1 Reve adanshi a̱ A̱sulazuva a̱ ta̱wa̱ ya̱'a̱ va̱, 2 <<Mawun ma vuma, vu yuwan adanshi na ama a̱ wu vu damma le, <A mantsa ma na n talai matsun me pe'eni a aci e iɗa i ro, reve ama e iɗa'a a ɗangwa vuma ta̱ a̱tsuma̱ e le, a̱vu a zuwa yi wo o'wo za vi ipiri i le, 3 na̱ we ene matsun me pe'eni a̱ ta̱wa̱ e iɗa'a reve wi ivula̱ aavana adama u revetyo ama'a, 4 a̱vu vuma ro uwwa mesun ma aavana'a, agba u zuwa ugbozu shi. Na̱ matsun me pe'eni ma̱ ta̱wa̱ a̱vu wu una yi, mpasa ma̱ yi n ta̱ da̱na̱ a aci a̱ yi. 5 Ana wo o'woi wu uwwa ta̱ mesun ma aavana'a agba u ka̱mbuwa̱ ugbozu shi, mpasa ma̱ yi n ta̱ da̱na̱ a aci a̱ yi. Agba nu u ka̱mbuwa̱ ugbozu o urevetyowu'u, u ta wawa aciya̱yi. 6 Agba na̱ za vi ipiri ene matsun me pe'eni a̱ ta̱wa̱, agba wi ivula̱ aavana adama u ca ama urevetyowu shi, hali matsun me pe'eni'i u ta̱wa̱ wu una vuma a̱tsuma̱ e le, vuma na o unai u kuwa̱ ta̱ adama o unusu wa̱ yi, amma n te ece mpasa ma̱ yi e ekere a za vi ipiri'i.> >>

7 <<Mawun ma vuma, n zuwa wu ta̱ za vi ipiri vu u'wa wa Isra'ila. Adama o ndolo, mantsa ma na vu uwwai adanshi diga o una u va̱, vu revetyo le. 8 Nna̱ n damma za vi iwuya, <A̱vu vuma vi iwuya vu ta̱ kuwa̱, ili yi lo shi vu ta̱ kuwa̱,> na̱ a̱vu gba vu yuwan adanshi tsa̱ra̱ vu revetyo vuma vi iwuya'a shi adama u vadala u lyawa mayan me iwuya shi, za vi iwuya ndolo u ta̱ kuwa̱ a̱tsuma̱ a mayan mo unusu ma̱ yi. Agba n te ece mpasa ma̱ yi e ekere a̱ wu. 9 Agba na̱ vu revetyo za vi iwuya'a tsa̱ra̱ u vadala u lyawa mayan me iwuya, reve u 'yuwan a vadala u lyawa mayan me iwuya ya̱ yi, u ta̱ kuwa̱ adama o unusu wa̱ yi. A̱vu gba vu ta wawa wuma wa̱ wu.>>

10 <<A̱vu mawun ma vuma, vu damma ama o u'wa wa Isra'ila apa ili i na yaa dansa, <Mayan ma̱ nusu tsu na̱ nusu tsu oɓolo a yuwan tsu ta̱ ume lon, waru tsu ta̱ la̱nga̱sa̱ adama e le. Cine tsa ɗa tsaa yuwan wuma?> >> 11 <<Vu damma le, <A̱mu A̱sulazuva Zagbain, amayun n kucina ta̱ na̱ wuma u va̱, ma uwwusa uyo'o wu ukwa̱ u vuma mayan me iwuya shi, agba n la'a ta̱ ciga u vadala u lyawa mayan me iwuya tsura̱ u la'a. I vadala! I vadala i lyawa mayan me iwuya! Adama a̱ nye ya̱a̱ kuwa̱, A̱ɗu u'wa wa Isra'ila?> >> 12 <<Gogo mawun ma vuma, vu damma ama a̱ wu a na, <A̱ɓula̱, a̱ɓula̱ a vuma a wawa yi shi nna̱ u 'yuwan a yuwan tsutoni. Waru iwuya yi za vi iwuya waa zuwa yi u riya̱ shi nna̱ u vadala u lyawa mayan me iwuya. Ne ɗa waru na̱ za va̱ a̱ɓula̱ yuwan unusu, aa lyawa yi wuma adama a̱ a̱ɓula̱ a na u shi a yuwusan shi.>

13 <<Nna̱ n damma za va̱ a̱ɓula̱ na amayun u ta̱ a la'a, reve u zuwa ucira a̱ a̱ɓula̱ a na waa yuwusan, reve u ka̱ra̱ a yuwusan iwuya. Aa cuwan na̱ ko ulinga wa̱ a̱ɓula̱ u ta̱ u na u shi u yuwain ɗe shi. Agba u ta̱ kuwa̱ adama e iwuya i na u yuwain. 14 Waru nna̱ n damma za mayan me iwuya, <Amayun vu ta̱ kuwa̱.> Agba nu u vadala u lyawa mayan mo unusu, u yuwan a̱ɓula̱ ni ili i na i ri mejege, 15 nu u ka̱mbuwa̱ ili i na u ushiyi o una̱ wu utan waru ni ili i na wi iva̱i reve u toni wila̱ na vaa casu wuma, a̱vu u lyawa mayan me iwuya, amayun u ta la'a, wa̱a̱ kuwa̱ shi. 16 Nusu va̱ yi na u yuwain nu ujumu, ko za ta̱ aa cuwan a aci a̱ yi shi. Ana wo o'woi u yuwain ili ya̱ a̱ɓula̱ na̱ mejege, amayun u ta̱ la'a.

17 <<Agba suru na̱ ne ama a̱ wu a damma, <Ure wa̱ A̱sulazuva u ri mejege shi.> Re le ɗa ri mejege shi. 18 A mantsa ma na vuma va̱ a̱ɓula̱ vadalai u lyawai mayan ma̱ a̱ɓula̱, reve u reme mayan me iwuya, u ta̱ kuwa̱ adama a̱ nusu va̱ yi. 19 Agba na̱ za vi iwuya'a u vadala u lyawa mayan me iwuya, reve u reme mayan ma̱ a̱ɓula̱ na̱ mejege, u ta la'a adama e ili i na u yuwain. 20 Agba suru na̱ ne reve i damma, <Ure wa̱ A̱sulazuva u ri mejege shi.> A̱vu u'wa wa Isra'ila, n ta̱ ge'eto za suru o una̱ vu linga va̱ yi.>>

21 O urana wa tawun u woto u kupa ne ejere, a aa'wan a kupa ne ejere u tsugbashi tsa̱ tsu, vuma ro na la'ai diga Urishelima ta̱wa̱ ta̱ ya̱'a̱ va̱, a̱vu u damma, <<Lyuci'i u riya̱ ta̱.>> 22 Kafu vuma'a u rawa ya̱'a̱ va̱, ukere wa̱ A̱sulazuva u shi ta̱ ɗe u ju'wa̱n aci a̱ va̱ nu ulivu. Waru u shi ta̱ ɗe u kpa̱tu'wa̱ una̱ u va̱ a mantsa ma na vuma'a u ta̱wa̱i nu usana. Una̱ u va̱ ukpa̱tu'u, n da̱na̱ kpaku waru shi.

23 Reve adanshi A̱sulazuva a̱ ta̱wa̱ ya̱'a̱: 24 <<Mawun ma vuma, ama a na a̱ ri nden o ookongo a̱tsuma̱ e iɗa ya Isra'ila a ta dansa, <Ibrahim vuma ta̱ ɗa shi, agba suru na̱ ne iɗa'a ma̱ɓula̱ yo o'wo ta̱ za va̱ yi. A̱tsu ɗa nda a̱bunda̱ lon, amayun a ca tsu ta̱ iɗa'a yoo o'o agadu a̱ tsu.> 25 Adama o ndolo, <Apa ili i na A̱sulazuva Zagbain dammai: A na i ri a tamusa inama na̱ mpasa ma̱ yi, reve waru i zuwa esu a̱ musula̱, waru i ka̱ra̱ ocosu mpasa, i ta majiyan iɗa'a i to o'wo agadu a̱ ɗu? 26 I zuwa ta̱ ucira a̱ matsun me pe'eni ma̱ ɗu. Reve i ka̱ra̱ a yuwusan ili yi idaba. Suru nɗu i ta yuwusan tsipere na̱ ka moron ma̱ nden n ɗu, a majiyan ma̱ ɗu iɗa'a i to o'wo agadu a̱ ɗu?>

27 <<Vu damma le ili i nda, <Apa ili i na A̱sulazuva Zagbain dammai, n kucina ta̱ na̱ wuma u va̱, a̱za̱ a na a̱ ri a̱ nden a̱tsuma̱ okongo, a̱ ta̱ o una le na̱ matsun me pe'eni. Inama yu una i ta tama aza a na a̱ ri a̱ nden o ogozo. Aza a na gba a̱ ri a pa'atan vu ucira na̱ a̱tsuma̱ a̱ a̱bunu, mɓa̱la̱ n ɗa moo una le. 28 N ta̱ ka̱mba̱to iɗa'a asa'a ni ili ye pere. Ucira u na waa yuwusaan uvaɗu u to koto. Nsasan ma Isra'ila o to o'wo asa'a ni ili i wovon na za lo na aa gura toni na̱ pe shi. 29 A mantsa ma na n ka̱mbuwa̱i iɗa'a asa'a ni ili ye pere adama e ili yi idaba i na a yuwain, e te reve a na a̱mu ɗa A̱sulazuva.> >>

30 <<Gogo, mawun ma vuma, ama a̱ wu a ta yuwusan adanshi a̱ wu o ukari. A na̱ntsu vu 'wa a ta yuwusan adanshi, a n dammulai a dansa, <Ta̱wa̱ yu uwwa ikaka i na i ta̱wa̱i diga uba̱ta̱ wa̱ A̱sulazuva.> 31 A̱ tsu ta̱wa̱ ta̱ uba̱ta̱ wa̱ wu cine ama a̱ tsu ta̱wa̱. A̱ tsu da̱nu ta̱ a̱ ma̱ka̱ka̱n ma̱ wu she damma ama a̱ a̱ɓula̱ a ɗa. A tsu uwwa ta̱ ili i na vaa dansa, agba oo toni shi. Adama a na nu una̱ u ɗa oo rocosu na ele ama a sa'ani a ɗa, agba a zuwa ta̱ okolo e ili i na yaa uwusa le yu uwuyanu. 32 A̱yi ɗa nda e ekere e le, vo o'o ta̱ tsu za vi ishipa yi icigi, za na tsu cana ishipa nu uɗyo wu uyo'o na̱ madaniyan ma amayun. A ta uwwusa ili i na vaa dansa, agba ili'i i ju'wa̱n okolo e le shi.

33 <<Agba ni ili i vama i nda i cina le, agba amayun u ta fara. A̱vu e reve a na vuma va̱ A̱sula̱ da̱na̱ ta̱ e memere me le.>>