon va̱ wu, adama vu gura yuwan adanshi wan. Waru vu gura ɓara le wan, adama a na ele u'wa wu u'ya̱susa̱n wu ugbozu u ɗa. 27 Amma a mantsa ma na maa yuwan adanshi na̱ a̱vu n ta̱ kpa̱tu'wa̱ una̱ wa̱ wu, reve vu damma le, <Apa ili i na A̱sulazuva Zagbain dammai.> Za na suru aa uwwa, lyawa wu uwwa. Za na waru aa 'yuwan a uwwa, lyawa u 'yuwan, adama a na ele u'wa wu u'ya̱susa̱n wu ugbozu u ɗa.>>