1 Hano ho ithangire eNgʉlʉ Mbʉya ya Yesʉ Kirisito, Mʉgala wa Gongo, 2 ɨkwamana nga ko bishakirwe mo kɨtabo ky'omʉmɨnyeretsɨ Isaya bɨthɨ:

«Shʉnga, ingye Gongo nyamathʉma omugendi aye

akʉthange ebʉshondotsɨ,

bʉshana akʉkometsye nzɨra*.

3 Nɨ mʉlenge w'omʉndʉ yo ʉhambala mo mbwarara athɨ:

"Muthungananie enzɨra ya Nyinya-kowethʉ,

mulambathikanie aho atsʉka*!"»

4 Aho Yoani Mubatisya mwahʉlʉka mo mbwarara. Mwabatisya abandʉ, alɨakangɨrɨtsyabo athɨ: « Mʉbɨndʉke ɨthoka mo bɨtsɨbʉ byenyu, mubatisibwe, nɨmo mwaganyɨrwako ebɨtsɨbʉ*.» 5 Abandʉ mobathoka mo kɨhʉgo kyoshɨ ky'iYuteya n'abahimbani boshi b'ɨYerʉsalemʉ n'ɨgendera Yoani. Mobatsɨga ebɨtsɨbʉ byabo, naye mwabatisyabo mo lwitsi lw'eYorotani.

6 Yoani agenda ambala lʉkɨmba lwakomibawa mʉ boya bwa nyama yo ɨnahʉlwamo ngamɨa, na kuthyo agenda ambala mʉkaba wa ngobi mo mbɨndɨ yɨwe*.. Na agenda alya emɨʉngʉra n'obʉkɨ bw'omo ndokolo. 7 Athya ko Yoani agenda akangɨrɨtsya abandʉ: «Oyo uhika enyuma kw'ingye, awithe maka kw'inyirengya, nangye nyɨthatholere iunama n'ɨmɨnʉla emiriki y'oko bɨrato bɨwe. 8 Ingye enyibabatisya mʉ metsi, h'ɨye andababatisya mʉ Mʉthɨma Mwerʉ.»

9 Mo bɨro ebyo, Yesʉ mwathoka iNasareti, mo kɨhʉgo ky'iNgalilaya, na Yoani mwamubatisya mo lwitsi lw'eYorotani. 10 Yesʉ abere anemʉthoka mo metsi, aho n'aho mwashʉnga olʉbʉla nɨ lwamakɨngʉkala n'oMʉthɨma Mwerʉ mwamukimirako nga kalikuku. 11 N'omʉlenge mw'onvwɨka ɨthoka mo lʉbʉla, nɨanegena athɨ: «Ɨwe ʉlɨ Mʉgala aye mʉtsɨɨrwa, unanyimoya kʉtsɨbʉ.»

12 Aho n'aho oMʉthɨma Mwerʉ mwamukuna n'ɨmʉthwala mo mbwarara. 13 Yesʉ mwabya mo mbwarara eyo mo bɨro makumi ane, alɨ alengwako na Sitani. Mwikalayo hagʉma n'esonyama s'omo ndokolo, na bamalaɨka bagenda abamʉkolera. 14 Honyuma w'erɨmɨnwa lya Yoani mo muliki, Yesʉ mwaya mo kɨhʉgo ky'iNgalilaya, mwafʉla eNgʉlʉ Mbʉya ya Gongo. 15 Agenda abwɨra abandʉ athɨ: «Endambi yamahika, n'oBwamɨ bwa Gongo bʉlɨ hofɨ! Bʉshana n'ekyo, mʉbɨndʉke ɨthoka mo bɨtsɨbʉ byenyu, na mwɨkɨrɨtsye eNgʉlʉ Mbʉya!»

16 Yesʉ abere anemʉtsʉka emʉsɨke w'engetsɨ y'iNgalilaya, mwashʉnga Simoni bana Ndereya mʉgala wabo. Bano bagenda abagʉsha akakira kabo mo ngetsɨ, kʉshangwa babyaga barobi. 17 Yesʉ mwabwɨrabo athɨ: «Mʉnyɨkwame, nyabayɨramo barobi ba bandʉ.» 18 Aho n'aho mobamika ehikira hyabo n'ɨmʉkwama. 19 Yesʉ abere alotsya ebʉshondotsɨ, mwashʉnga Yakobo na Yoani mʉgala wabo, bagala ba Sebetayo. Babyaga mo bwatho bwabo niabakomya ehikira hyabo. 20 Aho n'aho mwabɨrɨkɨrabo. Aho mobamika Sebetayo ishe wabo y'omo bwatho hagʉma n'abakoli bʉwe, na mobakwama Yesʉ.

21 Yesʉ n'abɨga bʉwe mobɨngɨra mo muyi w'ɨKaperenaʉmʉ. Ekɨro ky'eSabato kyabere kyahika, Yesʉ mwɨngɨra mo sinakoki n'ɨthanga ɨkangɨrɨtsya abandʉ. 22 Abandʉ bo bagenda abamwonvwa mobashweka kʉtsɨbʉ babere bashʉnga ko mɨkangɨrɨtsye yɨwe, kʉshangwa mwathakangɨrɨtsyabo nga kw'abakangɨrɨtsya babo b'oMʉgomba, hewethuwe agenda akangɨrɨtsyabo n'amaka.

23 Ko ndambi eyo, mo Sinakoki yabo mwabyaga mʉndʉ mʉgʉma yo wabyagako mʉtsɨmʉ mʉbɨ. Mwathanga ɨhambala n'ɨanegena athɨ: 24 «Ɨwe Yesʉ w'iNasareti, Uthushondyako ki no? wahikaga bʉshana n'ithutsikya? Nyetsi ko ʉlɨ Mubuyirire wa Gongo!»

25 Yesʉ mwakemera omʉtsɨmʉ mʉbɨ oyo yo kʉtsɨbʉ, n'ɨmʉhamʉla athɨ: «Tsɨra, thoka ko mʉndʉ oyu!» 26 Omʉtsɨmʉ oyo mwathengania omʉndʉ oyo yo kʉtsɨbʉ, mwamʉthokako, nɨahambala kʉtsɨbʉ.

27 Abandʉ boshi mobashweka kʉtsɨbʉ n'ɨthanga ibutsania bathɨ: «Ebi nabyo nɨ bɨhɨ? Ko kwenene ebɨnwa ebyo Yesʉ akangɨrɨtsya ni bihya-bihya kandɨ nɨ bya maka! Omʉndʉ oyu anahamʉla emɨtsɨmʉ, naro ni yamushikya!» 28 Aho Yesʉ mwaya ngʉlʉ mo kɨhʉgo kyoshi ky'iNgalilaya.

29 Babere bathoka mo sinakoki eyo, aho n'aho mobaya mo nyʉmba ya Simoni na Ndereya, Yesʉ nɨalɨ hagʉma na Yakobo na Yoani. 30 Nyatsala wa Simoni abyaga mo ngɨngo, bʉshana n'akapururu. Mo ndambi Yesʉ abere ahika aho, aho n'aho mobamʉfʉlɨra omwatsɨ w'endwala yɨwe. 31 Yesʉ mwayɨfʉnda hofɨ naye, mwamʉtsɨmba ko kʉboko n'imwimania, naye mwalama akapururu ako, na mwathanga ɨthekerabo.

32 Bwabere bwagoroba, erɨtsʉba nɨ lyamamala ɨrenga, mobalethera Yesʉ yo abandʉ boshi bo babyaga bakoni na bo babyagako emɨtsɨmʉ mɨbɨ. 33 Abandʉ boshi b'omo muyi oyo mobahindana ho lukyo lw'enyʉmba. 34 Yesʉ mwalamya bakoni bangɨ bo bagenda abagalwa na makoni mɨna-mɨna. Mwabɨnga emɨtsɨmʉ mɨbɨ mɨngɨ, mwathalikaro ɨnegene n'ekɨnwa n'ekɨgʉma, kʉshangwa yabyaga niyimwetsi.

35 Bwabere bwakya mo mambya matsɨbʉ, Yesʉ mwabʉka, mwathoka mo muyi na mwaya ahathalɨ bandʉ, n'eyo mwathanga ɨshaba. 36 Aho Simoni na balikyabo mobayamushondya. 37 Babere bamʉshʉnga mobamʉbwɨra bathɨ: «Abandʉ boshi abakushondya.» 38 Hewethuwe Yesʉ mwashʉbɨtsyabo athɨ: «Thʉgende mo mɨrongo yo yɨrɨ hofɨ, bʉshana nyɨfʉle eNgʉlʉ Mbʉya ko bandʉ b'eyo nabo. Kʉshangwa nyahikaga bʉshana n'ekyo.»

39 Aho mwagenda ahoshi-hoshi mo kɨhʉgo ky'iNgalilaya alɨafʉla eNgʉlʉ Mbʉya mo sosinakoki n'erɨbɨnga emɨtsɨmʉ mɨbɨ.

40 Kɨro kɨgʉma mʉbenzɨ mʉgʉma mwahikira Yesʉ. Omʉbenzɨ oyo mwafʉkama embere sɨwe n'ɨmʉshaba athɨ: «Wamashasha wanganyetsya.» 41 Yesʉ mwamʉshashɨra, mwalambʉla okʉboko, mwamʉkolako n'ɨmʉbwɨra athɨ: «Nyishashire, wetsɨbwe!» 42 Aho n'aho ebɨbenzɨ mobyamʉthokako, n'omʉndʉ oyo mwetsɨbwa. 43 Kona ndambi eyo, Yesʉ mwamʉbwɨra athɨ agende. 44 Mwakongomeretsya athɨ: «Onvwa! Uthanalinda wabwɨra mʉndʉ n'omʉgʉma y'ebɨnwa ebi. Hewethuwe ʉgende ew'o muheri n'imukangya nga ko wamamala ibya. Honyuma kw'aho ʉlethe ebɨhembo nga ko Mʉsa ahamulire, bibye butimo ko bandʉ boshi ko wametsɨbwa.»

45 Hewethuwe omʉndʉ oyo abere agenda, mwathanga ithulagania emyatsɨ eyo y'ahoshi-hoshi. Na bʉshana n'ekyo Yesʉ mwathashubakotsya ɨngɨra mu muyi woshi-woshi mo bʉrora-rora. Mwikala mo mbwarara, hewethuwe namo byanabyaga bithyo, abandʉ bagenda abamuhikira eyo, ɨthoka ko mbande soshi.