1 Adanshi a̱ A̱sulazuva a̱ ta̱wa̱ ta̱ ya̱'a̱ va̱, 2 <<Mawun ma vuma, yuwan adanshi e ili i na yaa cina a ama̱sula̱ a Isra'ila aza a na a yuwusan adanshi e ili i na yaa fara. A̱vu vu damma aza a na a yuwusan adanshi e ili i na yaa fara a majiyan mo okolo e le, uwwai adanshi a̱ A̱sulazuva! 3 Apa ili i na A̱sulazuva Zagbain dammai, a̱tsuma̱lima̱ a ta cina olo a̱ ama̱sula̱ aza a na a̱a̱ kurusu majiyan mo okolo e le, agba e ene ili shi! 4 Ama̱sula̱ a̱ wu Isra'ila, a̱ ta̱ tsa̱ musa̱n mu una a̱tsuma̱ o okongo. 5 A kumba uba̱ta̱ u na uɓaɓu wu karai adama a lapula yi, ko a suwaa u'wa wa Isra'ila uɓaɓu adama wi isawan a̱tsuma̱ o uvon o urana wa̱ A̱sulazuva shi. 6 Epen a ɗa aa dansa, waru yindi ye epen a ɗa aa yuwusan. A ta dansa, <A̱sulazuva a ɗa a dammai,> agba A̱sulazuva a̱ lyungu le shi, reve a zuwa okolo adanshi e le a shiwan. 7 Alavu alavu e epen a ɗa ye enei shi, reve waru i damma ili i na yaa fara i yindi ye epen shi? A mantsa ma na i dammai, <A̱sulazuva a ɗa a dammai,> >> ko na wo o'woi n yuwan adanshi shi. 8 Adama o ndolo, apa ili i na A̱sulazuva Zagbain dammai, adama a adanshi e epen a̱ ɗu na alavu alavu e epen a̱ ɗu, n ta̱ a̱ nla̱ngi na̱ a̱ɗu, A̱sulazuva Zagbain ɗa a dammai. 9 Ukere u va̱ u ta̱ da̱na̱ a̱ nla̱ngi na ama̱sula̱ a na ee inda alavu alavu e epen aza a na aa dansa yindi ye epen. A̱ da̱na̱ a̱tsuma̱ o oɓolo a ama a̱ va̱ shi, ko aɗa le a̱tsuma̱ e mekece mo u'wa wa Isra'ila shi, ko a uwa e iɗa ya Isra'ila shi. Reve i reve a na a̱mu ɗa A̱sulazuva Zagbain. 10 <<Adama a na a̱ ta̱ pususa̱n ama a̱ va̱, a dansa, <Nden ma alafiya,> mantsa ma na babu nden ma alafiya. Waru adama a na a mantsa ma na a suwai uɓaɓu u vile vile reve a̱ma̱sula̱ nda a pala yi nu uruku u uri. 11 Adama o ndolo vu damma ama o ndolo aza a na a palasa yi na̱ mini ma̱ uri a na uɓaɓu'u u ta̱ riya̱. Mini mo ucira na atayan nu upepu wu ulungusu u to polo yi. 12 A mantsa ma na uɓaɓu'u wo ocoi, ama ee ece ɗu, <Te ɗa mini ma̱ uri ma na yi palaa niyi'i?> >> 13 Adama o ndolo apa ili i na A̱sulazuva Zagbain dammai, <<A̱tsuma̱ o upan u va̱ n ta zuwa upepu wu ulungusu u ɓoso o uta̱. Waru a̱tsuma̱ o upan u va̱ atayan o to oco na̱ mini mo ucira mo ukototosu. 14 N to polo uɓaɓu u na yi palai na̱ mini ma̱ uri'i a̱vu mo oco yi e iɗa adama ikyun ya̱ yi yo o'wo a alanga eteshe. A mantsa ma na wo ocoi i ta̱ kuwa̱ pe a̱tsuma̱ a̱ yi. Reve i reve a na a̱mu ɗa A̱sulazuva.>> 15 Ne ɗa ma̱ tsuwa̱n uɓaɓu'u na aza a na a sura niyi na̱ mini ma̱ uri upan u va̱. N ta damma ɗu, <<Uɓaɓu u nda buwa shi, ne ɗa waru aza a na a sura niyi. 16 Ama̱sula̱ a Isra'ila o ndolo aza a na a yuwain adanshi e ikaka adama a̱ Urishelima reve waru e ene alavu alavu a̱ nden ma alafiya ma̱ yi, mantsa ma na nden ma alafiya n ri lo shi, A̱sulazuva Zagbain ɗa dammai ne.>> 17 A̱vu gba mawun ma vuma, vu zuwa esu a̱ wu nla̱ngi ne esheli a ama a̱ wu, aza a na a yuwusan adanshi e ikaka ya̱ A̱sula̱ diga a majiyan mo okolo me ele. Damma ikaka a aci e le, 18 vu damma, <<Apa ili i na A̱sulazuva Zagbain dammai, a̱tsuma̱lima̱ a ta cina a̱ma̱ci aza a na a̱a̱ nla̱sa̱ ilawu e ekere e le suru waru aa yuwusan apalutsu o una̱ wu uga'an u vuma biti, adama aa azu ama. I ta yuwan maza ma wuma wa ama a̱ va̱ reve i lyawa wuma u ɗu wuma? 19 I lungusa̱ ta̱ ala a̱ va̱ a̱tsuma̱ a ama a̱ va̱ adama a yitabo wa'a adama waru a̱ mubishi mo opopofu wa'a. Uba̱ta̱ we epen a̱ ɗu ya aza a na oo polusoo epen atsuvu, yu una ta̱ aza a na a̱ shi a̱ kuwa̱ shi a̱vu i lyawa aza a na a̱ shi a̱ da̱na̱ wuma shi.>> 20 << <Adama o ndolo apa ili i na A̱sulazuva Zagbain dammai, n ta̱ a̱ nla̱ngi ilawu i ɗu i na yaa azusu wuma wa ama tsa̱ nnunu. N ta̱ gba a kasa le e ekere a̱ ɗu. N ta̱ ba̱ɗa̱ ama a na yaa azusu tsa̱ nnunu. 21 Apalutsu a̱ ɗu waru n ta kara le a̱vu n wawa ama a̱ va̱ e ekere a̱ ɗu. A buwa gba o'wo ili yu utamu e ekere a̱ ɗu shi. Reve i reve a na a̱mu ɗa A̱sulazuva. 22 I kuɗa ta̱ okolo a̱ za̱ va̱ a̱ɓula̱ ne epen a̱ ɗu. Ko na wo o'woi n ta̱wa̱a̱ le na̱ a̱tsumola̱ngu shi, reve waru i gbamato a̱za̱ e iwuya okolo adama a vadala a lyawa iwuya i le wan, adama aa wawa wuma u le wan. 23 Adama o ndolo, i buwa a̱ da̱shi ene alavu alavu e epen shi ko i da̱shi yuwan yindi ye epen shi. N ta wawa ama a̱ diga e ekere a̱ ɗu. Reve i reve a na a̱mu ɗa A̱sulazuva.> >>