1 Adanshi a̱ A̱sulazuva a̱ ta̱wa̱ ta̱ ya̱'a̱ va̱, 2 <<Mawun ma vuma, apa nda ili i na A̱sulazuva Zagbain dammai a̱ tyo e iɗa ya Isra'ila, Ukosu! Ukosu wu pasu na̱shi vi iɗa'a u ta̱wa̱ ta̱. 3 Ukosu u ta a aci a̱ wu gogo, waru n ta̱ lyungu upan u va̱ a aci a̱ wu. N te ge'eto wu cine vaa yuwusan wuma wa̱ wu, a̱vu n tsupa wu adama e ili yi idaba i na vu yuwain suru. 4 Waru esu a̱ va̱ a̱a̱ ka̱lyuwa̱ wu ni iliyali shi ko n lyawa wu shi. Amma n ta ca wu oforo adama e ili i na vaa yuwusan ni ili yi yi idaba i na i ri e memere ma̱ wu. A̱vu vu reve a na a̱mu ɗa A̱sulazuva.

5 <<Apa ili i na A̱sulazuva Zagbain dammai, Mɓa̱la̱ a aci a̱ mɓa̱la̱! Uwwai, u ta̱ lo a̱ ta̱wa̱. 6 Ukosu u ta̱wa̱ ta̱! Ukosu u ta̱wa̱ ta̱! U 'yon ta̱ a aci a̱ wu. U ta̱wa̱ ta̱! 7 Ukosu wa̱ wu u ta̱wa̱ wu ta̱, a̱ɗu aza a na a̱ ri nden e iɗa'a. Mantsa ma rawa ta̱, urana u rawa ta̱ zuzu, urana u wovon agba urana u ma̱za̱nga̱ a masasan shi. 8 Aa jima shi gogo n ta̱ tsuwa̱n wu upan u va̱, reve n voton upan u va̱ a aci a̱ wu. N te ge'eto wu o una̱ wi ili i na vu yuwain, waru n ta ca wu oforo o una̱ wi ili yi idaba i na vu yuwain suru. 9 Esu a̱ va̱ a̱a̱ ka̱lyuwa̱ wu ni iliyali shi ko n lyawa wu shi. N ta tsupa wu o una̱ wi ili i na vu yuwain, waru o una̱ wi ili yi idaba i na i ri e memere ma̱ wu. Reve vu reve a na a̱mu A̱sulazuva a ɗa za na tsu ga̱la̱.

10 <<Uwwai nda, urana'a u ta̱ pa! U rawa ta̱! Ukosu u ba̱ma̱ ta̱, aaɗanga a yuwan ta̱ yipa̱lu, aciyogbamu a yuwan ta̱ yipa̱lu! 11 U'ya̱susa̱n wu ugbozu u gbozo ta̱ wo o'wo aaɗanga e iwuya. Ko vuma ta̱ a̱tsuma̱ e le aa la'a shi, ko ili ya̱ a̱bunda̱ i le ko utsuru u le ko vuma na aa tarasa na̱ tsugbain a̱tsuma̱ e le aa la'a shi. 12 Mantsa ma̱ ta̱wa̱ ta̱, urana u rawa ta̱. She za va atsulu za̱nga̱na̱ wan ko za awina yuwan a̱tsumola̱ngu wan, adama a na upan u ta̱ a aci a ama e le suru. 13 Adama a na za va awina a̱a̱ ka̱mba̱ e ili i na u winai shi ne ele ra a buwa wuma. Adama a na alavu alavu'u u ta a aci a ama e le suru, agba wa̱a̱ bula̱ shi. Adama o unusu u le ko za a̱tsuma̱ e le aa gura geshe wuma wa̱ yi shi. 14 E ivula̱ ta̱ avana, reve o foɓo ili biti, agba ko za a̱a̱ 'ya̱wa̱ uba̱ta̱ o uvon shi, adama na upan u va̱ u ta̱ a aci o oɓolo a ama'a suru.

15 <<Matsun me pe'eni ma̱ ta̱ a alanga a̱ lyuci'i, mɓa̱la̱ na ambulu pe a̱tsuma̱. Aza a na a̱ ri a alanga a̱ ta̱ kuwa̱ a matsun me pe'eni, aza a na waru a̱ ri a̱tsuma̱ a̱ lyuci'i ambulu na̱ mɓa̱la̱ n ta lyuwa le. 16 Waru aza a na a pasai a̱vu a la'ai suru, a̱ ta̱ da̱na̱ a nsasan e mesun ma̱ a̱tsumola̱ngu tsa muɗa mu uɓaa. Za suru ta̱ shon adama o unusu wa̱ yi. 17 Ekere suru a̱ ta̱ ɗa̱mba̱, reve a̱lu suru a̱ ka̱mba̱ mini. 18 O to oto akashamuna, reve wovon u ɓa̱ru le. Urewesu u le u to dolyo na̱ wono, reve a puna aci e le suru ogbondo. 19 A ta vari azurufa le a̱tsuma̱ e re gbain, zinariya le waru to o'wo tsi ili yi idaba. Azurufa le na̱ zinariya aa gura wawa le shi o urana wu upan wa̱ A̱sulazuva. A gura cuwa̱ton ambulu e le shi ko o shiton a̱tsuma̱ e le na̱ a̱yi shi, adama a na u zuwa le ta̱ a̱ riya̱ a̱tsuma̱ o unusu. 20 Itana yi ikebe i sa'ani i le i zuwa le ta̱ afalu, reve a yuwaan a̱ma̱li e idaba e le na̱ ruma vi idaba. Adama o ndolo n ka̱mba̱to le ta̱ ili yi idaba e ekere e le. 21 N ta zuwa le suru e ekere o omocin tsi ili i na e remei, n ta ca le e ekere a̱za̱ e iwuya o uvaɗi, reve a̱ lungusa̱ le. 22 N ta vadalaa le urewesu u va̱, a̱vu oo o'woto uba̱ta̱ wi izuwa i va̱ idaba. Evu a ta uwa pe a̱ lungusa̱ yi.

23 <<Ruma akani, adama a na iɗa'a i shiwan ta̱ na̱ wocosu wu mpasa, lyuci'i waru u shiwan ta̱ nu u'ya̱susa̱n wu ugbozu. 24 N ta̱ ta̱wa̱ ni iɗa i na i la'ai iwuya wo o'woto 'wa le za le. N ta zuwa aciyogbamu a̱ a̱za̱ o ucira o koto, reve a̱ lungusa̱ a̱'isa̱ e le. 25 A mantsa ma na a̱tsuma̱lima̱ a̱ ta̱wa̱i, a ta zami asuvu nden, agba a̱a̱ tsura̱ yi shi. 26 A̱tsuma̱lima̱ o tono a̱tsuma̱lima̱ a̱ ta̱ ta̱wa̱, na̱ yidammishi a aci a yidammishi. A ta zami alavu alavu uba̱ta̱ u vumava̱sula̱ pere. A̱a̱ tsura̱ uritosu uba̱ta̱ u nan ganu shi ko a̱sa̱la̱ uba̱ta̱ wa azagbain shi. 27 Mogono ma ta yuwan nden ma̱ a̱tsumola̱ngu, mawun mo mogono ma̱ to uta̱a̱ okolo. Ekere a ama e iɗa'a e te je'en. N ta yuwan ne ele una̱ta̱ ni ili i na aa yuwusan, waru cine a yuwain na ama o ro ne ɗa mee ge'eto le. Reve e reve a na a̱mu ɗa A̱sulazuva.>>