1 Honyuma kw'aho Polo mwathoka mo muyi w'ɨAtene mwaya mo w'iKorinto. 2 Abere ahika eyo, mweyayo Muyuta mʉgʉma yo wagenda ahʉlwamo Akila, mbʉthɨrwa w'omo kɨhʉgo ky'ɨPonto. Ye Akila oyo hagʉma na mʉkatsɨwe Pirisila babyaga nibathetsi bamala bɨro bɨngɨ bathokire mo kɨhʉgo ky'iItalia, kʉshangwa omwamɨ Kalautio abyaga nɨamahamʉla athɨ aBayuta boshi bathoke ɨRoma. Polo mwayashʉngabo. 3 Aho mwikala nabo kʉshangwa omʉlɨmo ʉwe n'owabo abyaga mʉgʉma. N'omʉlɨmo oyo abyaga w'ikomya eso hema. 4 Mo bʉlɨ kɨro ky'eSabato, Polo agenda ɨngɨra mo sinakoki. Agenda iuhya n'aBayuta n'aBakiriki bʉshana bɨkɨrɨtsye.

5 Sɨla bana Timote babere bahika ɨthoka mo kɨhʉgo ky'iMaketonia, Polo mwatsukya endambi yɨwe yoshi mw'ɨfʉla eKɨnwa kya Gongo. Agenda akangania aBayuta bo kʉbʉya-kʉbʉya ko Yesʉ yo Kirisito. 6 Hewethuwe aBayuta mobathɨnda ebɨnwa bya Polo n'imuhangya. Aho mwakʉngʉthɨrabo esongɨmba* sɨwe n'ɨbwɨrabo athɨ: «Mwamahera omʉsasɨ enyu abye ko mithwe enyu. Ingye nyɨthalɨ na mwinda enyu. Ɨthanga lɨno nyaya yo yɨrɨ abandʉ b'ebɨhanda.»

7 Polo mwathoka aho, mwaya mʉ nyʉmba ya muyira mʉgʉma yo wahʉlawamo Tito Yusito. Tito oyo agenda aramya Gongo. Enyʉmba yɨwe yabyaga hofɨ n'esinakoki. 8 Omʉkʉlʉ w'esinakoki eyo yo wahʉlawamo Kirisipo mwɨkɨrɨtsya Nyinya-kowethʉ ɨye n'abandʉ b'omwe boshi. Na Banyakorinto bangɨ bo bagenda abahʉlɨkɨrɨtsya ebɨnwa bya Polo, nabo mobɨkɨrɨtsya n'ibatisibwa.

9 Kɨro kɨgʉma mʉ kɨro Nyinya-kowethʉ mwabwɨra Polo mo humanani athɨ: «Ʉthʉbahaga, ʉhɨrɨke mw'ɨnegena na ʉthahʉlɨkɨrɨraga, 10 kʉshangwa nyɨrɨ hagʉma nawe. Hathalɨ mʉndʉ yo wandakuhirako eminwe akwagatsye, kʉshangwa mo muyi oyo, nyiwithemo bandʉ bangɨ.» 11 Mo muyi w'iKorinto oyo, Polo mwikalako mwaka mʉgʉma na myetsɨ ndathʉ alɨ akangɨrɨtsya abandʉ bw'eKɨnwa kya Gongo.Polo akangɨrɨtsya eKɨnwa kya Gongo iKorinto

12 Mo mʉgʉlʉ Ngalio abyaga mʉkʉlʉ w'ekɨhʉgo ky'ɨAkaya, aBayuta mobayihira hagʉma mw'ɨyɨra Polo yo nama y'ɨmʉtsɨmba n'ɨmʉthwala ko tɨrɨbɨnalɨ. 13 Mobathanga imusitaka bathɨ: «Omʉndʉ oyu uhya abandʉ athɨ bagende abaramya Gongo ngak'oMʉgomba ethʉ athanegenire.»

14 Polo abere ashondya ɨnegena, Ngalio mwabwɨra aBayuta athɨ: «Imwe Bayuta mwangasitakire omʉndʉ oyu bʉshana na kɨnwa kɨtsɨbʉ, kʉtse kɨbɨ kɨnene athakola, nyangabatheyire amathwi. 15 He kʉshangwa obʉhaka bwenyu bulebitsye bɨnwa na matsɨna, n'omʉgomba enyu ebyo bibalebitsye imwe bene. Ebɨnwa ebɨrɨ ng'ebyo ingye nyithatsiire ɨsohabyo.» 16 Na mwaligithabo ko tɨrɨbɨnalɨ. 17 Aho, abandʉ boshi mobatsɨmba Sositene yo wabyaga mʉkʉlʉ w'esinakoki, na mobamuhumba embere y'etɨrɨbɨnalɨ. Hewethuwe ebyoshi ebyo Ngalio mwathatsomanabyo.

18 Polo mwikala bɨndɨ bɨro bɨngɨ mo muyi w'iKorinto oyo. Honyuma kw'aho mwalagana n'abagala bethʉ bɨkɨrɨtsya, mwatsɨmba bwatho bʉshana ashabʉkɨre mo kɨhʉgo ky'iSuria, nɨakwamene na Pirisila bana Akila. Embere y'erɨthoka ko kyambʉ ky'iKengureya, mwagembwa kʉshangwa abyaga nɨamamala ɨbereretsya erɨlahɨtsya akolaga embere sa Gongo. 19 Babere bahika mo muyi w'ɨEfeso, Polo mwamikana na Akila bana Pirisila. Ɨye mwɨngɨra mo sinakoki na mwathanga ɨsɨmola n'aBayuta. 20 Mobamʉshaba bathɨ ikale nabo bɨro bɨngɨ, he mwathɨnda. 21 Abere amamala ɨlagabo, mwabwɨrabo athɨ: «Gongo amashasha nyandashʉba hika ewenyu eno.» Honyuma kw'aho mwathoka ɨEfeso mʉ bwatho. 22 Abere ahika mo muyi w'iKaisaria, mwɨrʉkɨra ɨYerʉsalemʉ ɨyaketsya akanisa. Honyuma kw'aho mwandagalɨra mo muyi w'iAntiokia. 23 Abere amamala bɨro bɨrɨ bʉlebe mo muyi oyo, mwashʉba genda alɨ athimba mo kɨhʉgo ky'ɨNgalatɨa, na mo ky'iFurikia alɨ ashikya abɨga boshi bo mʉthɨma mo lwɨkɨrɨtsyo lwabo.

24 Mo muyi w'ɨEfeso momwahika Muyuta mʉgʉma erɨtsɨna lɨwe nɨ yo Apolo. Apolo oyo abyaga mbʉthɨrwa y'omo muyi w'iAlesanduria. Abyaga muyira mbuyi mbʉya, kandɨ abyaga nietsi kʉbʉya aMashako Abuyirire. 25 N'enzɨra y'erɨkwama Nyinya-kowethʉ, naye abyaga nɨamamala ɨkangɨrɨtsɨbwaro. Anotswiremo oMʉthɨma Mwerʉ agenda afʉlɨra abandʉ n'ɨkangɨrɨtsyabo na muhwa mʉngɨ ebɨnwa by'ekwenene ebirebitsye Yesʉ. Hewethuwe abyaga nietsi olubatiso lwa Yoani lʉsha. 26 Mwɨngɨra mo sinakoki na mwathanga ɨkangɨrɨtsya abandʉ bw'eKɨnwa kya Gongo bʉtsɨra bʉba. Pirisila bana Akila babere bamamala ɨmʉhʉlɨkɨrɨtsya, mobagenda naye ewabo kʉshangwa bamʉkangɨrɨtsye ko kwenene enzɨra y'erɨkwama Gongo. 27 Honyuma kw'aho, Apolo mwashondya ɨya mo kɨhʉgo ky'ɨAkaya. Abɨkɨrɨtsya mobamʉha muhwa mo kɨnwa ekyo. Aho mobashakɨra abagala bethʉ, bɨga balikyabo b'omo kɨhʉgo ekyo, bathɨ bamukokye kʉbʉya. Abere ahikayo, mwabya mʉndʉ ukwirire ko bandʉ bo bɨkɨrɨtsaya ko lʉkogo lwa Gongo, 28 kʉshangwa agenda agashamya aBayuta embere s'abandʉ, alɨ akanganiabo ɨtsʉkɨra mo Mashako Abuyirire ko Yesʉ yo Kirisito.