1 Mo bɨro ebyo emɨganzo y'abɨga moyagenda eyɨlʉga. Mokwabya ɨrʉkʉma mo kathi k'abɨkɨrɨtsya bo bagenda abanegena ekikiriki na bo bagenda abanegena ekɨebʉranɨa, kʉshangwa abo bagenda abanegena ekikiriki mobatsɨbʉka bathɨ abashʉmbakatsɨ babo mobathagenda abagabɨrwa ng'abandɨ ko bʉlɨ kɨro. 2 Abathʉmwa ikumi n'ababɨrɨ mobahindania abandɨ bɨga boshi n'ɨbwɨrabo bathɨ: «Bɨthatholere kw'ithwe thulike ɨkangɨrɨtsya eKɨnwa kya Gongo, bʉshana n'ɨgenda othʉgaba akalyo. 3 Bʉshana n'ekyo, bagala bethʉ, mʉshombole bandʉ balɨnda mw'imwe bandʉ bayire ngʉlʉ mbʉya, bo botswiremo oMʉthɨma Mwerʉ, n'abo bwenge, kʉshangwa thʉhebo omʉlɨmo oyu. 4 He ithwe thwagenda othʉshaba n'erɨfʉla eKɨnwa kya Gongo.» 5 Ekɨnwa eki mokyamoya omuhindano woshi. Aho mobashombola Sɨtɨfano, mʉndʉ yo wabyaga otswiremo olwɨkɨrɨtsyo n'oMʉthɨma Mwerʉ, na Filipo na Porokoro na Nikanora na Timoni na Parɨmena na Nikola w'iAntiokia, yo wabɨndʉkɨraga mo kɨsomo ky'aBayuta. 6 Mobakangyabo embere s'abathʉmwa, nabo mobashabɨrabo n'ihira kʉbo kw'eminwe.

7 Aho eKɨnwa kya Gongo kyagenda ekɨkanya n'emɨganzo y'abɨga yagenda eyɨlʉga kʉtsɨbʉ mo muyi w'ɨYerʉsalemʉ, na baheri bangɨ mobɨkɨrɨtsya.

8 Na ye Sɨtɨfano anotswiremo olʉkogo lwa Gongo n'akagala, agenda akola bɨthɨko-thɨko na bɨmɨnyɨkalo bɨngɨ mo kathi-kathi k'abandʉ. 9 Hewethuwe bandʉ bagʉma mobakubisania na Sɨtɨfano. Abandʉ abo babyaga b'omo sinakoki yo yagenda eyahʉlwamo: «Bandʉ b'oBwiranda» babyaga b'omo miyi y'iKurene n'iAlesanduria na b'omo kɨhʉgo k'iKilikia na ky'iAsia. 10 Hewethuwe mobathakotsya ɨmʉsɨnda kʉshangwa agenda anegena n'obwenge ahabawa n'oMʉthɨma Mwerʉ. 11 Aho mobaha bandʉ bagʉma bo kituliro bʉshana bayanegene bathɨ: «Mothwonvwa omʉndʉ oyu niahangya Mʉsa na Gongo!» 12 Mobakaramya abandʉ n'abangʉmwa n'abakangɨrɨtsya b'oMʉgomba mobayihuma kw'ɨye n'ɨmʉtsɨmba n'ɨmʉthwala embere s'oBʉshenge Bʉkʉlʉ. 13 Mobaletha abatimo b'amabesɨ bo banegenaga bathɨ: «Omʉndʉ oyu athathangire alika ɨhatsya ko Nyʉmba ya Gongo na ko Mʉgomba wa Mʉsa. 14 Kʉshangwa mothʉmwonvwa nɨanegena athɨ Yesʉ w'iNasareti ashambʉla eNyʉmba ya Gongo n'ɨbɨndʉla emɨbere ethʉ thwahabawa na Mʉsa.» 15 Aboshi bo babyaga bikere mo Bʉshenge Bʉkʉlʉ mobahanda kʉ Sɨtɨfano kw'amesho, na mobashʉnga obʉsʉ bʉwe nɨbwamashosha nga bwa malaɨka.