1 Fesɨto abere amamala bɨro bɨshathʉ ahikire mo kɨhʉgo ky'iYuteya, mwathoka mo muyi w'iKaisaria n'ɨrʉkɨra mo muyi w'ɨYerʉsalemʉ. 2 Abere ahika eyo, abakʉlʉ b'abaheri n'abangʉmwa b'aBayuta mobayasitaka Polo yo embere sɨwe. 3 Mobamʉshaba kʉtsɨbʉ bathɨ awathikyebo ashubye Polo y'ɨYerʉsalemʉ, kʉshangwa babyaga nɨbamaya nama y'ithira Polo mo nzɨra. 4 Hewethuwe Fesɨto mwashʉbɨtsyabo athɨ: «Ndɨ Polo atheyibwa mo biriso mw'iKaisaria, nangye ngy'owene-wene ndɨthɨndɨre ɨyayo. 5 Aho mʉyɨre thwandagalɨre iKaisaria na bagʉma mo bakʉlʉ benyu. Na nɨ eyo yo bamusitakire amabya niakolire kɨbɨ kyoshi-kyoshi.»

6 Fesɨto abere amamala bɨro bithalingetsye mʉnanɨ kʉtse ikumi hagʉma nabo mwashʉba iKaisaria. Bwabere bwakya, mwayikala mo tɨrɨbɨnalɨ na mwahamʉla athɨ bamʉlethere Polo. 7 Polo abere ahika, aBayuta bo bathokaga ɨYerʉsalemʉ, mobamuthimbako na mobamusitaka bɨnwa bɨngɨ kandɨ bɨtsɨtho byo ɨbo bene balemwaga ikangya ko nɨ bya kwenene. 8 Hewethuwe Polo mwathonda athɨ: «Hathalɨ kɨtsɨbʉ kyoshi kyo nyakolire, ibye ko Mʉgomba w'aBayuta, ibye ko Nyʉmba ya Gongo, ibye kʉ Kaisari.»

9 Fesɨto naye abyaga niashondya imoya aBayuta. Bʉshana n'ekyo, mwabʉtsya Polo athɨ: «Ushondya w'ɨrʉkɨre ɨYerʉsalemʉ bʉshana ʉyasoherweyo embere saye?» 10 Hewethuwe Polo mwamʉshʉbɨtsya athɨ: «Ko ndambi eno nyimene embere y'etɨrɨbɨnalɨ ya Kaisari. Aho nɨ hano hasha ho nyɨtholere ɨsoherwa. Ɨwe wowene wetsi ko hathalɨ kiro na kɨbɨ ekyo nyakolere aBayuta aba. 11 Na ko kwenene nyamabya nyɨrɨ mʉlɨgo na nyamabya nɨmonyakola kɨbɨ kyo kyangaleka ninyithwa, nyithathindire ɨhola. Hewethuwe halɨ hathalɨ kya kwenene mo byo abandʉ aba abanyisitakira, hathalɨ mʉndʉ yo wanyihira mo minwe yabo. Enyishondya ɨya thondera embere sa Kaisari.» 12 Aho Fesɨto mwathanga ɨsɨmola n'abahani bʉwe. Honyuma kw'aho mwashʉbɨtsya Polo athɨ: «Kʉshangwa wamashaba ɨyathondera embere ya Kaisari, nɨ eyo yo wayathondera.»

13 Enyuma ya bɨro bɨrɨ bʉlebe, omwamɨ Angiripa na Berenike mwalɨ wabo, mobahika iKaisaria bʉshana n'ɨyaketsya kafʉrʉnalɨ Fesɨto. 14 Mobamala eyo yo bɨro bɨngɨ. Na mo bɨro ebyo Fesɨto mwaganʉlɨra omwamɨ y'ebɨnwa bya Polo. Mwamʉbwɨra athɨ: «Hano halɨ muyira mʉgʉma yo Felisi athamika mo biriso. 15 Nyabere nyahika ɨYerʉsalemʉ, abakʉlʉ b'abaheri n'abangʉmwa b'aBayuta mobamusitaka na mobanyɨshaba nyɨmʉsohe. 16 Nangye monyashubitsyebo nyɨthɨ aBaroma bathabegere ɨsoha mʉndʉ yo uthasitakwa alɨ athetsi athonda embere y'abandʉ bathamusitaka bʉshana abone mwanya w'ɨyɨthondera ko byo bathamusitakira. 17 Aho, monyahikire nabo kʉno. Bwabere bwakya, bʉthathɨndɨra, monyikere mo tɨrɨbɨnalɨ n'ɨhamʉla nyɨthɨ balethe Polo oyo. 18 Abere ahika, abo bamusitakaga babere bamala ɨthonda, monyashungire ko hathalɨ kiro na kɨnwa kɨbɨ kyo bathamusitakako kyo kɨrɨ nga ko nyɨthagenda enyɨganɨtsya. 19 Bathagenda abakubisania naye ko birebitsye ekɨsomo kyabo na ko birebitsye mʉndʉ mʉgʉma yo wamalire ɨfwa mbʉ yo Yesʉ. Na Yesʉ oyo, yo Polo abwɨrako abandʉ athɨ akɨnalɨho. 20 Ebɨnwa bɨrɨ ng'ebyo monyalemirwe nga ko nyangatsabyo. Nɨmo monyabʉtsya Polo ng'ashondya ebɨnwa bɨwe bɨyasoherwe ɨYerʉsalemʉ. 21 Hewethuwe Polo mwashaba athɨ embere ya Kaisari yo ashondya ɨthondera. Aho, nangye monyahamulire bamutheye mo biriso ihika ko kɨro nyandamʉthʉma ewa Kaisari ɨRoma.»

22 Angiripa mwabwɨra Fesɨto athɨ: «Nangye nyitsigire nɨnyayonvwɨra omuyira oyo ingy'owene-wene.» Fesɨto mwashubya athɨ: «Mungya wandamonvwa.»

23 Bwabere bwakya, Angiripa na Berenike mobahika na lʉkengerwa lʉnene nɨbakwamene n'abakʉlʉ b'abashirikani n'abangʉmwa b'omuyi, na mobɨngɨra mo nyʉmba yo bagenda abatsɨramo esomanza. Aho, Fesɨto mwahamʉla athɨ balethe Polo. 24 Honyuma kw'aho Fesɨto mwanegena athɨ: «Mwamɨ Angiripa n'imwe boshi mʉlɨ hano hagʉma nethwe, mʉshʉnge omʉndʉ oyu! aBayuta boshi mobamusitakire kw'ingye ɨYerʉsalemʉ. Na kuthyo mobamusitakire kʉno Kaisaria balɨ abahambala bathɨ athakɨtholere ibyaho. 25 Hewethuwe ingye monyashungire ko athakolire kiro na kɨbɨ ekyangaleka n'ithwa. Hewethuwe kʉshangwa yowene mwashabire athɨ ebɨnwa bɨwe bɨsohwe na Kaisari, aho monyashungire ko bɨtholere nyɨmʉthʉme ey'alɨ. 26 Na kuthyo nangye nyithawithe kɨnwa kyo nyangashakɨra Kaisari bʉshana naye. Ekyo kyo kyamaleka nɨnyamʉletha embere sawe mbe mwamɨ Angiripa. Aho, nyabona kɨnwa ekyo nyangashaka wabya wamala ɨmʉthondesa. 27 Kʉshangwa nyamalola ko bithakwirire ɨthʉma mʉndʉ wa muliki ɨRoma buthakangania kʉbʉya-kʉbʉya ebyo abamusitakira.»