1 A̱tsuma̱ a aa'wan a̱ kucci, o woto wa kupa, o urana wa kupa u woto'o adanshi A̱sulazuva a̱ ta̱wa̱ ta̱ ya̱'a̱ va̱, 2 <<Mawun ma vuma,>> ɗana urana u nda, urana u nda gan, adama a na mogono ma Babila ma̱ ka̱nda̱ruwa̱ ta̱ Urishelima o urana u nda gan. 3 Yuwaan aza a aciyogbamu a nda adanshi vu damma le, <<Apa ili i na A̱sulazuva Zagbain dammai, <Foɓoi upondo, i zuwa yi a akina reve i tsun pe mini. 4 I zuwa pe mupaɗi mi inama, suru mupaɗi n sa'ani, agutsu na vatsu, vu shiton yi ne etele a na a la'ai ulobonu. 5 Tara za na la'ai ulobonu a̱tsuma̱ o oɓolo e ikyon, vu zuwa a̱gba̱la̱ za̱la̱ va̱ yi, vu lyawa inama'a a̱ puna̱ ulobonu oɓolo ne etele'e. > >> 6 << <Adama a na a̱yi nda a̱yi ɗa ili i na A̱sulazuva Zagbain dammai, a̱tsuma̱lima̱ a ta cina lyuci gbain na voo ocosu mpasa, uba̱ta̱ o upondo u na u ri na̱ matsafi, za na matsafi ma̱ yi ma tsu tawa shi! O uta̱a̱ le mupaɗi mupaɗi she i aɗangulu wan.> >> 7 <<Adama a mpasa n na wo ocoi a̱tsuma̱ a̱ yi, u tsun yi ta̱ a aatali a agalaci, wo oco yi e iɗa adama a̱ ciɗo yi na̱ ma̱buta̱ shi. 8 Adama n 'ya̱sa̱n upan u va̱, adama n yuwan atsupu, n tsun ta̱ mpasa ma̱ yi zuva va aatali a agalaci, adama a̱ ciɗo yi wan.>> 9 Adama o ndolo apa ili i na A̱sulazuva Zagbain dammai, a̱tsuma̱lima̱ a ta cina lyuci gbain na voo ocosu mpasa! A̱mu fo n to ɓoloto aganga a ɗanga va akina'a. 10 Ɓoloto a̱gba̱la̱, reve vu daɓa le akina, vu su'wan inama'a ulobonu, vu ja̱mba̱ra̱ le nu ucita, reve vu lyawa etele'e a̱a̱ kula̱. 11 Reve a zuwa upondo u na u ri lya̱nga̱ a akinkina, hali she nu u suɗuwa, rumushili va̱ yi suluwan, accaka a̱ yi e jeruwe matsafi ma̱ yi waru ma̱ kula̱. 12 U kuna̱to ta̱ aciya̱yi pere, aa gura uta̱a̱ matsafi ma̱ yi shi, a vari yi a̱tsuma̱ a akina. 13 Gogo idaba ya̱ wu i la̱ngwa̱ ta̱, adama a na n ciga ta̱ n ka̱mbuwa̱ wu cece, agba vu ka̱mba̱ cece diga e idaba ya̱ wu shi, va̱a̱ ka̱mbisa̱ cece shi hali she nu upan u va̱ u shiwan a aci a̱ wu.

14 << <A̱mu A̱sulazuva n damma ta̱. Mantsa ma ta rawa ta̱ n reve ta̱ ili i na maa yuwan. Maa vadala majiyan ma̱ va̱ shi, mee ne iliyali shi, ko m bula̱ shi. N ta yuwaan wu uge'etosu o una̱ wu re va̱ wu nu ulinga wa̱ wu, A̱sulazuva Zagbain ɗa dammai ne.> >>

15 Adanshi a̱ A̱sulazuva a̱ ta̱wa̱ ta̱ ya̱'a̱ va̱: 16 <<Mawun ma vuma, a̱yi ɗa nda, nu uga̱lu uta̱ u ɗa maa tawa ili i na vu la'a cigai uba̱ta̱ wa̱ wu. Suru na̱ ne she vu yuwan a̱tsumola̱ngu ko vu shon ko vo oco aɓara wan. 17 A̱nga̱ kpen, she vu yuwan nden ma̱ a̱tsumola̱ngu adama a za na kuwa̱i wan. Nla̱ ookokolo a̱ wu waru vo oto atan, she vu keɗe ugbaguzu wan, ko vu lyuwa ilyalya ya̱ a̱za̱ a̱ nden n wira̱ uta̱ wan.>>

18 Reve n yuwan adanshi na ama nu usana, reve a cina ulivu reve ka va̱ kuwa̱. Nu usana u tawa reve n yuwan cine a damma numu.

19 Reve ama a damma mu, <<Vaa cuɗuwa tsu urevu wi ili ya nda ni ili i na u ri a̱ tyo ya̱'a̱ tsu shi?>>

20 Ɗaɗa n damma nle, <<Adanshi a̱ A̱sulazuva a̱ ta̱wa̱ ta̱ ya̱'a̱ va̱, 21 yuwan adanshi nu u'wa wa Isra'ila, <Apa ili i na A̱sulazuva Zagbain dammai, a̱yi ɗa nda, n ta̱ lungusa̱ a̱'isa̱ a̱ va̱, uba̱ta̱ o uvaɗu u ɗu, ili i na i la'a cigai, ili i na i tsu ca ɗu uyo'o wo okolo. Waru olobo ne esheli a̱ ɗu a na i lyawai a̱ca̱pa̱ a̱ ta̱ una le na̱ matsun me pe'eni. 22 Waru i ta yuwan cine n yuwain. Yee keɗe ugbaguzu u ɗu ko i lyuwa ilyalya ya̱ a̱za̱ a̱ nden n wira̱ uta̱ shi. 23 I ta̱ da̱na̱ no okokolo a̱ ɗu a aci atan waru a ana a̱ ɗu. Yaa yuwan a̱tsumola̱ngu ko i shon shi amma i ta̱ la̱nga̱ adama o unusu u ɗu na̱ ma̱nga̱ a̱tsuma̱ a̱ ɗu. 24 Ne ɗa Izike oo o'wo ɗu iroci. Suru cine u yuwain ne ɗa fo yaa yuwan. Ni ili i nda i fara, i te reve a na̱ a̱mu ɗa A̱sulazuva Zagbain.> >>

25 <<A̱vu gba shi, mawun ma vuma, o urana u na n tawai upa'atan u le, ma̱za̱nga̱ me le na̱ tsugbain tse le, ili i na esu e le a cigai ni ili i na okolo e le a cigai, waru no olobo ne esheli e le fo, 26 o urana u ndolo za na suma u la'ai u ta̱ ta̱wa̱ u damma ɗu alabari a atsuvu a̱ ɗu. 27 O urana u ndolo una̱ wa̱ wu u ta̱ kpa̱tu'wa̱ vu ta yuwan adanshi na̱ za na suma u la'ai. Vu ta yuwan adanshi na̱ a̱yi waru va̱a̱ da̱shi rungwa̱ shi. Ne ɗa voo o'wo iroci uba̱ta̱ u le, waru e te reve a na̱ a̱mu ɗa A̱sulazuva.>>