1 Honyuma wa bɨro bɨrebe, Yesʉ mwashʉba ɨKaperenaʉmʉ, abandʉ mobonvwa kw'alɨ mo nyʉmba. 2 Bandʉ bangɨ mobahindana aho, ihika ko kɨka mohathashubabya mwanya mo nyʉmba n'embʉga embere y'olukyo. Yesʉ agenda akangɨrɨtsyabo eKɨnwa kya Gongo.

3 Aho, bandʉ bagʉma mobalethera Yesʉ yo mukoni wa makonongola niahekirwe na bayira bane. 4 Hewethuwe, bʉshana n'obʉngɨ bw'abandʉ, mobathakotsya imuhikya embere sa Yesʉ. Aho mobashamba naye ko lʉthwe* lw'enyʉmba, mobathobola elʉgʉlʉ y'ahandʉ ho Yesʉ abyaga imene. Aho, mobakimya ow'amakonongola ahandʉ aho bashambʉlaga, nɨanaonzere ko kipoyi kɨwe (ImageCO000123jpj) 5 Yesʉ abere ashʉnga olwɨkɨrɨtsyo lw'abandʉ abo, mwabwɨra ow'amakonongola athɨ: «Mwana aye, ebɨtsɨbʉ byawe byamaganyɨrwa.»

6 Bakangɨrɨtsya bagʉma b'oMʉgomba, babyaga nibikere mo nyʉmba eyo. aBakangɨrɨtsya abo mobathanga ɨyɨbʉtsya mo mɨthɨma yabo, bathɨ: 7 «Omʉndʉ oyu anegena athya bʉshana na ki? Ahatsya kʉ Gongo. Nɨ ndɨ yo wangakotsya ɨganyɨra ebɨtsɨbʉ athalɨ Gongo mʉsha?» 8 Aho Yesʉ mwamɨnya ebɨnwa bagenda abayɨbʉtsya mo mɨthɨma yabo. Bʉshana n'ekyo, mwabʉtsyabo athɨ: «Bʉshana na ki omʉyɨbʉtsya ebɨnwa ebi mo mɨthɨma enyu? 9 Kɨhe kyo kyolo mo bɨbɨrɨ bɨno? Ɨbwɨra omʉndʉ w'amakonongola mbʉ: "ebɨtsɨbʉ byawe byamaganyɨrwa" kʉtse ɨmʉbwɨra mbʉ: "wimana, ʉheke ekipoyi kyawe na ʉgende?" 10 Aho, enyishondya mʉmɨnye kw'oMʉgala w'oMʉndʉ awithe amaka w'erɨganyɨra ebɨtsɨbʉ hano ishi.» Bʉshana n'ekyo mwabwɨra omʉndʉ w'amakonongola oyo athɨ: 11 «Ni ingye enyɨkʉbwɨra nyɨthɨ wimana, heka ekipoyi kyawe na ʉgende ewawe!»

12 Aho n'aho omʉndʉ oyo mwimana, mwatsɨmba ekipoyi kɨwe, mwahʉlʉka embere s'abandʉ boshi n'ɨyɨgendera. Abandʉ boshi mobashweka, mobasingya Gongo, nɨabanegena bathɨ: «Thʉthahera thwathashʉnga kʉ bɨnwa bɨrɨnga ebi!»

13 Honyuma kw'aho, Yesʉ mwashʉbaya emʉsɨke w'engetsɨ y'iNgalilaya. Muhindano mʉnene wa bandʉ mobamʉkwama, naye agenda akangɨrɨtsyabo. 14 Abere anemʉtsʉka, mwashʉnga Lawi* mʉgala wa Alʉfayo. Lawi oyo abyaga n'ikere mo biro by'erɨrɨhɨsɨramo ekoli. Yesʉ mwamʉbwɨra athɨ: «Nyɨkwame!» Na Lawi mwimana n'ɨmʉkwama.

15 Honyuma kw'aho, Yesʉ mwayalya ku kalyo mo nyʉmba ya Lawi. Bakarani bangɨ b'ekoli na bandɨ bakoli b'ebɨbɨ mobikala irya hagʉma na Yesʉ n'abɨga bʉwe, kʉshangwa bangɨ ba mo bandʉ bo balɨ ng'abo bo bagenda abamʉkwama. 16 aBakangɨrɨtsya b'oMʉgomba b'omo kɨkembe ky'aBafarisayo babere bashʉnga ko Yesʉ alya hagʉma n'abandʉ abo, mobabʉtsya abɨga bʉwe bathɨ: «Bʉshana na ki oMʉkangɨrɨtsya enyu alya hagʉma n'abakarani b'ekoli n'abakoli b'ebɨbɨ?»

17 Yesʉ abere onvwa athyo, aho mwabwɨrabo athɨ: «Abatsibuhire bathalayire kʉ mʉshake, hewethuwe nɨ abo balwere basha. Nyithahikaga ɨbɨrɨkɨra abathʉnganene banyɨkwame, hewethuwe abakoli b'ebɨtsɨbʉ.»

18 Kɨro kɨgʉma abɨga ba Yoani Mubatisya n'aBafarisayo bagenda abayima kalyo. Aho bandʉ bagʉma mobahikira Yesʉ n'ɨmʉbʉtsya bathɨ: «Bʉshana na ki abɨga ba Yoani Mubatisya n'abɨga b'aBafarisayo abanayima kalyo, hewethuwe abɨga bawe ɨbo ɨhɨ?»

19 Yesʉ mwashʉbɨtsyabo athɨ: «Abo bathalalɨkwa ko linye ly'obuheruki banganayima kalyo omuherukya akɨnalɨ hagʉma nabo? Ɨhɨ! Mo ndambi omuherukya akɨnalɨ hagʉma nabo bathangakotsya iyima kalyo. 20 Hewethuwe kwandabya bɨro omuherukya andabya athokibwa mo kathi kabo, nɨ mo bɨro ebyo mo bandayima kalyo.

21 «Hathalɨ mʉndʉ yo ʉnalandɨra kɨbandɨko kihya-kihya kʉ lʉkɨmba lwa kera. Amakola athyo, ekɨbandɨko kihya-kihya nɨkyaberenga olʉkɨmba lwa kera, n'erɨbereka lyalo nɨlyongereka kʉtsɨbʉ. 22 Na kuthyo hathalɨ mʉndʉ yo unahira tifayi nyihya-nyihya mʉ bɨrega bya ngobi sikulire. Amakola athyo, etifayi nɨyaberenga ebɨrega, n'aho nɨahetsya etifayi n'ebɨrega kuthyo. Bʉshana n'ekyo abanahira etifayi nyihya-nyihya mʉ bɨrega bihya-bihya.»

23 Kɨro kɨgʉma ky'eSabato, Yesʉ n'abɨga bʉwe bagenda abatsʉka mo mashwa w'engano. Abɨga bʉwe mobagenda nɨbanemʉtsa ebɨkʉmba by'engano*. 24 Aho aBafarisayo babere bashʉnga kw'ebyo, mobabwɨra Yesʉ bathɨ: «Lola! Bʉshana na ki abɨga bawe abakola ebyo oMʉgomba ethʉ ahangire ɨkola ekɨro ky'eSabato?»

25 Yesʉ mwashʉbɨtsyabo athɨ: «Mʉthahera mwathasoma ebyo Tawiti akolaga ɨye n'abandʉ bʉwe babere bawɨra? 26 Ndɨ mwɨngɨra mo Nyʉmba ya Gongo n'irya emikati yo yahererawa Gongo! Naho, nɨ abaheri basha bo babyaga bahamulirwe irya emikati eyo. Hewethuwe Tawiti mwalya n'ɨha abandʉ abo abyaga nabo. Ekɨnwa eki kyakolekaga mo mʉgʉlʉ Abiatari abyaga Muheri Mʉkʉlʉ.»

27 Yesʉ mwashʉba bwɨrabo athɨ: «Ekɨro ky'eSabato kyahirawaho bʉshana n'omʉndʉ. Hewethuwe omʉndʉ athakomibawa bʉshana n'eSabato 28 Bʉshana n'ekyo, oMʉgala w'oMʉndʉ yo Mʉkʉlʉ w'eSabato.»