1 O urana wa kupa ne ejere, o woto wa kupa, a aa'wan a kupa, adanshi A̱sulazuva a̱ ta̱wa̱ ta̱ ya̱'a̱ va̱: 2 <<Mawun ma vuma, zuwa urewesu wa̱ wu nla̱ngi na̱ Firi'awuna mogono ma Masar, vu yuwan adanshi e ikaka ya̱ A̱sula̱ a aci a̱ yi na a aci a Masar suru.>> 3 Yuwan adanshi na̱ a̱yi vu damma, <<Apa ili i na A̱sulazuva Zagbain dammai, <Ka̱lyuwa̱ n ta yuwusan nla̱ngi na̱ a̱vu Firi'awuna mogono ma Masar, a̱vu a̱ba̱jini a̱ a̱dodo za na ri nven e memere ma̱ Nilu.> >> Vu damma ta̱, <<Uɗolu wa̱ Nilu za va̱ ɗa, n yuwan yi ta̱ adama a aciya̱va̱.>> 4 Amma n ta zuwa gon e etele o una̱ wa̱ wu, reve n zuwa mugula mu uɗolu a̱ wu a kaɓa a̱ a̱ka̱ɓa̱ wu. Waru n ta̱ ronu wu o uta̱ diga a̱tsuma̱ a̱ mini ma̱ wu, na̱ mugula n na suru mu kaɓa nuwu a̱ a̱ka̱ɓa̱. 5 N ta̱ vari wu a̱tsumona, a̱vu na̱ mugula n na n ri o uɗolu wa̱ wu suru. Vu ta̱ riya̱ a atsusa, waru oo ɓoloto wu ko a̱ ciɗo wu shi. N ta̱ ka̱mbuwa̱ wu ilyalya yi inama yu una yu uvaɗi ni ilyalya yi nnunu ma zuva. 6 Ne ɗa suru aza a na a̱ ri na̱ nden Masar e reve a na a̱mu ɗa A̱sulazuva. <<Adama o ndolo yo o'wo ta̱ aɗanga a apumpu adama o u'wa wa Isra'ila. 7 Mantsa ma na e reme nuwu ne ekere e le, reve vu kukuɗa waru vu kakara avangaci e le. Mantsa ma na a raɓato nuwu, vu tsu kukuɗa ta̱ reve vu zuwa ucina̱ u le u yuwan usa̱n lon.

8 <<Adama o ndolo apa ili i na A̱sulazuva Zagbain dammai: N ta̱ ta̱wa̱ na̱ matsun me pe'eni n yuwan nla̱ngi na̱ a̱vu, reve wu una ama a̱ wu ni iliyamunga e le. 9 Waru iɗa ya Masar u to o'wo ofoli babu ili.>> Ne ɗa ee reve a na a̱mu ɗa A̱sulazuva. Adama a na vu damma ta̱, <<Uɗolu wa̱ Nilu za va̱ ɗa, waru a̱mu ɗa n yuwan niyi.>> 10 Adama o ndolo n ta yuwusan nla̱ngi na̱ a̱vu na̱ ɗolu va̱ wu, waru n ta̱ ka̱mbuwa̱ iɗa ya Masar okongo waru ofoli suru suru, diga Megido a̱ tyo Siyene, hali a cina ukosu wa̱ Kush. 11 Babu anana a vuma a na oo uta̱la̱i pe, waru babu anana a nama na voo uta̱la̱i pe. Waru babu za na a̱a̱ da̱nu pe hali a'wan amunga. 12 N ta̱ ka̱mbuwa̱ iɗa ya Masar okongo a̱tsuma̱ a nɗa n na n ri okongo, waru ilyuci i gbain ya̱ yi i to o'wo okongo a'wan amunga a̱tsuma̱ e i lyuci i na i ri okongo. Waru n ta̱ bete'we aza a Masar a̱tsuma̱ a nɗa. Ee, ta̱ bete'we le a̱tsuma̱ a nɗa mu uvaɗi.

13 << <Suru na̱ ne apa ili i na A̱sulazuva Zagbain dammai, a cina ukosu wa a'wan amunga n to ɓoloto aza a Masar diga a̱tsuma̱ a nɗa n na a̱ shi e bete'we nle. 14 N ta̱ ka̱mbuwa̱a̱ Masar nu utsuru wa̱ yi, waru n ka̱mbuwa̱ ama a̱ yi e iɗa ya Paturo, iɗa yu umatsun i le. Waru ɗe ɗa oo o'wo o tsugono tsa babu ucira. 15 U to o'wo tsugono tsa na tsa la'ai uka̱la̱mu, waru wa̱a̱ da̱shi 'ya̱sa̱n aciya̱yi zuva vu nɗa shi. N ta jiba yi ucira suru suru cine waa gura yuwan tsugono a aci a nɗa shi. 16 Masar a̱a̱ da̱shi o'wo ili i na aza a Isra'ila aa zuwaa ucira shi, amma u to o'wo ili yu ucuwusan adama o unusu u le cine a vadaluwa niyi adama e izami yi ikambi. Ne ɗa ee reve a na a̱mu ɗa A̱sulazuva Zagbain.> >>

17 O urana wu ufaru, o woto wu ufaru, a a'wan ushin na̱ a̱za̱ e cindere, adanshi A̱sulazuva a̱ ta̱wa̱ ta̱ ya̱'a̱ va̱: 18 <<Mawun ma vuma, Nebukanaza mogono Babila ma̱ 'ya̱sa̱n ta̱ a̱soja nu ucira a yuwan nla̱ngi na̱ Taya. Aci suru o kporo ta̱ waru nlyungu suru a yuwan ta̱ antsu. Na̱ ne suru a̱yi na a̱soja a̱ yi a̱ tsura̱ uda̱shiyi diga uba̱ta̱ a̱ nla̱ngi na̱ Taya shi. 19 Adama o ndolo apa ili i na A̱sulazuva Zagbain dammai, n ta ca Masar ya Nebukanaza mogono ma Babila, waru u ta̱ pura̱ utsuru u le. U ta̱ pura̱ reve u usa ili i na a̱ ri na̱ a̱yi adama u tsupa a̱soja a̱ yi. 20 N ca yi ta̱ iɗa ya Masar o una̱ wa atsupu wu ulinga u na u yuwain, adama a na a̱yi na̱ a̱soja a̱yi a yuwaan mu ta̱ ulinga. A̱mu A̱sulazuva Zagbain ɗa dammai.

21 <<O urana u ndolo n ta zuwa aavana o uta̱ adama o u'wa wa Isra'ila, waru n ta̱ ka̱tsu'wa̱ una̱ wa̱ wu e memere ma̱ le. Ne ɗa ee reve a na a̱mu ɗa A̱sulazuva.>>