1 Bafarisayo na bakangɨrɨtsya bagʉma b'oMʉgomba mobathoka ɨYerʉsalemʉ, mobahindana embere sa Yesʉ. 2 Mobashʉnga bagʉma ba ko bɨga bʉwe niabalya kalyo mu minwe yɨrɨko mɨkonzɨ. Nɨ negena mbʉ, eminwe yo bathanabireko ɨkwamana n'emɨbere y'ekɨsomo kyabo.

3 Mobyabya bithyo kʉshangwa aBafarisayo n'aBayuta boshi bashikitsye emɨbere y'obwishe-kʉlʉ wabo, yo yihangire erirya bʉthanaba ko minwe, erihika ko ngokola nga ko bɨtholere. 4 Kandɨ, abanabya bathoka mo kathale, bathalɨ abanalya bathakarabire. Na kalengyo kw'ebyo bashikitsye n'eyɨndɨ mɨbere mɨngɨ ng'omʉhanda w'eryetsya esonyatha, ebɨrega n'esonyʉngʉ so sakomibawa mʉ mɨrɨnga [n'esongɨngo.*]

5 Aho aBafarisayo n'abakangɨrɨtsya b'oMʉgomba mobabʉtsya Yesʉ bathɨ: «Bʉshana na ki abɨga bawe ɨbo bathakwamire emɨbere y'abo thatha-kʉlʉ, hewethuwe abanalya mo minwe yɨrɨko mɨkonzɨ?»

6 Yesʉ mwashʉbɨtsyabo athɨ: «Imwe bayimbya, Isaya mwamɨnyerera kʉbʉya mo mʉgʉlʉ ashakaga ebɨnwa bɨno kw'imwe athɨ:

"Gongo anegena athɨ:

aBandʉ aba banyishikitsye ko mitutu yabo,

hewethuwe emɨthɨma yabo yɨrɨ hale nangye.

7 Eriramya abananyiramya nɨ lya bʉsha-bʉsha,

kʉshangwa amakangɨrɨtsya wabo

nɨ hɨhanɨrɨro hya bandʉ*."»

8 Yesʉ mwashʉba bwɨrabo athɨ: «Imwe omumika amathegeko wa Gongo bʉshana n'erishikya ehɨhanɨrɨro hy'abandʉ. 9 Mwashʉba bwɨrabo kandɨ athɨ: Mwetsi kweneneko erɨhɨgʉla amathegeko wa Gongo bʉshana mushikye ehɨhanɨrɨro hyenyu! 10 Kʉshangwa Mʉsa mwanegena athɨ: "Ushikye sho na nyoko," na kuthyo "oyo uhangya ishe kʉtse nyinya, atholere ithwa*." 11 Hewethuwe imwe omʉnanegena mʉthɨ omʉndʉ angabwɨra ishe kʉtse nyinya athɨ: "Ebyo nyangabawathikitsye nabyo byamabya Korobane. Korobane n'ɨnegena mbʉ bɨhembo bibuyirire b'ɨhemba Gongo, 12 omw'ɨkola muthyo nɨ mwamahangɨra omʉndʉ mʉthɨ athashʉba wathikya ishe kʉtse nyinya. 13 Ni bathyo k'omʉnasʉnzʉgʉra eKɨnwa kya Gongo bʉshana n'emɨbere enyu yo munashigirana. Nemwe ʉmʉkola bɨndɨ bɨndʉ bɨngɨ by'omʉhanda oyo."»

14 Honyuma kw'aho Yesʉ mwashʉba bɨrɨkɨra omuhindano w'abandʉ n'ɨbwɨrabo athɨ: «Imwe boshi mʉnyɨhʉlɨkɨrɨtsye na mʉmɨnye ebɨnwa byo nyinshondya ɨbabwɨra bɨno: 15 Bɨthalɨ byo bɨngɨra mo mʉndʉ ɨthoka embʉga byo byanga mʉyɨramo muhenyi. Hewethuwe nɨ ebyo bɨthoka mo mʉndʉ nɨ ebyo, byo bɨnamʉyɨramo muhenyi. 16 [Oyo uwithe mathwi w'ɨonvwa, onvwe.»] 17 Yesʉ abere amikana n'omuhindano w'abandʉ n'ɨngɨra mo nyʉmba, abɨga bʉwe mobamʉbʉtsya esonzomolo y'omushinga oyo. 18 Naye mwabwɨrabo athɨ: «Nemwe kuthyo muthaminyire? Muthetsi k'obʉlɨ kɨndʉ kyo kɨnɨngɨra mo mʉndʉ ɨthoka embʉga kɨthangakotsya ɨmʉyɨramo muhenyi. 19 Kʉshangwa ebɨndʉ ebyo, bɨthalɨ ebɨnɨngɨra mo mʉthɨma ʉwe, hewethuwe ebɨnɨngɨra mo nda kuroshi na honyuma kw'aho nɨbyathokamo mw'ɨya ebwɨga.» Mw'ɨnegena athyo, Yesʉ mwakangania kw'ebiryo byoshi bihamulirwe ɨrɨbwa. 20 Yesʉ mwashʉba negena athɨ: «Nɨ ebyo bɨnathoka mo mʉndʉ byo bɨnamʉyɨramo muhenyi. 21 Kʉshangwa nɨ mo mʉthɨma w'omʉndʉ, mo mʉnathoka emɨganɨtsye mɨbɨ yo yɨnaletha: ɨthola bakatsɨ ba bene na bwɨtsɨ na bwithi 22 na rʉsɨngɨ na ngʉmbʉ mbɨ ya bɨndʉ na mɨkolano mɨbɨ na buliribania na mɨbere mɨbɨ na mwisho na buhangya n'ɨyɨheka na bʉhʉmo. 23 Ebɨbɨ byoshi ebi ebɨnathoka mo mʉndʉ, nabyo nɨbyamʉyɨramo muhenyi.»

24 Honyuma kw'aho Yesʉ mwathoka aho, n'ɨya mo ndambɨ ndambɨ s'omuyi w'iTiro. Mwɨngɨra mʉ nyʉmba ngʉma, naye mwashondya abandʉ bathamɨnyaga ko alɨ omo, hewethuwe mwathakotsya iyibisha. 25 Aho n'aho mʉkatsɨ mʉgʉma mwonvwa omwatsɨ wa Yesʉ. Omʉkatsɨ oyo mwalɨ ʉwe abyagako mɨtsɨmʉ mɨbɨ. Mwahikira Yesʉ n'ɨyɨgʉsha mo bɨshando bɨwe. 26 Omʉkatsɨ oyo abyaga mukiriki, mbʉthɨrwa w'iFoiniki mo kɨhʉgo ky'iSuria. Mwashaba Yesʉ abɨnge omʉtsɨmʉ mʉbɨ oyo athoke kʉ mwalɨ ʉwe. 27 Yesʉ mwamʉshʉbɨtsya athɨ: «Thanga walika abana buguthe, kʉshangwa bithakwirire ɨtsɨmba akalyo k'abana n'ɨgʉshɨrako esombwa.» 28 Omʉkatsɨ mwamʉshʉbɨtsya athɨ: «Nyinya-kowethʉ, wamanegena ekwenene, hewethuwe ebɨbwana ebinalya ebɨshakɨtsya by'akalyo kw'abana abanathogongya ko lʉgalɨ.» 29 Aho Yesʉ mwamʉbwɨra athɨ: «Bʉshana n'ekɨnwa eki, shʉba ewawe, omʉtsɨmʉ oyo amathoka kʉ mwalɨ wawe.» 30 Omʉkatsɨ mwashʉba ewe, mweya mwalɨ ʉwe niayilambikire ko ngɨngo, n'omʉtsɨmʉ mʉbɨ niamalire ɨmʉthokako.

31 Honyuma kw'aho Yesʉ mwathoka mo kɨhʉgo kyabyaga hofɨ n'iTiro. Mwatsʉka mo muyi w'iSitona na mwalotsya ko ngetsɨ y'iNgalilaya mo kɨhʉgo ky'eMiyi iKumi. 32 Mobalethera Yesʉ yo mʉndʉ mʉgʉma yo wabyaga mʉtsɨha na muthethu-thethu. Abo bamʉlethaga mobashaba Yesʉ amuhireko eminwe. 33 Aho Yesʉ mwathokya omʉndʉ oyo mo kathi k'omuhindano w'abandʉ, mwamʉthwala hale hake n'abandʉ. Mwahira eminwe mo mathwi w'omʉndʉ oyo, mwayɨtsɨrako mathandɨ ko minwe na mwakola ko lʉlɨmɨ lw'omʉndʉ oyo. 34 Yesʉ mwashʉmba amesho mo lʉbʉla, mwahʉmʉlɨkana kʉtsɨbʉ n'ɨbwɨra omʉndʉ oyo athɨ: «Efata», n'ɨnegena mbʉ, «Tsɨbʉkala!» 35 Aho n'aho amathwi ʉwe mwatsɨbʉkala, na kuthyo olʉlɨmɨ lʉwe molwagobokala, mwathanga ɨnegena kʉbʉya. 36 Yesʉ mwahamʉla abandʉ athɨ bathabwɨraga mʉndʉ n'omʉgʉma ekyamakoleka. Hewethuwe na mwanahangɨragabo, ɨbo mobathalika ithulagania omwatsɨ oyo ko bandʉ. 37 Abandʉ mobashweka kʉtsɨbʉ n'ɨnegena bathɨ: «Ko kwenene, ebyoshi akola bikwirire. Akɨngʉla amathwi w'abatsɨha, anegenia n'othurumbu.»