1 A aa'wan a kupa ne ejere o woto u kupa ne ejere o urana wu ufaru u woto'o adanshi a̱ A̱sulazuva a̱ ta̱wa̱ ta̱ ya̱'a̱ va̱: 2 Mawun ma vuma, cana ishipa yu ula̱ngu a aci a Firi'awuna mogono ma Masar, vu damma yi, <<A̱vu vu ka̱mba̱to ta̱ aciya̱wu tsu kamu a̱tsuma̱ a nɗa. Agba vu ta̱ tsa̱ a̱dodo a̱tsuma̱ a mala, a̱ lukuta̱sa̱ ɗolu waru a̱ 'ya̱sa̱sa̱n mini na ana a̱ wu. Vu to umbusa mini mo ɗolu.>> 3 <<Apa ili i na A̱sulazuva Zagbain dammai, <N ta vari igolo i va̱ a aci a̱ wu a̱tsuma̱ o oɓolo a ama a̱ a̱bunda̱, reve o rono wu pe e igolo'o. 4 N ta vari wu e iɗa, a alanga eteshe maa vari wu. Reve n zuwa nnunu ma zuva n cipa̱ a aci a̱ wu, waru n ta̱ cuwa̱nto inama yu una nu uvaɗi ma̱ɓula̱ ni inama i lipu ya̱ wu. 5 N ta baza inama i lipu ya̱ wu a nsasan, waru n ta̱ shiton ka̱ri suru na̱ a̱kwa̱kwa̱ a̱ wu. 6 N ta̱ re'weto iɗa'a na̱ mpasa ma̱ wu hali a̱ tyo a nsasan, waru re mini a ta shiwan na̱ mpasa ma̱ wu. 7 A mantsa ma na mu disha nuwu, n ta pala zuva, reve n zuwa mutyolo'o mo o'wo irumbu. Reve waru n zuwa eleshe a pala urana, woto waru gba waa ca ekan shi. 8 Ili ye ekan a zuva suru o to o'wo irumbu e ekere a̱ wu, reve n zuwa irumbu a̱tsuma̱ e iɗa ya̱ wu. A̱mu A̱sulazuva Zagbain a̱mu ɗa n yuwain adanshi a nda. 9 N ta zuwa okolo a ama na̱ a̱bunda̱ a̱ 'yon, a mantsa ma na n ta̱wa̱yi nu ukototosu wa̱ wu a̱tsuma̱ a nɗa, hali a̱ tyo e iɗa i na vu revei shi. 10 N ta zuwa nɗa na̱ a̱bunda̱ a da'wan adama e ili i na yaa cina wu. Ngono waru n yuwan meje'en ma̱ lipu adama a̱ wu a mantsa ma na n vuta̱la̱i matsun me pe'eni ma̱ va̱ a̱ ma̱ka̱ka̱n me le. O urana u na vu riya̱i, suru nle a̱ ta̱ da̱na̱ a̱ meje'en ma̱ lipu, za suru ta̱ da̱na̱ aɗa a wuma wa̱ yi a mantsa suru.> >> 11 <<Adama a na apa ili i na A̱sulazuva Zagbain dammai, <Matsun me pe'eni mo mogono ma Babila ma̱ ta̱ riya̱ a aci a̱ wu. 12 N ta zuwa ama a̱ a̱bunda̱ a̱ kuwa̱ e ekere a aza a na a la'a gurai uvon na̱ matsun me pe'eni, aza a na e tse ene iliyali ya ama shi. A̱ ta̱ ka̱mba̱to aciyogbamu a Masar ili ye pere, waru a̱ ta̱ lungusa̱ ama a̱ a̱bunda̱ a̱ yi. 13 N to kototo iliyamunga ya̱ yi suru aza a na a̱ ri a alyuna a̱ nkyun mu ɗolu. Ana za lo na a̱ lukuta̱ mini'i shi, waru ana e iliyamunga yi lo na a̱ 'ya̱sa̱n mini'i shi. 14 N ta zuwa mini me le ma̱ da̱na̱ cece, reve waru n zuwa ɗolu e yene tsa mani'i. A̱sulazuva Zagbain ɗa dammai ne. 15 A mantsa ma na n ka̱mba̱toi iɗa ya Masar ookongo, waru a mantsa ma na mu kasai iɗa'a ni ili i na i ri pe a̱tsuma̱ a̱ yi suru na a mantsa ma na mu ga̱la̱i ama a na a̱ ri pe a̱tsuma̱ a̱ yi suru, a̱vu e reve a na a̱mu ɗa A̱sulazuva.> >> 16 <<A̱yi nda a̱yi ɗa ishipa yu ula̱ngu i na aa cana. Esheli a nɗa n ɗa maa cana ishipa'a. A ta yuwan ishipa yu ula̱ngu adama a Masar na ama a̱ a̱bunda̱ a̱ yi. A̱sulazuva Zagbain ɗa dammai ne.>> 17 O urana u kupa no ozo o ton o woto'o a̱tsuma̱ a aa'wan a kupa ne ejere'e, adanshi a̱ A̱sulazuva a̱ ta̱wa̱ ta̱ ya̱'a̱ va̱, 18 <<Mawun ma vuma, vu showen ama a̱ a̱bunda̱ a Masar. Vu ca̱co yi oɓolo na̱ nɗa mu ucira a̱ cipa̱ a̱ tyo uba̱ta̱ a̱ nden ma̱ a̱kwa̱kwa̱ oɓolo na ama a na a̱ cipa̱i ɗe pe a̱ a̱a̱ka̱ri a̱ a̱kwa̱kwa̱.>> 19 <<Vu damma le, <Zane ɗa vu la'ai ulobonu? Vu lapa a̱ cipa̱, vu von oɓolo na aza a na a paɗai uryumbu shi. 20 A ta̱ riya̱ e memere ma aza a na o unai na̱ matsun me pe'eni. A tala ta̱ matsun me pe'eni, lyawa a pura̱ yi oɓolo na ama a̱ a̱bunda̱. 21 Azagbain a na a gurai uvon na aza a na a kambusa le a ta raba le.> A ta yuwan adanshi diga uba̱ta̱ a̱ a̱kwa̱kwa̱ a damma, <A̱ cipa̱ ta̱ ɗe, apa le nven. Ele ama a ɗa a na a paɗai uryumbu shi, aza a na o unai na̱ matsun me pe'eni.> >>

22 <<Iɗa ya Asuriya i ta̱ ɗe na̱ a̱soja a̱ yi suru. Ason e le a̱ ta̱ uka̱nda̱ruwu na̱ a̱yi. O una le ta̱ suru na̱ matsun me pe'eni. 23 Ason e le a̱ ta̱ pe o ukosu wa̱ a̱ka̱ri a̱ a̱kwa̱kwa̱. A̱soja a̱ yi a̱ ka̱nda̱ruwa̱ ta̱ ason a̱ yi, o una le ta̱ suru na̱ matsun me pe'eni. Ele ɗa aza a na a̱ ta̱wa̱yi ni ili i wovon o uvaɗi wa aza a wuma. 24 Iɗa ya Elam i ta̱ ɗe na ama a̱bunda̱ a̱ yi suru uka̱nda̱ruwu na ason a̱ yi. O una le ta̱ suru na̱ matsun me pe'eni. A̱ ka̱ra̱ ta̱ a̱ cipa̱ na̱ nshinda̱ n le mu ulambu wu upaɗu wu uryumbu a̱ cipa̱ a̱ tyo uba̱ta̱ a̱ nden ma̱ a̱kwa̱kwa̱. Ele ɗa aza a na a̱ ta̱wa̱a̱ ni ili i wovon o uvaɗi wa aza a wuma. A uwwa ta̱ wono oɓolo na aza a na a̱ ka̱ra̱i a̱ cipa̱ a̱ a̱ka̱ri a̱kwa̱kwa̱. 25 O foɓoo yi ta̱ uba̱ta̱ e nven a̱tsuma̱ a̱ a̱kwa̱kwa̱ oɓolo na ama a̱ a̱bunda̱ a̱ yi. Suru n le a paɗa le uryumbu shi, aza a na o unai na̱ matsun me pe'eni. Adama a na a baza ta̱ nden n wovon a̱tsuma̱ o uvaɗi wa aza a wuma. A̱ ta̱ a̱tsuma̱ o wono oɓolo na aza a na a̱ za̱luwa̱i a̱ tyo a̱ a̱ka̱ri a̱ a̱kwa̱kwa̱. O ɓolo le ta̱ oɓolo na̱ a̱kwa̱kwa̱.>> 26 <<Iɗa ya Mesheke Tubala u ta̱ ɗe oɓolo na ama a̱ a̱bunda̱ a̱ yi suru, ason e le a̱ ta̱ uka̱nda̱ruwu ne ele. Suru nle ama a na o unai na̱ matsun me pe'eni aza a na a paɗai uryumbu shi. Adama a na ele ɗa aza a na a̱ ta̱wa̱i ni ili i wovon o uvaɗi wa aza a wuma. 27 O von zuzu na akapi a ama a gbain a na a gurai uvon shi aza a a na a paɗai uryumbu shi. Ele aza a na a̱ ka̱ra̱i a̱ cipa̱ a̱ tyo uba̱ta̱ a̱ nden wa̱ a̱kwa̱kwa̱ oɓolo ni itana yu uvon i le. A̱ ka̱mba̱to ta̱ mutsun mu pe'eni n le ili i mazuwa ma aci e le, a̱ra̱ga̱ e le waru a̱ ka̱mba̱ ta̱ ili i mapala me etele me le. Suru na azagbain a na a gurai uvon o o'wo ta̱ ili i wovon o uvaɗi wa aza a wuma. 28 A̱vu fo a̱ ta̱ lungusa̱ wu, reve i von a̱tsuma̱ a ama a na a paɗai uryumbu shi oɓolo na aza a na o unai na̱ matsun me pe'eni.>> 29 <<Iɗa ya Edom fo i ta̱ ɗe, ngono ma̱ yi na azagbain a̱ yi, a̱ ta̱ nven oɓolo na aza a na o unai na̱ matsun me pe'eni. A̱ ta̱ nven oɓolo na aza a na a paɗai uryumbu shi na aza a na a̱ ka̱ra̱i a̱ cipa̱ a̱ a̱a̱ka̱ri a̱ a̱kwa̱kwa̱.

30 <<Azagbain o ugana suru a̱ ta̱ ɗe, suru nle na aza a Sidon suru. A̱ ka̱ra̱ ta̱ a̱ cipa̱ a̱tsuma̱ o wono oɓolo na aza a na o unai, suru na̱ nden n wovon n na a zuwai ama adama o ucira u le. Gogo a̱ ta̱ nven oɓolo na̱ aza a na a paɗai uryumbu shi, aza a na o unai na̱ matsun me pe'eni. A ta uwwusa wono oɓolo na aza a na a̱ ka̱ra̱i a̱ cipa̱ a̱ tyo a̱a̱ka̱ri a̱ a̱kwa̱kwa̱. 31 A mantsa ma na Firi'awuna ene nle, u ta̱ tsura̱ nden mo okolo adama a ama a̱ yi suru, a̱yi na̱ a̱soja a̱ yi suru aza a na o unai na̱ matsun me pe'eni. A̱sulazuva Zagbain ɗa dammai ne. 32 Ko na wo o'woi n zuwai Firi'awuna zuwa wovon o uvaɗi wa aza a wuma, u to von oɓolo na aza a na a paɗai uryumbu shi, aza a na o unai na̱ matsun me pe'eni, a̱yi Firi'awuna na ama a̱ a̱bunda̱ a̱ yi suru. A̱sulazuva Zagbain ɗa dammai ne.>>