1 Kwabyaga nikukishiya bɨro bɨbɨrɨ embere ekɨro kɨkʉlʉ ky'ePasaka na ky'eMikati ɨthemo tsatsʉ kihike. Abakʉlʉ b'abaheri n'abakangɨrɨtsya b'oMʉgomba mobashondya ko bangatsɨmba Yesʉ mʉ menge bʉshana bamwithe. 2 Hewethuwe bagenda ababwɨrana bathɨ: «Thʉthamʉtsɨmbaga mo kɨro ky'elinye, bʉshana kuthangabya bʉrʉnga mo kathi k'abandʉ.»

3 Yesʉ abyaga ɨBetanɨa mo nyʉmba ya Simoni Mʉbenzɨ. Abere anemulya, mʉkatsɨ mʉgʉma mwɨngɨra mo nyʉmba. Abyaga niahekire murangi akomibwe mw'ibwe nɨalɨmo marasi wa kɨtsɨro kɨnene. Amarasi merʉ ayo akomibawa mʉ mʉshanga wa narito. Honyuma kw'aho, mwatsa obʉnʉ bw'omurangi oyo n'ɨhaka amarasɨ ko muthwe wa Yesʉ. 4 Bagʉma mo bandʉ babyaga aho, mobagalɨrwa bʉshana n'ekyo n'ɨbwɨrana bathɨ: «Bʉshana na ki ibihya amarasi aya? 5 Amarasi aya angautsibwe kʉ kɨtsɨro kya bɨtsere magana ashathʉ bya faranga nɨgabɨrabyo abatsene!» Bʉshana n'ekyo mobahayɨra omʉkatsɨ oyo yo kʉtsɨbʉ. 6 Hewethuwe Yesʉ mwabwɨrabo athɨ: «Mumulike! Omumunubya bʉshana na ki? Ekyo amanyɨkolera kikwirire. 7 Kʉshangwa mwandabya n'abatsene ebɨro byoshi, na mwangawathikyabo ko ndambi mushashire. Hewethuwe ingye, nyithindabye hagʉma nemwe ko bɨro byoshi. 8 Omʉkatsɨ oyu amakola ekyo angakotsya. Amanyɨhaka marasi ko mʉbɨrɨ bʉshana athegekaniewo embere bathewo. 9 Kwenene enyɨbabwɨra, ahoshi Engʉlʉ Mbʉya yandafʉlwa, ekyo amakola kyandafʉlwa mo kɨhʉgo kyoshi bʉshana n'ɨmwɨbʉka.»

10 Yuta Isikariote, mʉgʉma w'oko bathʉmwa ikumi na babɨrɨ, mwaya ewa abakʉlʉ b'abaheri, bʉshana ahothere Yesʉ kʉbo. 11 Abakʉlʉ b'abaheri abo babere bonvwa omwatsɨ oyo, mobamoga kʉtsɨbʉ na mobamʉlaga ɨmʉha faranga. Aho Yuta mwathanga ishondya kathambi kakwirire ako angahanamo Yesʉ.

12 Mo kɨro kɨmbere ky'elinye ly'emikati ɨthemo tsatsʉ, ekɨro ekyo bagenda abakeramo embuli y'erirya ko Pasaka, abɨga ba Yesʉ mobamʉbʉtsya bathɨ: «Ushondya thʉyakʉkometsye elinye ly'ePasaka lyo hayi?» 13 Aho Yesʉ mwathʉma babɨrɨ ba mo bɨga bʉwe n'ɨbwɨrabo athɨ: «Mʉye mo muyi, mwahindana na mʉndʉ mʉgʉma yo uhekire kɨrega kya metsi. Mʉkwame omʉndʉ oyo, 14 n'enyʉmba eyo ɨngɨramo, mʉbwɨre omwenye nyʉmba eyo mʉthɨ: "oMʉkangɨrɨtsya abʉtsya nga hayi ho halɨ ekɨshenge kɨwe ekyo alɨramo elinye ly'ePasaka hagʉma n'abɨga bʉwe!" 15 Aho, omwenye enyʉmba abakangya kɨshenge kɨnene ko ngorofa, kyamalire ithegekanibwa kʉbʉya. Nɨ omo mo mwathʉkometsya elinye.» 16 Abɨga babɨrɨ abo mobagenda, mobahika mo muyi, mobeya ebɨndʉ byoshi ni bithegekanibwe kʉbʉya nga ko Yesʉ athabwɨrabo. Na mobatheka akalyo k'ePasaka.

17 Bwabere bwahika igolo, Yesʉ mwahika hagʉma n'abathʉmwa bʉwe ikumi na babɨrɨ. 18 Babere bahera abalya, Yesʉ mwanegena athɨ: «Kwenene enyɨbabwɨra, mʉgʉma mw'imwe yo ulya hagʉma nangye anyɨhothera.» 19 Abɨga mobathanga ɨfwa buliye n'ɨmʉbʉtsya mʉgʉma kʉ ʉndɨ bathɨ: «N'ingye he?» 20 Yesʉ mwashʉbɨtsyabo athɨ: «Nɨ mʉgʉma mw'imwe ikumi na babɨrɨ, yo ʉkoletsya omukati hagʉma nangye mo mbale. 21 Kʉshangwa oMʉgala w'oMʉndʉ afwa nga kw'Amashako Abuyirire anegenire bʉshana naye. Hewethuwe bʉhanya ko mʉndʉ yo wamʉhothera! Byangabere bɨbʉya ko mʉndʉ oyo athabʉthawa.»

22 Babere balɨ abalya, Yesʉ mwatsɨmba omukati, mwasɨma Gongo, honyuma kw'aho mwatsitsangawo n'ɨhawo abɨga bʉwe, nɨanegena athɨ: «Mʉtsɨmbe, ono nɨ mʉbɨrɨ aye.» 23 Honyuma kw'aho, mwatsɨmba olwatha, abere amamala ɨsɨma Gongo, mwahalobo. N'aboshi mobashoma kʉlo. 24 Yesʉ mwabwɨrabo athɨ: «Ono nɨ mʉsasɨ aye, mʉsasɨ w'endagane wo ashesheka bʉshana na bandʉ bangɨ. 25 Kwenene enyɨbabwɨra, nyɨthɨshʉbe shoma tifayi ya misabibu ihika ko kɨro nyandashoma nyihya-nyihya mo Bwamɨ bwa Gongo.» 26 Babere bamamala imba esosaburi* s'elinye, mobaya ko kɨthwa ky'eMiseituni.

27 Yesʉ mwabwɨra abɨga bʉwe athɨ: «Imwe boshi mwanyishiga, kʉshangwa kushakirwe mo Mashako Abuyirire kʉthɨ:

"Nyanditha omulishya,

n'esombuli sandasanzabana*."»

28 Hewethuwe enyuma w'erilubuka lyaye, nyandabathanga iNgalilaya. 29 Petero mwamʉbwɨra athɨ: «Namo abandɨ boshi bangakushiga, ingye nyithindakushige.» 30 Yesʉ mwamʉshʉbɨtsya athɨ: «Kwenene enyɨkʉbwɨra, mo kɨro kya munobwire, embere embagatsɨ y'ɨbɨke kabɨrɨ, wabya nɨwamayɨgana ingye ngendo ishathu.» 31 Hewethuwe Petero mwayɨtsɨnga ɨnegena athɨ: «Namo byangaleka nɨnyafwa hagʉma nawe, nyɨthɨyɨgane ɨwe kiro na hake.» N'abandɨ boshi, nabo mobanegena ng'ɨye.

32 Yesʉ n'abɨga bʉwe mobahika ahandʉ ho ahanahʉlwamo Ngetetsemani. Yesʉ mwabwɨra abɨga bʉwe athɨ: «Mwikale hano mo ndambi enyɨya shaba.» 33 Mwatsɨmba Petero na Yakobo na Yoani, na mwagenda nabo. Mwathanga ibya na bulige bʉnene n'ɨthabagana. 34 Mwabwɨrabo athɨ: «Omʉthɨma aye alɨ na bulige hofɨ nyɨfwe. Mushibe hano na mubye mesho.»

35 Honyuma kw'aho mwayɨfʉnda hale hake kʉbo na mwayihuma ahishi n'ɨshaba athɨ: «Byamathokekana ko ndambi eyo y'emɨnʉbo ɨtsʉke hale naye.» 36 Mwanegena athɨ: «Mbe Thatha! Obʉlɨ kɨndʉ kɨthokekene kw'ɨwe, enyɨkʉshaba ʉhɨgʉle olwatha lw'amalɨgo olu. Hewethuwe ithabyaga nga ko nyishashire, hewethuwe nga ko ushashire.»

37 Yesʉ abere ashʉba ahalɨ abɨga bashathʉ mweyabo nɨbalɨtho. Mwabwɨra Petero athɨ: «Simoni, ʉlɨ tho? Moʉthalɨ ʉbona kagala k'itheya saha ngʉma bʉsha. 38 Mutheye na mʉshabe Gongo, bʉshana mʉthangalengwako. Kʉshangwa omʉthɨma nɨ mʉngangwe, hewethuwe omʉbɨrɨ nɨ molo.»

39 Yesʉ mwashʉba yɨfʉnda hale hake kʉbo. Mwayashaba Gongo nɨashʉbɨrɨra ebɨnwa bɨgʉmerera. 40 Abere ashʉba shʉba eyɨrɨ abɨga bʉwe, mweyabo nibashubire yatho, bʉshana amesho wabo abyaga nɨamatsɨthoha kʉtsɨbʉ n'othʉlo. Nabo mobathabona ky'erɨmʉshʉbɨtsya. 41 Abere ashʉba shʉbʉla erya kashathʉ, mwabwɨrabo athɨ: «Mʉkɨnalɨ tho n'ɨlʉhʉka? Bɨhwere aho! Endambi yamahika. Aho, oMʉgala w'oMʉndʉ amamala ihirwa mo minwe y'abakoli b'ebɨtsɨbʉ. 42 Mwimane thʉgende! Mʉlole, yo ʉnyɨhothera yono ahera hofɨ!»

43 Yesʉ abere akɨnalɨ anegena, aho n'aho Yuta, mʉgʉma w'oko bathʉmwa ikumi na babɨrɨ, mwahika hagʉma na kɨkembe kɨnene ky'abandʉ bo babyaga bahekire emiyali na mihumbo. Aboshi aba babyaga nɨbamathʉmwa n'abakʉlʉ b'abaheri, n'abakangɨrɨtsya b'oMʉgomba, n'abakʉlʉ b'abandʉ. 44 Yuta oyo, yo wabyaga nɨamamʉhana, abyaga nɨamamala ɨhabo ekɨmɨnyɨkalo kɨno: «Oyo nyafʉmbatha, nɨ ɨye. Mʉmʉtsɨmbe na mʉmʉthwale, nimumutheyitsye kʉbʉya.»

45 Yuta abere ahika ahalɨ Yesʉ, aho n'aho mwayɨfʉnda hofɨ naye n'ɨmʉbwɨra athɨ: «Mʉkangɨrɨtsya!» Honyuma kw'aho mwamʉfʉmbatha. 46 Aho abandʉ abo mobatsɨmba Yesʉ n'ɨmʉmɨna. 47 Hewethuwe mʉgʉma mo kathi k'abo babyaga hagʉma na Yesʉ, mwashoshola omuyali n'ɨtsa okuthwi k'omukoli w'omuheri Mʉkʉlʉ. 48 Honyuma kw'aho, Yesʉ mwabwɨrabo athɨ: «Mwamahika na miyali na mihumbo bʉshana n'ɨnyɨtsɨmba nga bandʉ bo baya tsɨmba mushamuli? 49 Ebɨro byoshi nyabyaga hagʉma nemwe, nangye nyagenda enyɨkangɨrɨtsya mo Nyʉmba ya Gongo, ewo kamomuthanyitsimbire! Hewethuwe ebɨnwa ebi byamahika bʉshana ebyo bishakirwe mo Mashako Abuyirire bɨbererere.»

50 Aho abɨga bʉwe boshi mobamumika n'ɨshaga.

51 Mʉtsana mʉgʉma abyaga ambithe tarape mwakwama Yesʉ. Mobayɨrenga ɨmʉkɨkɨra, 52 hewethuwe mwamika etarape eyo n'ɨthɨbɨtha ndumbu.

53 Abandʉ abo mobathwala Yesʉ ew'oMuheri Mʉkʉlʉ. Abakʉlʉ b'abaheri boshi, na bimanitsi b'abandʉ hagʉma na Bakangɨrɨtsya b'oMʉgomba mobahindana aho. 54 Petero mwakwama Yesʉ y'enyuma yo hale, na mwɨngɨra mo rʉba lw'enyʉmba y'oMuheri Mʉkʉlʉ. Aho mwikala hagʉma n'abakoli, nɨotha ko mʉtsanwa.

55 Abakʉlʉ b'abaheri hagʉma n'abandɨ bakʉlʉ boshi b'obʉshenge bʉkʉlʉ mobashondya kʉ Yesʉ ko bɨnwa bʉshana bamwithe, hewethuwe mobathabona kɨnwa. 56 Bandʉ bangɨ mobamʉhambɨka, hewethuwe obutimo bwabo mobʉthalɨngana. 57 Aho, bagʉma mobimana bʉshana n'ɨretha butimo bwa mabesɨ kw'ɨye nɨabanegena bathɨ: 58 «Ithwe mothʉmwonvwa nɨanegena athɨ: "Ingye nyashambʉla Enyʉmba ya Gongo yo yahimbawa na bandʉ eyi, na mʉ bɨro bɨshathʉ nyahimba yɨndɨ yo yithihimbwe na bandʉ."» 59 Hewethuwe namo byanabyaga bithyo, obutimo bwabo mobʉthalɨngana. 60 Aho oMuheri Mʉkʉlʉ mwimana mo kathi k'abandʉ n'ɨbʉtsya Yesʉ athɨ: «Ko bɨnwa byoshi abandʉ aba abakusitakira uthashubitsye kiro na kɨnwa?» Abandʉ aba abakusitakira ki? 61 Hewethuwe Yesʉ mwayɨtsɨrɨra, na mwathashubya kɨnwa. oMuheri Mʉkʉlʉ oyo mwashʉbabʉtsya athɨ: «Ɨwe wo Kirisito Mʉgala wa Gongo yo ugashanirwe?» 62 Yesʉ mwashubya athɨ: «Ega! n'ingye! Nemwe mwashʉnga oMʉgala w'oMʉndʉ n'ikere ko malyo wa Gongo ow'amaka. Mwamʉshʉnga kuthyo niahika ɨthoka mo lʉbʉla mo kathi k'ebɨfʉ!» 63 Ko ndambi oMuheri Mʉkʉlʉ abere onvwa ebɨnwa ebi, mwaberenga esongɨmba sɨwe n'ɨnegena athɨ: «Thuthakilaire ku butimo ko mʉndʉ oyu. 64 Mwamonvwa imwe bene ko mwahangya Gongo. Omʉganɨtsya ki?» Aboshi mobanegena bathɨ atholere lʉholo*. 65 Bagʉma mo kathi kabo mobathanga ɨtsɨra kʉ Yesʉ ko mathandɨ, mobamʉshwɨka obʉsʉ n'imuhiramo nvʉndo, mobamʉbwɨra bathɨ: «Mɨnyerera nga nɨ ndɨ yo wamakuhumba!» Na bashirikani batheya mobatsɨmba Yesʉ n'ɨmʉha makofi*.

66 Petero abyaga nɨakɨnalɨ ekihya mo rʉba, mʉgʉma wa ko bakoli bakatsɨ b'oMuheri Mʉkʉlʉ mwahika aho. 67 Mwashʉnga Petero nɨotha ko mʉtsanwa, mwamʉlola, n'ɨmʉbwɨra athɨ: «Ɨwe kuthyo ʉthalɨ hagʉma na Yesʉ w'iNasareti.» 68 Hewethuwe Petero mwayɨgana, na mwanegena athɨ: «Nyithetsi ebyo ushondya ɨnegena, nyithonvwire kɨndʉ.» Honyuma kw'aho, Petero mwahʉlʉka n'ɨya ho lukyo lw'orʉba. [Ko kathambi ako, embagatsɨ moyabɨka.] 69 Omukoli mʉkatsɨ oyo mwashʉba shʉnga Petero, mwashʉba bwɨra abo babyaga aho athɨ: «Omʉndʉ oyu nɨ mʉgʉma wa kʉbo!» 70 Hewethuwe Petero mwashʉbayɨgana. Honyuma hake, abandʉ abo mobashʉbabwɨra Petero bathɨ: «Kwenene ɨwe ʉlɨ mʉgʉma wa kʉbo, kʉshangwa ɨwe kuthyo ʉlɨ mʉndʉ w'iNgalilaya.»

71 Aho Petero mwathanga ɨyɨgana n'ɨlahɨtsya kʉtsɨbʉ athɨ: «Omʉndʉ yo mwahʉla oyu nyamalahɨtsya nyɨthɨ nyithamwetsi. Na nyamabya nɨenyɨbɨha, nyɨthakɨrwe!» 72 Aho n'aho embagatsɨ moyabɨka ngendo ya kabɨrɨ, na Petero mwɨbʉka ebɨnwa ebyo Yesʉ amʉbwɨraga ko embere embagatsɨ ithetsi yabɨka ngendo ibiri, andabya nɨamayɨgana ɨye ngendo ishathu. Aho mwathanga ɨrɨra.