1 Adanshi A̱sulazuva a̱ ta̱wa̱ ta̱ ya̱'a̱ va̱, 2 Mawun ma vuma, a̱ma̱ci e re a̱ ta̱ lo, esheli a na a̱ ri mma ta̱. 3 O'wo ta̱ aashakala a̱tsuma̱ a Masar, a̱ 'yon ta̱ na̱ tsushakala diga ele a̱ muwun, ɗe ɗa o kpoko nle agaɓa waru o moɗo nle. 4 Ohola ɗa aala a zakpara, zawa'a va̱ yi waru a̱yi ɗa Oholiba. Ele a̱za̱ a̱ va̱ a ɗa a̱vu a matsan olobo ne esheli. Adama a ala e le gba, Ohola a̱yi ɗa Samariya, Oholiba waru a̱yi ɗa Urishelima.

5 Ohola yuwan ta̱ tsushakala mantsa ma na u da̱na̱i za va̱. U da̱na̱ ta̱ a maluwa ma̱ a̱za̱ e icigi ya̱ yi aza a Asuriya, a̱soja a na a gurai uvon, 6 wotowu na̱ a̱tugu mini ma̱ bulu, nan gwamna na azagbain, suru nle olobo a sa'ani a ɗa, akumbi e ido zuva vi ido. 7 U ca ta̱ aciya̱yi a tsushakala uba̱ta̱ wa aza a Asuriya na a la'ai ulobonu suru, reve u lungusa̱ aciya̱yi na̱ a̱ma̱li a aza na waa uwwusa maluwa lipu. 8 U lyawa tsushakala tsa na u farai diga Masar shi, a mantsa ma na u da̱na̱i o usheli wa̱ yi ali o vosun ta̱ na̱ a̱yi, waru o kpokoi ta̱ maani a̱vu a̱ cuwa̱ton okolo e le na̱ maluwa ma̱ lipu ma̱ yi.

9 Adama o ndolo n lyawa yi ta̱ e ekere a̱ a̱za̱ e icigi ya̱ yi, e ekere a aza a Asuriya aza a na wu uwwusai maluwa ma̱ lipu. 10 A lyawa yi ta̱ ataɓu, a usa ta̱ olobo ne esheli a̱ yi, reve o una yi na̱ matsun me pe'eni. Wo o'wo ta̱ udammu a̱tsuma̱ a̱ a̱ma̱ci, waru a̱tsuma̱lima̱ a kumba ta̱ a aci a̱ yi.

11 <<Mawun ma̱ a̱na̱wun ma̱ yi Oholiba ene ta̱ ili ya nda, amma u la'a ta̱ mawun ma̱ a̱na̱wun ma̱ yi uba̱ta̱ u maluwa ma̱ lipu na̱ tsushakala tsa̱ yi, za na ka̱ra̱i za vu zakpara va̱ yi. 12 U da̱na̱ ta̱ a uwwusa maluwa ma̱ lipu ma aza a Asuriya lon, nan gwamna na azagbain, na̱ a̱soja a na a gurai uvon wotowu ni itana yu uvon ya amayun, akumbi e ido zuva vi ido, suru nle olobo a sa'ani. 13 Waru me ene ta̱ cine u lungusa̱i aciya̱yi, ele ra a̱ kuru ta̱ ure u ta̱.>>

14 <<Amma tsushakala tsa̱ yi tsa̱ da̱shi ta̱ wuyana. We ene ta̱ ali a na a yuwain ma'an le o uɓaɓu, ma'an va aza a Kaldiya aza a na a ma'ain na̱ mini ma̱ shili, 15 ni igbakala wunlu a̱ nkyun n le waru ukatalu no okokolo a sa'ani a aci e le. Suru nle o rotso ta̱ azagbain akumbi e ido a Babila aza a na iɗa i le i ɗa Kaldiya. 16 Ana we ene nle, reve wu uwwa maluwa lipu le reve u lyungu nlingata a̱ 'ya̱wa̱ ya̱'a̱ le a̱tsuma̱ a Kaldiya. 17 Reve aza a Babila a̱ ta̱wa̱ ya̱'a̱ yi hali she a̱ a̱ga̱da̱ a̱ tsipere, a̱vu a̱ lungusa̱ yi ni icigi i lipu le. Ana u kotoi ma̱la̱nga̱ uba̱ta̱ u le, reve we ene idaba i le a̱vu u vadaluwaa le ucina̱. 18 Ana u lyuwai elime na̱ tsushakala tsa̱ yi a alanga eteshe waru u kpa̱tu'wa̱i ataɓu a̱ yi, me ene ta̱ idaba ya̱ yi a̱vu n vadaluwaa yi ucina̱, cine n vadaluwaa yi mawun ma̱ a̱na̱wun ma̱ yi ucina̱. 19 Suru na̱ ne u da̱shi ta̱ lyuwisa elime na̱ tsushakala tsa̱ yi a cuwusan na̱ rana tsusheli tsa̱ yi, mantsa ma na u da̱na̱i a tsushakala e iɗa ya Masar. 20 Ɗe ɗa u da̱na̱i a maluwa ma̱ lipu ma̱ a̱za̱ e icigi ya̱ yi, aza na lipu le ri tsu za vu nloli waru tsalyali tse le tsu za vi ido. 21 Ne ɗa vu yuwain maluwa me ili yi idaba a̱vu o usheli wa̱ wu, mantsa ma na aza a Masar o kpokoi agaɓa a̱ wu waru o moɗo nle.>>

22 <<Adama o ndolo, Oholiba, apa ili i na A̱sulazuva Zagbain dammai, n ta zuwa a̱za̱ e icigi ya̱ wu a yuwan nla̱ngi na̱ a̱vu, aza a na vu vadaluwayi ucina̱ adama e idaba n ta zuwa le a yuwan nla̱ngi na̱ a̱vu pasu suru. 23 Aza a Babila na aza a Kaldiya suru, aza a Peko na aza a Showa na aza a Kowa, suru na aza a Asuriya oɓolo ne ele, olobo a sa'ani a ɗa. Nan gwamna na̱ nan yali, na aza a tsugbain tsa gbain, suru nle a̱ tu ukumbu e ido. 24 A̱ ta̱ ta̱wa̱a̱ wu nu uvon diga upasu wu ugana ni ikeke yi ido ni ikeke yi inan no oɓolo a̱ a̱soja o ucira. O to foɓo aciyele adama a̱ wu a pasu suru wotowu na̱ a̱ra̱ga̱ na̱ nlezu mi irumu. Waru n ta lyawa wu e ekere e le adama a ca wu oforo. Ne ɗa aa yuwaan ɗu uge'etosu cine a cigai. 25 Waru n ta yuwan tsushu'un na̱ a̱vu, reve a yuwan nla̱ngi na̱ a̱vu a̱tsuma̱ o upan. O to koɗo vunu va̱ wu na atsuvu a̱ wu, waru aza a na a̱ ri a̱tsuma̱ a̱ wu na a pasai a̱ to una̱ le na̱ matsun me pe'eni. A ta usa olobo ne esheli a̱ wu waru a̱za̱ a̱ wu a na a pasai akina a ta lyuwa le. 26 Waru o to fufoɗo wu itana ya̱ wu reve a usa itana i tsusheli i sa'ani ya̱ wu. 27 Ne ɗa maa zuwaa wu utyo wu ulinga wi idaba na̱ tsushakala tsa̱ wu tsa na vu farai a̱tsuma̱ a Masar. Va̱a̱ ka̱lyuwa̱ ili i nda na̱ maluwa ko vu da̱shi cuwan na̱ Masar shi.>>

28 <<Adama a na a̱yi ɗa ili i na A̱sulazuva Zagbain dammai, Uwwa nda, n ta lyawa wu e ekere a aza a na vu 'yuwain, uba̱ta̱ wa aza a na vu vadaluwayi ucina̱ adama e idaba. 29 A ta yuwan na̱ a̱vu nu upan reve a̱ pura̱ suru ili i na vu yuwain ulinga wa̱ yi. A ta lyawa wu ataɓu babu itana, waru wono u tsushakala tsa̱ wu wu uta̱ a alanga. Ulinga wi idaba wa̱ wu na̱ tsushakala tsa̱ wu, 30 ele ɗa a̱ ta̱wa̱a̱ nuwu ni ili ya nda, adama a na vu yuwan ta̱ maluwa ma̱ lipu na̱ nɗa waru vu lungusa̱ ta̱ aciya̱wu na̱ a̱ma̱li e le. 31 Adama a na vu kuruyi ure wu zakpara va̱ wu, n ta zuwa wu vu sowo cu'un mokkoto ma̱ a̱tsuma̱lima̱ ma na u sowoi.>>

32 Apa ili i na A̱sulazuva Zagbain dammai, <<Vu to sowo mokkoto ma zakpara va̱ wu, mokkoto ma na ma̱ ri a̱ru'un na̱ washin. O to zo'oso wu nu ulamu, adama a na u ta̱ tapu ili na̱ a̱bunda̱. 33 Vu ta shiwan nu usowu na̱ a̱tsuma̱lima̱, mokkoto mo okongo no ofoli, mokkoto ma zakpara va̱ wu Samariya. 34 Vu to sowo a̱tsuma̱lima̱ a nda vu to sowo yi suru, vu to sowo yi na ashiva a̱ yi, reve vu saza maani ma̱ wu, adama a na a̱mu ɗa n yuwain adanshi, ne ɗa A̱sulazuva Zagbain dammai.

35 <<Adama o ndolo apa ili i na A̱sulazuva Zagbain dammai, na wo o'woi vi icina ta̱ na̱ a̱mu waru vu vari numu a̱ca̱pa̱ a̱ wu, a̱vu na aciya̱wu vu ciga vu 'yuwan vu tara ume wu ulinga wi idaba na̱ tsushakala tsa̱ wu.>>

36 A̱sulazuva a damma mu ta̱, <<Mawun ma vuma, vu ta yuwaan Ohola na̱ Oholiba uge'etosu? Damma le linga vi idaba i le. 37 Adama a na a yuwan ta̱ tsushakala, waru ume wu mpasa u ta̱ a aci e le. A yuwan ta̱ tsushakala na̱ a̱ma̱li e le, waru a ca ta̱ kucci muwun n le, aza a na a matsaan numu, tsa tsuwa tse le. 38 Waru a yuwisaan mu ta̱ ili ya nda, o urana u ndolo'o gan a̱ lungusa̱ ta̱ A̱a̱'isamapaɗa a̱ va̱ waru a tara Ashibi a̱ va̱ ili i ro shi. 39 O urana u ndolo'o gan a ca ta̱ a̱ma̱li e le kucci muwun n le, a̱vu a uwa a̱ a̱a̱'isa̱ a̱ va̱ reve a̱ lungusa̱ yi. A̱yi ɗa ili i na a yuwain o u'wa u va̱.

40 <<A̱ lyungu ta̱ nlingata adama a ama a na o uta̱i alanga, waru ana a rawai reve i sumba̱ adama e le. Vu tsun ili a̱ a̱ga̱pa̱na̱ a̱ wu, a̱vu vo oto itana i tsusheli. 41 Vu da̱nu ta̱ o otogu a sa'ani, na apada eleme a̱ yi za na o foɓoi a̱tsuka̱ a̱a̱ ma̱guru na̱ mani'in ma̱ va̱.

42 <<Elemu e iɓolo ya ama aza u ɓa̱la̱ yi shi a̱ da̱na̱ ta̱ uka̱nda̱ruwu na̱ a̱yi, ama a ndana ososowi a̱ ta̱wa̱ ta̱ ne ele diga a̱tsumona, reve a zuwa nshingi e ekere a ka, no okokolo a sa'ani aci e le. 43 Reve n yuwan adanshi adama a̱ yi za na kutsai a tsushakala, <Gogo lyawa le a lyuwa elime na̱ tsushakala na̱ a̱yi, adama a na ne ɗa u ri.> 44 Waru o von ta̱ na̱ a̱yi, cine ali o tsu von na aashakala. Ne ɗa a uwai uba̱ta̱ wa Ohola na̱ Oholiba a̱ma̱ci a na a̱ la̱nga̱i. 45 Ama a̱ a̱ɓula̱ a ta ca le oforo cu'un va̱ a̱ma̱ci a na a yuwain tsushakala waru o ocoi mpasa, adama a na ele aza a tsushakala tsa ɗa, waru ume wu mpasa u ta̱ e ekere e le.

46 <<Apa ili i na A̱sulazuva Zagbain dammai, ta̱wa̱a̱ le no oɓolo a̱ a̱soja, reve i ka̱mbuwa̱ le ili i wovon ni ili i na a̱a̱ pura̱. 47 Oɓolo a̱ a̱soja'a a ta vuvara le reve a gasa le na̱ mutsun mu pe'eni n le. A̱ to una olobo ne esheli e le, reve a̱ kula̱to 'wa le.

48 <<Ne ɗa ma̱a̱ ta̱wa̱ nu ukosu wi ili yi idaba a̱tsuma̱ e iɗa'a, adama a̱ma̱ci suru a tara tsuɓari adama she a yuwan ili yi idaba cine i yuwain wan. 49 Vu to sowo a̱tsuma̱lima̱ adama e idaba ya̱ wu, waru vu tara ume wu unusu u tsushakala tsa wu. Ɗaɗa vee reve a na a̱mu ɗa A̱sulazuva Zagbain.>>