1 Hewethuwe mʉndʉ mʉgʉma erɨtsɨna lɨwe agenda ahʉlwamo Ananɨa hagʉma na mʉkatsɨwe agenda ahʉlwamo Safɨra, mwagʉtsya ɨshwa lɨwe, 2 mwabisha ko sofaranga, mwaletha eso sashakaga, mwawathyatho abathʉmwa. Na mʉkatsɨwe abyaga nietsi omwatsɨ oyo. 3 Aho Petero mwamʉbʉtsya athɨ: «Ananɨa, bʉshana na ki Sitani mwotsutsya omʉthɨma awe n'ɨkʉthʉma ʉthɨme oMʉthɨma Mwerʉ n'ibisha ko faranga s'erɨshwa lyawe? 4 Embere ʉgʉtsyelyo lithabyaga lɨwawe? Na ʉthabere wamamala ɨgʉtsyalyo, esofaranga sɨthathalɨ sɨwawe? Bʉshana na ki moʉganɨkɨra ɨkola ebɨrɨ ng'ebi? Moʉthalɨ ʉthɨma bandʉ, hewethuwe Gongo yo wamathɨma!» 5 Ananɨa abere onvwa ebɨnwa ebyo, mwawa ahishi n'ɨfwa. Aboshi abo bonvwaga omwatsɨ oyo mobatsɨmbwa na bʉba bʉngɨ. 6 Aho mokwahʉlʉka bathabana mobatsɨmba omʉbɨrɨ ʉwe mobashwɨkawo n'ɨyathawo.

7 Honyuma wa saha ishathu, mʉka Ananɨa mwɨngɨra bʉthamɨnya ebyo byamatsʉka. 8 Petero mwamʉbʉtsya athɨ: «Nyɨbwɨre, esi so faranga mwabonaga mwabere mwagʉtsya erɨshwa lyenyu?» Naye mwamʉshʉbɨtsya athɨ: «Ega, so netho.» 9 Petero mwamʉbwɨra athɨ: «Bʉshana na ki momwalagene kw'ɨrenga ko Mʉthɨma wa Nyinya-kowethʉ? Onvwa, bobamatha ibawe babano bahera ho lukyo nawe kuthyo bakʉheka.» 10 Aho n'aho mwawa ahishi embere s'ebɨshando bya Petero n'ɨfwa. Abathabana mobɨngɨra na mobamweya niamalire ɨfwa. Mobamʉheka n'ɨya mʉtha hofɨ n'iba. 11 Akanisa koshi n'aboshi bo bonvwaga omwatsɨ oyo mobʉbaha kʉtsɨbʉ.

12 Abathʉmwa bagenda abakola bɨmɨnyɨkalo na bɨthɨko-thɨko bɨngɨ mo kathi k'abandʉ. Abɨkɨrɨtsya boshi mobagenda abahindana hagʉma mo mbarasa ya Solomona.* 13 Mohathabya ʉndɨ mʉndʉ yo wayihiraga kʉbo, na mobyanabyaga bithyo abandʉ babyaga nibashikitsyebo kʉbʉya. 14 Emɨganzo y'abandʉ bikiritsaya Nyinya-kowethʉ, abayira n'abakatsɨ, bagenda abongererwa kʉtsɨbʉ ko kɨkembe kyabo. 15 Aho mobagenda abaletha abakoni b'emʉsɨke w'enzɨra, na mobagenda abahirabo ko bipoya kʉtse ko mɨkeka nɨmo Petero abya atsʉkaho, ekithuthu kɨwe kɨshwɨke bagʉma ba mʉbo. 16 Bandʉ bangɨ bo bagenda abathoka mo miyi eyithimbire kʉ Yerʉsalemʉ, mobahindana nɨabaletha abakoni n'abandʉ bo bagenda abagalwa n'emɨtsɨmʉ, n'aboshi mobalamibwa.

17 Aho omuheri mʉkʉlʉ n'abalikyabo boshi, n'ɨnegena mbʉ abandʉ b'omo kɨkembe ky'aBasandukayo, mobafwa mwisho ko bathʉmwa. 18 Mobatsɨmba abathʉmwa abo n'ɨyagʉshabo mo biriso by'abandʉ boshi. 19 Hewethuwe mo kɨro malaɨka wa Nyinya-kowethʉ mwakɨngʉla esonyuyi s'ebiriso mwahʉlʉkɨtsyabo embʉga, n'ɨbwɨrabo athɨ: 20 «Mʉgende muyimane mo Nyʉmba ya Gongo, mʉyabwɨre abandʉ b'emyatsɨ yoshi y'obʉyɨngo buhya.» 21 Abathʉmwa babere bonvwa ebyo, mobɨngɨra mo Nyʉmba ya Gongo mo mambya matsɨbʉ, mobathanga ɨkangɨrɨtsya abandʉ.

Omuheri mʉkʉlʉ n'abalembya bʉwe babere bahika, mobahindania abangʉmwa b'aBaisiraeli, bʉshana n'ɨkola muhindano w'oBʉshenge Bʉkʉlʉ. Honyuma kw'aho mobathʉma bandʉ ko biriso bayalethe abathʉmwa. 22 Hewethuwe abatheya babere bahikayo, mobatheyabomo. Mobashʉbʉla n'ɨyafʉla omwatsɨ, 23 mobanegena bathɨ: «Thwameya ebiriso nibinakingire kʉbʉya, n'abatheya nibanimene ko luyi. Hewethuwe thʉthabere thwakɨngʉla, mothʉthalɨ othʉshʉngamo mʉndʉ.» 24 Omʉkʉlʉ w'abatheya b'eNyʉmba ya Gongo n'abakʉlʉ b'abaheri babere bonvwa ebyo, mobagashama, mobayɨbʉtsya byo bithahikira abathʉmwa. 25 Honyuma kw'aho mʉndʉ mʉgʉma mwahʉlʉka n'ɨbwɨrabo athɨ: «Mwonvwe! Abandʉ bomwagʉshaga mo biriso balɨ mo Nyʉmba ya Gongo abakangɨrɨtsya abandʉ.»

26 Aho omʉkʉlʉ w'abatheya b'eNyʉmba ya Gongo oyo, mwagenda hagʉma n'abakoli bʉwe, mobayaletha abathʉmwa he bʉtsɨra kʉ kahatho, kʉshangwa mobʉbaha abandʉ bathangagʉsha kʉbo ko mabwe. 27 Babere balethabo, mobahirabo embere y'oBʉshenge Bʉkʉlʉ. Omuheri mʉkʉlʉ mwabwɨrabo athɨ: 28 «Mothwabahangire kʉtsɨbʉ thʉthɨ mʉthashʉba kangɨrɨtsya kw'ɨtsɨna ly'omʉndʉ oyo. Hene ko mwamutsutsya eYerʉsalemʉ yoshi n'amakangɨrɨtsya enyu, kandɨ omushondya ithuhekya omʉsasɨ w'omʉndʉ oyo.» 29 Hewethuwe Petero n'abandɨ bathʉmwa mobashubya bathɨ: «Bɨtholere nithwashikya Gongo kʉlenga abandʉ. 30 Gongo wa bo thatha-kʉlʉ mwalubukya Yesʉ, yo mwithaga mw'ɨmʉbamba ko mʉsalaba. 31 Omʉndʉ oyo, Gongo mwamusingya n'imuhira ko kʉboko kʉwe kw'amalyo n'ɨmʉyɨramo Mʉkʉlʉ na Mushabuli, kʉshangwa ahe aBaisiraeli bw'obuthoki bw'erɨbɨndʉka ɨthoka mo bɨtsɨbʉ byabo n'ɨganyɨrwa. 32 Nethwe thʉlɨ batimo b'ebɨnwa ebi hagʉma n'oMʉthɨma Mwerʉ yo Gongo ahaga bo bamushikitsye.»

33 Abandʉ b'oBʉshenge Bʉkʉlʉ babere bonvwa ebɨnwa ebyo, mobakapɨkɨra, n'ishondya itha abathʉmwa abo. 34 Hewethuwe kwabyaga mʉndʉ mʉgʉma Mufarisayo, erɨtsɨna lɨwe nɨ yo Ngamalieri, mʉkangɨrɨtsya w'oMʉgomba, niashikibwe n'abandʉ boshi. Mwayɨhangalɨka mo Bʉshenge, mwahamʉla athɨ bathahulukya abathʉmwa kʉ kathambi kake. 35 Honyuma kw'aho mwabwɨrabo athɨ: «Imwe bayira b'iIsiraeli, mʉyɨthondekere ebyo omushondya ɨkolera abandʉ aba. 36 Kʉshangwa mo bɨro byatsʉkaga mokwahulukire mʉndʉ mbʉ yo Teʉta nɨanegena athɨ ɨye nɨ mʉndʉ mʉkʉlʉ. N'abandʉ bo bamʉkwamaga mobahika hofɨ magana ane. Hewethuwe mwithwa, na bo babyaga bamukwamire mobasanzabana n'ekɨkembe kyabo mokyahwa. 37 Honyuma kw'ɨye mo bɨro by'efishi, mokwahʉlʉka Yuta mʉndʉ w'omo kɨhʉgo ky'iNgalilaya mwayɨkʉrɨrako bandʉ bangɨ naye mwithwa. N'aboshi bo bamʉkwamaga mobasanzabanibwa. 38 Aho enyɨbabwɨra, mʉthatsomanagabo, mulikebo bagende. Kʉshangwa ebyo abathegekania kʉtse ebyo abakola byamabya nɨ by'abandʉ nɨbyayɨhwera. 39 Hewethuwe byamabya nɨ bya Gongo muthangakotsya ibihyabyo. Mʉthangandabya nga kʉno omushondya ɨlwa na Gongo!»

Aboshi mobɨmɨra ebɨnwa bya Ngamalieri. 40 Mobashʉba bɨrɨkɨra abathʉmwa, mobahamʉla bahirweko mbasha na mobahangɨrabo bathɨ bathanalinda bashʉba negena kw'ɨtsɨna lya Yesʉ Kirisito. Honyuma kw'aho mobamɨnʉlabo. 41 Abathʉmwa mobathoka mo Bʉshenge Bʉkʉlʉ nibamogire kʉtsɨbʉ, kʉshangwa nɨbamaganzwa ko batholere ɨgalwa bʉshana n'erɨtsɨna lya Yesʉ Kirisito. 42 Ko bɨro byoshi, mobathalika erɨgenda abakangɨrɨtsya mo Nyʉmba ya Gongo n'omo bʉlɨ nyʉmba erɨfʉla eNgʉlʉ Mbʉya ya Yesʉ Kirisito.