1 Polo na Baranaba mobahika iIkonio. Oko nako mobɨngɨra mo sinakoki y'aBayuta, mobakangɨrɨtsya ihika ko kɨka Bayuta na Bakiriki bangɨ mobɨkɨrɨtsya. 2 Hewethuwe aBayuta bo bathɨndaga ɨkɨrɨtsya, mobakaramya abandʉ b'ebɨhanda, mobahira mʉbo mo mɨthɨma mɨbɨ y'ɨbaga abɨkɨrɨtsya. 3 Namo byanabyaga bithyo, Polo na Baranaba mobikala bɨro bɨngɨ iIkonio. Bagenda abanegena bʉtsɨra bʉba, nibayinihire Nyinya-kowethʉ. Naye mwahabo maka w'ɨkola bɨmɨnyɨkalo na bɨthɨko-thɨko. Na bʉshana n'ekyo mwakangania kwenene kw'amakangɨrɨtsya bakangɨrɨtsyaga w'olʉkogo lʉwe abyaga wa kwenene. 4 Abahimbani b'omo muyi mobagabana, bagʉma mobabya ko lʉhande lw'aBayuta n'abandɨ ko lʉhande lw'abathʉmwa. 5 aBayuta n'abandʉ b'ebɨhanda, hagʉma n'abakʉlʉ babo, bagenda abayithegekania inubya Polo na Baranaba n'ithabo mu mabwe. 6 Polo na Baranaba babere bamɨnya ebyo, mobashayɨra iLisitira n'ɨTerebe, miyi yɨrɨ mo kɨhʉgo ky'iLikaonia, na mo ndambɨ-ndambɨ y'emiyi eyo. 7 Eyo nayo mobagenda abafʉla eNgʉlʉ Mbʉya.

8 Mo muyi w'iLisitira, mwabyaga mʉndʉ mʉgʉma, abyaga nɨ kɨrema ɨthanga kw'ɨbʉthwa lɨwe, kʉshangwa ebɨshando bɨwe nibikonongokire. Abyaga nɨathahera athayɨsɨngɨrɨka kʉtse ɨgenda. 9 Mwonvwa ebyo Polo agenda anegena. Polo mwamʉhandako amesho, mwashʉnga nɨalɨ na lwɨkɨrɨtsyo lw'ilamibwa. 10 Aho Polo mwamʉbwɨra mʉ mʉlenge mʉnene athɨ: «Hangana, ʉyɨsɨngɨrɨke ko bɨshando byawe!» Omuyira oyo mwabathʉka na mwathanga ɨgenda.

11 Omuhindano abere ashʉnga ebyo Polo akolaga, mobahambala mo mʉnegene w'ekilikaonia bathɨ: «Bo gongo bamakimira eyo thʉlɨ nɨbalɨ mo mɨbɨrɨ y'abandʉ!» 12 Mobahʉla Baranaba mo «Seu» na Polo «Hereme», kʉshangwa Polo abyaga mbuyi.* 13 Omuheri w'omo nyʉmba ya gongo Seu yo yabyaga ko mbʉlʉkɨro yo muyi, mwaletha bɨmasa nibyambithe mbitha ya mʉshanga embere y'esongyo s'enyʉmba eyo. Agenda ashondya athɨ ɨye n'omuhindano bakometsye Baranaba na Polo bo bʉhere.

14 Hewethuwe abathʉmwa babɨrɨ, Baranaba na Polo babere bonvwa ebyo, mobaberengenga esongɨmba sabo* n'ɨthɨbɨtha mo muhindano nɨabahambala bathɨ: 15 «Balikyethu, bʉshana na ki omʉkola ebyo? Nethwe thʉnalɨ bandʉ, ng'imwe. Othʉbafʉlɨra eNgʉlʉ Mbʉya mw'ɨbabwɨra thʉthɨ mulike esoshoshani sa bʉsha-bʉsha, n'ɨbɨndʉkɨra Gongo yo ʉlɨho, yo wabʉmbaga olʉbʉla n'ekɨhʉgo n'engetsɨ n'ebyoshi bɨrɨmo. 16 Mo mɨgʉlʉ ya kera, Gongo mwalika ebɨhanda byoshi bɨkwame sonzɨra sabyo. 17 Hewethuwe, mwathalika iyikangya mw'ɨkola ebɨbʉya. Ɨthoka mo lʉbʉla anabaha nvʉla yo ɨnɨetsya emyaka mo bɨrɨmo byayo, anabaha akalyo na otsutsya lʉmogo mo mʉthɨma enyu.» 18 Namo bananegenaga ebɨnwa ebi, lyabyaga litsibuhire ko bathʉmwa ɨhangɨra omuhindano bathahereramo bʉhere.

19 Honyuma kw'ebyo aBayuta mobahika nɨabathoka iAntiokia n'iIkonio, na mobuhya abandʉ mo muhindano. Mobagʉshɨra Polo yo mabwe bʉshana bamwithe, mobamʉkʉrɨra ko kyashwa ky'omuyi, mobaganɨtsya bathɨ amalire ɨfwa. 20 Hewethuwe abɨkɨrɨtsya babere bamuthimbako, mwahangana, mwashʉbaya mo muyi. Bwabere bwakya, mwaya ɨTerebe hagʉma na Baranaba.

21 Polo na Baranaba mobafʉla eNgʉlʉ Mbʉya mo muyi w'ɨTerebe eyo babonaga bɨga bangɨ. Honyuma kw'aho mobashʉbaya iLisitira, n'iIkonio nɨ iAntiokia y'omo kɨhʉgo ky'iPisitia. 22 Eyo mobagenda abashikya emɨthɨma y'abɨga, n'ɨhabo muhwa mw'itsitsinia mo lwɨkɨrɨtsyo. Bagenda ababwɨrabo bathɨ: «Lɨtholere nɨthwɨngɨra mo Bwamɨ bwa Gongo mʉ malɨgo mangɨ.» 23 Babere bamamala iyima akalyo n'ɨshaba, mobahira mo bʉlɨ kanisa mo bangʉmwa, mobahirabo mo minwe ya Nyinya-kowethʉ yo bɨkɨrɨtsyaga.

24 Honyuma kw'aho mobatsʉka mo kɨhʉgo ky'iPisitia mobɨngɨra mo kɨhʉgo ky'iPamufilia. 25 Babere bamamala ɨfʉla eKɨnwa kya Gongo mo muyi w'ɨPerenga, honyuma kw'aho mobaya mo muyi w'iAtalia. 26 Babere bathoka eyo, mobaya iAntiokia y'iSuria mʉ bwatho, omuyi bashabɨrawamo olʉkogo lwa Gongo bʉshana n'omʉlɨmo babyaga nɨbamamala. 27 Babere bahika iAntiokia, mobahindania akanisa n'ɨbwɨrako ebyoshi Gongo akolaga kw'ɨtsʉkɨrabo, na ko mwakɨngʉlɨra abandʉ b'ebɨhanda nabo olukyo lw'olwɨkɨrɨtsyo. 28 Polo na Baranaba mobikala iAntiokia yo bɨro bɨngɨ hagʉma n'abɨga.