Colossenses 1

12 Mʉgende omʉsɨma Thatha Gongo yo wabahaga maka w’erɨshangɨra ko mwandʉ w’ababuyirire mo kyakakala. 13 Kʉshangwa mwathʉshabʉla ɨthoka mo maka w’omwitsimya*1:13 Maka w’omwitsimya: Soma Luk 22:53. n’ɨthwɨngɨtsya mo bwamɨ bwa Mʉgala ʉwe mʉtsɨɨrwa, 14 nɨ kw’ɨye ko thwamashabʉlwa ɨthoka mo bɨbɨ na kuthyo ebɨtsɨbʉ byethʉ byamaganyɨrwa.*1:14 Soma Efe 1:7.

Obʉkʉlʉ bwa Kirisito

15 Kirisito ni shoshani ya Gongo yo ʉthashʉngɨka. Ɨye nɨ Kambere, mʉkʉlʉ mo byoshi byo bya bʉmbawa.*1:15 Soma Migani 8:32-36; Yoa 1:1-3. 16 Kʉshangwa nɨ kw’ɨmʉtsʉkɨra, ko Gongo abʉmbaga ebyoshi mo lʉbʉla na mo kɨhʉgo, ebyo bɨnashʉngɨka na byo bɨthalɨ ebɨnashʉngɨka. Bubye bwamɨ kʉtse bʉkʉlʉ, kʉtse buthegeki kʉtse maka. Gongo mwabʉmba ebyoshi kw’ɨtsʉkɨra Kirisito na bʉshana naye. 17 Kirisito abyagaho embere w’ebɨndʉ byoshi, na nɨ kw’ɨye kw’ebɨndʉ byoshi bithondekire.