1 Polo mwahanda amesho w'oko bakʉlʉ b'oBʉshenge Bʉkʉlʉ obo, n'ɨnegena athɨ: «Bagala bethʉ, ingye nyithashungire kiro na kɨbɨ mo mʉthɨma aye. Kʉshangwa ihika munobwire, nyetsi ko nyimene kʉbʉya embere sa Gongo.» 2 Omuheri mʉkʉlʉ yo wahʉlawamo Ananɨa abere onvwa athyo, mwahamʉla abandʉ babyaga hofɨ na Polo athɨ bamʉbande ikofi ko bʉnʉ. 3 Aho Polo mwabwɨra Ananɨa oyo athɨ: «Nawe Gongo akʉbande ikofi, ɨwe ʉlɨ nga luhimbo luhakire mbemba.* Ɨwe wikere aho bʉshana n'ɨnyɨsoha kuroshi ɨkwamana n'oMʉgomba nga ko anegenire. Aho bʉshana na ki ʉlemwa ishikyawo mw'ɨhamʉla ʉthɨ banyɨbande ikofi?»

4 Bo babyaga hofɨ na Polo mobamʉbwɨra bathɨ: «Ee! Ʉthafwa shoni wo uhangya omuheri mʉkʉlʉ wa Gongo?» 5 Polo mwanegena athɨ: «Bagala bethʉ, nyithathetsi ko nɨ muheri mʉkʉlʉ. Kʉshangwa aMashako Abuyirire anegenire athɨ: "Ʉthagenda ʉnegena bɨbɨ ko mʉkʉlʉ w'abandʉ bawe.*"»

6 Polo abyaga nietsi ko bagʉma b'omo Bʉshenge Bʉkʉlʉ babyaga b'omo kɨkembe ky'a Basandukayo n'abandɨ babyaga b'omo kɨkembe ky'aBafarisayo. Bʉshana n'ekyo, mwahambalɨra mo Bʉshenge obo athɨ: «Bagala bethʉ, nyɨrɨ Mufarisayo, mʉgala w'aBafarisayo.* Enyɨsohwa munobwire bʉshana nyɨrɨ na maha ko abaholi bandalubuka.» 7 Polo abere amamala ɨnegena ebɨnwa ebyo, aho n'aho aBafarisayo n'aBasandukayo mobahaya, n'abandʉ bo babyaga mo muhindano mobagabana. 8 Byabyaga bithyo kʉshangwa aBasandukayo ɨbo abananegena bathɨ kʉthalɨ erilubuka lya baholi na kʉthalɨ bamalaɨka na kʉthalɨ batsɨmʉ, hewethuwe aBafarisayo ɨbo bɨkɨrɨtsye ebyoshi ebyo.

9 Bʉshana n'ekyo obʉrʉnga mobwabya bʉngɨ, aho bakangɨrɨtsya bagʉma b'oMʉgomba, b'omo kɨkembe ky'aBafarisayo mobimana n'ɨthanga ɨpenga bathɨ: «Ithwe thuthashungire kiro na kɨbɨ ko mʉndʉ oyu. Kʉthɨ nɨ mʉtsɨmʉ kʉtse malaɨka yo ʉthanegena naye!» 10 Obʉrʉnga obo bwabere bwakanya kʉtsɨbʉ, omʉkʉlʉ kʉtsɨbʉ w'abashirikani mwʉbaha, kʉshangwa mwaganɨtsya athɨ abandʉ abo bitha Polo. Aho mwahamʉla athɨ abashirikani bʉwe bakimire mo kathi k'abandʉ banyagʉle Polo mo minwe yabo, bamʉshʉbʉtsye mo rʉba lw'abashirikani.

11 Bwabere bwabya kɨro ky'ekɨro ekyo, Nyinya-kowethʉ mwahʉlʉkɨra Polo n'ɨmʉbwɨra athɨ: «Shika! Nga ko ʉthasɨmolera abandʉ bʉshana nangye mo muyi w'ɨYerʉsalemʉ ono, na ʉtholere nɨwakola uthyo na mo muyi w'ɨRoma namo.»

12 Bwabere bwakya, Bayuta bagʉma mobaya nama. Mobalahɨtsya bathɨ bathirye kʉtse ɨshoma bathetsi bitha Polo. 13 Abandʉ bakolaga enama eyo babyaga nibalengitsye makumi ane. 14 Mobagendera abakʉlʉ b'abaheri n'abangʉmwa b'aBayuta mobabwɨrabo bathɨ: «Ithwe thwamalahɨtsya ko thuthirye kiro na kɨndʉ thuthetsi thwitha Polo. 15 Aho, imwe hagʉma n'oBʉshenge Bʉkʉlʉ mʉgende mʉshabe omʉkʉlʉ kʉtsɨbʉ w'abashirikani abahe Polo oyo. Mwayɨyɨra nga bandʉ bo bashondya ɨmɨnya kʉbʉya ebɨnwa byo bathamusitakira. Nethwe thwamʉlambɨra monzɨra bʉshana thumwithe embere ahike hano.»

16 Hewethuwe mʉgala wa mwalɨ wabo Polo, mwonvwa hwehweri y'enama eyo. Aho mwathɨbɨthɨra mo rʉba lw'abashirikani, mwɨngɨra mʉlo n'ɨbwɨra Polo yo mwatsɨ oyo. 17 Honyuma kw'aho, Polo mwabɨrɨkɨra mʉkʉlʉ mʉgʉma mo kathi k'abakʉlʉ b'abashirikani n'ɨmʉbwɨra athɨ: «Thwala omʉsole oyu eyɨrɨ omʉkʉlʉ kʉtsɨbʉ, kʉshangwa awithe kɨnwa kyo ashondya ɨmʉbwɨra.» 18 Omʉkʉlʉ oyo mwathwala omʉsole ahalɨ omʉkʉlʉ kʉtsɨbʉ. Mwabwɨra omʉkʉlʉ kʉtsɨbʉ athɨ: «Mbe mʉkengwa, Polo mʉndʉ w'omuliki, mwanyɨbɨrɨkɨra n'ɨnyɨbwɨra athɨ nyɨkʉlethere omʉsole oyu kʉshangwa awithe ekɨnwa kyo ashondya ɨkʉbwɨra.»

19 Omʉkʉlʉ kʉtsɨbʉ oyo mwatsɨmba omʉsole oyo y'oko kʉboko, mwayɨhɨgʉla hagʉma naye. Honyuma kw'aho mwamʉbʉtsya athɨ: «Mbe mʉsole! Ushondya ɨnyɨbwɨra ki?» 20 Mwashubya athɨ: «aBayuta bamalire ɨhʉlɨkɨrɨrana ɨkʉshaba ʉlethe Polo yo mungya embere y'oBʉshenge Bʉkʉlʉ, mʉ menge w'ɨnegena mbʉ oBʉshenge Bʉkʉlʉ obushondya ɨmɨnya kʉbʉya omwatsɨ ʉwe. 21 Hewethuwe ebɨnwa bakʉbwɨra, ʉthatsɨgɨragabo kʉshangwa abandʉ bamaya nama ko bayamʉlambɨra mo nzɨra. Na abandʉ abo, balengitsye bandʉ makumi ane. Na kandɨ bamalahɨtsya ko bathangalya kʉtsye ɨshoma bathetsi bitha Polo. Aho bamalire iyithegekania, balindire ekɨnwa kyo wanegena.» 22 Omʉkʉlʉ kʉtsɨbʉ w'abashirikani oyo mwahamʉla omʉsole oyo athɨ: «Omwatsɨ wamanyɨfʉlɨra oyu, uthanalinda wabwɨra ʉndɨ mʉndʉ ko wamamala ɨnyɨfʉlɨrawo.» Honyuma kw'aho mobalagana.

23 Honyuma kw'aho omʉkʉlʉ kʉtsɨbʉ w'abashirikani oyo, mwabɨrɨkɨra bakʉlʉ babɨrɨ mo kathi k'abakʉlʉ b'abashirikani bʉwe. Mwabwɨrabo athɨ: «Muthegekanie bashirikani magana abɨrɨ, bo banagenda mo bɨshando, na bandɨ makumi alɨnda bobanalwa nɨbalɨ ko farasɨ, na bandɨ magana abɨrɨ bo betsi erɨlwa mo masɨnga. Aboshi abo bathoka hano ko saha ishathu sa kɨro bʉshana baye mo muyi w'iKaisaria. 24 Na muthegekanie farasɨ so saheka Polo n'imuhikya ewa kafʉrʉnalɨ Felisi nɨna mʉtsɨbʉ.»Abashirikani abathegekanibawa ɨthwala Polo ewa kafʉrʉnalɨ Felisi

25 Omʉkʉlʉ kʉtsɨbʉ w'abashirikani oyo mwashaka amarʉba athɨ:

26 «Mʉkengwa kafʉrʉnalɨ Felisi, ingye Kalautio Lʉsɨa enyɨkʉketsya. 27 Enyishondya ɨkʉbwɨra k'omʉndʉ oyu, aBayuta mobamʉtsɨmba n'ishondya imwitha. Hewethuwe nyabere nyonvwa ko ni Mʉroma, ingye n'abashirikani baye monyayire mʉshabʉla. 28 Aho monyamʉthwala embere s'oBʉshenge Bʉkʉlʉ bwabo. Kʉshangwa nyagenda enyishondya nyɨmɨnye ekyalekaga nibamusitaka. 29 Nyabere nyahika omo, monyamɨnya ko bamusitakire bʉshana n'obʉhaka bw'omʉgomba wabo. Hewethuwe hathabyaga kiro na kɨbɨ n'ekɨgʉma eky'akolaga ekyangaleka n'ithwa kʉtse nɨamɨnwa. 30 Nyabere nyonvwa ko aBayuta abamʉyɨra nama y'imwitha, monyashungire kʉbʉya nyɨkʉthʉmɨre ɨye yo tsʉba. Honyuma kw'aho monyabwire bo bamusitakaga nyɨthɨ nɨ eyo ʉlɨ eyo yo bayamusitakira.»

31 Abashirikani abo mobakola nga ko bahamʉlawa n'omʉkʉlʉ wabo. Mona kɨro ky'ekɨro ekyo, mobatsɨmba Polo n'ɨmʉthwala mo muyi w'iAntipatiri. 32 Bwabere bwakya, abashirikani bo banagenda mo bɨshando mobashʉba mo rʉba lwabo, na bo babyaga ko farasɨ mobalotsya ebʉshondotsɨ nɨbanalɨ na Polo. 33 Babere bahika mo muyi w'iKaisaria mobawathya kafʉrʉnalɨ yo amarʉba, na mobaletha Polo y'embere sɨwe. 34 Kafʉrʉnalɨ abere asoma amarʉba ayo, mwabʉtsya Polo athɨ: «Ɨwe ʉlɨ mʉndʉ wa mʉ kɨhʉgo kɨhe?» Abere onvwa ko Polo nɨ w'omo kɨhʉgo ky'iKilikia, 35 mwanegena athɨ: «Nyakʉthondesa bo bakusitaka babya bahika.»

Ko nduli, mwahamʉla abashirikani bʉwe athɨ batheye Polo mo rʉba lw'elyamɨ lw'omwamɨ Herote.