1 Obʉrʉnga bwabere bwahwa mo muyi w'ɨEfeso, Polo mwahindania abɨga n'ishikyabo mʉthɨma. Honyuma kw'aho mwalagabo, na mwagenda mo kɨhʉgo ky'iMaketonia. 2 Mwatsʉka mo kɨhʉgo ekyo nɨanemʉbwɨra abɨga bo bɨnwa bɨngɨ b'ishikyabo mʉthɨma. Honyuma kw'aho mwaya mo kɨhʉgo ky'iBukiriki, 3 eyo mwamalayo myetsɨ ishathu. Abere ashondya ɨshabʉkɨra mo kɨhʉgo ky'iSuria mʉ bwatho, mwamɨnya ko aBayuta abamʉyɨra nama. Aho, mwahamʉla ɨshʉbʉla atsʉkɨre mo kɨhʉgo ky'iMaketonia. 4 Bano bo bandʉ bo bamʉherekeretsaya: Sopateri mʉgala wa Piro w'omo muyi w'ɨBeroya, na Sɨtarɨko na Sekundo w'omo muyi w'iTesalonika, na Kayo w'omo muyi w'ɨTerebe, na Timote na Tikiko na Torofimo b'omo kɨhʉgo ky'iAsia. 5 Abandʉ abo, mobathʉthanga embere mo muyi w'ɨTʉroa bʉshana bathʉlɨndɨrɨreyo. 6 Ekɨro ky'emikati ɨthemo tsatsʉ kyabere kyatsʉka, ithwe mothwatsɨmba bwatho, na mothwathoka mo muyi w'iFilipi. Thwabere thwamamala bɨro bɨthano mo lʉgendo olo, mothweya balikyethu mo muyi w'ɨTʉroa. Mo muyi oyo, mothwamalamo yenga ngʉma.

7 Ekɨro ky'eyenga kyabere kyahika, mothwahindana mw'ɨshangɨra omukati. Aho kʉshangwa Polo abyaga niangalamukire mungya, mwathanga ɨkangɨrɨtsya abandʉ eKɨnwa kya Gongo ihika mo kathi ka kɨro. 8 Mo kɨshenge ky'engorofa thwabyaga thuhindaniremo, mwabyaga nɨ munokire bɨmole bɨngɨ.

9 Ko lirisa ly'ekɨshenge ekyo, kwabyaga nikwikere mʉsole mʉgʉma erɨtsɨna lɨwe nɨ yo Eutiko. Polo abere anemʉkagɨrɨtsya abandʉ bo ndambi nyɨre, Eutiko oyo mwathanga ithinga. Abere amayatho kʉtsɨbʉ mwathogera ahishi, nɨathoka ko ngorofa ya kashathʉ y'enyʉmba eyo. Abandʉ mobathɨbɨtha ɨya mwimania, he mobamweya nɨamamala ɨfwa. 10 Polo mwakima, mwunama n'ɨmʉtsɨmba mo minwe yɨwe. Honyuma kw'aho mwabwɨra abandʉ athɨ: «Mʉthaganga-gangaya emɨthɨma, akɨnalɨho!» 11 Honyuma w'ebyo, Polo mwashʉba ɨrʉkɨra mo kɨshenge ekyo, mwashʉbatsa omukati n'iryawo. Kandɨ mwashʉba kangɨrɨtsyabo ndambi nyɨre ihika mo mambya. Ko nduli mwagenda. 12 Abɨkɨrɨtsya mobaherekeretsya omʉsole oyo nɨahera mʉkangwe. Emɨthɨma yabo moyashika.

13 Ithwe mothwatsʉka embere mʉ bwatho n'ɨya mo muyi w'iAsosi. Mo muyi oyo mothwangathwere Polo nga ko ahamʉlaga, kʉshangwa ɨye abyaga niashondya ɨgenda mo bɨshando. 14 Abere athweya iAsosi, mwɨngɨra mo bwatho, na mothwashabʉkɨra naye mo muyi w'iMitilena. 15 Bwabere bwakya mothwathoka iMitilena mo bwatho, na mothwashabʉkɨra hofɨ n'ekɨtsɨra ky'iKio. Kyabere kyabya ekɨro kya kashathʉ, mothwashabʉkɨra ko kɨtsɨra ky'iSamosi. Honyuma kw'aho mo kɨro kya kane, mothwashabʉkɨra mo muyi w'iMileto. 16 Polo abyaga nɨamahamʉla athɨ bathimanaga ɨEfeso, kʉshangwa athatsukaya endambi mo kɨhʉgo ky'iAsia. Abyaga nɨayɨhʉtha ahike ɨYerʉsalemʉ embere y'ekɨro ky'ePentekosite, byamathokekana.

17 Polo abere akɨnalɨ iMileto, mwabɨrɨkɨra abangʉmwa b'ekanisa k'ɨEfeso. 18 Babere bahika aho abyaga, mwabwɨrabo athɨ: «Imwe bene mwetsi nga ko mɨbere aye yabyaga ko ndambi soshi nyabyaga hagʉma nemwe, ɨthanga ekɨro kɨmbere nyahikiragamo mo kɨhʉgo kɨno ky'iAsia. 19 Monyakolera Nyinya-kowethʉ mo bʉlonvʉ boshi, na mo mishonia n'omwɨrengwako nyabonaga bʉshana n'esonama aBayuta bagenda abanyɨkolera. 20 Na kandɨ mwetsi, kʉlɨ kwabyaga kɨnwa kyo kyabyaga na ndundi kw'imwe, monyithanalinda nyababishakyo. Hewethuwe nyagendaga enyɨbafʉlɨra eNgʉlʉ Mbʉya n'ɨbakangɨrɨtsya ebyoshi embere s'abandʉ na mo manyʉmba enyu. 21 Nyabyaga nɨenyɨbwɨra aBayuta n'aBakiriki nyɨthɨ batholere nɨbabɨndʉkɨra Gongo n'ɨthoka mo bɨtsɨbʉ byabo na bɨkɨrɨtsye Nyinya-kowethʉ Yesʉ.

22 «Ewo ingye ono, oMʉthɨma Mwerʉ anyɨhathɨka athɨ nyɨtholere ɨya ɨYerʉsalemʉ. N'eyo Nyithetsi ebyo byanyihikira.» 23 Hewethuwe ekyo nyetsi, ko mo bʉlɨ muyi nyatsʉkagamo oMʉthɨma Mwerʉ mwanyikangya ko erɨmɨnwa n'erɨagalwa byo binyirindire. 24 Hewethuwe nyithaganzire obʉyɨngo bwaye nga kɨndʉ kya ndundi nene kw'ingye. Ekyo enyishondya n'ihikya omʉlɨmo aye ko nduli n'ɨmala omʉlɨmo Nyinya-kowethʉ Yesʉ anyɨhaga. N'omʉlɨmo oyo nɨ erɨfʉla eNgʉlʉ Mbʉya y'olʉkogo lwa Gongo.

25 «Nyagendaga enyithimba mo kathi kenyu ɨyafʉlɨra abandʉ bw'eNgʉlʉ Mbʉya y'oBwamɨ bwa Gongo. Hewethuwe lɨno mwonvwe, ɨthanga lɨno ingye nyetsi ko hathalɨ mʉgʉma wa mw'imwe yo wandashʉba nyɨshʉngako. 26 Bʉshana n'ekyo, enyɨbabwɨra munobwire nyɨthɨ mwamahera omʉsasɨ enyu alɨ ko mithwe enyu. 27 Enyɨnegena nyithyo kʉshangwa ebɨnwa byoshi by'erishondya lya Gongo, monyababwirebyo buthababisha kɨndʉ. 28 Aho lɨno mʉgende omuyitheya kʉbʉya, na mutheye ekihyo kyoshi ky'abɨkɨrɨtsya ekyo oMʉthɨma Mwerʉ abayɨragamo balishya. Mutheye akanisa ko Gongo ashabʉlaga mw'ɨtsʉkɨra mo mʉsasɨ wa mʉgala. 29 Nyetsi ko enyuma w'erɨgenda lyaye, nyambwe nzɨbʉ sandɨngɨra mo kathi kenyu, na sɨthɨndashashɨre ekihyo ekyo. 30 Na mo kathi kenyu namo mwandahʉlʉka bandʉ bandagenda abanegena bɨnwa bya mabesɨ, bʉshana bayɨkʉrɨreko abɨga na bakwamebo. 31 Bʉshana n'ekyo, muyitheye kʉbʉya na mw'ɨbʉke ko mʉ mɨaka ishathu, kɨro na mwɨshɨ, monyɨthalemerwa ɨhana bʉlɨ mʉgʉma mw'imwe mo mishonia.

32 «Na lɨno, enyibahira mo minwe ya Gongo, na mo kɨnwa kɨwe ky'olʉkogo kɨgende ekibatheya. Kʉshangwa nɨ ekɨnwa ekyo kyo kiwithe amaka w'ibawathikya bʉshana n'ɨkʉla mo lwɨkɨrɨtsyo, n'ɨbaha omwandʉ wo abikire abandʉ bʉwe boshi babuyirire. 33 Monyithayitsutsa faranga, kʉtse horo, kʉtse ngɨmba sa mʉndʉ. 34 Kuthyo imwe bene mwetsi ko ni mo minwe aye eno monyagendaga enyɨkola bʉshana n'emɨlago aye n'eya balikyethu bo babyaga hagʉma nangye. 35 Mo byoshi ebyo, nyagendaga enyibakangya ko lɨtholere nɨthwagenda othʉkola kʉtsɨbʉ bʉshana thʉbone ekyangawathikya abathayikotsitsye. Mʉgende omwɨbʉka ko Nyinya-kowethʉ Yesʉ mwanegena athɨ: "Yo ʉhana yo ʉnagashanɨrwa kʉlenga yo ʉhabwa."»

36 Polo abere amamala ɨnegena ebɨnwa ebyo, mwafʉkama hagʉma n'aboshi na mwashaba Gongo. 37 Abandʉ boshi mobathanga ɨyɨgʉsha mo minwe yɨwe, n'ɨmʉfʉmbatha nɨabalɨra kʉtsɨbʉ. 38 Babyaga n'obuliye kʉshangwa Polo mwabwɨrabo athɨ bathɨndashʉbe mʉloleko. Honyuma kw'aho mobamʉherekeretsya ihika ahalɨ obwatho.