1 A̱tsuma̱ a aa'wan a kupa na̱ a̱za̱ a̱ na̱shi a na a lyuwai Urishelima nu uvon, a aa'wan o ushin no ozo o ton a̱ nden n le e iɗa i tsugbashi, a̱tsuma̱ o woto wu ufaru o urana wa kupa, reve ukere wa̱ A̱sulazuva a̱ ju'wa̱n aci a̱ va̱ reve waru u 'ya̱wa̱to mu ɗe a̱ lyuci'i. 2 A̱tsuma̱ a alavu alavu, a̱vu A̱sula̱ a̱ 'ya̱wa̱to mu e iɗa ya Isra'ila, reve u da̱na̱to mu zuva masasan mo uga'an lon, uba̱ta̱ u na me enei uba̱ta̱ she damma lyuci ɗa upasu wu uyagi. 3 Ana u 'ya̱wa̱to numu ɗe, a̱vu me ene vuma ro za na urewesu wa̱ yi u da̱na̱i a madala she damma rumushili, uguzu na amunga o okoro na aɗanga o uritosu o ukere wa̱ yi. U da̱na̱ ta̱ mishin o una̱ntsu. 4 Reve vuma'a u damma mu, <<Mawun ma vuma, ka̱lyuwa̱ ne esu a̱ wu, reve vu polo atsuvu. Vu zuwa majiyan ma̱ wu uba̱ta̱ e ili i na moo roco wu suru. Adama a na adama o ndolo a ɗa a̱ ta̱wa̱to nuwu ta̱ pa tsa̱ra̱ o roco wu ele. A̱vu waru gba, vu cuɗuwa u'wa wa Isra'ila ili i na ve enei suru.>>

5 Me ene ta̱ a̱ba̱jini o ukari uka̱nda̱ruwu nu uba̱ta̱ wa̱ A̱a̱'isamapaɗa'a. Uga'an wa aaɗanga o uritosu a na a̱ ri o ukere u vuma'a u rawa ta̱ uga'an udasu kupa na akapi. U rito ta̱ ugba̱mu wu ukari'i udasu kupa na akapi waru uga'an wa̱ yi udasu kupa na akapi. 6 Reve u ka̱ra̱ u uwa nu una̱ntsu u na u ri na asana. Reve u kumba nu ukumbata reve u rito una̱ntsu'u na̱ a̱tsuma̱ udasu a̱ru'un kupa na akapi. 7 Musula̱ n da̱na̱ ta̱ pe uba̱ta̱ suru o una̱ntsu'u adama a̱ a̱za̱ e ipiri, uga'an u masula suru uritowu udasu kupa na akapi, washin wa̱ yi waru udasu kupa na akapi. Ure u na u ri e memere ma masula e eeɓele suru udasu kunla̱ ɗa na aɓaci a ta'atsu. Una̱ wu una̱ntsu u na u ri zuzu nu ukobu u na u ri o una̱ wa̱ A̱a̱'isamapaɗa'a a̱yi fo uritowu udasu kupa na akapi a ɗa. 8 Reve u rito ukobu u na u ri o una̱ntsu u na u ri uba̱ta̱ u ma'uwaa udasu kupa na akapi. 9 Waru u ta̱ a̱ru'un udasu kupa na̱ a̱za̱ a̱ na̱shi. U rito ta̱ ikyun yu una̱ntsu'u udasu uta'atsu na akapi. Ukobu u na u ri o una̱ntsu wa̱ A̱a̱'isa̱'a̱ u ta̱ ka̱lyuwusa̱ pe na̱ a̱tsuma̱. 10 Pe na̱ a̱tsuma̱ o una̱ntsu wa asana'a, asula a ta'atsu a̱ a̱za̱ e ipiri a̱ ta̱ pe e eeɓele suru. Mgbain n le suru una̱ta̱ u ɗa a̱ ri. Mishin mu nkyun n le fo una̱ta̱ u ɗa a̱ ri. 11 Reve u rito washin wu una̱ntsu'u, waru udasu kupa na̱ a̱za̱ e cindere a ɗa. Waru washin wu una̱ntsu'u a aciya̱yi udasu ushin ne ejere na̱ muɓaci n ta'atsu n ɗa. 12 Uɓaɓu u ta̱ lo elime a asula a̱ a̱za̱ e ipiri'i, waru washin u le eeɓele suru udasu u ta̱ na̱ muɓaci n ta'atsu n ɗa a̱ ri. Mgbain ma asula'a udasu kupa na akapi ɗa e eeɓele suru. 13 A̱vu u rito una̱ntsu'u diga o uɓaɓu nu ucina̱ e eeɓele a̱ ta̱ a asula a̱ a̱za̱ e ipiri'i a̱ tyo e eeɓele e ire o ucina̱ wa asula a̱ a̱za̱ e ipiri'i. Washin u le udasu amunga na aza a ta'atsu na aɓaci a ta'atsu a ɗa. 14 Waru u rito ta̱ elime e ikyun, udasu ukpaku kupa no ozo o ton (105) a ɗa. Waru agalaci a̱ ta̱ lo a na a̱ ka̱nda̱ruwa̱i ukobu u na u ri o una̱ wu una̱ntsu'u. 15 Elime o una̱ntsu u ma'uwaa a̱ tyo o ukosu wu ukobu'u u na u ri o u'uwata wu una̱ntsu'u udasu kupoton ɗa. 16 Ɓaɓu va̱ a̱tsuma̱ na alanga a asula va̱ a̱za̱ e ipiri'i suru a̱ ta̱ na̱ musowoto mu upepu wawa'a. Ne ɗa fo o ukobu'u u ta̱ na̱ musowoto mu upepu n wawa'a e eeɓele suru. A̱ nkyun waru o rono ta̱ lulu vu shuwa.

17 Reve u ta̱wa̱to mu o ukowo wa alanga. A̱vu me ene asula a̱tsuma̱ o uɓaɓu'u, a alanga waru ukowo u na a̱ ru'wa̱i elime a asula mata'atsu a̱ ta̱ lo. 18 Ura̱'a̱ u teme ta̱ diga e isula reve u ka̱ra̱ mejege a̱ tyo o una̱ntsu wu ukobu za na ri a̱ ka̱lyuwusa̱ pe na̱ a̱tsuma̱. A̱yi nda a̱yi ɗa ura̱'a̱ wa̱ za̱za̱la̱. 19 A̱vu u rito ukowo wa alanga u na u ri e memere mo una̱ntsu wa alanga nu una̱ntsu wa̱ a̱tsuma̱. Uritowu udasu ukpaku na̱ kupocindere no ozo o ton (175) a ɗa a̱ tyo asana nu upasu wu ugana waru.

20 A̱vu u rito washin wu una̱ntsu wu ugana oɓolo nu uga'an wa̱ yi u na u ri a̱ ka̱lyuwusa̱ alanga. 21 Una̱ntsu u nda fo u ta̱ na̱ musula̱ n ta'atsu va̱ a̱za̱ e ipiri upasu wu una̱ntsu pe na̱ a̱tsuma̱. Uritowu wi ikyun wu una̱ntsu'u nu ukobu wa̱ yi una̱ta̱ u ɗa a̱ ri nu una̱ntsu wu ufaru. Uga'an wa̱ yi uritowu kupakunla̱ na̱ a̱za̱ e cindere ɗa na̱ washin uritowu udasu amunga na aza a ta'atsu na akapi ɗa. 22 Mgbain vu sowoto vu upepu na̱ a̱za̱ o ukobu wu u'wa'a una̱ta̱ u ɗa a̱ ri waru o rono ta̱ ɗe lulu vu ɗanga dabino icu'un i ta̱ na aza a na a̱ ri o una̱ntsu u na wa̱ ka̱lyuwusa̱ asana. U ta̱ na̱ kumbata cindere a̱ tyo uba̱ta̱'a̱. Ukobu'u gba u ta̱ pe za̱la̱ a̱ ka̱lyuwusa̱ agalaci a̱ a̱a̱'isa̱'a̱. 23 Pa nda waru, upasu wu ugana, cine u ri nu una̱ntsu wa asana ne ɗa fo u ri. Ure u ta̱ lo na u kuruyi nu una̱ntsu'u a̱ tyo o ukowo wa̱ a̱tsuma̱. U rito ta̱ ukowo u na u ri e memere mo una̱ntsu wa̱ a̱tsuma̱ nu una̱ntsu wa alanga, udasu ukpaku na̱ kupocindere no ozo o ton (175) ɗa.

24 A̱vu u tara mu a̱ tyo o una̱ntsu wu upasu wu uyagi reve me ene una̱ntsu a̱ ka̱lyuwusa̱ uyagi. U rito ta̱ ikyun ya̱ yi nu ukobu wa̱ yi, mgbain n le una̱ta̱ u ɗa a̱ ri na akapi. 25 U ta̱ na̱ sowoto vu upepu u ka̱nda̱ruwu na asula a̱ yi suru nu ukobu wa̱ yi cine akapi'i a̱ ri. Uga'an wu una̱ntsu'u na̱ a̱tsuma̱ uritowu udasu kupakunla̱ na̱ a̱za̱ cindere na akapi ɗa na̱ washin uritowu amunga na aza a ta'atsu na̱ muɓaci n ta'atsu. 26 U ta̱ na̱ kumbata cindere a̱ tyo uba̱ta̱'a̱, ukobu wu u'wa'a gba u ta̱ pe pe. Reve o rono ɗe lulu vu ɗanga dabino e ikyun yu una̱ntsu'u, za ta̱ upasu u nda za ta̱ waru upasu u ndeɗe. 27 Pa nda waru, una̱ntsu u ta̱ lo o upasu wu uyagi o ukowo wa̱ a̱tsuma̱. U rito ta̱ agalaci a na a̱ ri e memere mo una̱ntsu wa̱ a̱tsuma̱ nu una̱ntsu wa alanga, waru uritowu udasu ukpaku na̱ kupocindere no ozo o ton (175) ɗa.

28 Reve waru u tara mu u toni na̱ a̱mu nu una̱ntsu wu uyagi a̱ tyo o ukowo wa̱ a̱tsuma̱. A̱vu u rito una̱ntsu wu uyagi'i. Mgbain ma̱ yi una̱ta̱ u ɗa u ri na akapi. 29 Pa nda fo, asula a̱ a̱za̱ e ipiri a̱ ta̱ pa ni ikyun yi na̱ntsu'u nu ukobu waru. Mgbain n le una̱ta̱ u ɗa a̱ ri na akapi. Waru asula'a a̱ ta̱ u ka̱nda̱ruwu na̱ sowoto vu upepu oɓolo nu ukobu wa̱ yi. Uga'an wu una̱ntsu'u pe na̱ a̱tsuma̱ uritowu udasu kupakunla̱ na̱ a̱za̱ e cindere na akapi ɗa na̱ washin uritowu udasu amunga na aza a ta'atsu na akapi. 30 Ukobu u ta̱ lo o una̱ntsu'u, za na uga'an wa̱ yi uritowu udasu kupa na̱ a̱za̱ a̱ na̱shi ɗa na̱ washin udasu amunga na aza a ta'atsu na aɓaci. 31 Ukobu u ta̱ lo o una̱ntsu wu uyagi a̱ ka̱lyuwusa̱ ukowo wa alanga. O rono ta̱ lulu vu ɗanga dabino zuva va̱ yi. Waru kumbata kunla̱ ta̱ lo na a̱ tyo ɗe. 32 Reve waru u tara mu u toni na̱ a̱mu nu ukowo wa̱ a̱tsuma̱ a̱ tyo asana. Reve u rito una̱ntsu wa asana'a, mgbain ma̱ yi gba una̱ta̱ u ɗa u ri na akapi. 33 Pa nda fo, asula a̱ a̱za̱ e ipiri a̱ ta̱ lo, ni ikyun yu una̱ntsu, nu ukobu waru. Mgbain n le gba una̱ta̱ u ɗa a̱ ri na akapi. Sowoto vu upepu ta̱ u ka̱nda̱ruwu na asula'a nu ukobu'u. Uga'an wu una̱ntsu'u na̱ a̱tsuma̱ uritowu udasu kupakunla̱ na̱ a̱za̱ e cindere na akapi ɗa na̱ washin amunga na aza a ta'atsu na akapi. 34 Ukobu wu una̱ntsu wa asana'a u ta̱ ka̱lyuwusa̱ ukobu wa alanga. O rono ta̱ lulu vu ɗanga dabino zuva va̱ yi. Waru kumbata kunla̱ ta̱ lo na a̱ tyo ɗe. 35 Reve waru u tara mu u toni na̱ a̱mu a̱ tyo o una̱ntsu wu ugana. Reve u rito una̱ntsu wu ugana'a, mgbain ma̱ yi gba una̱ta̱ u ɗa u ri na akapi. 36 Pa nda fo, asula a̱ a̱za̱ e ipiri o ta̱ lo, ni ikyun yu una̱ntsu, nu ukobu waru. Mgbain ma̱ yi gba una̱ta̱ u ɗa a̱ ri na akapi. Sowoto vu upepu ta̱ u ka̱nda̱ruwu na asula'a nu ukobu'u. Uga'an wu una̱ntsu'u na̱ a̱tsuma̱ uritowu udasu kupakunla̱ na̱ a̱za̱ e cindere na akapi ɗa na̱ washin amunga na aza a ta'atsu na akapi. 37 Ukobu wu una̱ntsu wu ugana'a u ta̱ ka̱lyuwusa̱ ukowo wa alanga. O rono ta̱ lulu vu ɗanga dabino zuva va̱ yi. Waru kumbata kunla̱ ta̱ lo na a̱ tyo ɗe.

38 Aasula a̱ ta̱ lo uɓaɓanuwu o ukobu wu ugana'a. Pe a aasula a nda nan ganu a̱ tsu za̱za̱'wa̱ ta̱ iliyamunga kucci vu ukula̱tosu. Nu una̱ntsu wa aasula a nda a ɗa a̱ tsu kuru a̱ tyo o ukobu wu una̱ntsu'u. 39 A̱tsuma̱ o ukobu wu una̱ntsu'u apada e re a̱ ta̱ lo e eeɓele suru. Zuva le ɗa a tsu paɗa iliyamunga i kucci vu ukula̱tosu na̱ kucci wuza̱'u vu nusu na̱ kucci matawa ma̱ nusu. 40 E eɓele o ukobu'u na alanga, na̱ vuma a kumbusa a̱ tyo o ukobu u na u ri o una̱ntsu wu ugana, apada a̱ na̱shi a̱ ta̱ lo fo, ejere e eeɓele suru. 41 Apada a̱ na̱shi a̱ ta̱ pe, apada a̱ na̱shi waru o una̱ntsu na alanga. A̱ 'yon ta̱ apada kunla̱, ɗe ɗa a paɗa iliyamunga i kucci. 42 Apada a̱ na̱shi a̱ ta̱ lo waru aza a na e she'ein a atali adama o foɓo kucci vu ukula̱tosu. Mishin mu za̱ ta̱ suru uritowu inci mata'atsu na̱ za ta̱ na akapi una̱ta̱. Uga'an wu za ta̱ waru suru uritowu inci ushin na̱ za ta̱ ɗa. Ɗe ɗa a tsu zuwa itana i mapaɗa me iliyamunga i mayan ma̱ kucci vu ukula̱tosu na aza a akapi a̱ kucci. 43 Igon i gbagbain i ta̱ lo aza a na uga'an u le u rawai inci ta'atsu, aza a na a̱ shuwa̱i o usa'a uka̱nda̱ruwu pe na̱ a̱tsuma̱. Ɗe zuva va apada'a waru ɗaɗa aa zuwa inama i kucci i na aa ca.

44 A̱vu u tara mu o uta̱ nu una̱ntsu u na wee tyo o ukobu wa alanga. Reve me ene asula e re a̱tsuma̱ o ukobu'u. Za ta̱ pa a̱ nge'en mu una̱ntsu wu ugana za na a̱ ka̱lyuwusa̱ uyagi. Za ta̱ waru ɗe a̱ nge'en mu una̱ntsu wu uyagi a̱ ka̱lyuwusa̱ ugana. 45 Reve u damma mu, <<A̱yi aasula a na a̱ ri a̱ ka̱lyuwusa̱ uyagi, aasula a nan ganu a ɗa aza a na a̱ ka̱lyuwusa̱ A̱a̱'isamapaɗa'a. 46 Aasula a na gba a̱ ka̱lyuwusa̱ ugana, aasula a ɗa adama a nan ganu aza a na a̱ ka̱lyuwusa̱ masa'a. Ele nda, ele ɗa a̱za̱ o ugundo wa Saduku. Ele ɗa gon diga o ugundo wa Levi aza a na aa gura ta̱wa̱ zuzu nu uba̱ta̱ wa A̱sulazuva tsa̱ra̱ a yuwaan yi a̱ga̱nda̱.>> 47 A̱vu u rito ukowo wa̱ a̱tsuma̱'a̱, uga'an wa̱ yi uritowu udasu ukpaku na̱ kupocindere no ozo ton (175) ɗa waru washin wa̱ yi, uritowu udasu ukpaku na̱ kupocindere no ozo o ton (175) ɗa. A̱vu me ene masa'a elime a̱ A̱a̱'isamapaɗa'a.

48 A̱vu u tara mu u toni na̱ a̱mu a̱ tyo o ukobu wa̱ A̱a̱'isamapaɗa'a. A̱vu u rito ikyun yu ukobu'u, ugba̱mu wa̱ yi udasu kunla̱ na̱ uɓatsulai u ta'atsu o una̱shi ɗa e eeɓele suru waru na̱ washin uritowu udasu ushin na̱ a̱za̱ a̱ na̱shi na akapi. Waru uga'an wu uɓaɓu'u o upasu wu una̱ntsu suru uritowu udasu uton na akapi. 49 Uga'an wu ukobu'u u rawa ta̱ uritowu udasu mata'atsu no ozo o ton na̱ washin uritowu udasu ushin na̱ za̱ ta̱. Waru udasata u ta̱ lo uba̱ta̱ suru a̱ nge'en mi ikyun yu ukobu'u. Waru atsura a̱ ta̱ lo a̱ nge'en suru.