1 Honyuma kw'aho Yesʉ n'abɨga bʉwe mobahika ko ʉndɨ mʉnda w'engetsɨ y'iNgalilaya mo kɨhʉgo ky'aBangerasi.

2 Yesʉ abere anemʉthoka mo bwatho, aho n'aho mʉndʉ mʉgʉma yo wabyagako mʉtsɨmʉ mʉbɨ mwathoka ko masɨnda bʉshana n'iyahindana naye. 3 Omʉndʉ oyu, ko masɨnda ko kwabyaga kowe. Na kandɨ hathabyaga mʉndʉ yo wangakotsitsye ɨshʉba mʉmɨna, ibye na mʉ bʉhʉlʉla. 4 Ngendo nyɨngɨ, abandʉ bagenda abamɨna ebɨshando bɨwe mʉ byʉma n'amaboko mʉ bʉhʉlʉla, hewethuwe agenda atsitsanga obʉhʉlʉla obo n'itsitsanga ebɨkono by'ebyʉma ebyo. Hathabyaga mʉndʉ n'omʉgʉma yo wabyaga na kagala k'imwikikania. 5 Ko bʉlɨ kathambi, kɨro na mwɨshɨ agenda atsʉka-tsʉka ko masɨnda na ko bɨthwa, alɨahambala n'ɨyɨbabatsya-babatsya mu mabwe.

6 Abere ashʉnga Yesʉ yo hale, mwagenda tsʉba ɨya mʉfʉkamɨra. 7 Mwahambala mʉ mʉlenge mʉnene athɨ: «Yesʉ, Mʉgala wa Gongo yo ʉlɨ mo lʉbʉla, unyishondya ko ki? Enyɨkʉshaba kw'ɨtsɨna lya Gongo, uthanyinubyaga!» 8 Anegenaga athyo kʉshangwa Yesʉ agenda amʉhamʉla athɨ: «Ɨwe mʉtsɨmʉ mʉbɨ, thoka ko mʉndʉ oyu!» 9 Aho Yesʉ mwamʉbʉtsya athɨ: «Erɨtsɨna lyawe ɨwe ndɨ?» Naye mwamʉshʉbɨtsya athɨ: «Erɨtsɨna lyaye nɨ "Kɨkembe" kʉshangwa thʉlɨ bangɨ.» 10 Omʉndʉ oyo mwatsitsinia ɨshaba athɨ Yesʉ athathokaya emɨtsɨmʉ mɨbɨ mo kɨhʉgo ekyo.

11 Na hofɨ n'ekɨthwa habyaga kihyo kɨnene kya ngʉlʉbe sosagenda esishondya kalyo. 12 Aho emɨtsɨmʉ mɨbɨ moyashaba Yesʉ yɨthɨ: «Thʉthʉme mo so ngʉlʉbe sirira thwɨngɨre mʉtho.» 13 Yesʉ mwatsɨɨraro. Aho, emɨtsɨmʉ mɨbɨ eyo moyathoka ko mʉndʉ oyo n'ɨngɨra mo so ngʉlʉbe. Ekihyo kyoshi ky'esongʉlʉbe mosahʉrʉmʉka tsʉba ko kɨthwa n'ɨthogongera mo ngetsɨ. Esongʉlʉbe etho sabyaga hofɨ bɨhʉmbɨ bɨbɨrɨ, na mosashenda mo ngetsɨ.

14 Abalishya b'esongʉlʉbe etho mobashaga, n'ɨyafʉla omwatsɨ mo muyi na mo mɨrongo. Abandʉ mobahika bʉshana bashʉnge ko byo bithabya. 15 Babere bahika ho Yesʉ abyaga, mobashʉnga oyo wabyagako ekihyo ky'emɨtsɨmʉ mɨbɨ n'ikere, niambithe lʉkɨmba niamalire ɨlama. Aho, abandʉ abo mobʉbaha. 16 Bo bashʉngaga ebyo byahikiraga omʉndʉ yo wabyagako emɨtsɨmʉ mɨbɨ, n'ebyo byahikiraga esongʉlʉbe, mobasɨmolera abandɨ bw'emyatsɨ eyo. 17 Bʉshana n'ekyo mobathanga ɨshaba Yesʉ yo kʉtsɨbʉ athoke mo kɨhʉgo kyabo. 18 Yesʉ abere analɨ ashambɨra mo bwatho, omʉndʉ yo wabyagako emɨtsɨmʉ mɨbɨ mwamʉshaba kʉtsɨbʉ athɨ agende hagʉma naye. 19 Yesʉ mwathamʉtsɨɨra, hewethuwe mwamʉbwɨra athɨ: «Genda ewawe eyɨrɨ olʉganda lwawe, na ʉsɨmolerebo ebɨnwa Nyinya-kowenyu athakʉkolera na kw'athakʉfwɨra shashi.» 20 Ko nduli, omʉndʉ oyo mwayɨgendera, mwathanga ɨganʉlɨra mo kɨhʉgo ky'eMiyi Ikumi ebɨnwa byoshi Yesʉ athamʉkolera. N'abandʉ boshi bo bamwonvwaga, mobashweka kʉtsɨbʉ.

21 Yesʉ mwashabʉkɨra ko ʉndɨ mwishirya w'engetsɨ y'iNgalilaya mʉ bwatho. Abere animene emʉsɨke w'engetsɨ, bandʉ bangɨ mobahindana hofɨ naye. 22 Aho mʉgʉma w'oko bakʉlʉ b'esinakoki yo wagenda ahʉlwamo Yairo, mwahika aho. Abere ashʉnga Yesʉ mwafʉkama embere sɨwe. 23 Mwashaba Yesʉ yo kʉtsɨbʉ nɨanegena athɨ: «mwalɨ waye mʉlere athakɨrɨko kalamo. Enyɨkʉshaba, hika umuhireko eminwe, bʉshana alame na ashʉbe byaho!»

24 Aho Yesʉ mwagenda naye. Bandʉ bangɨ mobakwama Yesʉ nɨabamʉyɨndɨrɨtsya.

25 Na mo kathi k'abandʉ abo mwabyaga mʉkatsɨ mʉgʉma yo wabyaga nɨamamala myaka ikumi n'ibiri nɨanalwere bukoni bw'ɨthoka mʉsasɨ. 26 Omʉkatsɨ oyo mwagalwa kʉtsɨbʉ mw'ɨgendera bashake bangɨ. Namo byanabyaga bithyo, mwahetsya ebyoshi abyaga awitheko na mwathalama. Hewethuwe mwaserwa kʉtsɨbʉ. 27 Omʉkatsɨ oyo mwonvwa omwatsɨ wa Yesʉ. Mwahika n'ɨngɨra mo muhindano w'abandʉ enyuma wa Yesʉ n'ɨkola ko lʉkɨmba lʉwe, 28 kʉshangwa agenda ayinegenia athɨ: «Nyamakola ko lʉkɨmba lwa Yesʉ nɨ nyalama.» 29 Abere akola ko lʉkɨmba lwa Yesʉ, aho n'aho omʉsasɨ mwathashʉba thoka mo mʉbɨrɨ ʉwe. Naye mwayonvwa kw'amalama.

30 Aho n'aho Yesʉ mwamɨnya ko akagala kamʉthokamo. Mwabɨndʉka mo kathi k'omuhindano n'ɨbʉtsya athɨ: «Nɨ ndɨ yo ʉthakola ko lʉkɨmba lwaye?»

31 Abɨga bʉwe mobamʉshʉbɨtsya bathɨ: «Shʉnga kw'abandʉ abakʉyɨndɨrɨtsya! Kʉthɨ ko ʉbʉtsya ʉthɨ nɨ ndɨ yo wamakʉkolako?»

32 Hewethuwe Yesʉ mwathimbya amesho ko bandʉ babyaga bamuthimbireko, bʉshana alole nga nɨ ndɨ yo wamakola ebyo. 33 Omʉkatsɨ oyo mwʉbaha na mwathanga ithithimana, kʉshangwa mwamɨnya ebyoshi bithamuhikira. Aho mwayɨgʉsha mo bɨshando bya Yesʉ n'ɨmʉbwɨra ekwenene yoshi. 34 Yesʉ mwamʉbwɨra athɨ: «Mwalɨ waye, olwɨkɨrɨtsyo lwawe lwamakulamya. Ʉgende mʉ bʉholo, obukoni bwawe bwamalama!»

35 Yesʉ abere akɨnalɨ anegena, bagendi mobahika ɨthoka ewa Yairo omʉkʉlʉ w'esinakoki. Abagendi abo mobabwɨra Yairo bathɨ: «Mwalɨ wawe athakɨrɨho. Bʉshana na ki ʉkɨne mʉkendetsya oMʉkangɨrɨtsya?» 36 Hewethuwe Yesʉ mwathakwama ebɨnwa byabo, mwabwɨra omʉkʉlʉ oyo athɨ: «Ʉthʉbahaga, wɨkɨrɨtsye kuroshi.» 37 Yesʉ mwathatsɨga kubye mʉndʉ w'ɨmʉherekeretsya, athalɨ Petero, Yakobo, na Yoani wa mʉ nda ngʉma na Yakobo. 38 Babere bahika ho nyʉmba y'omʉkʉlʉ Yairo, Yesʉ mweya nɨ halɨ bʉrʉnga, abandʉ bagenda abalɨra nɨahambala kʉtsɨbʉ. 39 Mwɨngɨra mo nyʉmba n'ɨbwɨra abandʉ athɨ: «Bʉshana na ki omʉletha bʉrʉnga n'ɨrɨra? Omwana oyu athafwire, hewethuwe alɨtho!»

40 Abandʉ abo mobathanga ɨmʉshekeretsya. Hewethuwe Yesʉ mwahʉlʉkɨtsya abandʉ boshi bw'embʉga, mwatsɨmba ishe na nyinya bw'omwana n'abɨga bʉwe bashathʉ. Mwɨngɨra mo kɨshenge kyo kyabyagamo ekinda ky'omwana. 41 Mwatsɨmba omwana ko kʉboko n'ɨmʉbwɨra athɨ: «Talita kumu!» n'ɨnegena mbʉ: «Mʉthasha, enyɨkʉbwɨra wimana!»

42 Aho n'aho, omʉthasha oyo mwimana na mwathanga ɨgenda. Abyaga na lʉgero lwa myaka ikumi n'ibiri. Abandʉ mobashweka kʉtsɨbʉ babere bashʉnga ekɨnwa ekyo. 43 Hewethuwe Yesʉ mwahangɨrabo kʉtsɨbʉ bathabwɨraga mʉndʉ woshi woshi ekɨnwa kyakolekaga. Honyuma kw'aho, mwabwɨrabo athɨ bahe omwana oyo yo kalyo.