1 Na Sauli abyaga n'imire olʉholo lwa Sɨtɨfano.

Ɨthanga ekɨro ekyo malɨgo mangɨ mwahikira akanisa k'ɨYerʉsalemʉ. Abɨkɨrɨtsya boshi erithokyako abathʉmwa basha, mobasanzabana mo kɨhʉgo kyoshi ky'iYuteya na eky'ɨSamarɨa. 2 Abandʉ bo babyaga bashikitsye Gongo mobayatha Sɨtɨfano, mobamʉlɨra kʉtsɨbʉ. 3 Hewethuwe ye Sauli agenda anubya akanisa, agenda ɨngɨra mo bʉlɨ nyʉmba n'ɨkʉra abayira n'abakatsɨ n'ɨyagʉshabo mo muliki.

4 Abɨkɨrɨtsya bo basanzabanibawa bagenda abaya ahoshi-hoshi nɨabafʉla eNgʉlʉ Mbʉya. 5 Filipo mwagenda mo muyi mʉkʉlʉ w'ekɨhʉgo ky'ɨSamarɨa na mwathanga ɨfʉlɨra abandʉ b'omwatsɨ wa Kirisito. 6 Abahimbani boshi babere bonvwa n'ɨshʉnga ko bɨmɨnyɨkalo ebyo Filipo agenda akola, mobathegera ebɨnwa bɨwe by'amathwi. 7 Aho abatsɨmʉ bagenda abathoka ko bandʉ bangɨ nɨabahambala mʉ mʉlenge mʉnene, na bandʉ bangɨ b'amakonongola n'ebɨrema mobalama. 8 Aho olʉmogo molwabya lʉnene mo muyi oyo.

9 Mʉndʉ mʉgʉma yo wagenda ahʉlwamo Simoni abyaga nɨamamala mo muyi oyo bɨro bɨthe bɨke. Agenda akola bukumu n'ishwekya abandʉ b'ɨSamarɨa. Agenda anegena athɨ ɨye nɨ mʉndʉ mʉkʉlʉ kʉtsɨbʉ. 10 N'aboshi, ɨthanga ko balere n'ihika ko bakʉlʉkʉlʉ, bagenda abamʉthega amathwi, nɨabanegena bathɨ: «Omʉndʉ oyu nɨ maka wa Gongo, wo anahʉlwamo "Maka Makʉlʉ".» 11 Bagenda abamʉhʉlɨkɨrɨtsya kʉtsɨbʉ, kʉshangwa mokwahwa bɨro bɨngɨ analɨ ashwekyabo mo bukumu bʉwe. 12 Hewethuwe babere bɨkɨrɨtsya eNgʉlʉ Mbʉya yo Filipo agenda afʉlɨrabo bʉshana n'oBwamɨ bwa Gongo n'erɨtsɨna lya Yesʉ Kirisito, abayira n'abakatsɨ mobabatisibwa. 13 Na Simoni yo wene-wene mwɨkɨrɨtsya n'ibatisibwa. Mwabya hagʉma na Filipo naye mwashweka kʉtsɨbʉ alɨashʉnga ko bɨmɨnyɨkalo na emɨkolano y'amaka byo byagenda ebɨkoleka.

14 Abathʉmwa bo babyaga ɨYerʉsalemʉ babere bonvwa kw'abandʉ b'ɨSamarɨa bamɨkɨrɨtsya eKɨnwa kya Gongo, aho mobathʉmɨrabo Petero na Yoani. 15 Babere bahika ɨSamarɨa, mobashabɨra abɨkɨrɨtsya bʉshana bangɨrɨre oMʉthɨma Mwerʉ. 16 Kʉshangwa babyaga nɨbamamala ibatisibwa kuroshi mw'ɨtsɨna lya Nyinya-kowethʉ Yesʉ, hewethuwe oMʉthɨma Mwerʉ abyaga niathetsi akimira kʉ mʉgʉma wa kʉbo. 17 Aho Petero na Yoani mobahira kʉbo kw'eminwe na mobangɨrɨra oMʉthɨma Mwerʉ.

18 Simoni abere ashʉnga kw'oMʉthɨma Mwerʉ amahabwa abɨkɨrɨtsya mo ndambi abathʉmwa bahiraga kʉbo kw'eminwe, mwalethera Petero na Yoani bo faranga 19 n'ɨnegena athɨ: «Nangye mʉnyɨhe amaka ayo, kʉshangwa abo nyandahirako eminwe babone oMʉthɨma Mwerʉ.» 20 Hewethuwe Petero mwamʉshʉbɨtsya athɨ: «Ubihibwe ɨwe n'esofaranga sawe, kʉshangwa moʉganɨtsya ʉthɨ olʉhembo lwa Gongo olʉnagʉlwa mʉ faranga! 21 Uthawithe mʉhango kandɨ ʉthatholere mo mwatsɨ ono, kʉshangwa omʉthɨma awe athathʉnganene embere sa Gongo. 22 Bʉshana n'ekyo ʉbɨndʉke ɨthoka mo bɨbɨ byawe na ʉshabe Nyinya-kowethʉ kʉthɨ anganakʉganyɨra ko mɨganɨtsye awe mɨbɨ eyi. 23 Nyamashʉnga kwenene ko wotswiremo mwisho mʉngɨ na ʉlɨ mo muliki w'ebɨtsɨbʉ.» 24 Aho Simoni mwabwɨra Petero bana Yoani athɨ: «Imwe bene mʉnyɨshabɨre kʉ Nyinya-kowethʉ, kʉshangwa kuthabyaga ekyanyihikira ko byoshi byo mwamanegena.»

25 Petero na Yoani babere bamamala ɨfʉla omwatsɨ w'ebyo bashʉngaga, n'ɨkangɨrɨtsya eKɨnwa kya Nyinya-kowethʉ, mobashʉba ɨYerʉsalemʉ. Mo nzɨra mobagenda nɨabafʉla eNgʉlʉ Mbʉya y'omo mɨrongo mɨngɨ y'omo kɨhʉgo ky'ɨSamarɨa.

26 Malaɨka mʉgʉma wa Nyinya-kowethʉ mwabwɨra Filipo athɨ: «Wagenda ko lʉnda lwa kihya*, omo ndaki yo ɨthoka ɨYerʉsalemʉ n'ikimira ɨNgasa. Enzɨra eyo yitsukire mo mbwarara.» 27 Aho Filipo mwabathʉka n'ɨgenda. Na mo ndaki eyo, mokwahʉlʉka muyira mʉgʉma, abyaga mʉsagarwa w'iEtiopia, na mukoli mʉkʉlʉ yo wabyaga mwimanitsi w'obushoki bwa Kandake,* omwamɨ-katsɨ w'iEtiopia. Abyaga niamahika ɨYerʉsalemʉ bʉshana n'iyaramya Gongo, 28 nɨ alɨ mʉ lʉgendo lw'ɨshʉba ewe. Abyaga n'ikere mo mutukali ʉwe, agenda asoma ekɨtabo ky'omʉmɨnyeretsɨ Isaya. 29 oMʉthɨma Mwerʉ mwabwɨra Filipo athɨ: «Yɨfʉnde ahalɨ omutukali ola.» 30 Filipo mwangʉha tsʉba ahalɨ omutukali, mwonvwa oMuetiopia nɨasoma ekɨtabo ky'omʉmɨnyeretsɨ Isaya. Mwamʉbʉtsya athɨ: «Unonvwire ebyo ʉsoma?» 31 Naye mwashʉbɨtsya Filipo athɨ: «Nyangonvwabyo nyɨthɨ nyithawithe yo ʉnyɨkangɨrɨtsyabyo?» Na mwabɨrɨkɨra Filipo athɨ ɨrʉkɨre mo mutukali ʉwe ikale ho mʉsɨke kw'ɨye. 32 Kɨno kyo kɨhande ky'aMashako Abuyirire kyo agenda asoma:

«Mwabya nga mbuli yo bagenda abathwala mo lʉkerero.

Nga kyana kya mbuli kyo kihulikirire embere y'abo batsa kʉkyo kw'ebyoya,

mwathamamʉla obʉnʉ bʉwe.

33 Mw'ɨsʉnzʉgʉrwa mw'imwa ebyo abyaga asɨngeneko.

Nɨ ɨndɨ yo wandanegena ko ngʉmo yɨwe?

Kʉshangwa mobamʉmalɨra obʉyɨngo bʉwe ko kɨhʉgo.*»

34 Omʉsagarwa mwabʉtsya Filipo athɨ: «Enyɨkʉshaba, nyɨbwɨre ng'omʉmɨnyeretsɨ oyu nga anegena athyo kʉ ndɨ? Ewono, nɨ kw'ɨye yowene kʉtse kʉ ʉndɨ mʉndʉ?» 35 Aho Filipo mwathangɨra ko Mashako Abuyirire ayo, mwamʉfʉlɨra eNgʉlʉ Mbʉya ya Yesʉ.Filipo afʉla eNgʉlʉ Mbʉya ko Muetiopia

36 Mobalotsya ebʉshondotsɨ mo lʉgendo lwabo, na mobahika halɨ metsi. Aho omʉsagarwa oyo mwabwɨra Filipo athɨ: «Shʉnga, ametsi waya. Ni ki kyo kyangaleka ninyithabatisibwa?» [37 Filipo mwamʉshʉbɨtsya athɨ: «Wamɨkɨrɨtsya n'omʉthɨma awe woshi wangabatisibwa.» N'omuyira oyo mwashubya athɨ: «Nyɨkɨrɨtsye ko Yesʉ Kirisito nɨ Mʉgala wa Gongo.»*] 38 Honyuma kw'aho, mwimania omutukali. Filipo mwakima hagʉma naye mo metsi n'imubatisya. 39 Babere bathoka mo metsi, oMʉthɨma wa Nyinya-kowethʉ mwabulirania Filipo. N'omʉsagarwa oyo mwathashʉba mʉshʉngako, he mwalotsya ebʉshondotsɨ niamogire kʉtsɨbʉ. 40 Filipo mwayeya mo muyi w'ɨAsoto. Honyuma kw'aho mwatsʉka muyi ku muyi alɨ afʉla eNgʉlʉ Mbʉya y'ahoshi, ihika ko ndambi mwahika mo muyi w'iKaisaria.