1 Thwabere thwamahabʉka, mothwamɨnya ko ekɨtsɨra thwabyagako ko nɨ kyo kyagenda ekyahʉlwamo Melita. 2 Abahimbani ba ko kɨtsɨra ekyo mobathʉkolera bɨbʉya bɨngɨ. Envʉla yabyaga nɨyamathanga ɨwa na kwabyaga mbeho nyɨngɨ. Abandʉ abo mobathʉnoketsya mʉtsanwa na mobathukokya ithwe boshi bathɨ thuhike thwothe. 3 Polo mwaya shenya bulo bwa ngwi. Abere agʉsha esongwi so mo mʉtsanwa, bʉshana n'ekyʉka ekɨkwetha mokyahʉlʉka mʉtho na mokyayɨtsɨngɨra ko kʉboko kʉwe. 4 Abahimbani b'ekɨtsɨra ky'iMelita babere bashʉnga ekɨkwetha ekyo ky'iyitsingire ko kʉboko kwa Polo, mobathanga ɨbwɨrana bathɨ: «Ko kwenene omʉndʉ oyu nɨ mwithi. Na mwanamahabʉka ɨthoka mo ngetsɨ, ɨkwamana n'esohi y'ekwenene ya Gongo, olʉholo lʉwe lʉlɨ hofɨ.» 5 Hewethuwe Polo mwakʉngʉthɨra ekɨkwetha ekyo ky'omo mʉtsanwa na mwathafwa kɨndʉ. 6 Abandʉ bagenda abalɨndɨlɨrɨra bathɨ okʉboko kwabimba, kʉtse iyihuma ahishi n'ɨfwa. Babere balɨndɨrɨra ndambi nyɨre, mobamɨnya kw'athafwire kɨndʉ. Aho mobabɨndʉla emɨganɨtsye yabo n'ɨthanga ɨnegena bathɨ Polo nɨ mʉgʉma w'oko bogongo.*Polo abʉlɨrwa n'ekɨkwetha

7 Hofɨ n'aho habyaga mashwa wa mʉkʉlʉ w'ekɨtsɨra ekyo yo wahʉlawamo Pubilio. Pubilio oyo mwathukokya kʉbʉya omwe, mothwamalamo bɨro bɨshathʉ. 8 Ishe wa Pubilio abyaga mo ngɨngo bʉshana na kapururu n'ɨhɨtha mʉsasɨ. Polo mwaya mulungula, mwamʉshabɨra n'imuhirako eminwe, mwamulamya. 9 Bʉshana n'ekyo, abandɨ bakoni babyaga ko kɨtsɨra ekyo mobagenda abahikira Polo nabo mobagenda abalama. 10 Abandʉ mobagenda abathushikya kʉtsɨbʉ. Na thwabere thwashondya ɨgenda mo bwatho, mobathʉha ebyoshi thwabyaga thulayireko mo lʉgendo lwethʉ.

11 Thwabere thwamamala myetsɨ ishathu ko kɨtsɨra ky'iMelita ekyo, mothwagenda mʉ bwatho bʉgʉma bo bwabyaga nibwimene bʉlɨ obʉlɨndɨrɨra omʉgʉlʉ w'embeho nzɨbʉ atsʉke. Obwatho obo bwagenda obʉthoka mo muyi w'iAlesanduria. Ko bwatho obo kwabyaga shoshani ya bogongo bahasha.* 12 Mothwahika mo muyi w'iSirakuse, mothwabyamo bɨro bɨshathʉ. 13 Mw'ɨthoka mo muyi oyo mothwatsʉka emʉsɨke-mʉsɨke w'engetsɨ, na mothwahika mo muyi w'iRengio. Bwabere bwakya ekɨhʉnga kɨthe kɨtsɨbʉ mokyahʉlʉka ko mʉnda kihya mokyathanga ɨkarama. Honyuma kw'aho mothwagenda lʉgendo lwa bɨro bɨbɨrɨ kw'ihika mo muyi w'iPuteoli. 14 Thwabere thwahika mo muyi oyo mothweyamo bagala bethʉ bɨkɨrɨtsya. Mobathʉshaba bathɨ thubye hagʉma nabo yenga ngʉma. Nɨ bathyo ko thwagendaga n'ihika mo muyi w'ɨRoma.

15 Abagala bethʉ bɨkɨrɨtsya b'omo muyi w'ɨRoma babere bonvwa omwatsɨ ethʉ k'othuhika, mobahika ɨthʉlɨndɨrɨra mo kathale k'iApio,* na bangɨ mobagenda ɨyathʉlɨndɨrɨra ko Tiretaberene.* Polo abere ashʉngabo mwasɨma Gongo na mwashʉbafwa muhwa. 16 Thwabere thwahika mo muyi w'ɨRoma, abakʉlʉ mobatsɨyɨra Polo abye mʉ nyʉmba yɨwe yo wene hagʉma na mushirikani mʉgʉma w'imutheya athangaromboka.

17 Honyuma wa bɨro bɨshathʉ, Polo mwabɨrɨkɨra abakʉlʉ b'aBayuta bo babyaga bikere mo muyi w'ɨRoma. Babere bamamala ihindana, Polo mwathanga ɨbwɨrabo athɨ: «Bagala bethʉ, ingye monyamɨnwa ɨYerʉsalemʉ n'ihirwa mo minwe y'aBaroma, naho hathalɨ kiro na kɨbɨ kyoshi-kyoshi nyakoleraga ekɨhanda kyethʉ kʉtse ɨhatsya ko mɨbere ya bo thatha-kʉlʉ. 18 aBaroma abo, babere bamamala ɨnyɨthondesa, mobashondya ɨnyɨmɨnʉla, kʉshangwa mobathanyɨshʉngako ekyangaleka nɨnyasoherwa lʉholo. 19 Hewethuwe aBayuta babere bathɨnda nyɨmɨnʉlwe, ko nyashabaga nyithyo nyɨyathondere kʉno Roma embere sa Kaisari. Na mo byoshi ebyo, nyithabyaga na maha woshi-woshi w'isitaka ekɨhanda kyaye. 20 Nɨ bʉshana n'ekyo monyɨbabɨrɨkɨra thʉshʉngane na nyɨsɨmole nemwe. Mʉmɨnye kundu ko nyiminirwe mo mahʉlʉla ano bʉshana n'amaha wo aBaisiraeli balɨ nawo.»

21 Abakʉlʉ abo mobamʉshʉbɨtsya bathɨ: «Thuthetsi thwabona marʉba woshi-woshi wathathoka iYuteya w'anegenire bʉshana nawe. Kuthyo hathalɨ mʉgala ethʉ Muyuta yo uthahika hano n'ɨthʉfʉlɨra mwatsɨ kʉtse ɨkʉnegenako kɨbɨ. 22 Hewethuwe othushondya ɨyonvwɨra emɨganɨtsye awe, kʉshangwa thwetsi ko ekɨsomo eki ekɨthɨndwa ahoshi n'abandʉ.»

23 Aho mobalagana ekɨro kyo bandashʉba hindana na Polo. N'ekɨro ekyo kyabere kyahika, bandʉ bangɨ mobahika mo nyʉmba abyaga ikeremo. Ɨthanga mo makerakera ihika mw'igolo, Polo agenda afʉlɨrabo omwatsɨ w'oBwamɨ bwa Gongo, n'ɨkangɨrɨtsyabo mw'ɨtsʉkɨra mo Mʉgomba wa Mʉsa n'ebishakirwe mo bɨtabo by'abamɨnyeretsɨ, kʉshangwa agenda iuhyabo bɨkɨrɨtsye Yesʉ. 24 Ebɨnwa Polo anegenaga, bagʉma ba mʉbo mobatsɨgabyo, hewethuwe abandɨ ɨbo mobathɨkɨrɨtsyabyo. 25 aBayuta abo babere bagenda bʉthahʉlɨkɨrɨrana, Polo mwashʉba bwɨrabo kɨno athɨ: «oMʉthɨma Mwerʉ abyaga niayitsye abere abwɨra bo sho-kʉlʉ mw'ɨtsʉkɨra mo mʉmɨnyeretsɨ Isaya athɨ:

26 "Ʉyabwɨre abandʉ aba ʉthɨ:

‘Erɨonvwa mwandagenda omwonvwa,

hewethuwe mʉthɨndagende omʉmɨnya.

Erɨlola mwandagenda omʉlola,

hewethuwe mʉthɨndagende omʉshʉnga.’

27 Kʉshangwa abandʉ aba bamayɨra emɨthɨma mɨtsɨbʉ,

bamatsɨba amathwi wabo,

bamatsɨba n'amesho wabo.

Bɨrɨ bɨthangabere bithyo, amesho wabo angagendire alola,

n'amathwi wabo angagendire onvwa,

n'emɨthɨma yabo yangagendire eyɨmɨnya,

na banganyibindukire, nangye nyangalamitsyebo.*"»

28 Polo mwashʉba bwɨrabo athɨ: «Ewo mʉmɨnye ko Gongo amathʉma omwatsɨ w'obushabuli ono ko bandʉ b'ebɨhanda. N'abandʉ abo ɨbo bonvwawo!*»

29 [Polo abere amamala ɨnegena ebɨnwa ebyo, aBayuta mobagenda niabakubisania kʉtsɨbʉ ɨbo kw'ɨbo.*]

30 Polo mwikala mo nyʉmba akondesaya mo myaka ibiri. Mwagenda akokyamo abandʉ boshi bo bagenda abahika ɨmʉlolako. 31 Agenda afʉla engʉlʉ y'oBwamɨ bwa Gongo n'ɨkangɨrɨtsya omwatsɨ wa Nyinya-kowethʉ Yesʉ Kirisito, na bʉtsɨra bʉba n'obwiranda boshi.