1 Mʉkengwa Teofili, mo kɨtabo kyaye kɨmbere,* monyashaka ebyoshi byo Yesʉ akolaga n'ebyo akangɨrɨtsaya, ɨthoka ko ndambi athangaga omʉlɨmo ʉwe, 2 n'ihika ko kɨro irukibawa mo lʉbʉla. Embere irukibwe, mwahana amathegeko ʉwe ko maka w'oMʉthɨma Mwerʉ ko bathʉmwa bʉwe ashombolaga. 3 Aho, enyuma y'olʉholo lʉwe, mwayikangania kʉbo mʉ mɨhanda mɨngɨ bamɨnye kw'alɨho. Mʉ bɨro makumi ane, mwagenda ahʉlʉkɨrabo n'ɨsɨmolerabo ko Bwamɨ bwa Gongo.

4 Kɨro kɨgʉma agenda alya hagʉma nabo, mwahamʉlabo athɨ: «Mʉthathokaga kʉ Yerʉsalemʉ, hewethuwe mʉlɨndɨrɨreko kyo Thatha abalagaga, olʉhembo lo nyababwɨraga. 5 Kʉshangwa Yoani mwabatisya mʉ metsi, he imwe, mʉ bɨro bɨke, mwabatisibwa mʉ Mʉthɨma Mwerʉ.»

6 Aho abathʉmwa babere bahindana na Yesʉ mobamʉbʉtsya bathɨ: «Nyinya-kowethʉ, nɨmo bɨro bɨno mo washʉbʉlɨtsya aBaisiraeli b'obwamɨ bwabo?» 7 Yesʉ mwashʉbɨtsyabo athɨ: «Erɨmɨnya endambi n'omʉgʉlʉ bithabalebitsye, kʉshangwa Thatha mwahirabyo mo maka ʉwe masha. 8 Hewethuwe mwandabona kagala omʉgʉlʉ oMʉthɨma Mwerʉ andabakimirako. Aho mwandabya batimo baye ɨYerʉsalemʉ, na mo kɨhʉgo kyoshi ky'iYuteya na ky'ɨSamarɨa, n'ihika ho kɨhʉgo kinika.»

9 Yesʉ abere amamala ɨnegena ebɨnwa ebyo, mwirukibwa elʉbʉla nabo nibanamuhandireko amesho. Honyuma kw'aho ekɨfʉ mokyamubisha na mobathashʉba mʉlolako. 10 Babyaga nibakinahandire amesho mo lʉbʉla eyo Yesʉ agenda ɨrʉkɨra, aho n'aho bandʉ babɨrɨ bambithe ngɨmba sa mʉshohe mobabʉthʉka hofɨ nabo 11 n'ɨbwɨrabo bathɨ: «Imwe bandʉ b'iNgalilaya, bʉshana na ki mʉlɨ hano mʉlɨ omʉlola mo kyanya? Yesʉ oyu, yo uthathokibwa mo kathi kenyu n'ɨya mo lʉbʉla, andashʉbʉla nga ko mʉthamʉshʉnga alɨ ayayo.»

12 Aho abathʉmwa mobashʉba ɨYerʉsalemʉ ɨthoka ko kɨthwa kyo kɨnahʉlwamo kɨthwa ky'eMiseituni. Ekɨthwa ekyo kɨrɨ hofɨ n'omuyi w'ɨYerʉsalemʉ, hofɨ lʉgendo lwa kilometere kɨgʉma. 13 Babere bahika ɨYerʉsalemʉ, mobɨrʉkɨra mo kɨshenge kyo kyabyaga mo ngorofa, kyo babyaga babegere ikalamo. Bano bo babyaga mo kɨshenge ekyo: Petero na Yoani na Yakobo na Ndereya na Filipo na Tomasɨ na Barɨtolomayo na Matayo na Yakobo mʉgala wa Alʉfayo na Simoni w'omo kɨkembe ky'aBaselote* na Yuta mʉgala wa Yakobo. 14 Aboshi hagʉma bagenda abahindana kangɨ kangɨ bʉshana n'ɨshaba, hagʉma na bakatsɨ balebe na hagʉma na Marɨa nyinya wa Yesʉ na hagʉma n'abagala babo Yesʉ.

15 Kɨro kɨgʉma mo bɨro ebyo, omuhindano w'abɨkɨrɨtsya abyaga mʉ mɨganzo ya bandʉ hofɨ igana na makumi abɨrɨ. Aho Petero mwimana mo kathi kabo n'ɨbwɨrabo athɨ: 16 «Bagala bethʉ, bɨthatholere nɨbyabererera ebyo oMʉthɨma Mwerʉ anegenaga mo Mashako Abuyirire mo bʉnʉ bwa Tawiti, bʉshana na Yuta yo washondoleraga abo batsɨmbaga Yesʉ.* 17 Yuta abyaga mʉgʉma wa kw'ithwe, na mothwakola hagʉma naye mo mʉlɨmo.» 18 Esofaranga Yuta ahabawa ko bʉbɨ akolaga, mwagʉla kʉtho kw'ɨshwa. Na aho mwathoga n'ɨthanga omuthwe w'ahishi, n'omʉbɨrɨ ʉwe mwabereka, n'ebɨshalɨ byoshi mobyashesheka. 19 Abahimbani boshi b'ɨYerʉsalemʉ mobonvwa omwatsɨ oyo, mobahika ko kɨka ky'erɨlʉka erɨshwa eryo mo «Akelitama», mo mʉnegene wabo n'ɨnegena mbʉ: «Ɨshwa lya Mʉsasɨ».

20 Petero mwashʉba negena athɨ: «Ewo shʉnga ebishakire mo kɨtabo kya Saburi kɨthɨ:

"Enyʉmba yɨwe ibye kihuma,

na ɨthandashʉba ikalamo mʉndʉ."

Na kandɨ kushakirwe kʉthɨ:

"Ʉndɨ mʉndʉ abye mo mwanya ʉwe.*"

21,22 Aho bɨtholere mʉndʉ mʉgʉma wa ko bo babyaga hagʉma nethwe ɨthanga ko ndambi yo Yoani abatisaya Yesʉ, n'ihika ko kɨro irukibawa ɨthoka mo kathi k'ethʉ kw'ɨya mo lʉbʉla, abye mutimo hagʉma nethwe w'erilubuka lya Nyinya-kowethʉ Yesʉ.»

23 Aho mobahʉla bandʉ babɨrɨ: ye Yosefʉ yo wahʉlawamo Barisaba kandɨ yo walʉkawamo Yusito, na Matiasi. 24 Honyuma kw'aho omuhindano mwashaba omʉshabe ono: «Nyinya-kowethʉ, ɨwe wetsi emɨthɨma y'abandʉ boshi. Thukangye oyo wamashombola mo babɨrɨ aba, 25 bʉshana abye mo mwanya w'obʉthʉmwa bo Yuta athathokamo n'ɨya ahandʉ hʉwe ahamʉtholere.» 26 Aho mobakola bwɨkɨ, n'obwɨkɨ obo mobwahʉla Matiasi, yo w'ongererawa ko bathʉmwa ikumi n'omʉgʉma.