1 A aa'wan a̱ cindere, o woto wa tawun, o urana wa kupa u woto'o, azagbain a Isra'ila o ro a̱ ta̱wa̱ ta̱ e izami yi ili i na A̱sulazuva a cigai, a̱vu a̱ da̱nu a̱ ma̱ka̱ka̱n ma̱ va̱.

2 Ɗaɗa adanshi a̱ A̱sulazuva a̱ ta̱wa̱i uba̱ta̱ u va̱,

3 <<Mawun ma vuma, yuwan adanshi na azagbain a Isra'ila a̱vu vu damma le, <Apa ili i na A̱sulazuva Zagbain dammai. I ta̱wa̱ ta̱ izami i va̱? Amayun na̱ n ri wuma, maa lyawa ɗu i zami mu shi, ne ɗa A̱sulazuva Zagbain dammai.> >>

4 <<Vu ta̱ ge'eto le? Vu ta̱ ge'eto le mawun ma vuma? Vu ɓara le e reve ili yi idaba i na nan dada le a yuwain. 5 Vu damma le, <Apa ili i na A̱sulazuva Zagbain dammai, O urana u na n ɗangwai aza a Isra'ila, n kucina ta̱ nu u'ya̱susa̱n wu ukere a̱ tyo o ugundo wa Yakubu a̱vu n roco le aciya̱va̱ a̱tsuma̱ a Masar.> >> N 'ya̱sa̱n ta̱ ukere a̱vu n kucinaa nle, <<A̱mu A̱sulazuva a ɗa A̱sula̱ a̱ ɗu.>> 6 O urana u ndolo n kucinaa le ta̱ a na n to uta̱a̱ le a̱tsuma̱ a Masar a̱ tyo e iɗa i na n zamiya nle, iɗa i na yee yeneshe maani ni ishiki, iɗa i na i la'ai iɗa suru aba'un. 7 A̱vu n damma le, <<Za suru u tawa ili yi idaba i na i tsu lungusa̱ majiyan, she i lungusa̱ aciya̱ɗu na̱ musula̱ ma aza a Masar wan. A̱mu A̱sulazuva a ɗa A̱sula̱ a̱ ɗu.>>

8 <<Agba a̱vu a̱ 'ya̱sa̱a̱n mu aci, a ciga a zuwaa mu atsuvu shi. A tawa ili yi idaba i na ya̱a̱ lungusa̱ majiyan me le shi, agba a kasa na̱ musula̱ ma aza a Masar shi. Ɗaɗa n dammai n to ocowo le nu upan u va̱, a̱vu gba n kototo ɗe upan u va̱ a aci e le a̱tsuma̱ a Masar. 9 Amma adama n geshe ala a̱ va̱ ɗaɗa n yuwain ne, tsa̱ra̱ ama a na ama a̱ va̱ a̱ ri na̱ nden a̱tsuma̱ e le a tara ala a̱ va̱ ivama wan, adama a na n rocoi aciya̱va̱ e ekere a aza a Isra'ila a̱ ma̱ka̱ka̱n ma akapi a ama a mantsa ma na mu uta̱a̱ nle diga a̱tsuma̱ a Masar. 10 Adama o ndolo a ɗa mu uta̱a̱ nle a̱tsuma̱ a Masar ɗaɗa n ta̱wa̱to nle a̱tsumona. 11 A̱vu n ca le ili i na n zuwai, na̱ wila̱ u va̱. Za na suru yuwain tsutoni ne ele u ta la'a. 12 Babu na̱ a̱yi a̱vu n ca le urana wa Ashibi iroci ne ele na̱ a̱mu, adama e reve a na a̱mu A̱sulazuva a̱mu ɗa n ka̱mba̱to nle na akiza. 13 Na̱ ne suru aza a Isra'ila a̱ 'ya̱sa̱a̱n mu ta̱ aci a̱tsumona. O toni ili i na n zuwai shi amma a̱vu a 'yuwan wila̱ u va̱, ko na wo o'woi za na suru yuwain tsutoni ne ele u ta la'a. Agba a tara urana wa Ashibi u va̱ ili i ro shi suru suru. Ɗaɗa gba n dammai n to ocowo le nu upan a̱vu n kototo le a̱tsumona. 14 Amma tsa̱ra̱ n geshe ala a̱ va̱ ɗaɗa n yuwain ne shi, tsa̱ra̱ she a tara ala a̱ va̱ ivama a̱ ma̱ka̱ka̱n ma nɗa aza a na mu uta̱yi na ama a̱ va̱ a̱ ma̱ka̱ka̱n me ele wan. 15 Waru n kucinaa le ta̱ a̱tsumona nu u'ya̱susa̱n wu ukere, a na ma̱a̱ 'ya̱wa̱to le e iɗa i na n ca nle shi, iɗa yu umili, a̱yi ɗa iɗa i na yee yeneshe maani ni ishiki, iɗa i na i la'ai iɗa suru aba'un. 16 N yuwan ta̱ tsundolo adama a na a 'yuwain wila̱ u va̱, waru o toni ili i na n zuwai shi. A̱vu waru a̱ ka̱mba̱to urana wa Ashibi ili ye pere, adama a na okolo e le a la'a ta̱ ciga a̱ma̱li e le. 17 Na̱ ne suru, n ka̱lyuwa̱ le ta̱ ne esu a sa'ani, mu una le suru suru a̱tsumona shi.>> 18 Reve n damma muwun n le a̱tsumona, <<She i toni ili i na nan dada a̱ ɗu a yuwain wan, ko i toni wila̱ u le ko i lungusa̱ aciya̱ɗu na̱ a̱ma̱li e le. 19 A̱mu ɗa A̱sulazuva A̱sula̱ a̱ ɗu, i toni ili i na n zuwai reve waru i toni ben na̱ wila̱ u va̱. 20 I tara urana wa Ashibi na akiza, adama a na ele iroci i ɗa e ekere a̱ ɗu na̱ a̱mu. Tsundolo tsa ɗa yee reve a na a̱mu A̱sulazuva A̱sula̱ a̱ ɗu a ɗa.>>

21 <<Amma muwun n 'ya̱sa̱a̱n mu ta̱ aci. O toni ili i na n zuwai shi, a yuwan tsutoni na̱ wila̱ u va̱ shi. Ko na wo o'woi za na yuwain tsutoni ne ele u ta la'a adama e le. A tara urana wa Ashibi u va̱ ili i ro shi. Ɗaɗa gba n dammai n to oco upan u va̱ a aci e le a̱vu n kototo upan u va̱ aci e le a̱tsumona. 22 Amma n yuwan ta̱ asuvu, adama n geshe ala a̱ va̱, adama a tara ala a̱ va̱ ili ye pere a̱ ma̱ka̱ka̱n ma ama wan, aza a na esu e le a ɗa mu uta̱a̱ nle a̱tsuma̱ a Masar. 23 Na̱ ne suru n kucinaa le ta̱ a̱tsumona a na n ta bete'we le a̱tsuma̱ a ama na̱ ba̱ta̱ ba̱ta̱ a̱tsuma̱ a nɗa. 24 Adama a na a 'yuwain a yuwan tsutoni na̱ wila̱ u va̱. A̱vu a 'yuwan ili i na n zuwai, waru a tara urana wa Ashibi u va̱ ili i ro shi, ɗaɗa majiyan me le ma̱ ka̱mba̱i uba̱ta̱ wa̱ a̱ma̱li a nan dada le. 25 Babu na̱ ndolo n ca le ta̱ ili i na oo toni aza a babu a̱ɓula̱ na̱ wila̱ u na aa gura tsura̱ wuma o ure u le shi. 26 N lyawa le ta̱ o o'wo idaba na aciyele o ure u na a casu une'e u muwun mu ufaru n le suru. N yuwan ta̱ ne adama n shiton le na̱ a̱tsuma̱lima̱ a̱ a̱bunda̱ tsa̱ra̱ e reve a na a̱mu ɗa A̱sulazuva.>>

27 <<Adama o ndolo, mawun ma vuma, yuwan adanshi na aza a Isra'ila a̱vu vu damma le, <Apa ili i na A̱sulazuva Zagbain dammai, ne tsunda tsa ɗa nan dada ɗu a yuwaan numu unusu a na a lyawa numu. 28 Ana n ta̱wa̱to nle a̱tsuma̱ e iɗa i na n kucinaa nle na maa ca le, a̱vu e ene agaɗi na̱ ɗanga va̱ a̱vu'un, lo ɗa a cayi kucci le, a cayi kucci na zuwa numu upan, a ca ili i ma̱guru a̱vu waru a ca kucci vi ili yo oso. 29 Reve n damma le, nye i ɗa agaɗi a na ya̱a̱ 'ya̱wusa̱? Hali na ana'an a̱ tsu ɗe yi ta̱ Bama.> >>

30 <<Adama o ndolo vu damma u'wa wa Isra'ila, <Apa nda ili i na A̱sulazuva Zagbain dammai, i ta̱ lungusa̱ aciya̱ɗu cine nan dada a̱ ɗu a yuwain a̱vu a ciga ili yi idaba? 31 Adama a na ni i ca uneꞌe i ca muwun n ɗu tsa̱ra̱ a̱ kula̱to le a akina, i lungusa̱ ta̱ aciya̱ɗu na̱ a̱ma̱li a̱ ɗu suru hali ana'an. A majiyan ma̱ ɗu n ta lyawa ɗu i zami a̱sa̱la̱ ya̱'a̱ va̱ a̱ɗu aza a Isra'ila? Na̱ n ri wuma maa lyawa ɗu i zami mu shi,> >> ne ɗa A̱sulazuva Zagbain dammai. 32 <<Majiyan ma na yaa yuwusan o okolo a dansa, <Lyawa tso o'wo tsa akapi a nɗa, na akapi o gundo na buwai aza a na a yuwusaan ɗanga oɓolo na atali a̱ga̱nda̱.> >> Cu'un ndolo aa fara shi. 33 Amayun na̱ n ri wuma, ili i na A̱sulazuva Zagbain dammai, n ta yuwan tsugbain a aci a̱ ɗu nu ukere wu ucira, oɓolo nu upan wa̱ a̱bunda̱. 34 Nu ukere wu ucira nu ulinga wa asalama oɓolo nu upan u ɗa moo uta̱a̱ ɗu a̱tsuma̱ a nɗa, a̱vu m ɓoloto ɗu diga a nɗa n na m bete'we nɗu. 35 N ta̱ ta̱wa̱to ɗu a̱tsumona. Ne ɗa maa ga'an na̱ a̱ɗu esu esu, a̱vu n ge'eto ɗu. 36 Cine n ge'etoi nkaya n ɗu a̱tsumona e iɗa ya Masar, ne ɗa mee ge'eto ɗu, ne ɗa A̱sulazuva Zagbain dammai. 37 N ta zuwa za suru a̱tsuma̱ a̱ ɗu u ka̱ra̱la̱i a aaɗanga a̱ va̱, waru n ta̱ ta̱wa̱to ɗu a̱tsuma̱ a akucunu a na n yuwain na̱ a̱ɗu. 38 N to uta̱a̱ na aza a na a̱ ri na aciyogbamu a̱tsuma̱ a̱ ɗu, aza a na a̱ 'ya̱sa̱sa̱a̱n mu aci. N to uta̱a̱ le a̱tsuma̱ e iɗa i na a yuwusan nden n limocin, agba koto a uwa a̱tsuma̱ e iɗa ya Isra'ila shi. Ɗaɗa yee reve a na a̱mu ɗaɗa A̱sulazuva.

39 <<A̱ɗu u'wa wa Isra'ila, apa ili i na A̱sulazuva Zagbain dammai, 'ya̱wa̱i i yuwaan a̱ma̱li a̱ ɗu a̱ga̱nda̱, suru nɗu i lyuwa elime! Agba na̱ a̱ca̱pa̱ amayun i ta̱ ta̱wa̱ i zuwaa mu atsuvu waru ya̱a̱ da̱shi tara ala a akiza a̱ va̱ ili ye pere shi adama o uneꞌe na̱ a̱ma̱li a̱ ɗu. 40 Adama a na a masasan ma akiza ma̱ va̱, masasan mo uga'an ma Isra'ila A̱sulazuva Zagbain dammai, ɗe e iɗa'a ugundo wa Isra'ila suru waa yuwaan mu a̱ga̱nda̱. A̱vu n ushi le. Ɗe ɗa maa zami ucasu u ɗu na̱ uneꞌe u ɗu u na u la'ai ulobonu oɓolo na̱ kucci va akiza ɗu suru. 41 N ta̱ ushi ɗu cine i revei ili i ma̱guru ana mu uta̱a̱ nɗu a̱ nɗa reve m ɓoloto ɗu diga uba̱ta̱ u na n shi m bete'we nɗu. Reve n roco aciya̱va̱ akiza a̱tsuma̱ a̱ ɗu a̱ ma̱ka̱ka̱n ma nɗa. 42 I te reve a na a̱mu ɗa A̱sulazuva, mantsa ma na n ta̱wa̱to nɗu a̱tsuma̱ e iɗa ya Isra'ila, iɗa i na n kucinai nu u'ya̱susa̱n we ekere n ta nkaya n ɗu. 43 Ɗe ɗa yaa cuwan na̱ linga ni ili i na i yuwain suru i na i lungusa̱i aciya̱ɗu ne ele. I ta̱ 'yuwan aciya̱ɗu adama a linga vi iwuya i na i yuwain suru. 44 I te reve a na a̱mu ɗa A̱sulazuva, mantsa ma na n yuwain na̱ a̱ɗu tsa̱ra̱ a ca ala a̱ va̱ tsugbain, amma adama a linga vi iwuya i na i yuwain ɗa shi, ko linga vi idaba i na i yuwain, a̱vu u'wa wa Isra'ila. A̱mu A̱sulazuva ɗa a yuwain adanshi.>>

45 Ɗaɗa adanshi a̱ A̱sulazuva a̱ ta̱wa̱i uba̱ta̱ u va̱, 46 <<Mawun ma vuma, vu ka̱lyuwa̱ uyagi, a̱vu vu yuwan adanshi a aci a̱ yi, vu yuwan adanshi e ikaka ya̱ A̱sula̱ a aci a̱ a̱rumbu a na a̱ ri uyagi. 47 Vu damma a̱rumbu o uyagi, <Uwwa adanshi a̱ A̱sulazuva. Apa ili i na A̱sulazuva Zagbain dammai: n te ifoɓi i na maa daɓa ɗu akina, waru u to una ɗanga ɗu suru, ili na i ri ulima̱ nu u'yewu. Akina a̱ ma̱kula̱ u ri n kimusa̱ shi. Akina a̱ ma̱kula̱ u ta lyuwa ili i na u tsura̱i biti diga uyagi a̱ tyo ugana. 48 Vuma suru te reve a na a̱mu A̱sulazuva a̱mu ɗa n daɓai akina'a, waru babu za na aa gura kimusa̱ yi.> >>

49 Reve n damma, <<A̱sulazuva Zagbain! A ta dansaa mu, <Ni iroci i ɗa waa yuwusan adanshi shi?> >>