1 Mo muyi w'iKaisaria mwabyaga mʉndʉ mʉgʉma, erɨtsɨna lɨwe agenda ahʉlwamo Koroneri. Koroneri oyo abyaga mʉkʉlʉ w'ekɨkembe ky'abashirikani ba Baroma kyo kyagenda ekyahʉlwamo «Kɨkembe ky'aBaitalia.» 2 Omʉndʉ oyo abyaga niubahire Gongo n'imuramya hagʉma n'abandʉ boshi bo babyaga mo nyʉmba yɨwe. Agenda awathikya kʉtsɨbʉ aBayuta batsene, na agenda ashaba Gongo ko bʉlɨ ndambi. 3 Kɨro kɨgʉma mwigolo ko saha mwenda, mwashʉnga humanani, na mo humanani eyo mwashʉnga kʉbʉya-kʉbʉya malaɨka wa Gongo mwɨngɨra omwe n'ɨmʉbɨrɨkɨra athɨ: «Koroneri!» 4 Koroneri mwahanda amesho wo kʉ malaɨka n'obʉba n'ɨmʉbwɨra athɨ: «Nyinya-kowethʉ, kwamabya ki?» Malaɨka mwamʉshʉbɨtsya athɨ: «Gongo amatsɨga emɨshabe awe n'ebɨbʉya ʉnakolera abatsene naye athakwibirirwe. 5 Ewo, thʉma bandʉ ɨYopa bagende bayalethe mʉndʉ mbʉ yo Simoni yo ʉnahʉlwamo Petero. 6 Nɨ mugeni wa mʉndʉ mʉgʉma mukoli wa ngobi yo ʉnahʉlwamo Simoni. Enyʉmba yɨwe yɨrɨ ko mʉsɨke w'engetsɨ.»

7 Malaɨka oyo wanegenaga naye abere amamala ɨgenda, Koroneri mwabɨrɨkɨra babɨrɨ ba ko bakoli bʉwe na mʉgʉma wa ko bashirikani bʉwe. Omushirikani oyo abyaga niashikitsye Gongo na Koroneri niayinihire ɨye. 8 Mwabwɨrabo ebyoshi byatsʉkaga, honyuma kw'aho mwathʉmabo ɨYopa.

9 Bwabere bwakya, babere bakɨnalɨ mo nzɨra hofɨ n'omuyi w'ɨYopa, Petero mwaya ko lʉthwe* kw'elʉgʉlʉ hofɨ kathi ka mwɨshɨ bʉshana n'ɨya shaba. 10 Mwafwa nzala na mwashondya irya. Babere banalɨ abamʉthekera akalyo, mwabya nga amalekʉla, 11 na mwashʉnga olʉbʉla nɨ lwamakɨngʉkala, na kɨndʉ kɨgʉma kyagendaga ekikima kishoshire nga lʉkɨmba lʉnene, olukimibwa ahishi ni lutsimbirwe ko mbande ine. 12 Namo mwabyaga mɨhanda yoshi y'esonyama s'ebɨrenge bɨne, n'esonyama eso sɨnagendera ahishi ko nda, na mɨhanda yoshi y'ebɨronge. 13 Aho mwonvwa mʉlenge nɨamʉbwɨra athɨ: «Petero, hangana, kera na ulye!» 14 Hewethuwe Petero mwashubya athɨ: «Oh, ɨhɨ mbe Nyinya-kowethʉ, kʉshangwa nyɨthahera nyathalya kɨndʉ kɨthatholere kʉtse kitherire.» 15 Omʉlenge mwashʉba onvwɨka n'ɨmʉbwɨra athɨ: «Ebyo Gongo athetsya, ʉthahʉlaga mʉbyo mo bitherire.*» 16 Ekyo mokyakoleka ngendo kashathʉ, honyuma kw'aho ekɨndʉ ekyo mokirukibwa mo lʉbʉla.Petero ashʉnga humanani ya lʉkɨmba lʉlɨmo nyama mɨna-mɨna

17 Petero mwayɨbʉtsya nga ehumanani athashʉnga nga yinegenire ithi ki. Mo ndambi eyo abo bathʉmawa na Koroneri mobahika ho lukyo, kʉshangwa babyaga nɨbamamala ɨbʉlɨrɨtsya ng'omwa Simoni mʉlɨ hayi. 18 Mobabɨrɨkɨra n'ɨbʉtsya bathɨ: «Ewono hano ho Simoni yo ʉnahʉlwamo Petero alɨ?» 19 Petero abere akɨnalɨ aganɨtsya ko humanani eyo, oMʉthɨma Mwerʉ mwamʉbwɨra athɨ: «Onvwa, hano halɨ bayira bashathʉ abakushondya. 20 Hangana, kima, ʉgende hagʉma nabo bʉtha thɨka-thɨka, kʉshangwa ni ingye ngyo nyɨthathʉmabo.» 21 Aho Petero mwakimira ahalɨ abandʉ abo n'ɨbwɨrabo athɨ: «Nɨ ingye ono ngy'omushondya. Mwamahika bʉshana na ki?» 22 Mobashubya bathɨ: «Koroneri mʉkʉlʉ w'abashirikani yo wamathʉthʉma. Nɨ mʉndʉ athʉnganene, yo ubahire Gongo na ayire ngʉlʉ mo Bayuta. Malaɨka mʉgʉma wa Gongo mwamuhamulire akʉbɨrɨkɨre ewe bʉshana nɨonvwa ekyo wamʉbwɨra.» 23 Petero mwakokyabo n'ɨhabo bʉgonzero.

Bwabere bwakya mwagenda nabo. Bagʉma ba mo bɨkɨrɨtsya b'ɨYopa mobamʉherekeretsya. 24 Bwabere bwashubakya, mobahika iKaisaria. Koroneri nialindirirebo hagʉma n'olʉganda lʉwe n'abira bʉwe abo athabɨrɨkɨra. 25 Petero abere ashondya ɨngɨra, Koroneri mwahika imukokya, mwunuma embere sɨwe ihika ko kɨthaka mw'imushikya. 26 Hewethuwe Petero mwamuhangania n'ɨmʉbwɨra athɨ: «Hangana, kʉshangwa nangye nyɨrɨ mʉndʉ ng'ɨwe.» 27 Honyuma kw'aho, nianemʉsɨmola na Koroneri, mwɨngɨra mo nyʉmba, mweya bandʉ bangɨ nibahindene. 28 Mwabwɨrabo athɨ: «Mwetsi k'oMuyuta athahamulirwe ɨkwamana n'ekɨsomo kɨwe ikiritsania n'omʉndʉ w'ebɨhanda kʉtse ɨngɨra mo nyʉmba yɨwe. Hewethuwe Gongo mwanyikangya ko Nyɨthatholere ɨtsɨmba mʉndʉ woshi-woshi nga athatholere kʉtse nga y'utherire. 29 Bʉshana n'ekyo, mʉthabere mwanyɨbɨrɨkɨra, monyihika bʉthakʉbɨsa. Enyishondya ɨmɨnya nga mʉthanyɨbɨrɨkɨra bʉshana na ki.»

30 Koroneri mwashubya athɨ: «Bɨro bɨshathʉ byamatsʉka, ko ndambi eyɨrɨ ng'eno, ko saha mwenda y'erigolo, nyabyaga nɨenyɨshabɨra omwaye. Aho n'aho, monyashʉnga kʉ mʉndʉ n'imene embere saye, niambithe ngɨmba singengire 31 na mwanyɨbwɨra athɨ: "Koroneri, Gongo mwonvwa emɨshabe awe, na amɨbʉka ebɨhembo byawe byo ʉnaha abatsene. 32 Aho ʉthʉme bandʉ ɨYopa ʉbɨrɨkɨre Simoni yo ʉnahʉlwamo Petero, ikere mo nyʉmba ya Simoni mukoli wa ngobi, ahimbire ho mʉsɨke w'engetsɨ." 33 Aho n'aho monyɨkʉthʉmɨra bandʉ, nawe wamashingya ukahika. Ithwe boshi thʉlɨ hano lɨno embere sa Gongo bʉshana nɨonvwa ebyoshi Nyinya-kowethʉ athakʉhamʉla ʉthʉbwɨre.»

34 Aho Petero mwanegena athɨ: «Ko kwenene nyamamɨnya lɨno ko Gongo athalɨ na ndondogoli, 35 hewethuwe obʉlɨ mʉndʉ na mw'angabya wa mʉ kɨhʉgo kɨhe yo ubahire Gongo n'ɨkola ebɨthʉnganene, oyo yo Gongo anakokya. 36 Mwathʉma mwatsɨ ʉwe ko Baisiraeli, eNgʉlʉ Mbʉya y'obʉholo ɨtsʉkɨra kʉ Yesʉ Kirisito n'ɨye yo Nyinya-kowethʉ w'abandʉ boshi. 37 Ndɨ munetsi kyo kyathangaga kyahika mo kɨhʉgo ky'iNgalilaya, na honyuma kw'aho mo kɨhʉgo kyoshi ky'iYuteya, Yoani abere amamala ɨkangɨrɨtsya abandʉ athɨ babatisibwe. 38 Mwetsi ko Gongo mwafʉbʉlɨra amaka w'oMʉthɨma Mwerʉ kʉ Yesʉ w'iNasareti. Kandɨ mwetsi ko Yesʉ mwathimba mo kɨhʉgo nɨakola bɨbʉya n'ilamya aboshi bo babyaga mo bʉkobe bwa Sitani, kʉshangwa Gongo abyaga hagʉma naye.

39 «Nethwe thʉlɨ batimo b'ebyoshi akolaga mo kɨhʉgo ky'aBayuta n'ɨYerʉsalemʉ. Mobamwitha mw'ɨmʉbamba ko mʉsalaba. 40 Hewethuwe Gongo mwamulubukya mo kɨro kya kashathʉ, mwamukangania kʉbʉya-kʉbʉya, 41 ɨthalɨ ko bandʉ boshi, hewethuwe kw'ithwe Gongo athangaga ɨshombolamo batimo. Ni ithwe thwalyaga n'ɨshoma hagʉma naye honyuma w'erilubuka lɨwe ɨthoka mo baholi. 42 Mwathʉhamʉla ɨkangɨrɨtsya abandʉ n'ibya batimo ko n'ɨye yo Gongo ayɨragamo musohi w'abalɨho n'abaholi. 43 Abamɨnyeretsɨ boshi abamwahʉla nɨabanegena bathɨ obʉlɨ mʉndʉ yo ʉmwɨkɨrɨtsye aganyɨrwa ebɨtsɨbʉ bɨwe mo maka w'erɨtsɨna lɨwe.»

44 Petero abere akɨnalɨ anegena, oMʉthɨma Mwerʉ mwakimira ko boshi bo bagenda abamʉhʉlɨkɨrɨtsya. 45 aBayuta bɨkɨrɨtsye bo bahikaga hagʉma na Petero mobashweka kw'ɨshʉnga ko Gongo amahana olʉhembo lw'oMʉthɨma Mwerʉ ko bandʉ b'ebɨhanda. 46 Kʉshangwa mobonvwabo nɨabanegena mʉ yɨndɨ mɨnegene ithetsibwe n'isingya obʉkʉlʉ bwa Gongo. Aho Petero mwanegena athɨ: 47 «Nɨ ndɨ yo wangakaga abandʉ aba ibatisibwa mo metsi, bo bamalire ɨbona oMʉthɨma Mwerʉ ng'ithwe?» 48 Na mwahamʉla babatisibwe mw'ɨtsɨna lya Yesʉ Kirisito. Aho mobamʉshaba abye hagʉma nabo bɨro bɨrebe.