1 Yesʉ abere anemʉthoka mo Nyʉmba ya Gongo, mʉgʉma w'oko bɨga bʉwe mwamʉbwɨra athɨ: «Mʉkangɨrɨtsya, shʉnga! Enyʉmba eyi ko yɨngana, n'amabwe w'ahimbagaro kw'akwirire!» 2 Yesʉ mwamʉshʉbɨtsya athɨ: «Ʉnatsene ko nyʉmba nene nene esi? Kuthindashibe kiro n'ibwe elʉgʉlʉ w'erɨndɨ, awoshi andashambʉlwa.»

3 Yesʉ abyaga n'ikere ko kɨthwa ky'iMiseituni ko mʉnda ow'alolire ko Nyʉmba ya Gongo. Petero na Yakobo na Yoani na Ndereya mobamuhikira ahathalɨ bandʉ. Mobamʉbʉtsya bathɨ: 4 «Thʉbwɨre, ebɨnwa wamanegena byandabya kʉ mʉgʉlʉ ohɨ? Na kɨhɨ kyo kɨmɨnyɨkalo kyandakangania kw'ebɨnwa byoshi ebyo ebishondya ɨbererera?»

5 Aho Yesʉ mwathanga ɨbwɨrabo athɨ: «Mʉmɨnyage, kuthabyaga kiro na mʉndʉ wabathɨma. 6 Bandʉ bangɨ bandahika mw'ɨtsɨna lyaye nɨabanegena bathɨ: "Ingye nyɨrɨ Kirisito!" Na bandathɨma bandʉ bangɨ. 7 Mwandabya mwonvwa omwatsɨ w'amalwa, kʉtse ehwehweri y'amalwa mʉthand'ʉbaha. Lɨtholere ebyo nibyabya, hewethuwe ebyo bɨthalɨ ebikangania kw'enduli y'ekɨhʉgo yamahika. 8 Kʉshangwa ekɨhʉgo kyandalwa na kɨndɨ kɨhʉgo, na bwamɨ bwandalwa na bʉndɨ bwamɨ. Thulingiti thwandatsʉka handʉ hangɨ-hangɨ na kuthyo kwandabya nzala. Ebyoshi ebi byandabya nga ndangɨro ya bwagali bw'ɨkʉnda. 9 He imwe muyitheye kʉshangwa abandʉ bandabathwala ko tɨrɨbɨnalɨ bʉshana n'ɨbasoha n'ibahumba mbasha mo sosinakoki. Na kuthyo mwandathonda embere s'abakʉlʉ n'abamɨ bʉshana nangye. Bʉshana n'ekyo mwandabya batimo baye embere sabo. 10 Bɨtholere Engʉlʉ Mbʉya ɨthange ɨfʉlɨrwa abandʉ b'ebɨhanda byoshi.» 11 «Bandabya babathwala ko tɨrɨbɨnalɨ, mʉthaganga-gangaya emɨthɨma enyu nga mwanegena ki. Hewethuwe ebyo mwandanegena mwandahabwabyo kona ndambi eyo. Kʉshangwa mʉthalɨ imwe mwandanegena, hewethuwe oMʉthɨma Mwerʉ. 12 Mʉndʉ andahothera mʉgalabo bʉshana n'ɨmwɨthɨsa, n'ishe w'omwana andakolera mʉgala yo athyo. Abana nabo bandabɨndʉka ko babuthi babo na bandɨthɨsabo. 13 N'abandʉ boshi bandababaga bʉshana nangye. Hewethuwe yo wandatsitsinia ihika ko nduli, oyo, andashabʉlwa.»

14 «Mwandabya mwashʉnga yo wahʉlwamo "Mubihya" imana aho athatholere ibya, yo ʉsoma ebɨnwa ebi onvwebyo kʉbʉya. Aho, abo bandabya iYuteya bashayɨre ko bɨthwa. 15 Yo wandabya ko lʉthwe lw'enyʉmba athakimaga n'ɨngɨra omwe bʉshana ayahekemo kɨndʉ. 16 Yo wandeyibwa mw'ɨshwa, naye athashʉbaga ewe bʉshana n'ɨyaheka olʉkɨmba lʉwe. 17 Bʉlɨgo ko bakatsɨ bo bandabya nɨ bakʉle na kw'abo bandabya niabongya mo bɨro ebyo. 18 Mʉshabe Gongo bʉshana ebyo bithabyaga mo bɨro by'embeho. 19 Kʉshangwa ebɨro ebyo, byandabya bɨro bya malɨgo mangɨ ow'athahera athashʉngɨka ɨthanga ko kɨro Gongo ahangɨkaga ekɨhʉgo ihika lɨno. Na kuthindashubabye wandɨ malɨgo alɨ ng'ayo. 20 Na Nyinya-kowethʉ athangakehitsye ebɨro by'amalɨgo ebyo, hathangabere kiro na mʉndʉ yo wangashabwirwe. Hewethuwe mwakehya ebɨro ebyo bʉshana n'abo ayɨshomboleraga.» 21 «Aho, mʉndʉ mʉlebe amababwɨra athɨ: "Mʉlole, Kirisito alɨ hano!" kʉtse "Alɨ halira!" mʉthamwɨkɨrɨtsyaga. 22 Kʉshangwa kwandahʉlʉka bo kirisito ba mabesɨ na bamɨnyeretsɨ ba mabesɨ. Abandʉ abo bandakola bɨmɨnyɨkalo na bɨthɨko-thɨko, bʉshana bɨrɨ byangathokekana bathɨme n'abo Gongo ashombolaga. 23 Hewethuwe imwe mʉmɨnyage kʉshangwa nyamalire ɨbabwɨra ebyoshi ebyo.»

24 Hewethuwe mo bɨro ebyo, honyuma w'amalɨgo ayo,

erɨtsʉba lyandabya mwitsimya,

omʉgenda athɨndashʉba koletsye.

25 Esongununu sandathogonga ɨthoka mo lʉbʉla.

N'ebyoshi by'amaka byo bɨrɨ mo lʉbʉla, byandathenganibwa.

26 Aho, Mʉgala w'oMʉndʉ andashʉngwa nɨathoka mo bɨfʉ mo maka na mo lʉkengerwa lʉwe. 27 Aho andathʉma abamalaɨka bʉwe ko mbande ine s'ekɨhʉgo ihika ko nduli y'olʉbʉla bʉshana bayashongye abandʉ bʉwe ashombolaga.

28 «Mw'ɨgɨre ko mushinga w'omʉthɨ w'omutini. Ko ndambi amathahɨ wao alashʉla, n'ebɨthɨ byawo byalasha, imwe omʉnamɨnya kw'endambi y'ekyanda yɨhera hofɨ. 29 Na kuthyo, mwandabya mwashʉnga ebɨnwa ebyo byahika, mʉmɨnye kw'oMʉgala w'oMʉndʉ alɨ hofɨ, na ahera ko lukyo. 30 Kwenene enyɨbabwɨra nyɨthɨ abandʉ b'olʉgero olu bathɨndahwe embere ebɨnwa byoshi ebi bibye. 31 Olʉbʉla n'ekɨhʉgo byandatsʉka, hewethuwe ebɨnwa byaye ɨbyo bɨthɨndatsʉke kiro na hake.»

32 «Hathalɨ mʉndʉ yo wetsi ekɨro kʉtse endambi ebyo byandabya. Ibye abamalaɨka ba mo lʉbʉla ibye Mʉgala wa Gongo, hewethuwe Thatha mʉsha yo wetsi. 33 Muyitheye, mubye mesho, kʉshangwa muthetsi ekɨro n'omʉgʉlʉ ebyo byandahika. 34 Byandabya nga mʉndʉ yo ʉlalɨtsya lʉgendo. Abere athoka ewe mwamikira abakoli bw'obuthegeki bʉwe, mw'ɨha bʉlɨ mʉndʉ omʉlɨmo ʉwe. Na kuthyo mwahamʉla omutheya w'oluyi abye mesho. 35 Aho mutheye, kʉshangwa muthetsi endambi omwenye nyʉmba andashʉbʉla. Yangabya mwigolo, kʉtse mʉ kathi ka kɨro, kʉtse ko ndambi embagatsɨ inabya yabɨka, kʉtse mo makerakera. 36 Bʉshana n'ekyo mutheye athangandahika bʉthalagana n'ibeya nɨ mʉlɨ thʉlo. 37 Ebɨnwa enyɨbabwɨra, enyɨbwɨrabyo abandʉ boshi, mutheye.»