1 Ana n ka̱lyuwa̱i, reve me ene oroci o ootogu o tsugono a atali e ikebe na a̱ tsu ɗe safaya zuva vi ili i na i ri wuba̱ruwu a aci nan kerobobi'i. 2 Reve A̱sulazuva a damma vuma na ri wotowu na̱ a̱tugu o okoro'o, <<Uwa pe e memere ma̱ a̱ga̱nda̱mu za̱la̱ nan kerobobi'i. Vu shiton ekere a̱ wu na akinkina a madala a na a̱ ri e memere me kerobobi'i, a̱vu vu kusha'wa le zuva lyuci'i.>> A̱vu u uwa pe a̱mu a̱ a̱ka̱nla̱. 3 Nan kerobobi'i a̱ shi ta̱ mishin upasu wu uyagi a̱tsuma̱ a̱ A̱a̱'isamapaɗa'a a mantsa ma na vuma'a u uwai pe, reve eleshe o shiton ukowo wa̱ a̱tsuma̱. 4 Reve tsugbain tsa̱ A̱sulazuva tsa̱ 'yon diga zuva nan kerobobi'i, a̱vu u ka̱ra̱ a̱ tyo o una̱ntsu wa̱ A̱a̱'isamapaɗa'a. Eleshe'e o shiton ta̱ A̱a̱'isamapaɗa'a, a̱vu ukowo'o u shiwan ne ekan a tsugbain tsa̱ A̱sulazuva. 5 Reve a uwwa mesun me evelu ma nan kerobobi'i hali ɗe o ukowo wa alanga'a tsu uɗyo wa̱ A̱sula̱ Mogono me Ili Suru a mantsa ma na waa yuwusan adanshi. 6 Ana A̱sulazuva a zuwai vuma na ri wotowu na̱ a̱tugu o okoro a na, <<Kene akina diga e memere ma̱ a̱ga̱nda̱mu'u, e memere ma nan kerobobi'i.>> Reve vuma'a u uwa pe reve wi isawan zuzu na̱ a̱a̱ga̱nda̱mu a̱ ta̱. 7 Reve kerobi ta̱ canana ukere wa̱ yi a̱vu u kene akinkina a na a̱ ri na akina a̱tsuma̱ a akina a na a̱ ri a madala e memere ma nan kerobobi. A̱vu u tsun akinkina'a o ukere u vuma na ri wotowu na̱ a̱tugu o okoro'o. A̱vu vuma'a u tara le a̱vu u ka̱ra̱ o uta̱. 8 Nan kerobobi'i a̱ ta̱ no oroci o ukere u vuma za̱la̱ ve evelu e le. 9 A̱vu n ka̱lyuwa̱, reve me ene a̱ga̱nda̱mu a̱ na̱shi zuzu na̱ nan kerobobi'i, za ta̱ suru zuzu na̱ kerobi ta̱. A̱ga̱nda̱mu'u a maɗatsasa cine vu revei atali e ikebe a na a̱ tsu ɗe beril. 10 Suru nle o rotsuloi ta̱, a̱a̱ga̱nda̱mu na̱ a̱a̱ga̱nda̱mu o ro a̱ vuta̱la̱sa̱ a̱tsuma̱ a̱ yi. 11 A mantsa ma na aa wala a tsu saɓa ta̱ upasu u na biti nan kerobobi'i a saɓa a pasu na̱shi'i suru, agba aa vadala lipu le shi. A tsu wala ta̱ mejege a̱ tyo upasu u na biti aaci a saɓai, babu vadala ele a mmalu. 12 Lipu le suru na̱ cina̱ le ne ekere e le, oɓolo ne evelu e le na̱ a̱ga̱nda̱mu a̱ na̱shi e le a̱ ta̱ ne esu uba̱ta̱ biti. 13 Ele a̱ga̱nda̱mu'u mu uwwa ta̱ e ɗesu le, <<a̱ga̱nda̱mu a na a̱a̱ vuta̱la̱sa̱ tsa̱ lipa̱.>> 14 Kerobi ta̱ suru ta̱ na̱ urewesu na̱shi. Urewesu u ta̱ wu za kerobi, za ve ire waru wu za vuma, za va ta'atsu waru urewesu wu kamu, urewesu wa̱ na̱shi wu za va̱ a̱kuru. 15 Reve nan kerobobi'i a gawan zuva. Ele ɗa ili i wuma i na me enei a̱ nge'en mu Uɗolu ma̱ Keba. 16 Mantsa ma na suru nan kerobobi'i a walai, a̱ga̱nda̱mu a na a̱ ri e eɓele e le a tsu wala ta̱. A mantsa ma na waru a̱ 'ya̱sa̱in evelu e le a na a gawan diga o uvaɗi, a̱ga̱nda̱mu'u a tsu lyawa eɓele e le shi. 17 Mantsa ma na nan kerobobi'i e isawain kuci, ele fo a tsu isawan ta̱ kuci. Waru a mantsa ma na a gawain ele fo a tsu gawan ta̱ oɓolo ne ele, adama a na ruhu vi ili wuma'a u ta̱ a̱tsuma̱ e le. 18 Reve tsugbain tsa̱ A̱sulazuva tso uta̱ o una̱ntsu wa̱ A̱a̱'isamapaɗa'a, a̱vu wi isawan zuva nan kerobobi'i. 19 E esu a̱ va̱ reve nan kerobobi'i a̱ ya̱sa̱n evelu e le reve a gawan zuva diga e iɗa na̱ a̱ga̱nda̱mu'u e eɓele e le. Reve e isawan o una̱ntsu wa asana wu u'wa wa̱ A̱sulazuva, reve tsugbain tsa̱ A̱sula̱ a Isra'ila tsa̱ da̱na̱ zuva le. 20 Ele nda ele ɗa ili i wuma i na̱shi i na me enei za̱la̱ va̱ A̱sula̱ a Isra'ila a̱ nge'en mu Uɗolu wa̱ Keba'a, a̱vu gba n reve a na ele nan kerobobi a ɗa. 21 Koyan suru ta̱ nu urewesu na̱shi ne evelu a̱ na̱shi, waru za̱la̱ ve evelu e le ili i ro i ta̱ pe cine vu revei ukere u vuma. 22 Adama o oroci o urewesu u le gba, o rotso ta̱ aza a na me enei a̱ nge'en mu Uɗolu wa̱ Keba. A̱vu koyan ɗa a̱tsuma̱ e le wala elime mejege.