1 A̱tsuma̱ a aa'wan a kupa na̱ za ta̱ o woto wa ta'atsu, o urana wu ufaru u woto'o, ɗaɗa adanshi a̱ A̱sulazuva a̱ ta̱wa̱i ya̱'a̱ va̱, 2 <<Mawun ma vuma, vu damma Firi'awuna mogono ma Masar na ama a̱ a̱bunda̱ a̱ yi suru, <Na̱ zane ɗa aa gura kurato tsugbain tsa̱ wu?> >> 3 Uwwai nda, iɗa ya Asuriya i ɗa nda u shi ta̱ tsu uɗanga wa̱ sida e iɗa ya Lebanon. Uɗanga u na u shi mishin uga'an mejege a̱ dukwa̱ eleshe ne eten a sa'ani ukpa̱towu a na a casu ululu tsa̱ a̱rumbu. 4 Mini ma kungwato yi ta̱, waru mini ma̱ a̱ru'un ma zuwa yi ta̱ u kungwa uga'an. Ɗolu yene ta̱ e ikyun ya̱ yi, hali mini'in ma rawa ta̱ a akapi a ɗanga va atsusa. 5 A̱bunda̱ a̱ mini ma na u tsu tsura̱, a̱yi ɗa i zuwai u tsu kungwa u la'a ɗanga va atsusa suru uga'an. Waru eten a̱ yi a yuwan ta̱ a̱bunda̱ a kungwa uga'an. 6 Nnunu ma zuva suru a yuwan ta̱ nkinda e eten a̱ yi. Waru za̱la̱ ve eten a̱ yi inama yu una i matsan ta̱ muwun n le. Nɗa mu uvaɗi suru a̱ da̱nu ta̱ a̱tsuma̱ o ululu wa̱ yi. 7 Mgbain ma̱ yi nu ulobonu wa̱ yi ili ya̱ a̱ka̱nla̱ i ɗa. Eten a gbagbain a̱ yi a pala ta̱ uba̱ta̱ suru adama a na aralu a̱ yi a uwa ta̱ e iɗa uba̱ta̱ u na mini ma̱ a̱bunda̱ ma̱ ri. 8 Ɗanga sida na ri a̱ a̱rumbu a̱ A̱sula̱ a rawa yi shi. Waru a̱ ri na o kurato ɗanga fir ne eten a̱ yi shi. Ne ɗa waru eten a wawa'wa a̱ yi a̱ ri na a kurato le na̱ ɗanga arumon shi. Uɗanga wu lo a̱ a̱rumbu a̱ A̱sula̱ a na u rawa niyi ulobonu shi. 9 A̱mu ɗa n zuwa niyi u yuwan ulobonu ne eten a̱ a̱bunda̱. Reve wo o'wo ili i tsushu'un a̱tsuma̱ a ɗanga na ri pe a̱tsuma̱ a̱ a̱rumbu a̱ A̱sula̱. 10 <<Adama o ndolo apa ili i na A̱sulazuva Zagbain dammai. Adama a na uɗanga'a u kungwai u dukwa̱i eleshe reve u shiwan nu uvaɗu adama o uga'an wa̱ yi. 11 Reve n ca yi e ekere o mogono ma gbain ma nɗa. A̱vu uɗanga'a u yuwan iwuya reve a̱mu gba n tawa yi. 12 Omocin e iɗa ya ama a na e tse ene iliyali shi upasu na akapi e iɗa a gagasa yi ta̱ reve a lyawa e yi iɗa. Reve eten a̱ yi o oco a agaɗi na̱ a̱tsuma̱ a ɓaa. Eten a̱ yi a kukuɗa ta̱ reve a̱ riya̱ e yene mini. Ama o uvaɗi suru a̱ 'yon ta̱ a lyawa ululu wa̱ yi.>>

13 <<Nnunu ma zuva suru a̱ ta̱ va̱la̱ o uɗanga u na u riya̱i, waru inama yu una suru o to von a̱tsuma̱ eten a̱ yi. 14 A yuwan ta̱ ne adama uɗanga u ro a̱tsuma̱ a ɗanga na ri e ikyun i mini u da̱shi yuwan uga'an wan ko u dukwa̱ eleshe wan. Waru adama uɗanga u na wa̱a̱ tsura̱sa̱ mini wuntsulai ma̱ da̱shi kungwa tsa̱ yi wan. Adama a na a zuwaa le ta̱ suru a̱ kuwa̱ a̱ za̱luwa̱ a̱ tyo uba̱ta̱ wa̱ a̱kwa̱kwa̱ oɓolo na akapi suru o uvaɗi.>>

15 <<Apa ili i na A̱sulazuva Zagbain dammai, O urana u na za̱luwa̱i a̱ cipa̱ uba̱ta̱ wu nden wa̱ a̱kwa̱kwa̱, n zuwa ta̱ ɗolu na̱ yenete e showen yi. N zuwa ta̱ mini me iɗa na̱ ɗolu suru a lyawa meyene. A pala ta Lebanon ni irumbu, waru ɗanga va̱ a̱tsuma̱ o ogozo suru e 'yewe ta̱. 16 N zuwa ta̱ nɗa n jinga̱ɗa̱ a mantsa ma na a uwwai ilama i ma̱riya̱ ma̱ yi a mantsa ma na n za̱luwa̱ niyi a̱ tyo uba̱ta̱ wu nden wa̱ a̱kwa̱kwa̱ oɓolo na aza a na a̱a̱ za̱luwusa̱ a̱ tyo uba̱ta̱ wu nden wa̱ a̱kwa̱kwa̱. Ɗanga va̱ a̱rumbu va Adini suru oɓolo na̱ ɗanga va Lebanon na la'ai ulobonu na aza a na a̱ tsura̱i mini wuntsulai, a̱ tsura̱ ta̱ ucawu wa adanshi o uvaɗi wa̱ a̱kwa̱kwa̱ a mantsa ma na e enei uɗanga'a ne ele. 17 Aza a na a̱ da̱nuyi o ululu wa̱ yi, aza a na o ɓoloi aci na̱ a̱yi a̱tsuma̱ a nɗa, ele fo a̱ za̱luwa̱ ta̱ a̱ tyo uba̱ta̱ wu nden wa̱ a̱kwa̱kwa̱ oɓolo na̱ a̱yi. A cina aza a na o unai na̱ matsun me pe'eni.>> 18 <<Uɗanga u ne u ɗa a̱tsuma̱ a ɗanga va̱ a̱rumbu a Adini ri na̱ mgbain na̱ tsugbain tsa̱ wu? Ne ɗa a̱ ca̱co wu a̱ tyo uba̱ta̱ wu nden wa̱ a̱kwa̱kwa̱ oɓolo na̱ ɗanga va Adini za̱la̱ o uvaɗi. Vu to von oɓolo na ama a na a paɗai uryumbu shi, na aza a na o unai na̱ matsun me pe'eni.>>

<< <Firi'awuna ɗa oɓolo na ama a̱ yi. A̱sulazuva Zagbain ɗa dammai. > >>