1 «Imwe bo thatha na bagala bethʉ, mʉhʉlɨkɨrɨtsye kʉbʉya ebyo enyishondya ɨyɨthondera bɨno embere senyu!» 2 Babere bonvwa ko Polo anegena nabo mo mʉnegene wabo w'ekɨebʉranɨa, mobahʉmana. Nɨmo Polo anegena athɨ: 3 «Ingye nyɨrɨ Muyuta, mbʉthɨrwa w'omo muyi w'ɨTarɨso mo kɨhʉgo k'iKilikia. Hewethuwe nɨ mo muyi w'ɨYerʉsalemʉ ono wo nyakʉlɨragamo, na nyabyaga mwɨga wa Ngamalieri. Na nɨ Ngamalieri oyo yo wanyɨkangɨrɨtsaya kʉbʉya-kʉbʉya oMʉgomba wa bo thatha-kʉlʉ nga ko anegenire. Na kuthyo nyabyaga na muhwa mʉngɨ ko bɨnwa bya Gongo nga ko imwe boshi mufwirewo munobwire. 4 Na kandɨ nyagenda enyinubya kʉtsɨbʉ abandʉ bo bagenda abakwama eNzɨra ya Nyinya-kowethʉ ihika ko kɨka k'ɨthɨsabo. Na nyagenda enyɨmɨna abayira n'abakatsɨ n'ɨgʉshabo mo biriso. 5 Omuheri mʉkʉlʉ hagʉma n'ekɨkembe kyoshi ky'abangʉmwa b'oBʉshenge Bʉkʉlʉ nabo bangana babwɨra ko ebyo nyɨnegena ebi nɨ bya kwenene. N'ɨbo bo bagenda abanyɨha amarʉba w'ɨthwalɨra bagala bethʉ Bayuta b'omo muyi w'iTamasiki. Nyagenda enyɨya eyo kʉshangwa nyɨmɨne abɨkɨrɨtsya n'ɨrethabo ɨYerʉsalemʉ eno kʉshangwa bahabwe malipisi.»

6 Polo mwashʉba negena athɨ: «Kɨro kɨgʉma nyabyaga mo nzɨra hofɨ n'omuyi w'iTamasiki. Aho n'aho, hofɨ kathi ka mwɨshɨ, kyakakala kɨnene kyo kyathokaga mo lʉbʉla mokyakoletsya aho nyabyaga. 7 Monyawa ahishi na monyonvwa mʉlenge nɨanyɨbwɨra athɨ: "Sauli, Sauli, bʉshana na ki unyinubya?" 8 Monyashubya nyɨthɨ: "Ʉlɨ ndɨ no Nyinya-kowethʉ?" Omʉlenge mwashubya athɨ: "Ni ingye Yesʉ w'iNasareti ngyo unubya." 9 Balikyethu bo thwabyaga nabo, mobashʉnga ekyakakala ekyo, hewethuwe mobathonvwa omʉlenge w'oyo wagenda anegena na ngye. 10 Aho monyashʉba bʉtsya nyɨthɨ: "Nyinya-kowethʉ, aho nyɨyɨre nyɨthɨ?" Na Nyinya-kowethʉ athɨ: "Wimana, ʉgende mo muyi w'iTamasiki, oko bakʉbwɨra ebyoshi wahamʉlwa ɨkola." 11 Ko ndambi eyo nyabyaga ninyithakilolire kʉshangwa obʉkalwe bw'ekyakakala ekyo bwabyaga nɨbwamamala ɨnyɨtsɨba amesho. Aho abalikyethu mobanyɨtsɨmbɨra ko kʉboko, n'ɨnyɨshondola ihika mo muyi w'iTamasiki.

12 «Mo muyi oyo, mwabyaga muyira mʉgʉma nɨ yo Ananɨa. Ananɨa oyo abyaga niashikitsye Gongo n'ishikya oMʉgomba ethʉ. Kuthyo abyaga niawithe mɨbere mɨbʉya mo Bayuta boshi b'omo muyi oyo. 13 Ananɨa mwahika, mwimana hofɨ nangye n'ɨnyɨbwɨra athɨ: "Mʉgala ethʉ Sauli, shʉba lola." Aho n'aho monyashʉba lola na monyamʉshʉnga. 14 Mwashʉba nyɨbwɨra athɨ: "Gongo wa bo thatha-kʉlʉ amakʉshombola bʉshana ʉmɨnye erishondya lɨwe, na ʉyɨlolere ko Mʉthʉnganene, na ʉyonvwɨre omʉlenge ʉwe. 15 Kʉshangwa ebyo wamayɨshʉngɨra n'ɨyonvwɨra, wandabya mutimo wabyo embere s'abandʉ boshi. 16 Ewono ukinalindire ki? Wimana no, ubatisibwe na ʉganyɨrwe ebɨtsɨbʉ byawe, mw'ɨbɨrɨkɨra erɨtsɨna lya Nyinya-kowethʉ."»

17 Aho Polo mwashʉba negena kandɨ athɨ: «Honyuma w'ebyo, monyashʉba ɨYerʉsalemʉ. Nyabere nyɨrɨ enyɨshaba mo Nyʉmba ya Gongo, monyashʉnga humanani. 18 Mo humanani eyo, monyashʉnga Nyinya-kowethʉ nɨanyɨbwɨra athɨ: "Ʉthoke mo muyi w'ɨYerʉsalemʉ ono mo tsʉba, kʉshangwa ebɨnwa byo wagenda ʉnegena bʉshana nangye, abandʉ bamo bathɨkɨrɨtsyebyo." 19 Nangye monyashubya nyɨthɨ: "Nyinya-kowethʉ, abandʉ aba betsi kʉbʉya ko n'ingye nyagenda enyɨtsʉka-tsʉka mo sosinakoki n'ɨgenda enyɨgʉsha abɨkɨrɨtsya mo biriso n'ihumbabo. 20 Na mo ndambi bithaga Sɨtɨfano, yo wabyaga mutimo awe, nangye ngyo wene nyabyaga aho. Monyɨmɨrana na bo bamwithaga. Na bo bamwithaga abo, n'ingye ngyo nyagendaga enyitheya esongɨmba sabo." 21 Hewethuwe Nyinya-kowethʉ mwanyɨbwɨra athɨ: "Genda, kʉshangwa nyandakʉthʉma hale, ko bandʉ b'ebɨhanda!"»

22 Abandʉ mobahʉlɨkɨrɨtsya Polo yo kʉbʉya. Hewethuwe abere anegena ekɨnwa eky'enduli ekyo, mobathanga ɨhambala bathɨ: «Omʉndʉ oyo ithwe, kʉshangwa athatholere ibyaho!» 23 Mobahambala kʉtsɨbʉ, n'ɨgʉshanga esongɨmba sabo mo kyanya, nɨ bane mugulukya oluthuthu.* 24 Aho omʉkʉlʉ kʉtsɨbʉ w'abashirikani mwahamʉla abashirikani bʉwe athɨ bɨngɨtsye Polo mo rʉba lwabo. Mwahamʉla bahumbe Polo yo mbasha bʉshana amɨnye ng'abandʉ abahambala bathyo kw'ɨye bʉshana na ki. 25 Hewethuwe mo ndambi abashirikani abo babere bamamala ɨmʉmɨna mʉ miriki bʉshana bamuhireko mbasha, Polo mwabʉtsya mʉgʉma w'oko bakʉlʉ babo yo wabyaga aho athɨ: «Mʉnyɨbwɨre, munahamulirwe ihumba Mʉroma* yo mbasha alɨ athetsi asohwa?»

26 Omʉkʉlʉ oyo abere onvwa ebɨnwa ebyo, mwayabwɨra omʉkʉlʉ kʉtsɨbʉ athɨ: «Mʉkengwa, uthabya nioushondya ɨkola ki? Omuyira oyu kwenzi naye nɨ Mʉroma!» 27 Omʉkʉlʉ kʉtsɨbʉ oyo abere onvwa ebyo, mwaya bʉtsya Polo athɨ: «Nyɨbwɨre kwenene nga ʉlɨ Mʉroma.» Polo mwashubya athɨ: «Ega, ingye nyɨrɨ Mʉroma!» 28 Omʉkʉlʉ oyo mwamʉbwɨra athɨ: «Ingye monyahana faranga nyɨngɨ bʉshana nyibye Mʉroma.» Polo mwashubya athɨ: «Ingye nyɨrɨ Mʉroma wa mbʉthɨrwa.» 29 Kona kathambi ako, abo babyaga niabashondya ɨthondesa Polo mobamulika. Omʉkʉlʉ kʉtsɨbʉ w'abashirikani oyo, naye abere amɨnya ko yo athamɨna ko nɨ Mʉroma, mwʉbaha.

30 Bwabere bwakya, omʉkʉlʉ kʉtsɨbʉ w'abashirikani mwashondya amɨnye kundu-kundu nga nɨ ki kyo aBayuta abasitakira Polo. Bʉshana n'ekyo mwamʉmɨnʉla, mwahamʉla abakʉlʉ b'abaheri n'oBʉshenge Bʉkʉlʉ boshi bw'aBayuta bahindane. Ko nduli mwaletha Polo n'imwimania embere sabo.