1 Mo ndambi eyo Sauli mwathalika bɨʉbahɨrɨtsyo bya bwithi ko bɨga ba Nyinya-kowethʉ. Mwaya eyɨrɨ omuheri mʉkʉlʉ, 2 n'ɨmʉshaba marʉba w'ɨmʉmɨnyɨsa ko sosinakoki s'iTamasiki, athɨ ameyayo bayira kʉtse bakatsɨ bo bakwamire eNzɨra ya Nyinya-kowethʉ, amɨnebo n'ɨthwalabo ɨYerʉsalemʉ.

3 Abere akɨnalɨ mo nzɨra y'iTamasiki, nɨahera hofɨ n'omuyi oyo, aho n'aho ekyakakala kyo kyathokaga mo lʉbʉla mokyamʉkoletsya ko mbande soshi. 4 Mwawa ahishi n'ɨonvwa mʉlenge nɨamʉbwɨra athɨ: «Sauli, Sauli, bʉshana na ki unyinubya?» 5 Na Sauli mwabʉtsya athɨ: «Ʉlɨ ndɨ no Nyinya-kowethʉ?» N'omʉlenge mwashubya athɨ: «Ni ingye Yesʉ ngyo unubya. 6 Hewethuwe wimana na wɨngɨre mo muyi, n'omo bakʉbwɨra ebyo wakola.» 7 Abagendania ba Sauli mobimana bʉthanegena kɨnwa, mobonvwa omʉlenge, hewethuwe mobathashʉnga mʉndʉ. 8 Sauli mwimana ɨthoka ko kɨthaka, mwatsɨbʉla amesho, hewethuwe niathakilolire. Mobamʉtsɨmba ko kʉboko n'ɨmʉthwala iTamasiki. 9 Mʉ bɨro bɨshathʉ mwathakotsya ɨlola na mwabya buthalya na bʉthashoma.Sauli abɨrɨkɨrwa na Yesʉ

10 iTamasiki yabyaga mwɨga yo wagenda ahʉlwamo Ananɨa. Nyinya-kowethʉ mwamʉhʉlʉkɨra mʉ humanani n'ɨmʉbɨrɨkɨra athɨ: «Ananɨa!» Naye mwashubya athɨ: «Ingye ono mbe Nyinya-kowethʉ.» 11 Nyinya-kowethʉ mwamʉbwɨra athɨ: «Ʉgende lɨno-lɨno mo nzɨra yo yɨnahʉlwamo "Ɨthʉnganene," na mo nyʉmba ya Yuta wabʉtsyamo mʉndʉ mʉgʉma w'ɨTarɨso erɨtsɨna lɨwe yo Sauli. Ashaba ko ndambi eno. 12 Sauli naye mwashʉnga mo humanani mo mʉndʉ mʉgʉma, erɨtsɨna lɨwe nɨ yo Ananɨa, n'ɨngɨra n'ihira eminwe yo kw'ɨye kʉshangwa ashʉbe lola.»

13 Ananɨa mwashubya athɨ: «Nyinya-kowethʉ, bandʉ bangɨ mobanyɨsɨmolera ko mʉndʉ oyo, na mobanyɨganʉlɨra ebɨbɨ akoleraga abɨkɨrɨtsya bawe ɨYerʉsalemʉ. 14 Na yono amahika kʉno na maka athahabwa n'abakʉlʉ b'abaheri bʉshana n'ɨmɨna aboshi bo bashaba kw'ɨtsɨna lyawe.» 15 Hewethuwe Nyinya-kowethʉ mwamʉbwɨra athɨ: «Genda, kʉshangwa monyashombwere omʉndʉ oyo bʉshana anyɨkolere mw'ikangania erɨtsɨna lyaye ly'oko bandʉ b'ebɨhanda na ko bamɨ kuthyo na ko Baisiraeli. 16 Ingye owene-wene nyamukangya ko atholere ɨagalwa kʉtsɨbʉ bʉshana nangye.»

17 Aho, Ananɨa mwagenda, mwɨngɨra mo nyʉmba, mwahira kʉ Sauli kw'eminwe n'ɨmʉbwɨra athɨ: «Sauli mʉgala ethʉ, Nyinya-kowethʉ Yesʉ yo ʉthakʉhʉlʉkɨra mo nzɨra yo ʉthahʉlʉkamo, yo wamanyɨthʉma kʉshangwa ʉshʉbe lola, na wotsulemo oMʉthɨma Mwerʉ.» 18 Aho n'aho ebɨndʉ ebɨrɨ nga bɨkora mobyathogonga mo mesho wa Sauli, mwashʉba lola. Mwimana na mwabatisibwa. 19 Honyuma kw'aho mwalya, mwashʉba bona kagala.

Sauli mwikala bɨro bɨke hagʉma n'abɨga abo babyaga iTamasiki. 20 Aho n'aho mwathanga ɨkangɨrɨtsya mo sosinakoki athɨ Yesʉ nɨ Mʉgala wa Gongo. 21 Aboshi bo bagenda abamwonvwa bagenda abashweka n'ɨyɨbʉtsya bathɨ: «Athalɨ omʉndʉ oyu yo wagenda anubya kʉtsɨbʉ abandʉ bo banashaba kw'ɨtsɨna lya Yesʉ ɨYerʉsalemʉ? Na kandɨ athalɨ athahika kʉno nɨalɨ mʉ menge w'ɨmɨna abandʉ n'ɨthwalabo eyɨrɨ abakʉlʉ b'abaheri?» 22 Hewethuwe Sauli agenda abona maka kʉtsɨbʉ, na agenda akangania kundu ko Yesʉ yo Kirisito. N'aBayuta b'iTamasiki mobathabona kɨnwa ky'erishubya.

23 Kwabere kwatsʉka bɨro bɨngɨ, aBayuta mobaya nama y'itha Sauli, 24 hewethuwe Sauli mwamɨnya enama eyo. Bagenda abatheya esongyo s'erɨngɨra mo muyi kɨro na mwɨshɨ kʉshangwa bamwithe. 25 Aho kɨro kɨgʉma mo kɨro, abɨga bʉwe mobamʉheka, mobamukimya mʉ kɨthonga kɨnene ko rʉba lw'omuyi.Sauli akimibwa mʉ kɨthonga ko rʉba lw'omuyi w'iTamasiki

26 Sauli abere ahika ɨYerʉsalemʉ agenda ashondya iyihira hagʉma n'abɨga. Hewethuwe aboshi bagenda abamʉbaha kʉshangwa mobathɨkɨrɨtsya kw'amalire ibya mwɨga. 27 Aho ye Baranaba mwathwala Sauli, n'imuhikya ahalɨ abathʉmwa n'ɨsɨmolerabo ko Sauli athashʉnga Nyinya-kowethʉ mo nzɨra na ko Nyinya-kowethʉ athasɨmola naye. Na kandɨ mwabwɨrabo ko Sauli mwakangɨrɨtsya abandʉ bʉtsɨra bʉba mw'ɨtsɨna lya Yesʉ iTamasiki. 28 Aho, Sauli mwikala hagʉma nabo, agenda athimba nabo mo Yerʉsalemʉ yoshi, agenda akangɨrɨtsya mw'ɨtsɨna lya Nyinya-kowethʉ bʉtsɨra bʉba. 29 Agenda asɨmola n'ikubisania n'aBayuta bo bagenda abanegena ekikiriki, he ɨbo mobashondya imwitha. 30 Abagala bethʉ bɨkɨrɨtsya babere bamɨnya omwatsɨ oyo, mobaheka Sauli, mobamʉthwala mo muyi w'iKaisaria, na mobamʉthʉma mo muyi w'ɨTarɨso.

31 Mo mʉgʉlʉ oyo akanisa k'omo kɨhʉgo kyoshi ky'iYuteya na ky'iNgalilaya, na ky'ɨSamarɨa mokabya na bʉholo. Akanisa mokashika mo lwɨkɨrɨtsyo n'ishikya Nyinya-kowethʉ, n'ɨlʉga bʉshana n'obuwathikya bw'oMʉthɨma Mwerʉ.

32 Mo ndambi Petero agenda athimba mo kɨhʉgo kyoshi, kɨro kɨgʉma mwahika ew'abɨkɨrɨtsya bo babya nibikere mo muyi w'iLuta. 33 Mweyayo mʉndʉ mʉgʉma yo wagenda ahʉlwamo Aineya yo wabyaga nɨalɨ ko ngɨngo mʉ myaka mʉnanɨ bʉshana n'obukoni bw'amakonongola. 34 Petero mwamʉbwɨra athɨ: «Aineya, Yesʉ Kirisito amakulamya. Hangana na ʉyɨsheshere engɨngo awe.» Aho n'aho Aineya mwahangana. 35 Abandʉ boshi b'omo muyi w'iLuta na mw'ibanda lya Saroni babere bamʉshʉnga mobabɨndʉkɨra Nyinya-kowethʉ.

36 Mo muyi w'ɨYopa mwabyaga mʉkatsɨ mʉgʉma mwɨga yo wagenda ahʉlwamo Thabitha. Erɨtsɨna lya Thabitha mo kikiriki nɨ Torika, n'ɨnegena mbʉ: «shuku». Omʉkatsɨ oyo agenda akola bɨbʉya ebɨro byoshi n'iwathikya abatsene. 37 Ko mʉgʉlʉ oyo mwalwala n'ihika kw'ɨfwa. Babere bamamala inabya omʉbɨrɨ ʉwe, mobamuhira mʉ kɨshenge kɨgʉma mo ngorofa. 38 Abɨga b'ɨYopa mobonvwa ko Petero alɨ iLuta, muyi walɨ hofɨ n'ɨYopa. Mobamʉthʉmɨra bagendi babɨrɨ n'omwatsɨ ono: «Othʉkʉshaba thʉthɨ uhike eno bʉthathɨndɨra.» 39 Aho n'aho Petero mwagenda hagʉma nabo. Babere bahikayo, mobamʉthwala mo kɨshenge kyabyaga mo ngorofa. Abashʉmbakatsɨ boshi mobayɨfʉnda hofɨ naye nɨabalɨra, niabamukangya eso ropo na sɨndɨ ngɨmba eso Torika alandɨragabo abere akɨnalɨho.

40 Petero mwahulukya abandʉ boshi, mwafʉkama n'ɨshaba. Honyuma kw'aho mwabɨndʉkɨra ekinda n'ɨnegena athɨ: «Thabitha, hangana!» Thabitha mwatsɨbʉla amesho, abere ashʉnga Petero, mwayimanika n'ikala. 41 Petero mwamʉtsɨmba ko kʉboko n'imuwathikya kw'imwimania. Honyuma kw'aho mwabɨrɨkɨra abɨkɨrɨtsya n'abashʉmbakatsɨ, na mwamukanganiabo nɨahera mʉndʉ ʉlɨho. 42 Omwatsɨ oyo mwamɨnyɨkala mo muyi woshi w'ɨYopa, na bandʉ bangɨ mobɨkɨrɨtsya Nyinya-kowethʉ. 43 Petero mwikala bɨro bɨngɨ ɨYopa howa mʉndʉ mʉgʉma mukoli wa ngobi yo wagenda ahʉlwamo Simoni.