1 Reve adanshi a̱ A̱sulazuva a̱ ta̱wa̱ ya̱'a̱ va̱, 2 <<Mawun ma vuma, zuwa urewesu wa̱ wu a̱ ka̱lyuwusa̱ nsasan ma Isra'ila, reve vu yuwan adanshi e ili i na yaa fara a aci e le. 3 Vu damma, <A̱ɗu nsasan ma Isra'ila, uwwai adanshi a Zagbain A̱sulazuva. Apa ili i na Zagbain A̱sulazuva a dammai nsasan na agaɗi, na̱ muka̱ri na̱ ka̱ri, uwwai nda, n ta̱ ta̱wa̱shi nɗu na̱ matsun me pe'eni, waru n to kototo a̱'isa̱ a̱ ɗu. 4 O to ɓoso musa'a n ɗu musa'a ma̱ a̱tsuka̱ n ɗu waru o to ɓoso. Waru n ta vari ama a̱ ɗu a na a paɗai a̱ ma̱ka̱ka̱n ma̱ a̱ma̱li a̱ ɗu. 5 N to voton a̱kwa̱kwa̱ a aza a Isra'ila a̱ ma̱ka̱ka̱n ma̱ a̱ma̱li e le. Reve m baza etele a̱ ɗu a̱ ka̱nda̱ruwa̱ musa'a n ɗu. 6 Uba̱ta̱ u na i ri nden suru, a̱ ta̱ rukutsa̱ ilyuci'i reve waru o ɓoso a̱'isa̱ a̱ ɗu. Ne ɗa musa'a n ɗu moo oco waru o o'wo okongo. A ta kuɗa a̱ma̱li a̱ ɗu reve o ɓoso le, a̱vu oo oco musa'a ma̱ a̱tsuka̱ a̱ ma̱guru ma̱ ɗu e iɗa. Ili i na i yuwain suru a ta tawa le. 7 Aza a na a paɗai o to oco e memere ma̱ ɗu, a̱vu i reve a na a̱mu ɗa A̱sulazuva. 8 Agba suru na̱ ne, n ta lyawa akapi. Akapi a̱ ɗu a ta la'a matsun me pe'eni a mantsa ma na e bete'we nɗu a̱tsuma̱ a ama na̱ nɗa. 9 Reve aza a na a la'ai a̱tsuma̱ a̱ ɗu a cuwan na̱ a̱mu a̱tsuma̱ a nɗa n na a̱ pura̱ nle a̱ tyo, cine a̱tsuma̱ a̱ la̱nga̱ numu no okolo a tsushakala tse le a na a lyawa numu, ne esu e le, a na a̱ ri a maluwa ma̱ a̱ma̱li ma̱ le. A ta uwwa tsugya tsa aciyele adama e iwuya i na a yuwain na adama e ili yi idaba i na a yuwain suru. 10 A̱vu e reve a na a̱mu ɗa A̱sulazuva, pere ɗa n dammai n ta̱ ta̱wa̱a̱ le na̱ a̱tsuma̱lima̱ a nda shi.> >> 11 << <Apa ili i na A̱sulazuva Zagbain dammai, ɓasa ekere a̱ wu reve vu dasa anana a̱ wu, a̱vu vo oruwo adama e iwuya yi idaba yu u'wa wa Isra'ila. Adama a na a̱ ta̱ kuwa̱ a matsun me pe'eni, na ambulu na̱ mɓa̱la̱ waru. 12 Za na ri alanga u ta̱ kuwa̱ na̱ mɓa̱la̱'a̱, za na gba ri zuzu u ta̱ kuwa̱ a matsun me pe'eni. Waru za na gba la'ai a lyawa niyi u ta̱ kuwa̱ na ambulu. Ne ɗa maa zuwa upan u va̱ u koto a aci e le. 13 A̱vu i reve a na a̱mu ɗa A̱sulazuva. Na ama e le o von ukwa̱ oɓolo na̱ a̱ma̱li e le uka̱nda̱ruwu na̱ musa'a n le, a agaɗi o uga'an suru waru na̱ zuva vu nsasan suru, na̱ za̱la̱ vu uɗanga u na u ri nu ululu suru nu uɗanga u oku u na u ri na̱ a̱vu'un suru, uba̱ta̱ u na a cayi a̱ma̱li e le suru aturare a̱ ma̱guru. 14 Reve mu ba̱ruwa̱ ukere u va̱ a aci e le n ka̱mbuwa̱ iɗa'a ofoli o okongo, diga a̱tsumona a Dibila, uba̱ta̱ a̱ nden n le suru. Ɗaɗa ee reve a na a̱mu ɗa A̱sulazuva.> >>