1 Reve vuma'a u ka̱mba̱ na̱ a̱mu o una̱ntsu wa̱ A̱a̱'isamapaɗa'a. Reve me ene mini o uta̱sa̱ za̱la̱ vu una̱ wu una̱ntsu wa̱ A̱a̱'isamapaɗa'a a̱ tyosu asana (adama a na A̱a̱'isamapaɗa'a a̱ ta̱ ka̱lyuwusa̱ asana). Mini'i ma̱ shi ta̱ o uta̱sa̱ diga upasu wu uyagi za̱la̱ va̱ A̱a̱'isamapaɗa'a, uyagi u masa'a. 2 Reve wu uta̱a̱ mu nu una̱ntsu wu upasu wu ugana, reve u kuru na̱ a̱mu a̱ ka̱nda̱ruwa̱ na alanga a̱ tyo o una̱ntsu wa alanga u na wa̱a̱ ka̱lyuwusa̱ asana. Mini'i gba ma̱ shi te yeneshe nu upasu wu uyagi. 3 A̱yi a mmalu a̱ tyo upasu wa asana ni ili yu uritosu o ukere wa̱ yi, a̱vu u rito udasu ukpakukupa (1,000), a̱vu u kuru na̱ a̱mu a pasalai mini ma na a̱ru'un a̱ yi a rawai mawun ma̱ lyusu. 4 A̱vu waru u ritowiso udasu ukpakukupa (1,000) u ro, reve waru u kuruwisa̱ na̱ a̱mu a̱ mini ma na ma rawai a̱lu. A̱vu u ritowiso udasu ukpakukupa (1,000) u ro a̱vu u kuruwisa̱ na̱ a̱mu a̱ mini ma na ma rawai ikyun. 5 A̱vu waru u ritowiso udasu ukpakukupa (1,000) u ro, agba gogo uɗolu u na maa gura pasa shi ɗa, adama a na mini ma gawan ta̱. Mini'i ma̱ ta̱ a̱ru'un a na a rawai uda̱su, agba u la'a ta̱ na za aa gura. 6 Reve u damma mu, <<Mawun ma vuma, ve ene ta̱ ili i nda?>> Reve u kuru na̱ a̱mu a̱ ka̱mba̱ a̱ nge'en mu uɗolu'u. 7 Ana n ka̱mba̱i, a̱vu gba me ene ɗanga va̱ a̱bunda̱ e eeɓele a nda ne e eeɓele a̱ ndeɗe o uɗolu'u. 8 A̱vu u damma mu, <<Uɗolu u nda u te yeneshe a̱ tyo upasu wa asana waru u ta̱ zurusu a̱ cipa̱ a̱ tyo upasu wa Araba, a̱vu u uwa a mala ma akpaɗi, reve u lapula mini'i mo o'wo ulobonu. 9 Uba̱ta̱ u na biti uɗolu'u u yenei a̱ tyo oɓolo e ili i wuma suru a̱ ta̱ da̱na̱ wuma. Mugula n tsu yuwan ta̱ a̱bunda̱ adama a na mini'i me yenei a̱ tyo ɗe, reve u lapula mini ma mala'a wo o'wo ulobonu. Uba̱ta̱ u na mini'i ma rawai ili biti i ta̱ da̱na̱ wuma. 10 A̱za̱ e mereme ma mugula e te isawan a̱ nge'en m mala. Diga En Gedi a̱ tyo En Eglayim u to o'wo uba̱ta̱ wu u'yetsusu wi igolo. Mugula n ta̱ da̱na̱ lo icu'un icu'un tsa mugula m Mala ma Gbain. 11 Amma mini ma abata na̱ za vu ɓaa a̱a̱ ka̱mba̱ ulobonu shi. A ta lyawa le o o'wo uba̱ta̱ u ma̱tsura̱ ma akpaɗi. 12 Ɗanga na vaa matsan muwun icu'un icu'un ta kungwa a̱ nge'en mu uɗolu'u ra ra ra. A̱vu'un e le a kpanla shi, waru a̱a̱ kuɗa̱ matsan shi. Woto suru a ta matsan, adama a na mini ma na ma̱ ri a̱ a̱a̱'isa̱'a̱ me te yenishee le. Muwun n le n to o'wo ilyalya a̱vu'un e le waru ili yo opocino.>>

13 Apa ili i na A̱sulazuva Zagbain dammai, <<Ne'eshein iɗa'a ne tsunda adama a agadu o gundo kupa ne ejere a Isra'ila, ugundo wa̱ Isuhu u ta̱ tsura̱ akunda e re e iɗa'a. 14 Babu na̱ a̱yi ndolo, vu te ne'eshen akapi o gundo'o iɗa'a una̱ta̱, cine n kucinai na maa ca nkaya n ɗu a̱yi. Iɗa i nda i to o'wo ɗu agadu.

15 <<Apa nda cine utyo'o woo o'wo, upasu wu ugana u te reme diga a Mala ma Gbain o ure wa Hetilon o uta̱la̱i na̱ Lebo Hama a̱ tyo Zeda. 16 Reve u kuru na̱ Berota na̱ Sibrayim (za na ri o utyo e memere ma Dimaska na̱ Hamata), hali a̱ tyo Haza Hatikon, za na ri o utyo wa Hauran. 17 Ne ɗa utyo'o wee reme diga a Mala ma Gbain a̱ tyo a mala ma Haza Ena o utyo u memere ma Hamat nu upasu wu ugana na̱ Dimaska o upasu wu uyagi. A̱yi ɗa woo o'wo utyo wu ugana.

18 <<Nu upasu wa asana, utyo'o u te reme e memere ma Hauran na̱ Dimaska, nu ure wa̱ Urudu e memere ma Giliyadu ni iɗa ya Isra'ila, a̱ tyo a mala ma asana hali a rawa Tama. A̱yi ɗa woo o'wo utyo wa asana.

19 <<Nu upasu wu uyagi, utyo'o u te reme diga Tamar hali a rawa mini ma Meribot Kedesh, nu ure wu Uɗolu wa Masar a̱ tyo a Mala ma Gbain. A̱yi ɗa woo o'wo utyo wu uyagi.

20 << Nu upasu wa̱ a̱livu, Mala ma Gbain u to o'wo utyo hali a rawa uba̱ta̱ u na u ri a̱ nka̱la̱la̱i na̱ Lebo Hama. A̱yi ɗa woo o'wo utyo wa̱ a̱livu.

21 <<Ne ɗa yee ne'eshen iɗa i nda a̱tsuma̱ a̱ ɗu o una̱ vu gundo va Isra'ila. 22 I te ne'eshen iɗa'a yo o'wo ɗu agadu no omocin a na a̱ ri na̱ nden a̱tsuma̱ a̱ ɗu waru a̱ ri na̱ muwun a̱tsuma̱ a̱ ɗu. Vu ta yuwan ne ele tsu umatsun wi iɗa wa Isra'ila. Oɓolo na̱ a̱ɗu, a ta ca le akunda a agadu oɓolo na̱ gundo va Isra'ila. 23 A̱tsuma̱ o ugundo u na suru mocin n ri na̱ nden, pe ɗa yaa ca yi agadu a̱ yi, ne ɗa A̱sulazuva Zagbain dammai.>>