1 Kɨro kɨgʉma Petero na Yoani bagenda abɨrʉkɨra ho Nyʉmba ya Gongo bʉshana n'omʉshabe w'oko saha mwenda. 2 Hofɨ n'olukyo lʉgʉma lw'eNyʉmba ya Gongo lo lwagenda olwahʉlwamo «Lukyo Lʉbʉya», mohahekerwa mʉndʉ mʉgʉma abyaga kɨrema ɨthanga kw'ɨbʉthwa lɨwe. Ko bɨro byoshi bagenda abamumika ko lukyo olo, bʉshana n'ɨgenda ashaba buwathikya ko bandʉ bo bagenda abɨngɨra mo Nyʉmba ya Gongo. 3 Omʉndʉ oyo mwashʉnga Petero na Yoani niabashondya ɨngɨra mo Nyʉmba ya Gongo, na mwashababo faranga. 4 Petero na Yoani mobamʉhandako amesho. Petero mwamʉbwɨra athɨ: «Yɨthegeretsye ithwe!» 5 Omʉndʉ oyo mwahanda kʉbo kw'amesho nɨaganɨtsya athɨ abona kʉbo ko kɨndʉ. 6 Hewethuwe Petero mwamʉbwɨra athɨ: «Nyithawithe kʉ faranga kʉtse kʉ horo. Hewethuwe ekyo nyiwitheko kyo nyakʉha. Mw'ɨtsɨna lya Yesʉ Kirisito w'iNasareti, wimana na ʉgende!»Petero na Yoani abalamya kɨrema ho lukyo lw'eNyʉmba ya Gongo

7 Aho Petero mwamʉtsɨmba ko kʉboko kʉwe kw'amalyo na mwamuwathikya erimwimania. Aho n'aho ebɨshando n'obukongolu by'omʉndʉ oyo mobyabya na kagala, 8 mwabathʉka n'ɨthanga ɨgenda. Mwɨngɨra na Petero na Yoani mo Nyʉmba ya Gongo, nɨagenda n'ɨyɨshɨnda, n'isingya Gongo.

9 Abandʉ boshi mobamʉshʉnga alɨagenda n'isingya Gongo. 10 Abandʉ babere bamʉshʉnga mobamɨnya ko nɨ ɨye yo wagenda ashabɨrɨtsya ikere ho lukyo lw'eNyʉmba ya Gongo lo lwagenda olwahʉlwamo «Lukyo Lʉbʉya». Kandɨ mobashishala n'ɨshweka kʉtsɨbʉ bashʉnga ko byo bithahikira omʉndʉ oyo.

11 Omʉndʉ oyo mwathalika Petero na Yoani. Abandʉ boshi mobashweka kʉtsɨbʉ n'ɨthɨbɨthɨra tsʉba yo babyaga mo mbarasa yo yagenda eyahʉlwamo «Mbarasa ya Solomona.*» 12 Aho, Petero abere ashʉnga kw'ebyo mwabwɨra abandʉ athɨ: «Imwe bandʉ b'iIsiraeli, bʉshana na ki omʉshwekera erɨlama eri? Na bʉshana na ki omʉthʉhandako amesho nga nɨ ko maka ethʉ ithwe bene, kʉtse nɨ kw'ɨtholera lyethʉ embere sa Gongo lyo lyamaleka omʉndʉ oyu nɨagenda? 13 Gongo wa Abʉrahamʉ na Isaka na Yakobo, Gongo wa bo thatha-kʉlʉ, n'ɨye yo wamasingya mukoli ʉwe Yesʉ. Yesʉ yo mwahotheraga n'ɨyɨgana ɨye embere sa Pilato mo ndambi abyaga niashondya ɨmʉmɨnʉla. 14 He imwe momwathɨnda yo ubuyirire, omʉthʉnganene, momwashaba mʉmɨnʉlɨrwe omwithi.* 15 Momwitha yo ʉlɨ shoko y'obʉyɨngo, hewethuwe Gongo mwamulubukya mo baholi nethwe thʉlɨ batimo bʉwe. 16 Nɨ mo maka w'erɨtsɨna lya Yesʉ, bʉshana n'olwɨkɨrɨtsyo mw'ɨye, lwamaha omʉndʉ oyu yo kagala yo mushungireko hano na mumwetsi. Nɨ erɨtsɨna lya Yesʉ n'olwɨkɨrɨtsyo mw'ɨye lo lwamamʉha erɨlama lɨhwererere nga ko mwamashʉnga imwe boshi.

17 «Aho bagala bethʉ imwe, nyetsi ko imwe n'abakʉlʉ benyu momwakolera Yesʉ mo bʉthamɨnya ebyo mwakolaga. 18 Hewethuwe Gongo amamala ɨbereretsya kuthyo ekyo anegenaga kera mo mʉnʉ w'abamɨnyeretsɨ boshi. Mwanegena athɨ Kirisito ʉwe angagerwe. 19 Ɨngo! Mʉbɨndʉke ɨthoka mo bɨtsɨbʉ byenyu, na mʉbɨndʉkɨre Gongo nɨmo abashangʉlako ebɨtsɨbʉ byenyu. 20 Aho Nyinya-kowethʉ andabaha ndambi y'ɨlʉhʉka, n'ɨbathʉmɨra Yesʉ, ye Kirisito yo Gongo abashombolera ɨthoka kera. 21 Ko ndambi eno Yesʉ Kirisito atholere nɨathanga ibya mo lʉbʉla ihika ko mʉgʉlʉ ebyoshi byandabya bihya-bihya, nga ko Gongo anegenaga mo mʉnʉ w'abamɨnyeretsɨ bʉwe babuyirire ɨthanga kera. 22 Kʉshangwa Mʉsa mwabwɨra bo thatha-kʉlʉ athɨ: "Nyinya-kowethʉ Gongo wenyu, andahulukya mʉmɨnyeretsɨ yo ʉlɨ ng'ingye mʉgʉma mw'imwe. Mwandahʉlɨkɨrɨtsya ebyoshi andababwɨra. 23 N'obʉlɨ mʉndʉ yo ʉthɨndahʉlɨkɨrɨtsye omʉmɨnyeretsɨ oyo, andaligithwa ɨthoka mo bandʉ ba Gongo n'ithwa.*"

24 «Na abamɨnyeretsɨ boshi bo banegenaga ɨthanga kʉ Samwere, aboshi nga ko bakwamanaga, nabo mobahʉla ebɨro bɨno. 25 Endagane yo Gongo akolaga n'abamɨnyeretsɨ, nɨ ndagane enyu. Na mushangire ko ndagane eyo akolaga na bo thatha-kʉlʉ abere anegena na Abʉrahamʉ athɨ: "Ko lʉbʉtho lwawe ebɨhanda byoshi by'omo kɨhʉgo byandagashanɨrwa.*" 26 Kuthyo, Gongo mwahulukya omukoli ʉwe, mwathanga ɨbathʉmɨra ɨye bʉshana n'ɨbagashanɨra mw'ɨbɨndʉla bʉlɨ mʉndʉ mw'imwe ɨthoka mo bɨbɨ bɨwe.»