1 A̱vu wu uta̱a̱ mu u 'ya̱wa̱ na̱ a̱mu o una̱ntsu wa alanga wa̱ a̱a̱'isa̱, za na da̱na̱i a̱ ka̱lyuwusa̱ a asana, agba u da̱na̱ ta̱ ukpa̱towu. 2 A̱vu A̱sulazuva a damma mu, <<Una̱ntsu u nda u ta̱ da̱na̱ ukpa̱towu kuci. She vuma uwa na̱ a̱yi wan, adama a na A̱sulazuva A̱sula̱ a aza a Isra'ila a uwa ta̱ na̱ a̱yi. Adama o ndolo u ta̱ da̱na̱ ukpa̱towu. 3 Mogono ma ɗa goon ma̱a̱ da̱nu ɗe a̱vu u lyuwa ilyalya a̱ ma̱ka̱ka̱n ma̱ A̱sulazuva. U ta uwa nu una̱ntsu u ro, u uwa a̱ tyo o ukobu wa asana, reve waru wu uta̱ nu una̱ntsu u na u uwayi.>>

4 A̱vu u ta̱wa̱to mu nu ure wu u'uwata wu ugana elime a̱ A̱a̱'isamapaɗa. Reve n ka̱lyuwa̱ a̱vu me ene tsugbain tsa̱ A̱sulazuva tsa shiwan A̱a̱'isamapaɗa va̱ A̱sulazuva. Ɗaɗa n riya̱i ma̱kpa̱ɓa̱. 5 Reve A̱sulazuva a damma mu, <<Mawun ma vuma, vu toni ben ulobonu, vu ka̱lyuwa̱ ulobonu, vu zuwa atsuvu ulobonu e ili i na maa damma wu suru adama a̱ wila̱ wa̱ A̱a̱'isamapaɗa va̱ A̱sulazuva. Vu toni ben nu u'uwata wa̱ A̱a̱'isamapaɗa na̱ re mota̱a̱. 6 Reve vu damma a̱za̱ o u'ya̱susa̱n wu ugbozu wa Isra'ila, <Apa ili i na A̱sulazuva Zagbain dammai. Nusu vi idaba ɗu rawa ɗu ta̱ ne! 7 Babu ni ili yi idaba i na yaa yuwusan suru, a̱yi ɗa nda i lungusa̱i a̱a̱'isa̱ o ure u na i uwatoi omocin a na koto a paɗai uryumbu a̱ lipu shi, aza a na koto e revei A̱sula̱ o okolo shi. A̱vu i lungusa̱ yi, mantsa ma na yaa casu mu kucci vi ilyalya, mpasa oɓolo na̱ mani'in. I kuɗa ta̱ nzuwulai n va̱ n na i yuwain. 8 I toni linga ɗu adama o ucasu wu ne'e va akiza va̱ shi, reve i zuwa omocin a̱ ka̱lyuwa̱ linga va̱ a̱tsuma̱ a̱ a̱a̱'isa̱.> >>

9 << <Apa ili i na A̱sulazuva Zagbain dammai, babu mocin na koto a paɗai uryumbu a̱ lipu, za na ri na̱ wovon wa̱ A̱sula̱ o okolo shi, na ri nu ucira u na waa uwa a̱tsuma̱ a̱ a̱a̱'isa̱ a̱ va̱, hali na aza a na a̱ ri na̱ nden a̱tsuma̱ a aza a Isra'ila. 10 Amma nan Levi a na a lyawa numu ana aza a Isra'ila a̱ ka̱ra̱ a lyawa numu a̱vu a uwa a yuwusaan a̱ma̱li a̱ga̱nda̱, a ta tanu nusu le. 11 A ta gura yuwan a̱ga̱nda̱ a̱tsuma̱ a̱ a̱a̱'isa̱ a̱ va̱, a̱ da̱na̱ a̱ ka̱lyuwusa̱ na̱ntsu va̱ A̱a̱'isamapaɗa, reve a yuwusan pe a̱ga̱nda̱. A ta gura paɗa kucci vu ukula̱tosu, reve a ca kucci adama a ama. Reve e isawan a̱ ma̱ka̱ka̱n ma ama waru a yuwaan le a̱ga̱nda̱. 12 Agba ana wo o'woi nan Levi a yuwayin aza a Isra'ila a̱ga̱nda̱ a̱ ma̱ka̱ka̱n ma̱ a̱ma̱li, ɗaɗa o o'woi ili yu uta̱ɗa̱tsa̱sa̱ e ekere a aza a Isra'ila. Adama o ndolo, a̱mu A̱sulazuva Zagbain n kucina ta̱ a ta tanu nusu le. 13 A̱a̱ ta̱wa̱ zuzu na̱ a̱mu adama a yuwaan mu a̱ga̱nda̱ tsa nan ganu shi, ko a̱ ta̱wa̱ zuzu ni ili ya akiza i va̱ ko kucci va̱ na la'ai akiza shi, ele ɗa ili i na a tawai. Amma a ta uwwa wono adama a linga vi idaba na a yuwain. 14 Amma na̱ ne suru, n ta̱ ka̱mba̱to le aza a na a̱ da̱na̱ a̱ ka̱lyuwusa̱ A̱a̱'isamapaɗa'a, a yuwan a̱ga̱nda̱ a na aa yuwusan pe suru a̱tsuma̱ a̱ yi.> >>

15 << <Amma nan ganu, aza a na a̱ ri nan Levi waru ugundo wa Saduku, aza a na a yuwain a̱ga̱nda̱ na̱ a̱ɓula̱ a̱tsuma̱ a̱ a̱a̱'isa̱ a mantsa ma na aza a Isra'ila a lyawa numu, a̱ ta̱ ta̱wa̱ zuzu a yuwan a̱ga̱nda̱ a̱ ma̱ka̱ka̱n ma̱ va̱. A̱ te isawan a̱ ma̱ka̱ka̱n ma̱ va̱ a ca kucci mani'in oɓolo na̱ mpasa, ne ɗa A̱sulazuva Zagbain dammai. 16 Ele ɗa goon a uwa a̱tsuma̱ a̱ a̱a̱'isa̱ a̱ va̱. Ele ɗa a rawa zuzu na apada a̱ va̱. A ta yuwaan mu a̱ga̱nda̱ a̱vu waru a yuwaan mu ipiri. 17 A mantsa ma na a uwai a̱ na̱ntsu va agalaci va̱ a̱tsuma̱, o to oto a̱tugu o okoro. O oto a̱tugu a na a yuwain na̱ a̱punda̱ shi, a mantsa ma na a yuwusan a̱ga̱nda̱ o una̱ wu una̱ntsu wa agalaci wa̱ a̱tsuma̱ ko a̱tsuma̱ a̱ A̱a̱'isamapaɗa. 18 O to oto okokolo o okoro, a̱vu waru o oto mucaka ma̱ a̱tsuma̱ mo okoro. Oo oto ili i na ya̱a̱ ta̱wa̱a̱ le na̱ melen shi. 19 Kafu a̱ 'ya̱wa̱ a agalaci uba̱ta̱ u na ama a̱ ri, o to foɗo itana yo okoro a na a yuwusayin a̱ga̱nda̱ ne ele, reve a zuwa le uba̱ta̱ wa akiza. A̱vu o oto mutugu n ro tsa̱ra̱ mutugu ma akiza n zuwa ama o ro o o'wo na akiza wan.> >>

20 << <Aa puna a̱nji e le shi, ko a lyawa a̱nji e le a kungwa. Amma a̱ ta̱ da̱na̱ a jibusa le goon. 21 Babu ganu na oo sowo masayan ma̱ ina̱bi mantsa ma na u uwai a agalaci a̱ a̱tsuma̱. 22 Aa zuwa ma̱runa̱ shi ko ka na kakasai na̱ vali va̱ yi, she usheli a̱tsuma̱ o ugundo wa Isra'ila u na koto u revei vali shi, ko ma̱runa̱ ma na vali va̱ yi shi ganu. 23 Ele ɗa oo rito ama a̱ va̱ ili i na i tawai ko'o ni ili ya akiza ni ili i na i ri na akiza shi. Reve waru o roco le ili i na i ri ni idaba ni ili i na i ri i idaba shi. 24 Na̱ a̱ tsura̱ mawasan ele ɗa oo o'wo tsa̱ a̱za̱ o uge'etosu, reve e ge'eto cine wila̱ u va̱ u dammai. A ta yuwan tsutoni nu uritosu u va̱ na̱ wila̱ u va̱ u na n zuwai adama a̱ a̱buki. Reve waru a̱ guza̱ urana wa Ashibi a̱ va̱ na akiza. 25 A̱a̱ ka̱mba̱to aciyele ili yi idaba o ure u marawa zuzu na̱ a̱kwa̱kwa̱ shi. Amma a ta gura o o'wo ili yi idaba adama a̱ a̱kwa̱kwa̱ a dada ko mma ko mawun mo ulobo ko mawun mo usheli, ko mawun ma̱ a̱na̱wun mo ulobo ko mawun ma̱ a̱na̱wun mo usheli ma na mo koto ma yuwain lolo shi. 26 Cina u ka̱mba̱to aciya̱yi cece, u to puro hali rana cindere. 27 O urana u na u ka̱mba̱i o ulinga a̱vu u uwa a agalaci a̱ a̱tsuma̱ a̱ a̱a̱'isa̱ tsa̱ra̱ u yuwan a̱ga̱nda̱, u ta ca kucci va̱ yi adama a̱ wuza̱'u wu unusu adama a aciya̱yi. Ne ɗa A̱sulazuva Zagbain dammai.> >>

28 << <Apa ili i na ya̱a̱ da̱na̱ agadu a nan Levi, a̱mu ɗa goon moo o'wo le agadu. Yaa ca le agadu a̱tsuma̱ a Isra'ila shi. A̱mu ɗa mo o'wo le ili i na a̱a̱ tsura̱. 29 A ta lyuwa kucci vi ishina i na a̱a̱ ta̱wusa̱a̱, oɓolo na̱ kucci wuza̱'u wu unusu na̱ kucci matawa mo unusu. Ili i na a tawai la̱nga̱ suru a̱tsuma̱ a Isra'ila o to o'wo a̱za̱ e le. 30 Mapaɗa ma̱ kucci mo ufaru ma na ma la'ai ulobonu vi itana yu uɗuma̱, oɓolo na̱ cu'un vu ne'e suru na i ta̱wa̱yi la̱nga̱, o to o'wo aza a nan ganu. I ta ca nan ganu yira i na a fara irai tsa̱ra̱ aba'un a̱ da̱na̱ a 'wa ɗu. 31 Nan ganu aa tama ko manunu ko a̱kwa̱kwa̱ a nama na kuwa̱i na aciya̱yi shi ko na nama ro vu unai shi.> >>