1 Aho Petero na Yoani babere bakɨnalɨ abanegena n'abandʉ, abaheri n'omʉkʉlʉ w'abatheya b'eNyʉmba ya Gongo n'aBasandukayo mobafʉmba. 2 Babyaga nibatsibukire kʉtsɨbʉ kʉshangwa abathʉmwa babɨrɨ abo bagenda abakangɨrɨtsya abandʉ n'ɨbwɨrabo ko Yesʉ mwalubuka, na mw'ebyo nɨabanegena bathɨ abaholi bangalubuka. 3 Mobatsɨmbabo na mobagʉshabo mo muliki ihika mungya, kʉshangwa bwabyaga nɨbwahera igolo. 4 Hewethuwe bangɨ mw'abo bonvwaga ebɨnwa by'abathʉmwa mobɨkɨrɨtsya, n'emɨganzo ya bobɨkɨrɨtsaya yabyaga hofɨ bɨhʉmbɨ bɨthano.

5 Aho bwabere bwakya, abakʉlʉ n'abangʉmwa n'abakangɨrɨtsya b'oMʉgomba, mobahindana ɨYerʉsalemʉ. 6 Mo kathi k'abo mwabyaga Ana muheri mʉkʉlʉ na Kayafa na Yoani na Likisa n'aboshi bo babyaga b'omo lʉganda lw'omuheri mʉkʉlʉ. 7 Mobahira Petero na Yoani mo kathi-kathi n'ɨbʉtsyabo bathɨ: «Nɨ kʉ maka ahɨ kʉtse kw'ɨtsɨna lya ndɨ lyo mʉthalamyamo?» 8 Aho Petero anotswiremo oMʉthɨma Mwerʉ, mwabwɨrabo athɨ: «Imwe bakʉlʉ b'abandʉ n'imwe bangʉmwa, 9 othʉbʉrana munobwire bʉshana n'ekɨbʉya kɨthakolerwa ekɨrema. Othʉbʉtsɨbwa ng'omʉndʉ athalama athɨ. 10 Imwe, n'abandʉ boshi b'iIsiraeli, mʉtholere nɨmwamɨnya k'omʉndʉ oyu amimana embere senyu alɨ amalire ɨlama kʉbʉya, nɨ bʉshana n'amaka w'erɨtsɨna lya Yesʉ Kirisito w'iNasareti. Momwamubambire ko mʉsalaba na Gongo mwamulubukitsye ɨthoka mo baholi. 11 Yesʉ oyo yo aMashako Abuyirire anegenako athɨ:

"Eribwe lyo mwathɨndaga imwe bahimbi,

nɨ lyo lyabere ibwe ly'ekoni.*"

12 Kandɨ hathalɨ ɨshabʉlwa mʉ ʉndɨ mʉndʉ, kʉshangwa hathalɨ lɨndɨ ɨtsɨna hano ishi lyo abandʉ bahabawa bashabʉlwe mʉlyo.»

13 Aho abangʉmwa babere bashʉnga obʉthʉbaha bwa Petero na Yoani, n'ɨmɨnya ko nɨ bandʉ bathasomire na nɨ bandʉ ba bʉsha-bʉsha, mobashweka kʉtsɨbʉ, na mobamɨnya ko bathalɨ hagʉma na Yesʉ. 14 Kandɨ babere bashʉnga omʉndʉ yo uthalamibwa imene hagʉma nabo, mobathakotsya ishubya kɨnwa. 15 Aho mobahamʉlabo bathoke mo Bʉshenge Bʉkʉlʉ, nabo mobaya bʉnombo. 16 Omo, mobathanga ɨnegena bathɨ: «Thwayɨra abandʉ aba bo thʉthɨ? Kʉshangwa ekɨthɨko-thɨko bathakola nɨ kɨnene embere s'abandʉ boshi b'ɨYerʉsalemʉ, kandɨ thʉthangakotsya ɨyɨganakyo. 17 Aho nɨmo omwatsɨ ono athayaga ngʉlʉ, thʉhangɨrebo kʉtsɨbʉ bathanalinda bashʉba sɨmolera mʉndʉ yo kw'ɨtsɨna eri.»

18 Honyuma kw'aho mobabɨrɨkɨrabo na mobabwɨrabo bathɨ: «Muthanalinda mwashʉba negena kʉtse ɨkangɨrɨtsya kw'ɨtsɨna lya Yesʉ.» 19 Hewethuwe Petero na Yoani mobashʉbɨtsyabo bathɨ: «Mʉsohe imwe bene ni ki kyo kɨtholere embere sa Gongo, ɨbonvwa kʉtse ɨonvwa Gongo? 20 Ithwe thuthangalika ɨnegena ko bɨnwa ebyo thʉthashʉngako nɨonvwa.» 21 Babere bamamala ɨshʉba hangɨrabo kʉtsɨbʉ, mobamɨnʉlabo, kʉshangwa mobathashʉnga omwanya w'erilakyabo bʉshana n'abandʉ, kʉshangwa abandʉ boshi bagenda abasingya Gongo bʉshana n'ebyo bɨthakoleka. 22 Omʉndʉ yo walamibawa abyaga niawithe myaka irengitsye makumi ane.

23 Petero na Yoani babere bamamala ɨmɨnʉlwa mobagenda eyɨrɨ balikyabo, mobafʉlɨrabo emyatsɨ y'ebyoshi abakʉlʉ b'abaheri n'abangʉmwa bathabwɨrabo. 24 Abɨkɨrɨtsya babere bamala ɨonvwa omwatsɨ oyo aboshi kʉgʉmerera mobalakɨra Gongo bathɨ: «Ewo Nyinya-kowethʉ, ɨwe wo wabʉmbaga olʉbʉla n'ekɨhʉgo n'engetsɨ n'ebyoshi bɨrɨ mʉbyo, 25 nɨ ɨwe wo wayɨraga omukoli awe Tawiti thatha-kʉlʉ wethʉ, anegene ko kagala k'oMʉthɨma Mwerʉ athɨ:

"Bʉshana na ki abandʉ b'ebɨhanda abaletha bʉrʉnga?

Na bʉshana na ki abandʉ abaya nama sa bʉsha-bʉsha?

26 Abamɨ ba hano ishi mobayithegekenie kʉbʉya,

n'abakʉlʉ mobahindene hagʉma

bʉshana n'ɨlwɨsa Nyinya-kowethʉ na Kirisito ʉwe.*"

27 Ega! Nɨ kwenene, ye Herote na Ponzo Pilato hagʉma n'abandʉ b'ebɨhanda, n'abandʉ b'iIsiraeli, mobahindene mo muyi ono bʉshana n'ɨlwɨsa omukoli awe mubuyirire Yesʉ, yo wahakabaya amafʉtha. 28 Nɨ bathyo ko babereretsaya ebyo walengekanaya mo maka n'erishondya lyawe ɨthanga kera. 29 Aho, Nyinya-kowethʉ, shʉnga ebyʉbahɨrɨtsyo byabo, ewo, ʉthʉhe ithwe bakoli bawe bo kagala k'erɨfʉla eKɨnwa kyawe bʉtsɨra bʉba. 30 Kangania amaka awe kʉshangwa abandʉ balamibwe, ebɨmɨnyɨkalo n'ebɨthɨko-thɨko bɨkoleke mw'ɨtsɨna ly'omukoli awe mubuyirire Yesʉ.» 31 Babere bamamala ɨshaba, aho babyaga bahindene mohathenganibwa, n'aboshi mobotsutsibwa n'oMʉthɨma Mwerʉ, mobathanga ɨfʉla eKɨnwa kya Gongo bʉtsɨra bʉba.

32 Ekɨkembe ky'abɨkɨrɨtsya mobabya na mʉthɨma mʉgʉma, na mɨganɨtsye mɨgʉma. Mohathabya mʉndʉ mʉbo yo wagenda anegena athɨ ebɨndʉ bɨwe nɨ bɨwe yowene, hewethuwe mobashangɨra ebɨndʉ byoshi. 33 N'abathʉmwa bagenda abafʉla ebyo balolagako kw'ilubuka lya Nyinya-kowethʉ Yesʉ mo maka mangɨ. Na Gongo mwaha aboshi bo lʉkogo lʉngɨ. 34 Na mo kathi kabo momuthabya n'omʉndʉ n'omʉgʉma yo wabʉshaga kɨndʉ, kʉshangwa aboshi bo babyaga bawithe mashwa kʉtse manyʉmba bagenda abagʉtsyawo n'ɨletha esofaranga sathokaga kʉwo 35 n'iwathyatho abathʉmwa, nabo bagenda abagabɨratho ko bʉlɨ mʉndʉ ɨkwamana n'emɨlago yɨwe.

36 Kwabyaga Mulawi mʉgʉma erɨtsɨna lɨwe nɨ yo Yosefʉ, mbʉthɨrwa y'ekɨtsɨra ky'iKipuro, yo abathʉmwa balʉkagamo Baranaba (nɨ ɨnegena mbʉ: «Mʉndʉ w'ɨhana muhwa»). 37 Yosefʉ oyo abyaga awithe ɨshwa lɨwe, mwagʉtsyalyo, na mwaletha esofaranga n'iwathyatho abathʉmwa.