1 Polo na Sɨla mobalotsya ebʉshondotsɨ mo lʉgendo lwabo, mobatsʉka mo muyi w'iAmufipoli na mo muyi w'iApolonia, mobahika mo muyi w'iTesalonika. Mo muyi oyo, mwabyaga sinakoki y'aBayuta. 2 Polo mwashushikania Sabato ishathu nɨanemwɨngɨra mo sinakoki nga ko abyaga abegere. Omo sinakoki eyo, mwasɨmola n'abo eyagamo, ko Mashako Abuyirire. 3 Agenda asonzomolerabo n'ikangyabo, ko Kirisito abyaga nɨatholere ɨgalwa n'ilubuka mo baholi. Na kuthyo agenda abwɨrabo athɨ: «Yesʉ oyo nyɨbafʉlɨra, n'ɨye yona Kirisito.» 4 Aho Bayuta bagʉma mobɨkɨrɨtsya na mobayihira ko mʉnda wa Polo bana Sɨla. Na kuthyo Bakiriki bangɨ bo babyaga nɨ abanaramya Gongo na bakatsɨ bangɨ bo babyaga bashikibwe nabo mobɨkɨrɨtsya.

5 Hewethuwe Bayuta bagʉma mobafwa mwisho. Mobahindania bandʉ babɨ bo beyaga mo ndaki. Honyuma kw'aho mobayihira hagʉma nɨthangɨtsya bʉrʉnga mo muyi. Mobayɨngɨrɨra mo nyʉmba ya Yasoni niabayashondya Polo bana Sɨla bʉshana bathwalebo embere s'abandʉ, 6 hewethuwe mobatheya b'omo. Mobakʉrɨra Yasoni n'abandɨ bagala bethʉ bɨkɨrɨtsya bagʉma embere y'abakʉlʉ b'omuyi. Na mobathanga ɨhambala bathɨ: «Abandʉ aba mobaletha bʉrʉnga mo kɨhʉgo kyoshi, na lɨno babano bahera kʉno! 7 Na nɨ Yasoni oyu yo uthakokyabo omwe! Abandʉ boshi aba abakola ebɨthalɨngene n'amathegeko wa Kaisari, kʉshangwa ɨbo abanegena bathɨ halɨ ʉndɨ mwamɨ mbʉ yo Yesʉ!» 8 Ebɨnwa ebi mobyathabagania omuhindano n'abakʉlʉ b'omuyi. 9 Yasoni na balikyabo mobathanga ɨthʉnga ndihi ko bakʉlʉ embere balikebo.

10 Bwabere bwahika kɨro, abagala bethʉ bɨkɨrɨtsya mobaherekeretsya Polo bana Sɨla ɨBeroya. Babere bahikayo mobɨngɨra mo sinakoki y'aBayuta. 11 Abandʉ b'ɨBeroya babyaga ba mʉthɨma mʉbʉya kʉlenga Abanyatesalonika, kʉshangwa ɨbo mobakokya eKɨnwa kya Gongo na ngʉmbʉ nyɨngɨ. Bʉlɨ kɨro bagenda abasonzomola aMashako Abuyirire bʉshana n'ɨmɨnya ng'ebyo Polo anegena nga nɨna bya kwenene. 12 Bayuta bangɨ mʉbo mobɨkɨrɨtsya hagʉma na bakatsɨ bangɨ Bakiriki bo bashikibwe na bayira bangɨ.

13 Hewethuwe aBayuta b'iTesalonika babere bonvwa ko Polo kw'afʉla kuthyo eKɨnwa kya Gongo ky'omo muyi w'ɨBeroya, oko nako mobayako n'ɨyakaramya abandʉ n'ɨretha bʉrʉnga mo muhindano. 14 Aho n'aho abagala bethʉ bɨkɨrɨtsya mobaherekeretsya Polo y'oko kyambʉ ky'engetsɨ. Hewethuwe ye Sɨla bana Timote ɨbo mobashiba ɨBeroya. 15 Abandʉ bo baherekeretsaya Polo mobamuhikya mo muyi w'ɨAtene. Babere balɨ abashʉba ɨBeroya, Polo mwahamʉla athɨ babwɨre Sɨla na Timote, bamweye tsʉba.

16 Polo abere akinalindire Sɨla bana Timote mo muyi w'ɨAtene, mwagenda ashʉnga kw'omuyi oyo otswiremo ebishoshekano by'esogongo. Ebyo mobyamwitha mʉthɨma. 17 Aho mwagenda asɨmola n'aBayuta mo sinakoki hagʉma n'abandʉ b'ebɨhanda bo babyaga nɨ abanaramya Gongo. Na bʉlɨ kɨro kuthyo agenda asɨmola n'abandʉ abo agenda eya ahandʉ h'erihindanira.

18 Bakangɨrɨtsya bagʉma b'omo kɨkembe ky'aBaepikurio na ky'aBasitoiko nabo mobathanga ikubisania na Polo.* Bagʉma mʉbo bagenda ababutsania bathɨ: «Ashondya ɨnegena athɨ ki omʉndʉ w'ebɨnwa bɨngɨ oyu?» N'abandɨ bathɨ: «Alɨnga afʉla mwatsɨ w'obo gongo bagʉma bageni.» Bagenda abanegena bathyo, kʉshangwa Polo agenda afʉla eNgʉlʉ Mbʉya ya Yesʉ n'erilubuka ly'abaholi. 19 Bʉshana n'ekyo mobathwala Polo y'embere s'oBʉshenge Bʉkʉlʉ bo bʉnahʉlwamo Areopako.* Abakʉlʉ b'oBʉshenge obo mobamʉbwɨra bathɨ: «Ebɨnwa bihya-bihya ebyo ʉkangɨrɨtsya abandʉ othushondya ʉthʉsonzomolerebyo kʉbʉya. 20 Thwamanegena thuthyo kʉshangwa ebɨnwa ebyo ʉthʉbwɨra bithonvwikire kʉbʉya mo mathwi ethʉ. Aho othushondya thʉmɨnye kʉbʉya nga binegenire bithi ki.» 21 Byabyaga bithyo kʉshangwa abandʉ boshi b'ɨAtene hagʉma n'abageni bo babyaga bikereko, bagenda abatsukya endambi yabo yoshi mw'ɨsɨmola kʉtse mw'ɨonvwa emyatsɨ mihya-mihya.

22 Aho Polo mwimana mo kathi-kathi k'oBʉshenge bw'eAreopako mwanegena athɨ: «Imwe bandʉ b'ɨAtene! Nyamashʉnga kw'imwe mo bʉlɨ mwatsɨ, omʉnatsɨɨra ebɨnwa by'ekɨsomo byo kʉtsɨbʉ. 23 Nyamanegena nyithyo kʉshangwa mw'ɨtsʉka-tsʉka mo muyi enyu, monyayishungire ko bɨshoshekano byenyu ebyo munaramya. Na monyashungire kʉ bʉtara bʉgʉma bw'ɨhererako bushakirweko bʉthɨ: "Kʉ Gongo yo uthetsibwe." Aho yo munaramya bʉthamʉmɨnya, yo nyitsire ɨbafʉlɨra.

24 «Gongo yo wabʉmbaga ekɨhʉgo n'ebyoshi bɨrɨmo, kandɨ nɨ ɨye yo mwenye olʉbʉla n'ekɨhʉgo. Bʉshana n'ekyo, athalɨ anikala mʉ manyʉmba wa bogongo wahimbawa na bandʉ. 25 Kuthyo ɨye athalayire iwathikibwa na bandʉ, nga mʉndʉ alayire kʉ buwathikya bʉlebe. Kʉshangwa n'ɨye yo ʉnaha abandʉ boshi bw'omʉka w'obʉyɨngo n'ebɨndɨ bɨndʉ byoshi balayireko. 26 Okw'ɨtsʉkɨra mo mʉndʉ mʉgʉma, mwabʉmba abandʉ b'ebɨhanda byoshi, bʉshana bikale ko kɨhʉgo kyoshi. Mwahirirabo bɨrɨmo na mɨhathɨ mo kɨhʉgo kyo bangikalamo. 27 Gongo akolaga athyo kʉshangwa abyaga niashondya abandʉ bamushondye, na bahike ko kɨka ky'ɨmʉbona, mobangamushondya mw'ɨmamatha-mamatha. Ko kwenene Gongo athalɨ hale n'obʉlɨ mʉgʉma kw'ithwe! 28 Kʉshangwa nɨ ko maka ʉwe waleka nithwabyaho, nithwabya niothuthengya n'ɨhʉmʉla. Ekyo kɨrɨngene nga ko bagʉma mo bashaki benyu b'esonyimbo banegenaga bathɨ: "Kʉshangwa nethwe thʉlɨ bana bʉwe." 29 Aho, kʉshangwa thʉlɨ bana ba Gongo, bɨthatholere ɨgenda thʉganɨtsya thʉthɨ Gongo ashoshikanibwe na kɨshoshekano kyakomibawa mʉ buthegekania na bwenge bwa mʉndʉ, kibye kya horo kʉtse kya faranga kʉtse ky'ibwe.

30 «Emyatsɨ yo bandʉ bagenda abakola mo bʉthamɨnya, Gongo mwathaganzɨrarobo. Hewethuwe abwɨra abandʉ boshi bo balɨ ahoshi athɨ babɨndʉke ɨthoka mo bɨtsɨbʉ byabo. 31 Kʉshangwa mwahiraho kɨro kɨgʉma ekyo andasohamo abandʉ boshi mo kwenene, kw'ɨtsʉkɨra omʉndʉ yo ashombolaga bʉshana n'omʉlɨmo oyo. Na Gongo mwabereretsya ebɨnwa ebyo, mw'ilubukya omʉndʉ oyo mo baholi.»Polo akangɨrɨtsya embere y'oBʉshenge bw'ɨAreopako

32 Abakʉlʉ abo babere bonvwa Polo kw'asɨmola bʉshana n'erilubuka ly'abaholi, bagʉma mʉbo mobathanga ɨmʉshekeretsya. Hewethuwe bangɨ mʉbo mobanegena bathɨ: «Thwandashʉba kʉhʉlɨkɨrɨtsya ʉlɨ ʉnegena ko bɨnwa ebi ko kɨndɨ kɨro.»

33 Nɨ bathyo ko Polo amikanaga nabo. 34 Hewethuwe bandʉ bagʉma mobɨkɨrɨtsya na mobabya ko mʉnda wa Polo. Mw'abo mwabyaga Tionisi mʉgʉma w'omo Bʉshenge bw'Areopako, na mʉkatsɨ mʉgʉma yo wahʉlawamo Tamari, hagʉma n'abandɨ bandʉ.