1 Reve mbara n ro a̱tsuma̱ a mbara ma Isra'ila n ta̱wa̱ ya̱'a̱ va̱ a̱vu a̱ da̱nu elime a̱ va̱. 2 Reve adanshi a̱ A̱sulazuva a̱ ta̱wa̱ ya̱'a̱ va̱, 3 <<Mawun ma vuma, ama a nda a zuwa ta̱ a̱ma̱li o okolo e le a̱vu a zuwa ili yu uta̱ɗa̱tsa̱sa̱ i wuya a̱ ma̱ka̱ka̱n me le. N ta lyawa le gba na amayun a zami a̱sa̱la̱ a̱ va̱? 4 Adama o ndolo yuwan adanshi ne ele vu damma le, <Apa ili i na A̱sulazuva Zagbain dammai, nna̱ za suru a̱tsuma̱ o u'wa wa Isra'ila u tara a̱ma̱li a̱vu u zuwa o okolo a̱ yi a̱vu waru u zuwa ili yu uta̱ɗa̱tsa̱sa̱ wi iwuya a̱ ma̱ka̱ka̱n ma̱ yi, a̱vu gba u 'ya̱wa̱ uba̱ta̱ u vumava̱sula̱, a̱mu gba A̱sulazuva n ta̱ usu yi na aciya̱va̱ o una̱ wa̱ a̱bunda̱ a̱ a̱ma̱li a̱ yi. 5 N ta yuwan ne adama n remishe okolo a ama o u'wa wa Isra'ila, aza a na a vari numu adama a̱ a̱ma̱li e le.>

6 <<Adama o ndolo vu damma u'wa Isra'ila, <Apa ili i na A̱sulazuva Zagbain dammai, vadalai i lyawa itoni ya̱ a̱ma̱li a̱ ɗu. I lyawa ili yi idaba i ɗu suru.

7 << <Adama a na za va Isra'ila na suru ko mocin na ri nden a̱tsuma̱ a Isra'ila na kakasai aciya̱yi na̱ a̱mu, a̱vu u zuwa a̱ma̱li a̱ yi o okolo a̱ yi a̱vu u zuwa ili yu uta̱ɗa̱tsa̱sa̱ elime a̱ yi, suru na̱ ne a̱vu u ta̱wa̱ uba̱ta̱ u vumava̱sula̱ adama u zami a̱sa̱la̱ a̱ va̱, a̱mu A̱sulazuva n ta̱ usu yi na aciya̱va̱. 8 N ta zuwa urewesu u va̱ nla̱ngi na̱ vuma ndolo. N zuwa yi wo o'wo iroci ni ili i majiyan, a̱vu n tawa yi a̱tsuma̱ a ama a̱ va̱. Reve i reve a na a̱mu ɗa A̱sulazuva.

9 << <Waru na̱ a̱ luluma̱ vumava̱sula̱'a̱ hali u yuwan adanshi e ikaka ya̱ A̱sula̱, a̱mu A̱sulazuva a̱mu ɗa n luluma̱i vumava̱sula̱'a̱. Agba n ta canana ukere u va̱ nla̱ngi na̱ a̱yi, a̱vu n kototo yi a̱tsuma̱ a ama a̱ va̱ aza a Isra'ila. 10 A̱ ta̱ gba a tara oforo o unusu u le. Oforo a vumava̱sula̱'a̱ na̱ za vu za na zamiyi ya̱'a̱ yi u to o'wo ili i ta̱. 11 Ne ɗa ama a Isra'ila a̱a̱ da̱shi ɓatsa a lyawa mu shi, ko a̱a̱ da̱shi lungusa̱ aciyele nu unusu u le suru waru shi. O to o'wo ama a̱ va̱, a̱vu mo o'wo A̱sula̱ e le, A̱sulazuva Zagbain ɗa a dammai.> >>

12 Reve adanshi a̱ A̱sulazuva a̱ ta̱wa̱ ya̱'a̱ va̱: 13 <<Mawun ma Vuma, ni iɗa i yuwaan mu unusu adama o ulambu wa̱ a̱ɓula̱, a̱vu n canana ukere u va̱ nla̱ngi na̱ a̱yi a̱vu n koɗo ure u ma̱tsura̱ me ilyalya ya̱ yi, a̱vu n lyunguwa̱ yi na ambulu a̱vu mu una ama ni iliyamunga ya̱ yi, 14 ko na̱ shi ama a ta'atsu a nda, Nuhu na̱ Daniya na̱ Ayuba, a̱ shi pe a̱tsuma̱ a̱ yi, aciyele a ɗa goon aa gura wawa adama a̱ a̱ɓula̱ e le,>> A̱sulazuva Zagbain ɗa dammai.

15 <<Ko gba na̱ n lyungu inama yu una a uwulai a̱tsuma̱ e iɗa'a, a̱vu o una ama, reve a lyawa iɗa'a okongo, hali na vuma aa gura utula̱i pe shi adama e inama yu una'a, 16 n kucina ta̱ na̱ wuma u va̱, A̱sulazuva Zagbain dammai, ko na̱ shi ama a ta'atsu a nda a̱ shi pe, aa gura wawa ko muwun n le olobo ko esheli shi. Ele goon ɗa aa wawa, agba iɗa'a i to o'wo okongo. 17 Ko na̱ n ta̱wa̱a̱ na̱ matsun me pe'eni a aci e iɗa i ndolo a̱vu n damma, <Lyawa matsun me pe'eni mo utula̱i e iɗa'a suru,> a̱vu mu una ama ni iliyamunga ya̱ yi suru, 18 n kucina ta̱ wuma u va̱, A̱sulazuva Zagbain dammai, ko na̱ shi ama a ta'atsu a nda a̱ shi pe, aa gura wawa muwun n le olobo ko esheli shi. Ele goon ɗa aa wawa.

19 <<Ko nna̱ n lyungu mɓa̱la̱ a̱tsuma̱ e iɗa i ndolo a̱vu mo oco upan u va̱ a aci a̱ yi na̱ wocosu wu mpasa, mu una ama ni iliyamunga ya̱ yi suru, 20 n kucina ta̱ na̱ wuma u va̱, A̱sulazuva Zagbain dammai, ko na̱ shi Nuhu na̱ Daniya na̱ Ayuba a̱ shi pe a̱tsuma̱ a̱ yi, aa gura wawa muwun n le olobo ko esheli shi. Aciyele a ɗa goon aa gura wawa adama a̱ a̱ɓula̱ e le.

21 <<Adama a na apa ili na A̱sulazuva Zagbain dammai, cine waa la'a uwuyanu na̱ n lyungu uge'etosu u na̱shi u vama u va̱ a aci a̱ Urishelima, matsun me pe'eni na ambulu ni inama yu una ivama na̱ mɓa̱la̱, wu una vuma ni iliyamunga i na i ri pe. 22 Agba suru na̱ ne, ozo o ro a ta la'a a̱tsuma̱ a̱ yi, olobo ne esheli a na o uta̱a̱ a̱tsuma̱ a̱ yi. A̱ ta̱ ta̱wa̱ ya̱'a̱ ɗu, reve na̱ ye ene ure u le ni ili i na aa yuwusan, asuvu a̱ ɗu a̱ ta̱ da̱nu adama e iwuya i na n ta̱wa̱yi a aci a̱ Urishelima, iwuya i na n ta̱wa̱yi a aci a̱ yi suru. 23 Na̱ ye ene ure u le ni ili i na aa yuwusan, asuvu a̱ ɗu a̱ ta̱ da̱nu adama e iwuya i na n ta̱wa̱yi a aci a̱ Urishelima, adama a na i te reve a na n yuwan yi iwa̱u shi, A̱sulazuva Zagbain ɗa dammai.>>