1 Yesʉ mwathoka mo Nyʉmba ya Gongo. Abere anemʉgenda, abɨga bʉwe mobayɨfʉnda hofɨ naye bʉshana bamukangye emihimbire y'eNyʉmba ya Gongo. 2 Aho Yesʉ mwanegena n'ɨbwɨrabo athɨ: «Mʉnatsene ko byoshi ebi? Kwenene enyɨbabwɨra, hano hathindashibe kiro n'ibwe elʉgʉlʉ wa lɨndɨ, awoshi andabɨndʉlwa.»

3 Yesʉ abere anikere ko kɨthwa ky'eMiseituni, abɨga bʉwe mobayɨfʉnda hofɨ naye emʉsɨke n'ɨmʉbʉtsya bathɨ: «Thʉbwɨre ebyo nga byandabya kɨro ki, na kɨhe kyo kɨmɨnyɨkalo kyandathukangya endambi wandahika na ky'enduli y'ekɨhʉgo.»

4 Yesʉ mwashʉbɨtsyabo athɨ: «Mʉmɨnyage, mʉndʉ athabathɨmaga. 5 Kʉshangwa bandʉ bangɨ bandahika mw'ɨtsɨna lyaye nɨabanegena bathɨ: "Ingye ngyo Kirisito!" Na bandahetsya bandʉ bangɨ.» 6 Mwand'onvwa mwatsɨ w'ebita na hwehweri ya bita. Mubye mesho mʉthʉbahaga, lɨtholere ebyo nɨ byabya, hewethuwe naki ɨthalɨ mɨhwere y'ekɨhʉgo kɨno. 7 Kʉshangwa ekɨhanda kyandalwa n'ekɨndɨ, na bwamɨ bwandalwa na bʉndɨ. Kwandabya nzala na thulingiti handʉ hangɨ-hangɨ. 8 Ebyoshi ebyo byandabya nga bwagali bwa mʉkatsɨ akʉnda.

9 «Aho, abandʉ bandabanubya na bandabwitha. Ebɨhanda byoshi byandababaga bʉshana n'erɨtsɨna lyaye. 10 Aho, bandʉ bangɨ bandathɨnda olwɨkɨrɨtsyo lwabo. Bandahotherana ɨbo kw'ɨbo na bandabagana ɨbo kw'ɨbo. 11 Bamɨnyeretsɨ bangɨ ba mabesɨ bandahʉlʉka na bandathɨma bandʉ bangɨ. 12 Bʉshana n'erɨongerera ly'ebɨbɨ, lwanzo lwa bandʉ bangɨ lwandaholoka. 13 Hewethuwe yo wandatsitsinia ihika ko nduli andashabʉlwa. 14 eNgʉlʉ Mbʉya y'oBwamɨ bwa Gongo, yandafʉlwa mo kɨhʉgo kyoshi bʉshana ibye butimo ko bandʉ boshi b'ebɨhanda. Honyuma kw'aho enduli y'ekɨhʉgo yandahika.»

15 «Mwandabya mwashʉnga ko yo ʉnahʉlwamo "Mubihya" yo mʉmɨnyeretsɨ Ndanieli ahʉlaga, andabya imana ahandʉ habuyirire yo ʉsoma ebɨnwa bɨno amɨnyebyo kʉbʉya! 16 Aho, bo bandabya iYuteya bagende bashayɨre ko bɨthwa. 17 Yo wandeyibwa ko lʉthwe lw'enyʉmba athandakima bʉshana ayaheke ebɨndʉ bɨrɨ omwe.* 18 Na yo wandeyibwa mw'ɨshwa athandafʉlʉka bʉshana ayaheke ekoti yɨwe. 19 Bwandabya bʉhanya mo bɨro ebyo ko bakatsɨ bakʉle na kw'abo bandabya niabongya! 20 Mʉshabe Gongo bʉshana mʉthandashaga mo bɨro by'embeho kʉtse ekɨro ky'eSabato! 21 Kʉshangwa mo bɨro ebyo, amalɨgo andabya mangɨ kʉlenga amalɨgo woshi amalire ibya hano ishi ɨthoka ko ndangɨro y'ekɨhʉgo ihika munobwire, na kuthindashubabye bʉndɨ bʉlɨgo bʉlɨ buthyo.* 22 Ebɨro bya malɨgo ebyo bɨrɨ bithakehibawa, hathangabere n'omʉndʉ n'omʉgʉma yo wangashabwirwe. Hewethuwe bʉshana n'abashombolawa, ebɨro ebyo byandakehibwa.

23 «Aho, mʉndʉ amababwira athɨ: "Mʉlole, Kirisito alɨ hano!" kʉtse: "Alɨ hala!" Mʉthamwɨkɨrɨtsyaga. 24 Kʉshangwa bo kirisito b'amabesɨ na bamɨnyeretsɨ b'amabesɨ bandahʉlʉka. Nabo bandakola bɨthɨko-thɨko, na bɨndɨ b'ishwekya ihika ko kɨka, bɨrɨ byangathokekana, bahetsye abandʉ Gongo ashombolaga. 25 Mʉhʉlɨkɨrɨtsye! Nyamababwɨra ebyoshi byo embere.»

26 «Aho bandʉ bamababwɨra mbʉ: "Mʉlole! alɨ mo mbwarara," nɨmʉthayagayo. Kʉtse bamababwɨra mbʉ: "Mʉlole, abishamire mo kɨshenge," nɨmʉthɨkɨrɨtsya. 27 Kʉshangwa ng'omulabyo kw'anakoletsya ɨthoka ebʉbʉkɨra ɨtsʉba ihika ebʉlengera ɨtsʉba, ni bathyo ko Mʉgala w'oMʉndʉ andahika. 28 Ahoshi ahalɨ ekinda, ho amahʉngʉ anahindana.»

29 «Honyuma w'amalɨgo w'ebɨro ebyo,

erɨtsʉba lyandabyamo mwitsimya, omʉgenda athɨndashʉbe ɨkoletsya,

esongununu sandathoga ɨthoka mo kyanya

n'ebyoshi by'amaka mo kyanya byandathenganibwa.*

30 «Aho, ekɨmɨnyɨkalo ky'oMʉgala w'oMʉndʉ kyandahʉlʉka mo kyanya. Aho, abandʉ boshi ba hano ishi bandaganga-ganga, bandalola ko Mʉgala w'oMʉndʉ niahika ko bɨfʉ by'omo kyanya hagʉma na maka mangɨ na lʉkengerwa.* 31 Ekɨroro kɨnene kyandahambala, andathʉma abamalaɨka bʉwe ko mbande ine s'olʉbʉla bʉshana bashongye abo ashombolaga, ɨthoka mo kɨhʉgo kyoshi.*»

32 «Mwɨge ko mushinga w'omʉthɨ w'omutini. Ko mʉgʉlʉ emɨthahɨ y'omutini eyɨlasha n'ebɨthɨ bya kʉro ebɨlasha, omʉnamɨnya kw'omʉgʉlʉ w'ekyanda alɨ hofɨ. 33 Na kuthyo, nemwe mwandabya mwalola ko byoshi ebyo, nɨmwamɨnya k'oMʉgala w'oMʉndʉ alɨ hofɨ, na alɨ ho lukyo. 34 Kwenene enyɨbabwɨra, olʉgero lʉno lʉthɨndatsʉke embere ebyoshi bɨno bɨbererere. 35 Olʉbʉla n'ekɨhʉgo byandatsʉka, hewethuwe ebɨnwa byaye bɨthɨndatsʉke n'ahake.»

36 «Hewethuwe hathalɨ mʉndʉ yo wetsi ekɨro kʉtse endambi y'ebyo byandakoleka. Ibye abamalaɨka mo lʉbʉla, ibye Mʉgala wa Gongo * kuthyo athetsi, he Thatha mʉsha yo wetsi. 37 Nga ko byabyaga ko mʉgʉlʉ wa Noa, bithyo ko byandabya ekɨro oMʉgala w'oMʉndʉ andahika. 38 Kʉshangwa mo bɨro ebyo embere envʉla nyɨngɨ yɨwe, abandʉ bagenda abalya n'ɨshoma, bagenda abahikya n'ɨhana balɨ babo bahikibwe, ihika ko kɨro Noa ɨngɨraga mo bwatho.* 39 Abandʉ abo mobathamɨnya kɨndʉ ihika ko kɨro envʉla y'ekithi yawaga n'itsikya aboshi.* Kuthyo ko byandabya ekɨro oMʉgala w'oMʉndʉ andashʉbʉla. 40 Aho, bandʉ babɨrɨ bandabya mw'ɨshwa, mʉgʉma andathwalwa n'oʉndɨ andamikwa. 41 Bakatsɨ babɨrɨ bandabya niabashya ko lushyo, mʉgʉma andathwalwa n'oʉndɨ andamikwa.»

42 «Kwenzi muyitheye, kʉshangwa muthetsi ekɨro Nyinya-kowenyu andahika. 43 Mwetsi kʉbʉya ko omwenye enyʉmba angaminyire nga omwɨtsɨ ahika mo kɨro kʉ ndambi ehɨ, angatheyitsye na athangalikire omwɨtsɨ athobole omwe. 44 Bʉshana n'ekyo, nemwe kuthyo, muyithegekanie, kʉshangwa oMʉgala w'oMʉndʉ andahika ko ndambi muthetsi.»

45 «Ɨndɨ yo mukoli mwenge na w'iyinihirwa? Nɨ yo nyinya-kowabo ahaga omʉlɨmo w'imanira abandɨ bakoli n'ɨhabo akalyo kabo ko ndambi yɨtholere. 46 Agashanɨrwe omukoli yo nyinya-kowabo mw'ɨshʉbʉla lɨwe, andamweya nɨakola omʉlɨmo oyo. 47 Kwenene enyɨbabwɨra, nyinya-kowabo andamʉyɨramo mwimanitsi w'ebɨndʉ bɨwe byoshi. 48 Hewethuwe omukoli oyo amabya nɨ mʉndʉ mʉbɨ nɨayɨbwɨra mo mʉthɨma ʉwe athɨ: "Nyinya-kowethʉ amathɨndɨra ɨshʉbʉla, 49 na nɨathanga ihumba abakoli balikyabo, nialya n'ɨshoma hagʉma n'abakundirya, 50 aho, nyinya-kowabo omukoli oyo, andashʉbʉla mʉ kɨro athamulindire na kʉ ndambi athetsi. 51 Andamʉthɨbɨthako na andamʉkolera nga ko banakolera abayimbya. Eyo yandabya bɨrɨro n'ishya ameno."»