1 Honyuma kw'aho bandʉ bagʉma mobathoka mo kɨhʉgo ky'iYuteya mobandagalɨra mo muyi w'iAntiokia. Abandʉ abo mobathanga ɨkangɨrɨtsya abɨkɨrɨtsya bathɨ: «Mwamabya mʉthamwene nga okw'oMʉgomba wa Mʉsa ahamulire, mʉthangashabʉlwa.» 2 Polo na Baranaba mobathɨndawo. Mobagenda abakubisania nabo kʉtsɨbʉ bʉshana n'omwatsɨ oyo. Bʉshana n'ekyo abɨkɨrɨtsya mobikiritsania ɨthʉma Polo na Baranaba na bagʉma ba mʉbo bɨrʉkɨre ɨYerʉsalemʉ, bayasɨmole n'abathʉmwa n'abangʉmwa b'ekanisa bʉshana n'obʉhaka obo.

3 Akanisa k'omo muyi w'iAntiokia kabere kamamala ɨthʉmabo, bo bathʉmawa abo, mobakirukania mo kɨhʉgo ky'iFoiniki na mo ky'ɨSamarɨa, nɨbanemʉfʉlɨra abandʉ bayo nga ko abandʉ b'ebɨhanda nabo ko bamabɨndʉkɨra Gongo. Omwatsɨ oyo mwaletha lʉmogo lʉnene mo bɨkɨrɨtsya boshi.

4 Polo na balikyabo babere bahika ɨYerʉsalemʉ, akanisa n'abathʉmwa hagʉma n'abangʉmwa, mobakokyabo. Polo na balikyabo mobasɨmolerabo ebyoshi Gongo akolaga mw'ɨtsʉkɨrabo. 5 He bandʉ bagʉma b'omo kɨkembe ky'aBafarisayo bo bathɨkɨrɨtsya Nyinya-kowethʉ, mobimana n'ɨnegena bathɨ: «Lɨtholere abandʉ b'ebɨhanda abo bathɨkɨrɨtsya nabo nibamonibwa n'ɨhamʉlabo bagende abakola nga ko oMʉgomba wa Mʉsa anegenire.»

6 Bʉshana n'ekyo abathʉmwa n'abangʉmwa b'ekanisa mobikala bʉshana basonzomole omwatsɨ oyo. 7 Obʉhaka bwabere bwabya bʉngɨ, Petero mwimana n'ɨnegena athɨ: «Imwe bagala bethʉ, ndɨ mwetsi ɨthanga kera ko Gongo mwanyɨshombola mo kathi kenyu, kʉshangwa nyɨgende enyɨfʉla eNgʉlʉ Mbʉya ko bandʉ b'ebɨhanda, bʉshana b'onvwero na bɨkɨrɨtsye. 8 Gongo yo wetsi emɨthɨma y'abandʉ, mwakangania kwenene kw'amatsɨga abandʉ b'ebɨhanda mw'ɨhabo oMʉthɨma Mwerʉ nga kw'athʉhagawo nethwe. 9 Mwathakola ndondogoli na hake mo kathi k'ithwe nabo, kʉshangwa mw'ɨkɨrɨtsya lyabo, nabo mwetsya emɨthɨma yabo. 10 Ewono bʉshana na ki omʉlenga kʉ Gongo mw'ihekya abɨga aba bw'omʉtsɨgo wo bo thatha nethwe thwalemawa ɨheka? 11 Bɨthatholere ibya bithyo, kʉshangwa ithwe nabo thwɨkɨrɨtsye ko ithwe boshi thwashabʉlawa mo lʉkogo lwa Nyinya-kowethʉ Yesʉ.»

12 Aho abandʉ boshi bo babyaga mo muhindano mobatsɨra. Mobahʉlɨkɨrɨtsya Baranaba bana Polo balɨ abasɨmola ko bɨmɨnyɨkalo n'ebɨthɨko-thɨko byoshi byo Gongo akolaga mw'ɨtsʉkɨrabo mo kathi k'abandʉ b'ebɨhanda.

13 Babere bamamala ɨsɨmola, Yakobo naye mwanegena athɨ: «Bagala bethʉ, mʉnyɨhʉlɨkɨrɨtsye! 14 Simoni* oyu amathʉganʉlɨra ko Gongo mwathanga ɨyɨshombolera abandʉ b'ebɨhanda kʉshangwa bagʉma ba mʉbo babye bandʉ bʉwe. 15 N'ekɨnwa eki kɨrɨngene n'ebɨnwa by'abamɨnyeretsɨ byo bishakirwe mo Mashako Abuyirire athɨ:

16 "Honyuma w'ebyo nyandashʉba hika,

n'ɨshʉba imania enyʉmba ya Tawiti,

nyandashʉba imaniaro,

nga ko banashʉba himba enyʉmba yo yithabya niyamalire ɨthera.

17 Ebyo byandaleka abandɨ bandʉ boshi nɨbanyɨbɨndʉkɨra,

kʉshangwa abandʉ b'ebɨhanda byoshi bo nyabɨrɨkɨraga, babye bandʉ baye.

Ebyo byo nyɨnegena ingye Nyinya-kowethʉ.

18 Ebɨnwa ebyo, nɨ ingye nyakanganayabyo ɨthanga kera.*"»

19 Yakobo mwashʉba negena athɨ: «Bʉshana n'ekyo, ingye nyamashʉnga ko abandʉ b'ebɨhanda bo babɨndʉkɨra Gongo lɨthatholere thʉgende othunubyabo. 20 Hewethuwe lɨtholere thʉshakɨrebo thʉthɨ bathalyaga ku kalyo kathahererwa abatsɨmʉ, bathagenda abakola rʉsɨngɨ, bathagenda abalya nyama sithaniwa, na bathalyaga n'omʉlegano. 21 Kʉshangwa ɨthanga kera oMʉgomba wa Mʉsa agenda asomwa mo sosinakoki na abyaga awithe bandʉ bo bagenda abakangɨrɨtsyawo mo bʉlɨ kɨro ky'eSabato mo bʉlɨ muyi.»

22 Aho abathʉmwa n'abangʉmwa n'akanisa koshi, mobahamʉla ɨshombola bagʉma mʉbo bo bagenda hagʉma na Polo na Baranaba iAntiokia. Mobashombola Yuta yo wahʉlawamo Barisaba bana Sɨla. Abandʉ babɨrɨ abo babyaga nibashikibwe mo bagala bethʉ bɨkɨrɨtsya. 23 Mobathʉmabo na marʉba ashakire athɨ:

«Ithwe bathʉmwa n'abangʉmwa na bagala bethʉ bɨkɨrɨtsya, othʉbaketsya imwe bagala bethʉ bɨkɨrɨtsya b'omo bandʉ b'ebɨhanda imwe mʉlɨ mo muyi w'iAntiokia, mo kɨhʉgo ky'iSuria na ky'iKilikia.

24 «Mothwonvwa omwatsɨ ko kʉlɨ bandʉ bagʉma mobathokire ewethʉ eno, mobayire babwɨra bɨnwa b'ɨbakendetsya na b'igangya-gangya emɨthɨma enyu. Abandʉ abo thʉthalɨ ithwe thʉthathʉmabo. 25 Nɨ bʉshana n'ekyo ithwe thwamikiritsania ɨshombola bandʉ bagʉma mw'ithwe n'ɨbatʉmɨrabo, hagʉma n'abatsɨɨrwa bethʉ Baranaba na Polo, 26 bo bathashɨga obʉyɨngo bwabo bʉshana n'omʉlɨmo w'erɨkolera Nyinya-kowethʉ Yesʉ Kirisito. 27 Aho thwamabathʉmɨra Yuta na Sɨla n'ɨbo bo bababwɨra bʉnʉ kʉ bʉnʉ ebɨnwa byo thwamabashakɨra.

28 «Kʉshangwa mobimoya oMʉthɨma Mwerʉ nethwe bene, thʉthahekayabo ʉndɨ mʉtsɨgo athalɨ ebɨnwa bɨtholere ebi: 29 Muthalyaga kalyo kathahererwa batsɨmʉ, muthalyaga mʉlegano, kʉtse muthalyaga nyama sithaniwa na muyitheye ko rʉsɨngɨ. Mwamayitheya kw'ebyo nɨmwamakola kʉbʉya. Mubye n'obʉholo!»

30 Babere balagana, abo bathʉmawa mobandagalɨra iAntiokia. Babere bahika eyo, mobahindania abɨkɨrɨtsya boshi, n'iwathyabo amarʉba ayo. 31 Nabo babere basoma amarʉba ayo, mobamoga kʉshangwa ebɨnwa byabyagamo byabyaga b'ɨhabo muhwa. 32 Kʉshangwa Yuta na Sɨla babyaga bamɨnyeretsɨ, mobabwɨra abagala bethʉ bɨkɨrɨtsya abo bo bɨndɨ bɨnwa bɨngɨ b'ɨhabo muhwa n'ɨsɨngɨrɨkabo.

33 Babere bamala bɨro bɨrebe iAntiokia eyo, bagala bethʉ bɨkɨrɨtsya mobalagabo bathɨ bafʉlʉke na bʉholo, eyo yɨrɨ bo bathʉmagabo. 34 [He Sɨla ɨye mwahamʉla ishibayo.*] 35 Polo na Baranaba ɨbo mobikala iAntiokia. Oko, ababɨrɨ abo hagʉma na bandɨ bandʉ bangɨ, bagenda abakangɨrɨtsya n'ɨfʉlɨra abandʉ bw'eKɨnwa kya Nyinya-kowethʉ.

36 Honyuma wa bɨro bɨrebe, Polo mwabwɨra Baranaba athɨ: «Thʉshʉbe ɨya lungula abagala bethʉ bɨkɨrɨtsya mo bʉlɨ muyi wo thwafʉlɨragamo abandʉ eKɨnwa kya Nyinya-kowethʉ, kʉshangwa thʉmɨnye nga balɨyo bathɨ.» 37 Baranaba abyaga niashondya bagende na Yoani yo wahʉlwamo Marɨko. 38 Hewethuwe Polo ɨye mwashʉnga nibithakwirire erɨgenda n'omʉndʉ oyo. Kʉshangwa babere bakɨnalɨ mo kɨhʉgo ky'iPamufilia, mwayɨhɨgʉla kʉbo, n'ɨthɨnda ɨshʉba kola hagʉma nabo mo mʉlɨmo wabo.* 39 Bʉshana n'ekyo Polo na Baranaba mobakubisania kʉtsɨbʉ, mobahika ko kɨka ky'erimikana. Baranaba mwagenda na Marɨko, mobɨngɨra mo bwatho n'ɨshabʉkɨra ko kɨtsɨra ky'iKipuro,* 40 na Polo mwashombola ɨgenda na Sɨla. Abagala bethʉ bɨkɨrɨtsya babere bamamala ɨshabɨrabo olʉkogo lwa Nyinya-kowethʉ, nabo mobagenda. 41 Mo lʉgendo olo Polo mwatsʉka mo kɨhʉgo ky'iSuria na mo ky'iKilikia alɨ ashikya olwɨkɨrɨtsyo lw'esokanisa.