1 Ko mʉgʉlʉ oyo, mwamɨ Herote Angiripa mwathanga inubya bɨkɨtsya bagʉma b'omo kanisa. 2 Mwahamʉla athɨ Yakobo mʉgala wabo Yoani ithwe mʉ muyali. 3 Abere ashʉnga aBayuta ko mobamogera ebyo, mwashʉba tsɨmba Petero, mo mʉgʉlʉ w'elinye ly'emikati ɨthemo tsatsʉ. 4 Herote abere amamala ɨmʉtsɨmba mwamʉgʉsha mo biriso n'imuhira mʉ bɨkembe bɨne bya bashirikani bane bane bamutheye. Abyaga nialalitsye ɨmʉsoha embere s'abandʉ enyuma y'ePasaka. 5 Aho Petero mobamutheya mo biriso, hewethuwe akanisa kagenda akamʉshabɨra kʉ Gongo na muhwa.

6 Mo kɨro ky'ekɨro ekyo Herote abyaga niashondya ɨmʉsoha embere s'abandʉ, Petero abyaga nɨagonzere mo kathi-kathi ka bashirikani babɨrɨ. Abyaga niaminire mʉ bʉhʉlʉla bʉbɨrɨ na batheya babyaga ko lukyo lw'ebiriso. 7 Aho n'aho, malaɨka mʉgʉma wa Nyinya-kowethʉ mwahʉlʉka n'ekyakakala mokyakoletsya kʉtsɨbʉ mo kɨshenge abyagamo. Malaɨka mwakola ko lʉkanga lwa Petero, mwamubukya n'ɨmʉbwɨra athɨ: «Hangana tsʉba!» Aho obʉhʉlʉla mobwathoga ko minwe yɨwe. 8 Honyuma kw'aho malaɨka mwamʉbwɨra athɨ: «Wambala omʉkaba awe na wambala ebɨrato byawe.» Petero mwakola athyo na malaɨka mwashʉbamʉbwɨra athɨ: «Wambala ekoti awe na ʉnyɨkwame.» 9 Petero mwathoka mo biriso niakwamire malaɨka oyo. Mwathamɨnya kw'ebyo malaɨka akola nga nɨ bya kwenene. Agenda aganɨtsya ng'amashʉnga humanani. 10 Mobatsʉka ahalɨ ekɨkembe kɨmbere ky'abatheya, n'ekya kabɨrɨ, na mobahika ko luyi lw'ekyʉma lo lulolire ko muyi. Oluyi olo molwayɨkɨngʉla lolwene embere sabo na mobahʉlʉkɨra embʉga. Mobatsʉka mo nzɨra ngʉma, aho n'aho malaɨka mwamumika.

11 Aho Petero abere amɨnya ebyo bɨthatsʉka mwanegena athɨ: «Lɨno nyamamɨnya ko nɨ kwenene. Nyinya-kowethʉ mwathʉma malaɨka ʉwe, mwanyithokya mo minwe ya Herote na mo bɨbɨ byoshi aBayuta bathagenda abaganitsya inyihikira.»

12 Abere amɨnya ebyo, mwaya omwa Marɨa, nyinya wa Yoani yo ʉnahʉlwamo Marɨko. Bandʉ bangɨ babyaga nibahindenemo nɨabashaba. 13 Petero mwakongotha ko luyi lw'orʉba. Mukoli mʉgʉma mʉkatsɨ yo wagenda ahʉlwamo Rota mwahika ɨya kɨngʉla. 14 Mwamɨnyerera omʉlenge wa Petero, na bʉshana n'olʉmogo lʉngɨ mwathakɨngʉla oluyi, he mwathɨbɨtha mo nyʉmba, mwaya bwɨra abandɨ ko Petero imene embʉga. 15 Mobamʉbwɨra bathɨ: «Ʉlɨ mʉsɨre!» Rota mwayɨtsɨnga athɨ nɨ kwenene. Aho mobanegena bathɨ: «Nɨ malaɨka ʉwe.*» 16 Mondambi eyo Petero mwayɨtsɨnga erɨkongotha. Babere bakɨngʉla oluyi, mobamʉshʉnga n'ɨshweka kʉtsɨbʉ. 17 Petero mwakohetsyabo mo minwe athɨ batsɨre, na mwasɨmolerabo nga ko Nyinya-kowethʉ athamʉshondola n'imuthokya mo biriso. Mwashʉba negena athɨ: «Mʉbwɨre Yakobo n'abandɨ bagala bethʉ bɨkɨrɨtsya.» Honyuma kw'aho mwathoka aho, mwaya handɨ.

18 Bwabere bwakya, abashirikani mobaganga-ganga mo kathi-kathi kabo. Bagenda abayɨbʉtsya nga Petero abere athɨ. 19 Herote mwahamʉla bamushondye he mobathamʉbona. Mwathondesabo n'ɨhamʉla b'ithwe. Honyuma kw'aho Herote mwathoka iYuteya, mwaya iKaisaria, mwabyayo kʉ ndambi nyɨrebe.

20 Herote abyaga nɨamatsɨbʉkɨra kʉtsɨbʉ abandʉ b'omo miyi y'iTiro n'iSitona. He abahimbani b'emiyi eyo mobalagana ɨyamʉshʉnga. Mobuhya Bʉlasɨto, mwimanitsi mʉkʉlʉ w'ekɨshenge ky'omwamɨ. Honyuma kw'aho mobayashʉnga Herote bʉshana barongane, kʉshangwa akalyo kabo kagenda akathoka mo kɨhʉgo kɨwe. 21 Ekɨro b'ɨkɨrɨtsanaya, Herote mwambala lʉkɨmba lʉwe lw'obwamɨ, mwikala ko lʉthebe lʉwe lw'obwamɨ, na mwasɨmolera abandʉ. 22 Aho abandʉ mobahambala bathɨ: «Athalɨ mʉndʉ yo ʉnegena, he nɨ Gongo!» 23 Hewethuwe aho n'aho, malaɨka mʉgʉma wa Nyinya-kowethʉ mwagʉshɨra Herote yo bukoni, kʉshangwa mwathaha Gongo y'olʉkengerwa lʉwe. Mwalɨbwa n'esonzoka sa mʉ nda, na mwafwa.

24 eKɨnwa kya Gongo mokyakanya kʉtsɨbʉ kʉ bandʉ bangɨ. 25 Baranaba na Sauli ɨbo babere bamala omʉlɨmo wabo w'ɨYerʉsalemʉ,* mobashʉba iAntiokia na mobalethania Yoani yo wagenda ahʉlwamo Marɨko.