1 Mo bɨro ebyo, Herote yo wabyaga muthegeki w'ekɨhʉgo ky'iNgalilaya, mwonvwa engʉlʉ ya Yesʉ. 2 Aho mwabwɨra abakoli bʉwe athɨ: «Omʉlʉme oyu nɨ Yoani Mubatisya yo walubukire mo baholi! Ekyo kyo kɨreka niabya n'amaka w'erɨkola ebɨthɨko-thɨko.»

3 Herote abyaga nɨamahamʉla batsɨmbe Yoani, bamʉmɨne na bamʉgʉshe mo biriso bʉshana na Herotia mʉka Filipo mʉgalabo. 4 Yoani agendaga abwɨra Herote athɨ: «Bithahamulirwe kw'ɨwe ɨthola Herotia!» 5 Herote mwashondya itha Yoani, hewethuwe agendaga ʉbaha abandʉ kʉshangwa babyaga nɨbɨkɨrɨtsye ko Yoani nɨ mʉmɨnyeretsɨ. 6 Ko kɨro ky'erɨbʉka erɨbʉthwa lya Herote, mwalɨ wa Herotia mwatsɨna embere y'abo balalɨkawa, na mwamoya Herote. 7 Aho mwamʉlaga mw'ɨlahɨtsya kw'amʉha ebyoshi amʉshaba. 8 Omʉthasha oyo, bʉshana n'erikunwa na nyinya ʉwe Herotia, mwabwɨra Herote athɨ: «Nyɨhe hano ko mbale, omuthwe wa Yoani Mubatisya!» 9 Omwamɨ mwathabagana. He bʉshana n'erɨlahɨtsya lɨwe embere y'abo balalɨkawa, mwahamʉla athɨ bahe omʉthasha y'omuthwe wa Yoani. 10 Aho, mwathʉma mʉndʉ ayatse omuthwe wa Yoani Mubatisya mo muliki. 11 Mobaletha omuthwe ʉwe ko mbale n'ɨhawo omʉthasha oyo, naye mwathwalɨrawo nyinya. 12 Abɨga ba Yoani mobayenda ekinda kɨwe n'ɨyathakyo. Honyuma kw'aho mobayabwɨra Yesʉ y'omwatsɨ oyo.

13 Yesʉ abere onvwa omwatsɨ oyo, mwathoka aho mʉ bwatho n'ɨya aho hathalɨ bandʉ. Bandʉ bangɨ babere bonvwa bathyo, mobathoka mo miyi yabo n'ɨmʉkwama mʉ bɨshando. 14 Yesʉ abere athoka mo bwatho, mwashʉnga bandʉ bangɨ, mwafwɨrabo shashi na mwathanga ilamya abakoni babo. 15 Bwabere bwahika igolo, abɨga bʉwe mobayɨfʉnda hofɨ naye n'ɨmʉbwɨra bathɨ: «Aho thʉlɨ hano hathalɨ bandʉ n'endambi yamatsʉka, shʉbʉtsya abandʉ bagende mo miyi bʉshana bayayɨʉlɨre kalyo.» 16 Hewethuwe Yesʉ mwashʉbɨtsyabo athɨ: «Bathalayire kw'ɨyayo, imwe bene mʉhebo kalyo!» 17 Aho, mobamʉbwɨra bathɨ: «Thuwite hano ku mikati ithano mɨsha na mahere abɨrɨ.» 18 Yesʉ mwabwɨrabo athɨ: «Mʉnyɨretherebyo hano.» 19 Honyuma kw'aho, mwahamʉla abandʉ bikale ko bɨthɨ. Mwatsɨmba emikati ithano eyo n'amahere abɨrɨ, mwashʉmbɨra amesho w'elʉbʉla na mwasɨma Gongo. Mwatsitsanga emikati eyo, na mwaharo abɨga, nabo mobagabɨraro abandʉ. 20 Aboshi mobalya na mobugutha, abɨga mobakʉma-kʉma bɨthonga ikumi na bɨbɨrɨ by'ebɨtse-bɨtse byashakaga. 21 Abandʉ bo balyaga babyaga hofɨ bɨhʉmbɨ bɨthano, bʉthaganza abakatsɨ n'abana.

22 Honyuma w'ebyo, aho n'aho Yesʉ mwahamʉla abɨga bʉwe bɨrʉkɨre mo bwatho bʉshana bamʉthange ko ʉndɨ mwishirya w'engetsɨ, mo ndambi eyo ɨye mwashiba alɨalaga omuhindano. 23 Abere amamala ɨlaga omuhindano, mwɨrʉkɨra kʉ kɨthwa yowene bʉshana n'ɨya shaba. Mobwagoroba nɨanalɨyo yowene. 24 Obwatho bwabyaga nɨbwahera kʉ ma metere magana ɨthoka ko kɨthaka. N'emibimbi yagenda eyiyihumanga ko bwatho kʉshangwa ekɨhʉnga kyagenda ekɨhʉlʉkabo embere. 25 Bwabere bwabya mʉhʉho, Yesʉ mwahikira abɨga bʉwe nɨagenda elʉgʉlʉ w'engetsɨ. 26 Abɨga babere bamʉshʉnga alɨagenda elʉgʉlʉ w'engetsɨ, mobafwa bʉba n'ɨnegena bathɨ: «Eki nɨ kɨhɨndɨ!» Mobathanga ɨhambala bʉshana n'obʉba. 27 Hewethuwe, aho n'aho Yesʉ mwabwɨrabo athɨ: «Mushikye emɨthɨma, n'ingye, mʉthʉbahaga!» 28 Aho Petero mwamʉbwɨra athɨ: «Nyinya-kowethʉ, wamabya nɨ ɨwe, nyɨhamʉle nyihike eyo ʉlɨ nɨenyɨgendera ko metsi. 29 Yesʉ mwamʉbwɨra athɨ: "Hika!"»

Petero mwakima mo bwatho, mwagenda elʉgʉlʉ y'ametsi na mwaya eyɨrɨ Yesʉ. 30 Hewethuwe abere ashʉnga ko kɨhʉnga, mwafwa bʉba. Na mwathanga ɨthobera mo metsi, mwalaka athɨ: «Nyinya-kowethʉ nyɨshabʉle!» 31 Aho n'aho Yesʉ mwalambʉla okʉboko kʉwe, mwamʉtsɨmba, n'ɨmʉbwɨra athɨ: «Ɨwe mʉndʉ w'olwɨkɨrɨtsyo lʉke! Bʉshana na ki moʉthɨka-thɨka?» 32 Yesʉ na Petero babere bashambɨra mo bwatho, ekɨhʉnga mokyathulera. 33 Abo babyaga mo bwatho mobafʉkamɨra Yesʉ n'ɨnegena bathɨ: «Kwenene ʉlɨ Mʉgala wa Gongo!»

34 Babere bamamala ɨshabʉka engetsɨ, mobahika mo kɨhʉgo ky'iNgenesareti. 35 Abandʉ bayo mobamɨnyerera Yesʉ, na mobabwɨra abandʉ boshi b'omo kɨhʉgo ekyo, na mobamʉlethera abakoni boshi. 36 Mobamʉshaba bathɨ ahamʉlebo bakole ko pindo y'olʉkɨmba lʉwe. N'abakoni boshi bo bakolaga kʉro mobalama.