1 Mo mʉgʉlʉ Apolo abere akɨnalɨ mo muyi w'iKorinto, Polo naye agenda athimba mo bɨthwa by'ekɨhʉgo ky'iAsia. Honyuma kw'aho mwandagalɨra mo muyi w'ɨEfeso. Mo muyi oyo mweyamo bɨga bagʉma, 2 mwabʉtsyabo athɨ: «Mwabere mwɨkɨrɨtsya Yesʉ momwanabona oMʉthɨma Mwerʉ?» Nabo mobamʉshʉbɨtsya bathɨ: «Ɨhɨ, n'erɨonvwa ko kunabya Mʉthɨma Mwerʉ thʉthahera thwathonvwa na hake.» 3 Aho Polo mwashʉba bʉtsyabo athɨ: «Ewono nɨ lubatiso lʉhɨ lo mwabatisibawako?» Mobashubya bathɨ: «Ko lubatiso lwa Yoani.» 4 Aho Polo mwabwɨrabo athɨ: «Yoani agenda abatisya bo bɨmɨraga ɨbɨndʉka ɨthoka mo bɨtsɨbʉ byabo. Kuthyo mwabwɨrabo athɨ bɨkɨrɨtsye yo wandahika enyuma kw'ɨye, naye ni Yesʉ.»

5 Babere bamala ɨonvwa ebɨnwa ebyo, mobabatisibwa mw'ɨtsɨna lya Nyinya-kowethʉ Yesʉ. 6 Polo mwahira kʉbo kw'eminwe n'oMʉthɨma Mwerʉ mwakimira kʉbo. Mobathanga ɨnegena mʉ yɨndɨ mɨnegene, n'ɨmɨnyerera. 7 Aboshi babyaga hofɨ bayira ikumi na babɨrɨ.

8 Polo mwamala myetsɨ ishathu analɨ ɨngɨra mo sinakoki. Agenda abwɨra abandʉ bʉtsɨra bʉba n'ikubisania nabo ko bɨnwa by'oBwamɨ bwa Gongo, kʉshangwa abyaga niashondya bɨkɨrɨtsyebyo. 9 Hewethuwe bagʉma mʉbo, mobabya na mɨthɨma mɨtsɨbʉ ihika ko kɨka mobathɨnda ɨkɨrɨtsya. Mobathanga ɨnegena kʉbɨ ko Nzɨra ya Nyinya-kowethʉ embere s'abandʉ. Bʉshana n'ekyo, Polo mwamikabo, mwagenda n'abɨga mʉ kalasɨ ka muyira mʉgʉma nɨ yo Tirano, omo agenda akangɨrɨtsya abandʉ. 10 Polo mwagenda akola athyo mʉ myaka ibiri, ihika ko kɨka aBayuta n'aBakiriki boshi bo babyaga mo kɨhʉgo ky'iAsia mobonvwa eKɨnwa kya Nyinya-kowethʉ.

11 Gongo agenda akola bɨthɨko-thɨko b'ishwekya mw'ɨtsʉkɨra Polo. 12 Abandʉ mobagenda abaletha ebɨpahasha kʉtse esongɨmba so sɨthakola ko mʉbɨrɨ wa Polo, mobagenda abahirabyo ko bakoni, nabo nɨbalama n'emɨtsɨmʉ moyagenda ɨthoka kʉbo.

13 Kwabyaga Bayuta bagʉma bo bagenda abathimba-thimba nɨabagenda nɨbane muligitha emɨtsɨmʉ. Nabo mw'iligitha emɨtsɨmʉ nɨabahʉla erɨtsɨna lya Nyinya-kowethʉ bathɨ: «Kw'ɨtsɨna lya Yesʉ yo Polo akangɨrɨtsya, enyɨbahamʉla mʉthoke ko mʉndʉ oyu!» 14 Mo kathi k'abandʉ bo bagenda abakola bathyo, mwabyaga bagala balɨnda ba Sikewa. Sikewa oyo abyaga muheri mʉkʉlʉ w'aBayuta. 15 Kɨro kɨgʉma, omʉtsɨmʉ abyaga nɨamatsɨmba mʉndʉ. Omʉtsɨmʉ oyo mwabwɨra abagala ba Sikewa abo athɨ: «Yesʉ, nyimwetsi, na Polo naye nyetsi nga nɨ ndɨ. He imwe mʉlɨ bahɨ?» 16 Omʉndʉ yo wabyagako omʉtsɨmʉ, aho n'aho mwagʉlʉkɨrabo, mwalengya aboshi bo kagala. Mwathanga ihumbabo na mobahika ko kɨka k'ɨthoka mo nyʉmba y'omukoni oyo. Mobagenda nɨabathɨbɨtha nɨbalɨ ndumbu nibotswireko bɨhʉlʉ.

17 Abahimbani boshi b'ɨEfeso, aBayuta n'aBakiriki babere bamɨnya omwatsɨ oyo, aboshi mobatsɨmbwa n'obʉba na mobathanga isingya kʉtsɨbʉ erɨtsɨna lya Nyinya-kowethʉ Yesʉ. 18 Aho bangɨ mw'abo bikiritsaya, bagenda abahika n'ɨnegena ebɨbɨ byoshi bakolaga embere s'abandʉ. 19 Bandʉ bangɨ mo bobagenda abakola obukumu, nabo mobaletha ebɨtabo byo bagenda abakolamo obukumu bwabo obo, mobokyabyo embere s'abandʉ boshi. Babere baganza ekɨtsɨro ky'ebɨtabʉ ebyo, mokyahika kʉ faranga bɨhʉmbɨ makumi athano.* 20 Nɨ bathyo, ko Kɨnwa kya Nyinya-kowethʉ, mokyaya-ngʉlʉ ahoshi mo maka ʉwe, n'ibya na kagala kangɨ.Abanyaefeso abokya ebɨtabʉ byabo by'obukumu

21 Honyuma w'ebyo, Polo mwahamʉla atsʉke mo kɨhʉgo ky'iMaketonia na ky'ɨAkaya, na honyuma kw'aho agende ɨYerʉsalemʉ. Mwashʉba negena athɨ: «Honyuma w'erihika ɨYerʉsalemʉ kuthyo lɨtholere ninyahika mo muyi w'ɨRoma.» 22 Aho mwatsɨmba bandʉ babɨrɨ mo bo bagenda abamuwathikya ko mʉlɨmo, Timote bana Rasɨto mwathʉmabo bamʉthange embere ɨya iMaketonia. He ɨye mwashiba mo kɨhʉgo ky'iAsia kʉ ndambi nge.

23 Aho mo bɨro ebyo, mo muyi w'ɨEfeso mo mwahʉlʉka bʉrʉnga bʉngɨ bʉshana n'eNzɨra ya Nyinya-kowethʉ. 24 Mo muyi oyo mwabyaga muheshi mʉgʉma erɨtsɨna lɨwe nɨ yo Temetirio. Temetirio oyo abyaga na mʉlɨmo w'ɨhesha bɨshoshekano bɨke-bɨke mʉ byʉma bya faranga bishoshire nyʉmba ya gongo mʉkatsɨ yo wahʉlwamo Aritemi. Omʉlɨmo oyo, mwagenda alethera abaheshi balikyabo bo ndundi nyɨngɨ.* 25 Temetirio mwahindania abaheshi balikyabo hagʉma n'abandɨ bandʉ bo bagenda abakola omʉlɨmo walɨ ng'oyo. Mwabwɨrabo athɨ: «Ewono imwe bayira! Ndɨ munetsi ko nɨ omʉlɨmo ono wathubikire! 26 Aho imwe bene mwamayɨlolera n'ɨyonvwɨra ko Polo oyu uhya n'ɨheka bandʉ bangɨ mo muyi w'ɨEfeso ono, na handʉ hangɨ mo kɨhʉgo ky'iAsia. Agenda anegena athɨ abo gongo bakomibawa n'abandʉ bathalɨ bagongo ba kwenene. 27 Ekyo kyangaleka omʉlɨmo ethʉ nɨasʉnzʉgʉrwa na kandɨ olushikyo loshi lw'enyʉmba ya gongo mʉkatsɨ mʉkʉlʉ Aritemi nɨlwahera, aho olʉkengerwa lʉwe lwakeha, ɨye yo uramibwa mo kɨhʉgo kyoshi ky'iAsia na hano ishi hoshi!»

28 Abaheshi abo babere bonvwa ebyo, mobakapɨkɨra kʉtsɨbʉ n'ɨthanga ɨhambala bathɨ: «Aritemi wa aBanyaefeso asingibwe!» 29 Olʉkanda olo, molwagenda olubya lʉngɨ kʉtsɨbʉ mo muyi woshi. Abandʉ mobatsɨmba bahimbani babɨrɨ b'omo kɨhʉgo ky'iMaketonia, Kayo bana Sɨtarɨko, bo bagenda abaherekeretsya Polo yo mo mʉlɨmo. Aho n'aho, mobathwalabo mʉ nyʉmba nene mo bandʉ bagenda abahindanira. 30 Polo abyaga niashondya iyikangania ko muhindano, hewethuwe abɨga mobamʉhangɨra. 31 Bakʉlʉ bagʉma b'omo kɨhʉgo ky'iAsia, bo babyaga bira bʉwe, mobamʉthʉmɨra mugendi nɨabamʉhangɨra bathɨ athanalinda ɨngɨra mo nyʉmba eyo.

32 Mo muhindano oyo mwabyaga lʉkanda lʉngɨ, kʉshangwa bandʉ bagʉma bagenda abahambala bagʉma bathya n'abandɨ bathya. Na bangɨ mʉbo, babyaga nibathetsi nga bahindene bʉshana na ki. 33 Bandʉ bagʉma mo Bayuta mobabwɨra muyira mʉgʉma nɨ yo Likisa bathɨ atsʉke embere y'abandʉ bʉshana n'ɨbwɨrabo ebɨrɨ. Aho naye mwashʉmba okʉboko bʉshana abandʉ batsɨre, kʉshangwa abyaga niashondya ayɨthondere embere sabo. 34 Hewethuwe abandʉ babere bamɨnya ko nɨ Muyuta, aboshi mobashʉba hambalɨra kʉgʉma bathɨ: «Aritemi wa aBanyaefeso asingibwe!» Mobamala hofɨ saha ibiri nɨbanemʉnegena bathyo!

35 Ko nduli, omushaki w'omuyi mwabombetsya abandʉ abo athɨ: «Ewo imwe bandʉ b'ɨEfeso kʉkɨnalɨ mʉndʉ yo uthetsi ko ni omuyi ethʉ ono w'anatheya enyʉmba ya gongo mʉkʉlʉ Aritemi hagʉma n'eshoshani yɨwe yo yathogaga ɨthoka mo lʉbʉla? 36 Hathalɨ mʉndʉ yo wangakotsya ɨyɨgana athɨ athetsi omwatsɨ oyo. Bʉshana n'ekyo, mʉtsɨre mʉthathɨbɨthɨraga ɨkola kɨndʉ kyoshi bʉtsɨra ɨganɨtsya. 37 Nyamanegena nyithyo kʉshangwa mwamaletha abayira aba bo hano bathibire kɨndʉ mo nyʉmba ya gongo, kʉtse bathahangitsye gongo wethʉ mʉkatsɨ Aritemi. 38 Aho Temetirio n'abaheshi balikyabo bamabya na lʉbanza na mʉndʉ mʉlebe betsi ko othunabya na tɨrɨbɨnalɨ na thuwithe kuthyo basohi. Aho nɨ eyo yo batholere ɨgenda abathwala esomanza sabo! 39 Na kandɨ mwamabya mʉkɨnalɨ na kɨndɨ kɨnwa, kyasɨmolerwa mo muhindano wetsibwe n'omʉgomba ethʉ. 40 Ebɨnwa byo byamakoleka munobwire, byangaleka nithwasitakwa ko nithwe thwothwamaletha bʉrʉnga. Kuthyo hathalɨ kɨnwa kyoshi-kyoshi kyo thwangakangania ko kyo kyamaleka omuhindano oyu niabya.» 41 Abere amamala ɨnegena athyo, aho mwabwɨra omuhindano athɨ bashʉbe mo manyʉmba wabo.*