1 Abathʉmwa n'abɨkɨrɨtsya bo babyaga iYuteya, mobonvwa ko abandʉ b'ebɨhanda kuthyo mobɨkɨrɨtsya eKɨnwa kya Gongo. 2 Petero abere ashʉba ɨYerʉsalemʉ, abɨkɨrɨtsya b'aBayuta mobakubisania 3 nɨabanegena bathɨ: «Ndɨ ɨwe mowɨngɨra mo nyʉmba ya bo bathamwene na moulya hagʉma nabo!»

4 Aho Petero mwathanga ɨsonzomolerabo ebyoshi byatsʉkaga. Mwabwɨrabo athɨ: 5 «Nyabyaga mo muyi w'ɨYopa nɨenyɨshaba, monyabya nga nyamalekʉla nangye monyashʉnga humanani. Monyashʉnga kʉ kɨndʉ kɨrebe niekikimibwa ɨthoka mo lʉbʉla, nɨ kɨrɨ nga lʉkɨmba lʉnene lutsimbirwe ko mbande ine niekikimira ho nyɨrɨ. 6 Monyayɨthegeretsya ebyo byabyaga omwishi na monyashʉnga sonyama s'ebɨrenge bɨne, n'esonyama s'omo ndokolo, n'esosɨnagendera ko nda n'ebɨronge. 7 Aho monyonvwa mʉlenge nɨanyɨbwɨra athɨ: "Petero, hangana, kera na ulye!" 8 Hewethuwe monyashubya nyɨthɨ: "Oo ɨhɨ mbe Nyinya-kowethʉ, kʉshangwa nyɨthahera nyathalya kɨndʉ kɨthatholere kʉtse kitherire." 9 Omʉlenge mwashʉba onvwɨka mo lʉbʉla athɨ: "Ebyo Gongo athetsya, ʉthahʉlaga mʉbyo mo bitherire." 10 Ekyo mokyashʉngɨka ngendo kashathʉ, honyuma kw'aho ebɨndʉ byoshi ebyo mobirukibwa mo lʉbʉla.

11 «Kona kathambi ako, bayira bashathʉ mobahika ho nyʉmba thwabyaga, bathʉmawa kw'ingye nɨabathoka iKaisaria. 12 oMʉthɨma Mwerʉ mwanyɨbwɨra athɨ enda hagʉma nabo bʉtsɨra ɨthɨka-thɨka. Abɨkɨrɨtsya ndathʉ aba mobanyɨherekeretsya iKaisaria na mothwingire ithwe boshi mo nyʉmba ya Koroneri. 13 Koroneri oyo mwathuganulire nga kw'ashʉngaga kʉ malaɨka yo wimanaga mo nyʉmba yɨwe n'ɨmʉbwɨra athɨ: "Thʉma bandʉ ɨYopa bayalethe Simoni, yo ʉnahʉlwamo Petero. 14 Ɨye, akʉbwɨra ebɨnwa ebyo byandakʉlethera bushabuli, ɨwe n'abandʉ boshi abalɨ omwawe."

15 «Nyabere nyathanga ɨnegena, oMʉthɨma Mwerʉ mwakimira kʉbo, nga ko nethwe athukimiragako ko ndangɨro. 16 Aho monyɨbʉka ekyo Nyinya-kowethʉ anegenaga athɨ: "Yoani mwabatisya mo metsi, he imwe mwabatisibwa mo Mʉthɨma Mwerʉ.*" 17 Aho Gongo amabya nɨmwahabo oMʉthɨma Mwerʉ nga kw'athʉhagawo thwabere thwɨkɨrɨtsya Nyinya-kowethʉ Yesʉ Kirisito, ewono ingye nyɨrɨ ndɨ w'ɨlwɨsa Gongo?»

18 Abɨkɨrɨtsya ba Bayuta babere bonvwa ebɨnwa ebyo, aboshi mobatsɨra n'isingya Gongo nɨabanegena bathɨ: «Nɨ kwenene, Gongo mwaha abandʉ b'ebɨhanda nabo bo buthoki bw'ɨbɨndʉka n'ɨthoka mo bɨtsɨbʉ byabo n'ɨbona bʉyɨngo bw'ekwenene.»

19 Honyuma y'olʉholo lwa Sɨtɨfano abɨkɨrɨtsya mobasanzabana bʉshana na malɨgo. Bagʉma ba mʉbo mobaya mo kɨhʉgo ky'iFoiniki na mo kɨhʉgo ky'iKipuro na mo muyi w'iAntiokia. Ahoshi bayaga bagenda abakangɨrɨtsya eKɨnwa kya Gongo ko Bayuta basha. 20 Hewethuwe bɨkɨrɨtsya bagʉma bo babyaga b'omo kɨhʉgo ky'iKipuro na mo muyi w'iKurene mobahika iAntiokia. Nabo kuthyo mobasɨmola n'abandʉ b'ebɨhanda nɨabafʉlɨrabo eNgʉlʉ Mbʉya ya Nyinya-kowethʉ Yesʉ. 21 Amaka wa Nyinya-kowethʉ abyaga hagʉma nabo, ihika ko kɨka bandʉ bangɨ mobɨkɨrɨtsya n'ɨbɨndʉkɨra Nyinya-kowethʉ. 22 Omwatsɨ oyo mw'onvwɨka ko kanisa k'ɨYerʉsalemʉ. Aho mobathʉma Baranaba y'iAntiokia. 23 Abere ahikayo n'ɨshʉnga olʉkogo lwa Gongo, mwamoga na mwaha abɨkɨrɨtsya boshi bo muhwa, kʉshangwa bayinihire Nyinya-kowethʉ n'omʉthɨma mʉgʉma. 24 Baranaba abyaga mʉndʉ mʉbʉya, niotswiremo oMʉthɨma Mwerʉ n'olwɨkɨrɨtsyo. Bandʉ bangɨ mobongererwa ko abo bikiritsaya Nyinya-kowethʉ.

25 Honyuma kw'aho Baranaba mwaya ɨTarɨso bʉshana n'ɨya shondya Sauli. 26 Abere amʉshʉnga, mwamʉthwala iAntiokia. Ababɨrɨ boshi mobamala omwaka woshi niabahindana na bandʉ mo kanisa nɨabakangɨrɨtsya bandʉ bangɨ mo lwɨkɨrɨtsyo. Nɨ iAntiokia yo abɨga bathangaga ɨahʉlwamo bakirisito.

27 Mo bɨro ebyo bamɨnyeretsɨ bagʉma mobathoka ɨYerʉsalemʉ, mobaya iAntiokia. 28 Mʉgʉma wa kʉbo agendaga ahʉlwamo Akabo, mw'ibishulirwa n'oMʉthɨma Mwerʉ, mwamɨnyerera ko kwabya nzala nzɨbʉ mo bɨhʉgo byoshi. (Enzala nzɨbʉ eyo moyabya ko mʉgʉlʉ Kalautio Kaisari abyaga muthegeki.) 29 Aho abɨga mobahamʉla bathɨ bʉlɨ mʉndʉ ahane nga kw'angakotsya bʉshana n'iwathikya abagala bethʉ bɨkɨrɨtsya bo babyaga b'ikere iYuteya. 30 Mobakola bathyo, na mobathʉmɨra ebɨhembo ebyo by'abangʉmwa b'ekanisa k'iYuteya mo minwe ya Baranaba na Sauli.