1 Reve vuma'a u ta̱wa̱to mu a alanga a̱ a̱a̱'isa̱'a̱ reve u rito ugba̱mu wu uɓaɓu'u. Eɓele suru washin wa̱ yi akatsu a̱ ta̱li. 2 Washin wu u'uwata akatsu kupa ɗa. Upasu suru wu u'uwata'a u ta̱ nu uɓaɓu wu uga'an u na u ri akatsu o ton. A̱vu waru u rito uga'an wa̱ a̱a̱'isa̱'a̱ akatsu amunga, washin waru akatsu ushin.

3 Reve u uwa a aasula a̱ a̱tsuma̱ a̱vu u rito washin wu uɓaɓu wu u'uwata'a upasu biti akatsu ure. U'uwata'a washin wa̱ yi akatsu uta̱li. Washin wu uɓaɓu we eɓele suru wu u'uwata'a akatsu ucindere. 4 Reve u rito uga'an wa aasula a̱ a̱tsuma̱ wa̱ a̱a̱'isa̱, uga'an wa̱ yi akatsu ushin. Washin wa a̱yi waru akatsu ushin diga o ufaru a̱ tyo o ukosu. A̱vu u damma mu, <<A̱yi nda a̱yi ɗa Upasu u na u La'ai Akiza.>>

5 Reve u rito uɓaɓu wa̱ a̱a̱'isa̱'a̱, ugba̱mu wa̱ yi akatsu uta̱li, washin wa aasula we eɓele suru akatsu una̱shi a̱ ka̱nda̱ruwa̱. 6 Asula a̱ nge'e'en suru a suwa le ta̱ ukurula̱i uta'atsu, za ta̱ zuva vu za va̱ yi, asula mata'atsu o ukuruwu u ta̱ ugeru. Ili i na i guza̱i asula a̱ nge'en a nda a̱ ta̱ ushuwu gon a aci a za na ri za̱la̱ va̱ yi cine wa̱a̱ ba̱ma̱ asula'a na̱ a̱a̱'isa̱'a̱ shi. 7 Ugeru suru washin wa̱ yi u la'a ta̱ washin wu ugeru u na u ri za̱la̱ va̱ yi. Usaa u na u ri uka̱nda̱ruwu na̱ a̱a̱'isa̱'a̱ a suwa yi ta̱ ukumbulai ukumbulai, tsa̱ra̱ asula'a a̱ da̱shi washin hali a rawa zuva vu usaa'a. Reve a suwa udasata u ro u na wu ba̱ruwa̱i diga e iɗa a rawa memere mo usaa'a hali a rawa zuva vu usaa'a.

8 Me ene ta̱ waru a na a suwai A̱a̱'isamapaɗa e ikyun i na a̱ 'ya̱sa̱in a̱ ka̱nda̱ruwa̱ i na yo o'woi ikyun ya asula a̱ nge'en. Uga'an wa̱ yi wu rumu vu uritosu u ɗa akatsu uta̱li. 9 Ugba̱mu wu uɓaɓu wa alanga we eɓele wa asula'a u shi ta̱ akatsu o ton. Washin wa agalaci a na a̱ ri e memere ma asula e eɓele a̱ A̱a̱'isa̱mapaɗa, 10 na asula a nan ganu akatsu ushin washin a̱ ka̱nda̱ruwa̱ A̱a̱'isamapaɗa. 11 Na̱ntsu re shi ta̱ lo ukpa̱tu'u a asula e eɓele a agalaci, za ta̱ upasu wu ugana za ve ire waru upasu wu uyagi. Washin wi ikyun u na u ka̱nda̱ruwa̱i A̱a̱'isamapaɗa'a na asula'a o usaa na agalaci'i akatsu uton. 12 Usaa u na wa̱a̱ ka̱lyuwusa̱ ukowo wa̱ A̱a̱'isamapaɗa'a nu upasu wa̱ a̱livu washin wa̱ yi akatsu kupocindere. Ugba̱mu wa̱ yi akatsu uton a̱ ka̱nda̱ruwa̱, uga'an wa̱ yi waru akatsu kupakucci.

13 Reve u rito A̱a̱'isamapaɗa'a uga'an wa̱ yi ukere ukpaku u ɗa. Reve ukowo wa̱ A̱a̱'isamapaɗa'a nu usaa na̱ ɓaɓu va̱ yi suru ele fo uga'an u le akatsu ukpaku. 14 Washin wu ukowo wa̱ A̱a̱'isamapaɗa'a upasu wa asana, oɓolo ne elime a̱ A̱a̱'isamapaɗa'a, akatsu ukpaku. 15 Reve u rito uga'an e iɗa wu usaa'a a̱ ka̱lyuwusa̱ ukowo na̱ a̱ca̱pa̱ a̱ A̱a̱'isamapaɗa'a oɓolo na asula a na a̱ ri e eɓele ra ra ra uga'an wa̱ yi akatsu ukpaku. A̱a̱'isa̱'a̱ na aasula a̱ a̱tsuma̱ nu ukobu wa̱ yi, 16 oɓolo na akpata a̱ nge'en nu usowoto wu upepu u wa'a, na asula a̱ ka̱nda̱ruwa̱ mata'atsu me le. Ɓaɓu va̱ a̱tsuma̱ va̱ A̱a̱'isa̱'a̱ oɓolo na akpata a̱ nge'e'en a vara le ta̱ na akpata a sa'ani zuva na̱ za̱la̱ vu usowoto wu upepu. 17 Ure u na u ri zuva vu una̱ntsu u na u ri a̱ tyo a aasula a̱ a̱tsuma̱, na̱ ɓaɓu va̱ yi a̱tsuma̱ na alanga a vara le ta̱ fo. 18 Suru ɓaɓu'u a kala le ta̱ na̱ she'en vi ikerobobi, za ta̱ suru nu urewesu ure. Reve a yuwan ushe'en wu ushuwa e memere ma kerobi suru. 19 Nu urewesu wu vaɗilima̱, a̱ ka̱lyuwusa̱ upasu wu ushuwa upasu u na. Urewesu u ro, wu za makamu, a̱ ka̱lyuwusa̱ upasu wu ushuwa nu upasu u ndeɗe. E she'en ta̱ ruma'a a̱ ka̱nda̱ruwa̱ a̱ A̱a̱'isamapaɗa'a suru. 20 Diga e iɗa a̱ tyo gon vu una̱ntsu'u, e she'en ta̱ nan kerobobi na̱ shuwa, ne ɗa waru na a alanga a̱ a̱a̱'isa̱'a̱.

21 Alanga a̱ a̱a̱'isa̱'a̱ a yuwaan yi ta̱ aakpata o una̱ntsu washin nu uga'an ili i ta̱. Za na waru ri o una̱ntsu we elime wu Upasu u na u La'ai Akiza a yuwan yi ta̱ una̱ta̱. 22 Masa'a ma akpata ma̱ shi ta̱ lo uga'an wa̱ yi akatsu uta'atsu nu uga'an wa̱ yi e iɗa akatsu ure una̱ta̱. Obolu a̱ yi ni ikyun ya̱ yi ne eɓele aza a akpata a ɗa. A̱vu vuma'a u damma mu, <<A̱yi nda a̱yi ɗa apada a na a̱ ri a̱ ma̱ka̱ka̱n ma̱ A̱sulazuva.>> 23 A̱a̱'isa̱'a̱ nu Upasu u na u La'ai Akiza a̱ ta̱ na̱ na̱ntsu re re ra ra ra le. 24 Una̱ntsu suru u ta̱ ne epete e re, epete o ukpa̱tu'usa̱ e re o una̱ntsu u ta̱. 25 Ɗe a̱ na̱ntsu va alanga va̱ a̱a̱'isa̱ e she'en ta̱ ɗe kerobi na̱ shuwa tsa aza a na e she'ein a ɓaɓu. Waru akpata a̱ shi ta̱ lo usa̱ga̱da̱wu elime o una̱ntsu u ma'uwaa. 26 A ɓaɓu ve eɓele vu ukobu'u sowoto vu upepu wawa'a shi ta̱ lo na̱ she'en vu ɗanga vu shuwa e eɓele suru. Asula e eɓele a̱ A̱a̱'isamapaɗa'a fo a̱ shi ta̱ na̱ kwa̱'a̱.