1 Honyuma w'erimikana n'abangʉmwa b'ekanisa k'ɨEfeso mothwɨngɨra mo bwatho aho n'aho mothwashabʉkɨra ko kɨtsɨra ky'iKosi. Bwabere bwakya mothwashabʉkɨra ko kɨtsɨra ky'ɨRoto. Mw'ɨthoka ko kɨtsɨra ky'ɨRoto ekyo mothwahika ko muyi w'ɨPatara. 2 Mo muyi oyo, mothweyamo bwatho bʉgʉma bo bwagenda obʉya mo kɨhʉgo ky'iFoiniki. Mothwashambɨra mo bwatho obo na mothwagenda. 3 Thwabere thwahera othʉshʉnga ekɨtsɨra ky'eKipuro ky'eyishirya, mothwashigakyo ko lʉnda lw'amalembe na mothwalotsya mo kɨhʉgo ky'iSuria. Mothwimana ko kyambʉ ky'iTiro bʉshana nɨ mo muyi oyo m'obwatho bwangikitsye emɨtsɨgo bwabyaga buhekire.

4 Mothwahindana n'abɨga b'omo muyi oyo, mothwamala yenga ngʉma hagʉma nabo. Abɨga abo kʉshangwa bagenda abashondolwa n'oMʉthɨma Mwerʉ, mobabwɨra Polo bathɨ athɨrʉkɨraga ɨYerʉsalemʉ. 5 Hewethuwe honyuma w'erɨmala eyenga ngʉma eyo mothwathoka ko muyi w'iTiro oyo na mothwalotsya ebʉshondotsɨ mo lʉgendo lwethʉ. Abɨga boshi abo hagʉma n'abakatsɨ n'abana mobathʉherekeretsya ɨthoka ko muyi ihika ko kyambʉ. Thwabere thwahika ko kyambʉ ekyo, mothwafʉkama n'ɨshaba Gongo. 6 Honyuma w'erɨlagana, mothwashambɨra mo bwatho. Hewethuwe abɨga abo ɨbo, mobashʉba ewabo.

7 Erɨthoka iTiro, mothwalotsya ebʉshondotsɨ mo lʉgendo lwethʉ lw'oko ngetsɨ mothwahika mo muyi w'iTolemai. Thwabere thwahika mo muyi oyo mothwaketsya bagala bethʉ bɨkɨrɨtsya, mothwamala kɨro kɨgʉma hagʉma nabo. 8 Bwabere bwakya, mothwashʉbagenda, na mothwahika mo muyi w'iKaisaria. Oko mothwɨngɨra mo nyʉmba ya Filipo mufuli w'eNgʉlʉ Mbʉya na mothwikala omwe. Filipo oyo abyaga mʉgʉma w'oko bandʉ balɨnda abo bashombolawa bawathikye abathʉmwa.* 9 Abyaga niawithe banyere bane bo bagenda abamɨnyerera.

10 Thwabere thwamamala ko muyi w'iKaisaria oyo ko bɨro bɨngɨ, momwahika mʉmɨnyeretsɨ mʉgʉma erɨtsɨna lɨwe nɨ yo Akabo. Akabo oyo mwahʉlʉka mo kɨhʉgo ky'iYuteya. 11 Abere ahika ho thwabyaga, mwatsɨmba omʉkaba wa Polo, mwayɨmɨna mʉwo mw'ebɨshando n'eminwe. Mwanegena athɨ: «Mwonvwe, oMʉthɨma Mwerʉ anegena, athɨ: "Omwenye omʉkaba oyu, ni bathya ko bamʉmɨna aBayuta b'omo muyi w'ɨYerʉsalemʉ n'imuhira mo minwe y'abandʉ b'ebɨhanda."»

12 Thwabere thwonvwa ebyo, ithwe hagʉma n'abandɨ bɨkɨrɨtsya b'omo muyi w'iKaisaria, mothwashaba Polo yo kʉtsɨbʉ thʉthɨ athɨrʉkɨraga ɨYerʉsalemʉ. 13 Hewethuwe Polo ɨye mwathʉshʉbɨthya athɨ: «Bʉshana na ki omʉlɨra n'inyitha mʉthɨma? Ingye nyamayɨsɨnga ɨyamɨnɨrwa ɨYerʉsalemʉ bʉshana n'erɨtsɨna lya Nyinya-kowethʉ Yesʉ. Na lwamabya lʉholo nyimire olʉholo bʉshana na Yesʉ.» 14 Thwabere thwashʉnga ko thwamalemwa imuhya, mothwatsɨra, aho mothwanegena thʉthɨ: «Erishondya lya Nyinya-kowethʉ lyo lɨkoleke.»

15 Honyuma w'ebɨro ebyo, mothwayithegekania na mothwɨrʉkɨra ɨYerʉsalemʉ. 16 Bɨga bagʉma b'omo muyi w'iKaisaria mobathʉherekeretsya n'ithuhikya ho thwikalaga, ho wa muyira mʉgʉma nɨ yo Munasoni. Munasoni oyo abyaga w'omo kɨtsɨra ky'iKipuro, na kuthyo abyaga mʉgʉma w'oko bɨga bambere.

17 Thwabere thwahika ɨYerʉsalemʉ, bagala bethʉ bɨkɨrɨtsya mobathukokya na lʉmogo. 18 Bwabere bwakya, Polo hagʉma nethwe mothwaya omwa Yakobo. Abangʉmwa boshi b'ekanisa nabo babyagamo. 19 Polo mwaketsyabo na mwaganʉlɨrabo kɨnwa kʉ kɨnwa, ebyoshi Gongo agenda akola mo kathi k'abandʉ b'ebɨhanda, ɨtsʉkɨra mo mʉlɨmo ʉwe.

20 Abangʉmwa abo babere bonvwa ebyo, mobasingya Gongo. Nɨmo babwɨra Polo bathɨ: «Mbe mʉgala ethʉ! Lola aBayuta bo bamɨkɨrɨtsya nga ko bangana, na kandɨ aboshi bashikitsye oMʉgomba wa Mʉsa wo kʉtsɨbʉ. 21 Aho bamamala ɨonvwa engʉlʉ kw'ɨwe ouhya aBayuta boshi bo bikere mo bandʉ b'ebɨhanda ko bathagenda abashikya oMʉgomba wa Mʉsa. Kuthyo bathɨ ambʉ, ʉbwɨrabo bathashʉba genda abamonia abana babo, n'ɨhangɨrabo ʉthɨ bathashʉba kwama emɨbere y'aBayuta. 22 Aho thʉyɨre thʉthɨ? aBayuta abo bonvwa ko wamalire ihika kʉno. 23 Bʉshana n'ekyo, ekyo othushondya ɨkʉbwɨra kɨno kyo ʉkole, thʉlɨ na bayira bane hano bamalahɨtsya embere sa Gongo, 24 ʉgende nabo mo kɨsomo ky'erɨyetsya. N'ebyoshi bashabwa nɨ ɨwe wo walɨhɨrabyobo nɨmo bagembwa. Ekɨnwa ekyo kyakangania abandʉ boshi ko ebɨnwa bathakonvwako nɨ mabesɨ masha. Na kuthyo bamɨnya kwenene ko ukinashikitsye oMʉgomba wa Mʉsa. 25 Ko byo birebitsye abandʉ b'ebɨhanda bo bɨkɨrɨtsye, thwamamala ɨshakɨrabo bʉshana n'ebyo thwasohaga thʉthɨ, bathagenda abashubalya nyama sɨthahererwa mɨtsɨmʉ, kʉtse irya mʉlegano, kʉtse irya nyama sɨthayɨfwɨra na bayitheye ko rʉsɨngɨ.*»

26 Aho bwabere bwakya Polo mwagenda n'abayira bane abo, na mwayetsya hagʉma nabo. Honyuma kw'aho mwaya mo Nyʉmba ya Gongo bʉshana abwɨre abandʉ omʉgʉlʉ w'erɨyetsya lyabo nga lyandahwa kɨro ki, n'ebɨhembo byo byandahanwa bʉshana n'obʉlɨ mʉgʉma wa kʉbo.

27 Ebɨro bɨrɨnda by'erɨyetsya byabere byashondya ɨhwa, aBayuta bagʉma bobathokaga mo kɨhʉgo ky'iAsia, mobashʉnga Polo mo Nyʉmba ya Gongo. Mobakaramya omuhindano woshi na mobamʉtsɨmba. 28 Mobahambala bathɨ: «Imwe bayira boshi b'iIsiraeli, muhike mʉthwangɨrɨre! Omuyira oyo yono, oyo ʉtsʉka ahoshi-hoshi alɨ akangɨrɨtsya abandʉ boshi athɨ bagende abathʉsʉnzʉgʉra, n'ɨbwɨrabo athɨ bathashikaya oMʉgomba wa Mʉsa n'ɨsʉnzʉgʉra eNyʉmba ya Gongo nyibuyirire eno. Na lɨno amabihyaro mw'ɨngɨtsya mʉro mw'aBakiriki!» 29 Banegenaga bathyo, kʉshangwa mobashʉnga Polo mo muyi nɨalɨ na muhimbani mʉgʉma w'ɨEfeso yo wahʉlawamo Torofimo. Mobaganɨtsya bathɨ mwakamwɨngɨtsya mo Nyʉmba ya Gongo.

30 Olʉkanda molwotsula mo muyi woshi w'ɨYerʉsalemʉ. Abandʉ mobathɨbɨthɨra aho Polo abyaga nɨabathoka mo mbande soshi, mobamʉtsɨmba n'ɨmʉkʉrɨra embʉga y'eNyʉmba ya Gongo. N'ɨkɨnga esonyuyi saro aho n'aho. 31 Babere bashondya itha Polo, omʉkʉlʉ kʉtsɨbʉ w'abashirikani b'aBaroma mwonvwa omwatsɨ k'omuyi woshi w'ɨYerʉsalemʉ alɨmo lʉkanda. 32 Aho n'aho, mwatsɨmba abashirikani bagʉma n'abakʉlʉ babo, n'ɨthɨbɨthɨra nabo aho abandʉ abo babyaga nibamahindanira. Abandʉ abo babere bashʉnga ko mʉkʉlʉ kʉtsɨbʉ wa abashirikani n'abashirikani bʉwe, aho mobalika ihumba Polo.

33 Aho omʉkʉlʉ kʉtsɨbʉ oyo, mwayɨfʉnda hofɨ na Polo. Mwatsɨmba Polo n'ɨhamʉla bamʉmɨne mʉ mahʉlʉla abɨrɨ. Honyuma kw'aho mwabʉtsya abandʉ athɨ: «Omʉndʉ oyu nɨ ndɨ? Na amakola ki?» 34 Hewethuwe babere balɨ abamʉshʉbɨtsya, abandʉ abo bagenda abahambala bagʉma bathya n'abandɨ bathya. Bʉshana n'ekyo omʉkʉlʉ kʉtsɨbʉ w'abashirikani oyo mwathamɨnya kwenene ebyo bithabya. Aho mwahamʉla athɨ bathwale Polo mo rʉba lw'abashirikani. 35 Polo abere ahika ko kɨrʉkɨro, abashirikani mobashʉnga ko bɨtholere bamʉshʉmbe bʉshana n'erɨkarama ly'omuhindano. 36 Abandʉ boshi babyaga nibakwamire Polo bagenda abagenda nɨabahambala bathɨ: «Itwe!»

37 Mo kathambi abashirikani babere bashondya ɨngɨtsya Polo mo rʉba lwabo, mwabwɨra omʉkʉlʉ kʉtsɨbʉ athɨ: «Mbe mʉkengwa wanganatsɨɨra nyɨkʉbwɨre kɨnwa?» Omʉkʉlʉ mwamʉbʉtsya athɨ: «Wetsi ekikiriki? 38 Ʉthalɨ ɨwe oMumisiri yo walethaga olʉkanda mo muyi ono mo bɨro byamatsʉka, n'ɨthwala ababandi bɨhʉmbɨ bɨne mo mbwarara?» 39 Polo naye mwashubya athɨ: «Ingye nyɨrɨ Muyuta, mbʉthɨrwa w'omo muyi w'ɨTarɨso. Omuyi oyo ayire ngʉlʉ mo kɨhʉgo ky'iKilikia. Aho mbe mʉkengwa, enyɨkʉshaba ʉnyɨtsɨyɨre nyɨnegene n'abandʉ aba.» 40 Omʉkʉlʉ kʉtsɨbʉ w'abashirikani oyo mwamʉtsɨyɨra athɨ anegene. Polo mwimana ko kɨrʉkɨro, mwakohetsya abandʉ mo minwe na mobatsɨra. Abandʉ boshi babere bamatsɨra nɨmo Polo anegena nabo mo mʉnegene wabo w'ekɨebʉranɨa athɨ: