1 Reve u ɗe a atsuvu a̱ va̱ u damma, <<Ta̱wa̱i na aza a na aa ca ge'eto lyuci'i oforo zuzu, koyan le ni itana yu ukototosu o ukere wa̱ yi.>> 2 Reve gba ama a̱ ta̱li a uwa nu una̱ntsu wa zuva u na wa̱a̱ ka̱lyuwusa̱ ugana koyan ɗa ni itana yu ukototosu o ukere wa̱ yi. Vuma ro na ri wotowu na̱ a̱tugu o okoro shi to oɓolo ne ele, uwo'owu nu uzuwata wi ili yi iɗana e eɓele a̱ yi. Suru nle a uwa ta̱ a̱vu e isawan zuzu na̱ masa'a ma̱ rumushili. 3 Reve tsugbain tsa̱ A̱sula̱ a Isra'ila tsa̱ ka̱ra̱ a gawan zuva diga zuva vi ikerobobi uba̱ta̱ u na u shi nden. Reve u ka̱ra̱ a̱ tyo o una̱ntsu wa̱ A̱a̱'isamapaɗa'a. Reve A̱sulazuva e ɗe vuma na shi wotowu na̱ a̱tugu o okoro'o za na shi nu uzuwata wi ili yi iɗana e eɓele. 4 Reve A̱sulazuva a damma yi, <<Uta̱la̱i a̱tsuma̱ a̱ lyuci gbai'in, lyuci va̱ Urishelima, a̱vu vu zuwa urotsu e icin ya aza a na a̱ ri a̱ ma̱nga̱ na̱ mesun adama e ili yi idaba i na a yuwain pe a̱ lyuci'i.>> 5 A atsuvu a̱ va̱ reve u damma ama a nda, <<Kuru niyi o uta̱la̱i lyuci gbai'in i ga̱la̱, she ye ene iliyali ko i roco isa'ani wan. 6 Yu una mbara no olobo ne esheli na̱ a̱ma̱ci na̱ muwun n kekeꞌen, amma she i ju'wa̱n aza a na a̱ ri nu urotsu wan. I fara a̱ a̱a̱'isa̱ a̱ va̱.>> Ɗaɗa a farai na̱ mbara n na n ri elime o u'wa'a. 7 Reve u damma le, <<Lungusa̱i A̱a̱'isamapaɗa'a, i shiton ukowo'o na̱ a̱kwa̱kwa̱. Walai!>> Ɗaɗa o uta̱i, reve a uwa mona ma ama a̱tsuma̱ a̱ lyuci'i. 8 Ele a̱tsuma̱ a̱ mona reve a lyawa mu a̱ nde'en, a̱vu n von ma̱kpa̱ɓa̱, a̱vu n sala, <<A̱sulazuva Zagbain! Vu to kototo akapi a aza a Isra'ila suru a̱tsuma̱ o upan u na va̱a̱ tsusa̱n Urishelima?>> 9 Reve u usu mu, <<Unusu wu u'wa wa Isra'ila na̱ Yahuda u ka̱ra̱la̱i ta̱ wira̱. Iɗa'a i shiwan ta̱ na̱ mpasa, lyuci gbai'in waru u shiwan ta̱ nu ulambu u mayan u mejege. Adama a na a damma ta̱, <A̱sulazuva a lyawa ta̱ iɗa'a, wee inda shi.> 10 O una̱ u va̱ gba, mee ene iliyali i le shi ko n lyawa le shi, amma n ta tsupa le adama e ili i na a yuwain.>> 11 Reve vuma na ri wotowu na̱ a̱tugu o okoro'o za na ri nu uzuwata wi ili yi iɗana e eɓele a̱ yi u ta̱wa̱ na adanshi, a na, <<N yuwan ta̱ ili i na vu zuwai.>>